الحب رحمة تُرجى

الفصل الرابع

الفصل الرابع

___كل صباح خيبة أمل___

وقفت فى هذا المحل التجاري ،تمسك هذا البلوفر وتتأمله جيدا،إقتربت منها (منار)تمسك ببلوفر آخر أزرق اللون قائلة:
-إيه رأيك فى ده لمحسن؟!

طالعت(رحمة) البلوفر قائلة بإستحسان:
-حلو اوى بس هاتى المقاس الأكبر،النوع ده من القماش بيكش بعد أول غسلة.

تأملت(منار)البلوفر قائلة بأسف:
-تصدقى صح،ياخسارة مفيش منه مقاس كبير ،بس عاجبنى أوى هاخده ولما يكش أبقى ألبسه أنا.

ضحكت (رحمة)قائلة:
-إعادة تدوير يعنى..انتى ملكيش حل يامنار،جايبة البلوفر لجوزك وانتى عينك فيه.

شاركتها (منار)ضحكتها ثم قالت:
-اللى بيصمموا الملابس هما اللى غلطانين،منزلين تصاميم محايدة،متبقيش عارفة إذا كانوا حريمى ولا رجالى..فبينفعوا الاتنين.

مطت (رحمة)شفتيها قائلة:
-والله معاكى حق..

لتتأمل هذا البلوفر الذى تحمله قائلة:
-بس ده رجالى أكيد.

تأملته (منار)بإعجاب قائلة:
-حلو اوى،دايما بيعجبنى ذوقك.. والبلوفر هيعجب جلال كمان.

عقدت (رحمة)حاجبيها قائلة:
-بس أنا مش جايباه لجلال.

عقدت (منار)حاجبيها قائلة:
-أومال جايباه لمين؟

قالت(رحمة) بإستنكار:
-لخالد طبعا..انتى ناسية انى متجوزة؟!

قالت(منار)بإرتباك:
-لأ طبعا مش ناسية،بس يمكن عشان اللون ده يليق على جلال وميليقش على خالد أبدا بسبب بشرته السمرا، لكن جلال بشرته بيضا وبيليق عليه أي لون.

تأملت (رحمة)البلوفر مرة أخرى قبل أن تقول:
-معاكى حق،عموما كدة كدة هشتريه،جلال أوخالد مش هتفرق..الاتنين واحد بالنسبة لى.

قالت (منار) وهي تتجه لتحاسب مدير المحل:
-مش واحد على فكرة..عيدى حساباتك.

تبعتها (رحمة)قائلة بحيرة:
-تقصدى إيه بالكلام ده؟!

توقفت (منار ) وإستدارت تطالعها بهدوء قائلة:
-واحد جوزك والتانى زي أخوكى ،إزاي يبقوا واحد؟!

قالت(رحمة):
-الاتنين مكانتهم غالية أوى فى قلبى..تقريبا زي بعض..يبقوا واحد بالنسبة لى.

مالت (منار)تتطلع مباشرة إلى عينيها قائلة:
-مينفعش..لازم حد فيهم هيكون أغلى عندك من التانى،لنفترض مثلا إن فيه موقف حصل واضطريتى تختارى مابينهم..هتختارى مين؟خالد ولا جلال؟

لم يصدمها هذا السؤال قدر صدمتها من أنها لم تستطيع أن تجيبها مباشرة وتذكر لها إسما..
لاتستطيع إختيار احدهما وترجيح كفته على الآخر..
كلاهما أساسي..
لا تستطيع الإستغناء عن أي منهما..
بل لا تستطيع تخيل حياتها دونهما سويا..
قد تضحى بكل شيئ..
عداهما..
تتعجب من نفسها..
لما لم تستطيع بكل بساطة إختيار زوجها ؟هو يستحق بكل تأكيد مكانته كشخص قد تضحى بالعالم كله من أجله..
فبالنهاية هو زوجها..
ولكن كيف يحتل ( جلال)نفس المكانة حتى أنها لا تستطيع تفضيل شخص آخر عليه؟