الليلة الحمراء الموسم الثاني

الجزء الثامن عشر

#الجزء_الثامن_عشر (18) :
#الليلة_الحمراء

خلال لحظات بس كان هالمشهد وفجأة شافت اخوها طالع من بين الضباب والغبرة وهو حامل بنت صبية كلها دم
صرخ فيهن: وين الإسعاف
لما شافتو ارتاحت وبلشت تبكي بحضن حنين وهي بتتأملو بسعادة من بعيد

وبرا كان الوضع متوتر الشارع زحمة سيارات والشرطة وقفت كل الناس عن الحركة بعدما مات رئيس مجلس البلدية

حاولو نرجس وحنين يساعدو الجرحى ويهدو الخيفانين … ولما امنو ع وصول الإسعاف والشرطة وانو مهمتهن انتهت تركو كل شي وراهن وطلعو باتجاه الموقع يلي حطو فيه السيارة
وقفت نرجس لما صوت أخوها بيصرخ من بعيد: أنت وين رايحة

وقفت وبتردد لفت لتواجه
سألها: مين أنت ومنين بتعرفي اسمي
بلعت ريقها وهي بتقول: انا ولا شي انو ما بعرف … أنت شو بدك
قرب منها وقال: انا مستحيل انساكي أنت اجيتي لبيتنا بعد موت أبي
نرجس: أي اجيت لعزي لان جمال بيك افضالو كبيرة عليي
عنار: انت البنت يلي تبناها انا شفت صورتك بدفتر العيلة ومستحيل انسى شكلك ليش كل هالسنين ماعرفنا عليكي
رفعت كتافها وهي بتقول: ليش ما سالتو

صرخلو واحد من بعيد لف لعندو ورفعلو ايدو …ولما رجع لف ليحكي معها شاف رفيقتها ماسكتها من ايدها وسحبتها
حنين: بدك تفتحي حديث معو ونحنا بخطر بعد فشل المهمة يمكن جماعة نيرمين يعرفو انو انا وانت فشلنا عملية التنظيف … وغير هيك رام عم يستنانا
التفت لتشوفو كيف واقف مكانو وعيونو عليها وهي بتمشي لحتى بلشو يركضو ليوصلو لموقع سيارة المنظمة يلي فيها رام

ترك المكان واتوجه ليكمل ويساعد الجرحى!!

*****

دخلو حنين ونرجس ورام من الباب السري الخلفي للمنظمة
واستقبلون هيا وسندس وأيمن
كانو لسا لابسين تياب العاملات ومجهزين كذبة ليقولوها
قرب أيمن من حنين وهو بيتطمن عليها وعيون رام عليهن 
وهيا سألت نرجس: شو صار معكم نجحت المهمة
هزت رسها وهي بتقول: اي كلو تمام
قربت من حنين وهمست بأذنها: بعدي عنو بكفي تشلقي الناس هاي رام عرف بحبكم
التفتت لتشوف رام عم يتطلع عليهن اتوترت وقالت لأيمن: شكرا الك اخي
ملامح وجه أيمن صارت بالون الأبيض شاحبة من دون دم

مشي رام وهو بقول: امشو لنعطيها تقرير المهمة للمديرة
التفتت حنين لعند ايمن يلي كانت ملامحو جامدة …  عضت على شفايفها وهزتلو راسها ومشيت
بس نرجس قربت وهمست: هيك أفضل الكن لا تحطها بالخطر

دخلو لغرفة نيرمين يلي كانت ناطرتن وبقربها اثنين من رجالها وشهاب عند الباب برا
اتوترت نرجس وهي بتشوف شاشة الاخبار قدامها عم تحكي عن العملية التفجيرية يلي صارت من نص ساعة وعدنان كان قاعد على كرسيه بتابع معها الخبر ببسمة

لما دخلو وقف عدنان وسلم على نرجس وهو بقول: مبروك علينا تعيينك معنا
اتطلعت نيرمين بقرف ومشيت وقالت: بس المهمة ما اكتملت متل ما بدنا واضح انو الخطة اتغيرت
قرب رام وقال: أي صح بعدما قتلت نرجس الرجال طلعت صوت صفارات الإنذار واتطرينا نغير مجرى الخطة ونرجس وحنين راحو ليتأكدو من عملية النظيف بنفسهم
نيرمين: ومين يلي سرب خبر وجود القنبلة
رام: ما منعرف هاد الشي انتو يلي بدكن تعرفوه
هلق قالت نرجس: بس نحنا ما كان اتفقانا وجود قنبلة أنتو هيك قتلتو ناس بريئة