الليلة الحمراء الموسم الثاني

الجزء الرابع والعشرون

#الجزء_الرابع_والعشرون (24) :
#الليلة_الحمراء

الكل بالكوخ كان مستنفر بعد الخبر يلي شافوه على الشاشة قدامهم وصورة نرجس الواضحة كيف عم تهرب من اليخت وتركض برا الكورنيش
قال شب: شوفو نرجس يلي اجيتو كرمالا شو عملت … كنت مفكرها أذكى من هيك في حدا بيقتل الزعيم وبهيك ظرف الكمرات كلها سجلت يلي صار
وقف مراد وواجهو وهو بقول: هاد مديرك لعب عليها وجرّها لعندو وعمل عملتو
شب تاني قال: عدنان !! … وشو مصلحتو ليقتل الزعيم هاي نرجس على أساس بدها تخلصنا شوف كيف وقعت هيي هلق نحنا شو بدنا نعمل؟
مراد: ليك يا بتخرس يابتشوف شي ما شفتو أبداً بحياتك أنا ما ناقصك
قرب فريد ووقف بيناتن وهو بقول: ببوس أيديكن وقفو خناق يلي فينا مكفينا
كان فريد لسا حزنان على صاحبو وماعم يقدر يستوعب موتو هيك فجأة كانت عندو أحلام لحياة حلوة مع عيلة يكون هو عامودها بس للأسف الموت خطفو بسرعة وفريد ماقدر لسا يشلح توب الحزن أبدا
قال الصخرة: نحنا صرنا بخطر أكيد بعد يلي صار رح يعرفو موقعنا
شهاب: خطر لك قول مصيبة إذا ما لقتنا المنظمة رح تلاقينا الشرطة وننسجن كلنا
قال شب: أنا مستحيل أرجع لهداك المكان
ردت بنت: وأنا متلك ماعرفت كيف خلصت من زمن العبودية
قال شهاب: نحنا عبيد ومستحيل نقدر نعيش أحرار نحنا كلنا خلقنا بقفص وليكو هلق اجينا لقفص جديد … ويلي متعود ع السجن صعب يعيش بلا حدود ونحنا نهايتنا يا المقر يا السجن
وقفت بنت وواجهتو: نرجس وعدتنا تخلصنا من هالوضع
قال شب: وينها نرجس هلق ليكوها صارت مطلوبة لجريمة قتل واخرتها سجن وإعدام
وشب تاني قال: شفتي هاد يلي كنت عم قولو
صرخ مراد فيهم: خرسووووو لسا كل واحد عم يرمي كلام ع التاني بكفييي نرجس مادخلها بكل هاد فوق ماراحت للموت لتجبلكن دليل حريتكن وأنتو عم تنكرو جميلها
رجع قال الشب الاخير: نحنا ما نكرنا أبدا بس المشكلة انو يلي متلنا صعب ينجو من يلي فيه كتير ناس بدها راسنا وإذا عم تقول عدنان السبب بقتل الزعيم شوف مين طلع كبش الفدا
وقدامهم على الشاشة عم تنعاد لقطة نرجس وهي بتركض هربانة بنص الليل

تركهم وخبط الباب وطلع … وقف عند التلة وهو براقب الطبيعة قدام عيونو طالع جوال فريد يلي فيه جهاز تشويش ودق لنرجس للمرة العاشرة يمكن بهاليوم لحتى يتطمن عليها وأخيرا ردت
قال بسرعة: الو نرجس انا مراد عم حكيي من جوال فريد فيه جهاز تشويش ماتخافي
برقو عيونو وفرح لما سمع صوتها بتهمس: مراد لا عاد تتصل الله يوفقك
مراد: وينك نرجس قلبي داب عليكي
نرجس: لاتخاف عليي أنا بأمان حاليا
مراد: بدي شوفك خليني امن عليكي ونطلع برا البلد
نرجس: صعب كتير خلي كل شي يهدا وماعاد تصل
مراد: ليش عم تهربي مني ليييش
بلعت ريقها وكانت بدها تخبرو بحملها بس أكيد هي ما مجنونة لتخبرو هيك خبرية بهيك ظرف بلعت غصتها وقالتلو: لا تاكل همي أنا ربيت بأيدين مجرمين بعرف منيح كيف خلص حالي من هالمشكلة انت ما دخلك بشي شوف رام شو بقول لأن هو عندو خبرة بهالموضوع يلا سلام … بحبك
صرخ مرد قبل ما تسكر: نرجس نرجسسسس لا تسكري لاااا
بس هي كانت سكرت الخط ضرب صخرة بأجرو لحتى وجعتو قعد بالأرض وهو بمسدها وبيهمس: شو عملتي بحالك ياحبيبتي كرمال رفقاتك رح تخسري حالك