Ang Pag-ibig ng Isang Manunula(t): Koleksyon ng mga Akda

Kabanata 2

Hindi ko alam kung kailan ako nagsimulang mamulat sa konsepto ng pag-ibig at pagmamahal. Malinaw sa akin na hindi masaya ang pagsasama ng aking mga magulang. Lumaki ako na mulat sa bigat ng responsibilidad at hirap ng pag-aasawa. 

Akda 1: Ang Pag-ibig

Hindi ko batid ang kahulugan ng salitang pag-ibig

Hindi ko nauunawaan ng lubos ang masidhing damdaming tinutukoy nila
Sa murang edad, malabo ang konseptong ito

Mas nauna ko pang natutunan ang mga ingay ng lasenggo sa tapat ng bahay

Habang lumalaki, nahubog ng mga babasahin at palabas ang aking murang kaisipan
Ang pag-ibig ay masaya at makulay

Isa rin ako sa mga babae na nangarap makatagpo ng prinsipeng sasagip

Pinilit sa realidad ang piksyon mula sa iba't ibang porma ng media

Isang porma ng pagtakas sa realidad na kinamulatan

Sa pagdadalaga, namulat sa konsepto ng paghanga 

Mababaw at kulang sa karanasan ang puso

Kilig ang pangunahing nararamdaman
Sapat na ang malaman ang ngalan at masulyapan

Nariyan ang pagtanaw sa malayo sa tuwing maglalakad siya sa pasilyo
Sa oras ng kanilang uwian, pinipili rin magpaalam sa guro 

At dumating ang unang pagkadurog ng puso

Nalaman na may kasintahan ang tinatangi

Naging sa pantasya, puso ay tila nasawi

Sa ganap na pagiging dalaga, namulat sa pag-ibig na kakaiba

Tila ang nagtatakda ng sino, paano at ano ay ang ibang tao

Palaging iniisip ang iisipin kung tama ba sa paningin nila

Sa unang beses ay nagkaroon ng nobyo

Sa mga unang araw at buwan ay masaya, nakakakilig

'Di pansin ang anumang mali o hindi magandang gawi 

Bulag at alipin ng pag-ibig ang dilag

Sa kanyang isipan, siya ang mundo

Ang sagot sa mga hiling at dasal na idinaan na yata sa lahat ng santo

Ngunit, dumating ang mga dagok at unos

Nalunod sa karagatan ng kawalan,

Tila isang sanggol na walang lakas upang lumaban

Natutunan ko na ang sakit ay kalakip ng pag-ibig

Sa muling pag-ahon, tumungo sa isla 
Sa lugar kung saan maaaring puso't isip ay mamahinga

Patuloy pa rin ang pagtuklas sa pag-ibig

Batid na ito ay may iba't ibang anyo at kahulugan

Ngunit hindi maitatanggi na ito ay pwersang tunay na makapangyarihan