#مدحت_وسمر الجزء الاول
بعد يوم تعب بقى ما بين كليه وشغل من حقي ارتاح شويه، كان يوم صعب، الحمدلله ان بكره اجازه اعمل لقمه بقى، وافتح الفيس اقرا روايه ولا اقلب اشوف اخبار الدنيا ...اها نسيت اقولكم انا اسمي سمر بدرس طب اسنان، وبخلص الكليه وبطلع على الشغل، بحاول اخف الحمل عن اهلي شويه علي الأقل اجيب حاجه نفسي فيها، او اساعد بردوا بقرشين كتر خيرهم، فتلاقيني بنت بميت راجل، أسد في أي حاجه عندي عشرين سنه وشكلي مقبول خلصت مذاكرتي بقى، واكلت لقمه وعاوزة افضي دماغي شويه، وانا زي أي بنت على الفيس عرضه للتحرش من المتخلفين عقلياً ما بين، هاي ممكن نتعرف آل فاكر انه متربي كندا
ومابين ناس مرضى نفسين بس اللي حصل معايا دلوقت شيء غريب جدا لقيت رساله اخدني فضولي اني اقراها، لانها كانت كوميديه شويه من واحد الاكونت بتاعه اسمه مودي دودي، اسم غريب ممكن يكون حماده ابن اختي الاغرب نص الرساله
"انا مش عاوز ازعجك بس بجد انا عندي واوا وحاسس اني روحي بتطلع ومحتاج أتكلم مع حد معرفوش"
واوا ايه يا ربي الاشكال دي طب ده يترد عليه بأيه
كنت هاعمله بلوك بس قلت اتسلى شويه رديت عليه
"الف سلامه عليك يا ترى الواوا دي من ايه "
بدأ يكتب
Final destination
ده اسم فيلم اجنبي احداثه ان فيه أشخاص هتموت بالدور والتسلسل بعد ما ينجوا من حادثه كبيره
سكت شويه قبل ما أرد عليه
"وده ايه علاقته بالواوا بتاعتك معلش"
كتب
"ما هو السبب في حالتي انا قاعد اعيط وماما قلقانه عليا جدا بس انا قولتلها سبيني لوحدي ودخلت أتكلم معاكي "
"ربنا يخلي لك ماما وانت بقي اسمك ايه وعندك كام سنه علشان تخاف كده يا نانوس "
"اسمي مدحت وعندي ٢٥سنه وماما بتقولي يا مودي "
سمر: وكمان مدحت طيب ما انت شحط اهو خايف من حته فيلم ربنا يخلي لك ماما
مدحت : اصل انا حساس شويه واي حاجه بتتعب اعصابي
سمر : لا ما هو باين بقولك ايه اسأل ماما كده فيه لبن في التلاجه
مدحت:حاضر خليكي معايا اسالها .......اه بتقول فيه
سمر :طيب خليها تغليه بس متحطهوش في كوبايه
مدحت :اومال تحطه فين
سمر : في بيبيرونه وتديهالك تشربها بس أوعى يلسع لسانك يبقى واوا ولسوعه كتير عليك
مدحت : مش عارف يا سكر حاسس انك بتتريقي عليا وكده هازعل منك واخاصمك
سمر : انا اقدر بردوا يا مودي اخص عليك ده انت صغنن كده ومرهف الحس
مدحت : ميرسي يا سمر ممكن تديني رقمك ؟
سمر : هو من ناحيه هاديك فده اكيد بس مش رقمي
مدحت : اومال ايه ؟ ... انا عاوزه علشان نبقي أصحاب، ماما جابتلي عربيه ميني كوبر جديده
ونخرج نتفسح مع بعض انتي عندك عربيه ؟؟
سمر : لا عندي اتوبيس الصراحه
مدحت : بجد وبتعرفي تسوقيه ازاي ده كبير اووي انا أخاف بس ممكن اجي معاكي مره
سمر : لا هو مش بتاعي انا بركب فيه وبخلي بالي من نفسي لا انت مينفعش تركبه خالص هتنزل حامل انا متاكده ثم كفايه انك مدحت هيبقى من كله وليه سموك مدحت أساسا
مدحت : يوه دي حكايه اصل آنا ام ماما متجوزه واحد اسمه مدحت
سمر : لا ثواني هاجيب اللب والسوداني واجي ده انت سهره حلوه .... يعني نينا بتاعك بعد ما جدك مات اتجوزت مدحت وسمتك على اسمه صح كده
مدحت : ايوه برافو عليكي يا سمر انتي بتعملي ايه في حياتك ؟؟
سمر : بدرس طب اسنان وبشتغل هكون بعمل ايه وانت ؟
مدحت : ايه ده الاتنين بتدرسي وبتشتغلي كده تتعبي
لا انا مش بعمل حاجه قاعد مع ماما بتجبلي اللي انا عاوزه
سمر : اه انت مسلي بس كده الضغط هيعلى عليا
انت متاكد انك راجل يااااض انت
مدحت : بتكسف يا سمر اقولك سر
سمر : قول في ليلتك اللي مش هتعدي دي
مدحت : ماما عاوزه تجوزني بس مكسوف اووي
سمر : تجوزك راجل ؟؟؟
مدحت : راجل ايه هتجوزني بنت طبعا بس انا خايف ومتردد
سمر : ليك حق تخاف يبني والله لأنك لما تتجوز هتاخد بالجزمه ومش بعيد تطلقك كمان بلاش جواز حالتك ما تسمحش قول لماما لما اكبر شويه
مدحت : ما انا رديت وقلت كده لما ابقى مستعد وكمان مش متخيل اني اجيب بيبي ويقولي يا بابي
سمر : مين ده االي يجيب بيبي
مدحت : انا
سمر : تجيبه ازاي مستحيل طبعا مستحيل ايه ده من رابع المستحيلات ثم لو فرضا حصل هيقولك يا خالتو
ايه بابي دي ما تنشف شويه ياااااض
مدحت : ما انا كنت بروح الچيم بس مقدرتش اشيل حديد
وكانوا بيضحكوا عليا هناك قعدت في البيت ماما قالتلي هتتعب على الفاضي بس بلعب بلياردوا دلوقت
سمر : عارف يا مودى على لساني لفظ ابيح اووي
واحد ليك والتاني للست الولده اسمع انا هقفل دلوقت ولينا لقاء تاني اكيد انت ميتشبعش منك
مدحت : طيب ابعتلك ادد على الفيس بوك بليز
سمر : ابعت انت مفيش خوف منك يلا مع السلامه
مدحت : لا استني هو انتي بتشتغلي ايه ؟؟
سمر : بياعه في محل حلويات
مدحت : انا بموت في ال sweet
سمر : اللي زيك مياكلش سويت انت محتاجه لحاجه تانيه
مدحت : مش فاهم
سمر : سلام يا مدحت هبقى اقولك لما تكبر
يااااه كانت حته سهره انما ايه عنب اللوز ضحكت من قلبي ده انت هتبقى اشتغالتي يا مدحت بعد كده ان مخليتك راجل مبقاش سمر
