جحيم حبك

الفصل السـابع عشـر ✨

‏- إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا ❤

_

رحيـم بعـد ما خرج مـن عند سهـر .. كـان بـ يفكر في كلام مسك وخصوصاً لمـا قالت

"مـسك: انا مراتك!! طب أزاي هي أمك مش قالتلك أنهـا جات لحد بيتي وقالتلي أنك طلقتني غيـابي"

أزاي والدته تقول حاجة زي دي؟ حاجة محصلتش ولا يمكن تحصل؟

ماهما حصل بينـه وبين مـسك هو لا يمكن يخطر على باله انه ينفصل عنهـا. حبـه ليهـا أقوي من كده. وأن كان غلط مـره وأتسرع وسابهـا فـ دي غلطـة غيـر قابلة للتكرار.

أخيراً وصل لـ شقه والدته رن الجرس ودي اول مره يعملها لانـه في العادة بيفتح بـ المفتاح اللي معاه

ثواني وكانت "سميحـة" فاتحه الباب

سميحـة بـأستغراب: رحيم؟ أول مره ترن الجرس يعني؟ وكملت بـ سخريـة: ولا خلاص أتبريت مننا

رحيم دخل وسميحة قفلت الباب

رحيم: للأسف مقدرش اتبرى منكم لأنكم في الأخر من لحمي ودمي. انا بس جاي أسألك سؤال واحد

سميحـة بـ ملل: قول يابن بطني؟ خيـر

رحيـم: انتي صحيح قولتي لـ مـسك اني طلقتها غيابي؟

سميحـة ارتبكت ووشها جاب ألوان ومبقتش عارفة ترد تقول أيه؟ واكيد مش هـ تعرف تنكر. معنى ان رحيـم فاتحها في الموضوع يبقى هو على معرفة سابقة بـ كل حاجة

سميحـة بـ ثبات ظاهري: أيوه قولتلهـا كده. قولتلها كده لـما شوفت راجل غريب خارج من بيتهـا قبل الشمس ما تطلع. والله أعلم كان بيعمل ايـه عندهـا وهي لوحدهـا حتى أخوهـا مكنش موجود.

كملت بـ خبث وهي شايفه رحيـم ساكت: شوف كانت بتعمل ايـه وتستغفلك في غيابك يابني دا انا شيفاه بعيوني والراجل خارج من شقتها

قاطعها رحـيم بـ غضب وعيون شرسة: بس كفايـــة مش عايز اسمع منك ولا كلمة انتي ايه؟ مش واخدة بالك انك بـ تخوضي في شرفي. شرف أبنك ومراته يا حجة سميحـة

سميحـة بـغل و شراسة: هي البت دي سحرالك؟ بقولك شفت راجل غريب خارج من شقتها. وهي وهو لوحدهم. ولحد دلوقتي بتدافع عنها وتقولي شرفك. شرفك ماهي مرمغته في التراب لما سمحت بدخول راجل غريب لـ شقتها والله اعلم كانو بيعملوا ايه. ولا انت مش قادر على الحمار فـ بتتشطر على البردعة

رحيـم: كلمة كمان و هـ أنسى انك أمي و هـ أعمل حاجات عقلك ما يتخيلهاش. مراتي خط احمر. مراتي اللي بنتك كانت سبب بعدي عنها. وقبل ما تتكلمي على مراتي وتخوضي في شرفهـا اللي انضف وأطهر من اي حاجة. شوفي بنتك الاول وربيها .. بنتك اللي بكل سهوله اتبلت على نفسها ان حد لمسها. انتي مش مستوعبة المصيبة اللي بنتك عملاها؟ انا مش عارف جبتوا الكره والسواد دا كله ناحية مـسك منين .. أذتك في ايه عشان تكرهيها انتي وبنتك الكره ده كله