جحيم حبك

الفصل الثامـن ✨

في شقة نرچس

نرچس في أوضتها من امبارح مخرجتش منها .. حزينة بس مرتاحة ، ايوه مرتاحة الحيرة اللي عاشت فيها كتير انتهت .. الحيرة من ان "خالـد" بيحبها ولا لا خلصت وعرفت الاجابة .. ايوه حزينة وموجوعة بس هتنسى وهتعيش ومفيش حد بيموت من الحب .. من انهارده "خالـد" زي اخوها .. اخوها وبـس .. مش هتوقف حالها في انتظاره .. اخدت قرار ومش هترجع فيه والقرار هو أنهـا تعيش حياتهـا واول عريس هيخبط على بابهـا هتوافـق عليه طالما أنسان كويـس وأبن حلال .. قاطع شرودها دخول امها عليها بسرعة مسحت دموعة ورسمت ابتسامة حزينة على وشها
والده نرچس:انتي ياختي هتفضلي حابسه نفسك في الاوضة كده كتير؟
نرچس: ولا حابسه نفسي ولا حاجة انا بس حسيت بشوية برد فـ قولت اقعد لوحدي بدل ما اعديكي
والـدة نرچس: لا يابت عليا انا الشويتين دول؟ فيكي ايه يابت قوليلي محدش هيخاف عليكي قدي
نرچس: يوووووه ياما قولتلك مفيش تعبانة شوية .. الاه! حرام اتعب يعني ولا ايه؟ مش كفاية المرار الطافح اللي بشوفة في الشغل؟!!
والـدة نرچس: والله ياختي انتي اللي غاوية مرمطة محدش قالك ترفضي كل عريس والتاني لما هتعنسي .. انتي باصه عليوي اووي ياضنايا وهتقعي على جدور رقبتك
نرچس بهمس موصلش لأمها: وهو انا لسه هقع! ما انا وقعت واللي كان كان
والـدة نرچس: بتبرطمي بـأيه يافالحة سامعيني كده
نرچس بنفاذ صبر: مفيش ياما بقولك ان اول واحد هيخبط على بابنا هوافق علطول استريحتي كده .. ياكش اتجوز واريحك
والـدة نرچس: لوووووووووي ايوه كده يابت فوقي لنفسك بدل ما القطر يفوتك يانن عيني انتي
نرچس بسخرية: دلوقتي بقيت نن عينك؟ عجايب!!!
........................

عند رحيـم ومسـك

رحـيم : هنعمل ايه دلوقتي هنقف نتفرج على الارض كده كتيـر ؟ انتي بتفكري فـأيه
مـسك بجدية: ادخل اجيب السحلية دي من جوه
رحيـم ضحك بصوت عالي: هي سحلية ولا عقربة ولا ايه بالظبط
مسـك بغيظ: اضحك كمان اضحــك لسه في اتنين ماسمعوش ضحكتك
رحيـم: لااااا دا انتي غريبة اوووي انهارده اوعى تكوني غيرانـه
مسـك: غـ أيه؟ غيـرانة لا ياخويا انا مبغرش من حد
رحيـم: ومين قالك اني بقولك انك غيرانـة من حد؟ انا بقول غيرانـه بـس على حد .. اللي هو أنا يعني
مسـك بأرتباك وقفت تاكسي : يا ساتر يارب ايه ده ايه ده
رحيـم بقلق: في ايه يابت؟ انتي بتوقفي تاكسي ليه
مسـك وقفت تاكسي وركبت فيه وبصت لرحيم وقالت: اصل أتأخرت والاكل على النار حصلني انت بقا .. سلام ياخويا وبصت لسواق التاكسي: يلا ياسطا الله يكرمك اتكل على الله
ثواني وكان التاكسي مشي وفيه مسـك اتنهدت براحة .. أما رحيم مش مستوعب انها مشيت فعلا!! وأكل ايه اللي على النار!!
رحيم بهمس: البت دي مجنونـة؟!!.. اكيد مجنونـة ماهو مفيش حد عاقل يتصرف كده! بس اعمـل ايه بحبهــا