يكبرني سنا

-ورطه-

اسوء يوم بحياتي هو يوم الثلاثاء.... كل مشاريعي تتاجل بسبب اختي الدلوعه رهف لان بهذا اليوم لازم اكون وياها من ترجع من المدرسه... لان والدي ميكدر يرجعها للبيت بهذا اليوم...
طلعت من البيت بسرعه حته اروح لشغلي ماريد اتاخر... شفت صديقي امير واخذته وياي بسيارتي...
احب شغلي لان هالشي الي اختاريته وحبيته رغم انو صعب كلش...
بالطريق امير كلي (كرار.. دريت بحبيبتك التركتها تزوجت)... مرديت عليه لان مالي مزاج افتح موضوع مر عليه وقت طويل...
اتصلت عليه رهف حته ارجعها من الدوام... خلصت شغلي وطلعت رحت لرهف لكيتها تنتضرني واكيد صديقتها اللزكه ايات وياها ماتفوت فرصه حته اوصلها...
متعجبني هيج نوعيه من البنات الي تذب روحها عله الشباب... عينها صلفه تتغزل بيه كدام اختي الصغيره...
رادت اوصلها بالاخير حته تحجي وياي وجانت تتقصد تتماوع بكلامها اني ماهتميت الها... وصلتها لبيتهم وقبل لاتنزل كالتلي اني معجبه بيك(صارحتني هههه) بس اني كلتلها اني ماشوفج غير طفله وماتعجبيني...
جنت قاسي كلش بكلامي وياها حته تقطع الامل مني ومتفكر بيه بعد...وهالشي نجح لان من ذاك اليوم وبعد مشفتها ولا سمعت عنها شي...
بنفس اليوم اتصل عليه صديقي جان متعارك وي ولد بالمنطقه وضاربه...رحت عليه واخذته للمستفي ضمدو جرح الي براسه بسبب الضربه.. واكيد ذاك الولد اخذ جزائه من الضرب... تاخر الوقت كلش اتصل عليه والدي حته يتطمن كتله راجع للبيت... ماجنت ادري الله شنو كاتبلي وشنو راح اشوف واصادف بطريقي....
جنت داسوق السياره... شفت مره شابه وبيدها طفله واكفه ع الرصيف وتاشر حته سياره توكف.... الشارع كان فارغ والوقت متاخر كلش شفتها مو عله بعضها ودتتالم وتبجي... اشرتلي.... مكدرت اتتركها واروح وكفت سيارتي يمها ونزلت اسالها محتاجه شي... والصدمه كانت لما تقربت شفتها حامل .... لمن نزلت اسالها لزمت بيه وتبجي وتتوسل اوصلها للمستشفي جانت تتوجع وماعرف شنو اسويلها فتحت باب السياره وصعدتها هي والطفله واخذتها للمستشفي بسرررعه... لمن وصلت كانت المره مغمه عليها من الوجع والطفله تبجي... بقيت وي الطفله لان ميصير تدخل وي امها للعمليات مافهمت شنو ديصير .... الطفله كانت حيل لطيفه وكيوته اجت الممرضه تسالني شنو اكون من المره جاوبتها ببرود انو ماعرفها لكيتها ع الطريق...
طلبو اي معلومات بس مجان عندي اي معلومه عنها غير هاي الطفله ... تركت الطفله عند الممرضه وردت ارجع للبيت لان والدي حرك الدنيه عليه بعد ساعه ويطلع الفجر واني مراجع للبيت... بس قبل لا اطلع طلبو ياخذون رقمي... رجعت للبيت ونمت كنت كلش تعبان وماشوف كدامي من التعب...
كعدت عله صوت التلفون كان رقم غريب ماهتميت رجعت نمت بعد حوالي نص ساعه كعدت اكلت واتصلت اعتذر لان ماكدر اروح للشغل ... نزلت اكلت جانت الوالده قلقه عليه لان تاخرت والدي زعلان بس من حجيتلهم شنو صار عذروني....
شويه واجاني اتصال من رقم غريب رديت كان من المستشفي... كالولي لازم اجي بسرعه جنت مستغرب وحسيت اكو ورطه...
اخذت والدي وراحنه للمشفى ... جان متردد بس ابوي جان يريد يعرف شنو السالفة....
رحنه واول مادخلت اجتي الطفله تركض عليه وتبجي قطعت كلبي.... اجت الممرضه وكالت (الحاله الي جبتها البارحه ماتت وماكدرنه ننقذ الطفل الي داخلها... ونحتاج احد يكمل المعلومات لان ماعدنه احد نتواصل وياه غيرك)...
شلت البنت وضليت اسكتها والدي راح للاستعلامات يكمل اجرائات المستشفي سالتها بعد ماسكتت من البجي عن اسمها... حجت بنبره ناعمه وطفوليه...(نيوم)... مفهمت شنو بس مو مهم صاحني والدي
وكال هاي اغراضها الي جانت وياها شوف اكو اي اثبات شخصيه.... لكيت هويتها ومعلوماتها وهويه الطفله اسمها(غيوم).... لكيت جهاز زغير فتحته وشفت اخر اتصال اتصلت عليه بس ماكو جواب
لكيت رقم مكتوب عليه اختي رغد... اتصلت عله الرقم فتحت الخط بعدني مكايل كلمه وحده وسمعت كلام اول مره اسمعه وانسد التلفون بوجهي...
معرفت شنو اسوي وملكيت غير ابوي يساعدني... كملنه الاجرائات واخذت الطفله لان ماكدر اخليها بالمستشفي...
جانت خايفه كلش وتبجي وماقبلت تبقه بالبيت ويانه... اخذتها وطلعت ضليت بره وياها لحد مانامت...