(ممرات الموتى)
مرات الحياة تحطنا بتجارب مرعبه منعرف شلون وليش؟؟
هذي قصتي طالب طب مرحله سادسه اهلي ميسورين الحال والحمدلله قررنا اني واصدقائي بعد امتحانات متعبه نروح سفره لفرنسا ، الدوله اللي احبهه من اني طفل واتمنى ازورها وفعلا حضرنا كلشي وانطلقنا وصلنا للفندق ومصدكت شوكت انام شوكت اكعد دنسوي جوله بشوارع فرنسا
المهم كعدنه الصبح وانطلقنه بعد الريوگ الفرنسي اللذيذ
وطبعا كتلهم مناخذ اي وسيلة نقل نقضيها مشي حتى نستمتع...
بعد ما قطعنه مسافات طويله من الفندق بشوارع باريس الجميله اتوقفنا بمكان بي مسطبات كلنه نكعد نرتاح ناكل شي والولد راحوا يجيبون لفات على عصير المهم اني كعدت،،، وانتبهت اكو نفق بعد كم متر مني ، اباوع ركزت اكو واحد واكف جوه بالنفق ياشرلي بيده عبالك ديطلب مساعده ركزت اكثر اي والله صدك كمت مشيت داريد افهم شبي!!
عندي كاميرا مشيت وشغلت الزوم دااصور لان عندي واهس تصوير ، جمدت بمكاني واني متقرب وداباوع بالكاميرا شو هذا الرجال بس نص جسم ؟؟؟؟
والنص الثاني جوه الارض !! صرخت صرخه قويه اختفى الرجال ولا عبالك موجود ! وسمعت صوت زمجره عاليه كلش ترست المكان
اتلفتت بكل اتجاه
حسيت ورايه اكو شي التفتت على كيفي لكيت كلب اسود ضخم جدا ينظرلي بشراسه عيونه حمره دم وجبير جدا
مااحس غير ايد على كتفي من خرعتي اخترع صديقي ويايه خطيه حسيت گلبي انبلع ببطني وهذا صديقي يكلي شبيك شصاير؟؟ جاوبته كتله انتبه ترا اكو كلب جبير هنا باوعنه بكل مكان كلشي ماكو معقوله دااتخيل؟ هالمره التفت حتى صديقي ماكو رجعت ركض اركض واتلفت ورايه لكيت اصدقائي واكفين دياكلون عافوا الاكل وجوي عليه شبيك يمعود؟وين رحت؟
كتلهم السالفه كلها ، صديقي احمد كلي لعد مسامع بممرات الموتى هنا بفرنسا؟ كتله لا
كلي هاي ايام الحرب العالميه الثانيه دفنوا بيهه هوايه عساكر معروفه هاي الممرات والانفاق مليانه ارواح واشباح معذبه
الطريق كله اني مرعوب وصلنا للفندق حتى مااكلت صعدت لغرفتي اول مفتحت الباب دخلت لكيت الرجال اللي بالنفق شفته ابو نص جسم كاعد بالغرفه ووياه واحد من خوفي صرخت وفتحت الباب دااهرب لكيت نفسي ممدد واصدقائي داير مدايري كالولي شبيك اليوم ؟ لاكيني ممدد بباب غرفتي مال الفندق !!
المهم حجيتلهم شنو شفت بالغرفه صديقي احمد كال ترا هاي الممرات حقيقيه وبعد محد يطلع او يفوت بمكان وحده ، اتفقنا نغير ملابسنا صديقي كال اجي وياك للغرفه كتله ميحتاج دخلت لغرفتي
فتت للحمام بس اني خايف
ماكو دقايق شفت خيال طويل بالغرفه عالحايط وبده يتقرب عليه ثواني وانقطعت الكهرباء !! رجعت الكهرباء بسرعه لكيت خيال رجل كدامي او كان رجل حقيقي تركيزي انعدم مكمت اميز ودياشرلي بيده حركه بمامعناه انت راح تنذبح هم صرخت ويه الصرخه اجتني صفعه قويه على وجهي فقدت على اثرها الوعي لكيت نفسي بممر مليان هياكل وجثث موتى فجاه طلعلي شخص اسود بدون ملامح واضحه كلي ابتعد وارجع ،،
مفهمت شيقصد كعدت لكيت نفسي بارض الغرفه رحت لاصدقائي ركض حجيتلهم صديقي كال ماعرف والله شنو المقصود المهم بعد نقاشات قررت اني واصدقائي نترك الفندق وبوجهنا للمطار لان متحملت ابقى واصلا المكان مو مريح ابداً ،،
تصدكون بعد رجوعنا بيومين قريت خبر الفندق اللي جنه نازلين بي انفجرت كل المرايا اللي بي وناس ماتت انذبحت بقطع المرايا وناس انصابت !!!!!
انصدمنا اني واصدقائي من الموضوع كله معقوله الشبح اللي سوالي حركة الذبح والشخص الاسود حذروني ؟؟
تجربه ماراح انساها طول عمري
