حكايات تمس القلب

حكاية 3

- متقدملي عريس يا اركين.
- يا دبلة الخطوبة عقبالنا كلنا.
- يا حيوانة راعي مشاعري شوية.
- مشاعر مين يا حجة انتي لا مرتبطة ولا بتحبي حد ولا قلبك بيدق لحد قلبك بيضخ دم وخلاص يبقى مشاعر مين ياما.
- اولا انا مينفعش ارتبط لانه حرام ثانيا ايوة انا مبحبش حد ثالثا بقى والاهم انا معرفش مشاعر ايه دي بس احترميها.
- اه دا انتي هرموناتك ضاربة بقى.
- انا عايزة اعيش قصة حب بعد كدا اتجوز.. اتجوز عن حب يعني بس مش هرتبط عشان الارتباط حرام بس مش عايزة اتجوز جواز تقليدي انتي فهماني؟
-لما تفهمي نفسك الاول ابقى نادي عليا عشان افهمك.
-غوري من وشي يا اركين احسن افتحلك دماغك.

انا مني لله والله على الحيوانات اللي بصاحبها انا تقريبا مصاحباهم تكفير ذنوب مش اكتر حرقولي دمي. ما علينا قررت اقعد مع عريس الغفلة واشوفه انا مش ضد الجواز ولا حاجة انا بس زي ما بيقولوا كدا نصيبي لسه مجاش. قعدنا وشوفته كان شكله حلو بس لسه اخلاقه بس انا طبعا مكنتش مركزة معاه انا كنت متوترة اوي انا اصلا بتوتر من اي حاجة. اهلنا قاموا وسابونا مع بعض وماما السكرة العسلية اللي قولتلها متسبنيش معاه قامت وسابتني معاه بردو وكاني كلبة من الشارع يا جماعة لو انتوا لقيني قدام المعبد اليهودي قولولي ووعد مش هزعل.

- هتفضلي متوترة كدا كتير انا مبعُضش على فكرة.
- اديني بس خمس ثواني اهدا.
قعدت اهدي نفسي واستجمع افكاري واخدت نفس عميق وخرجته.
- اوك ابدا.
- طيب انا جواد عندي 27 سنة بشتغل موظف في شركة كويسة ومرتبي كويس.
- بص انا مش هحكيلك عن مميزاتي خلينا في العيوب عشان هي اللي بتفرق.. انا معقدة مش مجنونة لا معقدة يعني ممكن اكون انهاردة باردة وبكرا اكون عصبية مزاجي متقلب يعني.. بعرف اطبخ الاكل اللي بحبه بس يعني انا مثلا مبحبش الممبار فمش هعرف اعمله لو عملت ايه.. احيانا ببقى مهملة ومليش نفس اعمل حاجة.. بتوتر بزيادة بس مش ثقة ضعيفة في نفسي لا هي بتبقى حالة توتر.. مبحبش حد يتحكم فيا عشان هعند معاه يعني لو حد قالي اروح يمين وانا ناوية اروح يمين هعاند معاه واروح شمال.. لبسي مش هغيره.. انا مختمرة ولبسي كله فساتين وجيبات واسعة ومبلبسش بناطيل او حاجات ضيقة.. مبحطش ميك اب لانه حرام اولا ومبحبوش ثانيا اقصى حاجة هي كحل وبحطه في البيت.. مبدلعش زي البنات على اي حد مهما كان.. وقبل ما تجيب سيرة الشغل انا معنديش اي طموحات للشغل ومش عايزة اشتغل عايزة كام رواية اقراها وورقة وقلم عشان ارسم بس كدا.
ابتسم.
- طيب طالما انتي صريحة معايا كدا انا كمان هكون صريح.. انا هادي لكن عند شغلي بكون عصبي مبحبش حد يتدخل في شغلي.. معنديش مشكلة مع الاكل لاني مبفضلش حاجة طالما الاكل معمول كويس وحلو يبقى مش مشكلة.. خلقي ضيق شوية فلما اقول على حاجة بس اعرفي اني مش هقدر اتكلم فيها تاني.. لما بتعصب باخد ركن لوحدي لحد ما اهدا.. انا كنت هقولك اني مش عايز اتجوز واحدة بتشتغل عشان لو انتي عايزة حاجة انا هديكي كل شهر مبلغ تشتري بيه اللي انتي عايزاه بس متطلعيش برا وتحتكي برجالة تانية.. وكمان لبسك كدا كويس طالما هو اللبس الشرعي فبدعي في الالوان والتصاميم براحتك.. وبالنسبة للمكياج فانا مرضاش ان مراتي تحطه الا في البيت لانه حرام ولو اني مبحبوش من اساسه.
- طيب..
- اظن كدا اننا متفقين الى حد ما.
- ايوة بس هصلي استخارة الاول وردي هيوصلك من بابا.. انت بتصلي ولا لا صحيح؟
- اكيد بصلي الحمدلله ومبشربش سجاير الحمدلله بردو.
- كويس.. اااخخ نسيت اقولك ان اسمي حور.
- اكيد عارف اسمك مش هاجي اتقدم لواحدة وانا معرفش اسمها.