حكايات تمس القلب

حكاية 1

- انتي ياللي نايمة اصحي هو دا بيتكوا عشان تنامي.
صحيت وسامعة صوت المدرج مليان ضحك والدكتور وشه احمر من الغيظ.. اوفر اوي الدكتور دا ايه يعني نمت في المحاضرة كانت الاولى مثلا اما عجايب يا اخي.
- معلش يا دكتور نمت بالغلط.
- اطلعي براااا.
- طيب طيب بس متزعقش.
- لما تتعلمي تحترمي المكان اللي انتي فيه ابقى مزعقش بس انتي مش محترمة لا دكتورك ولا محاضرته.
نفسي ارد عليه بس مردتش تدروا ليش لاني محترمة اه والله محترمة مالكوا استغربتوا ليه. مشيت من قدامه وهي بينفخ.. طب حاسب بس لتطيرني وانت بتنفخ كدا. طب اروح فين دلوقتي تروحي فين يا بت يا حور الكلية مليانة وشكلي مش هعرف انام يبقى اروح المكتبة احسن. روحت وقعدت في الركن على ترابيزة بعيدة عن الناس وحطيت عليها راسي ونمت.

- انتي يا انسة.. انتي يا ماما.. انتي يا حجة قومي.
- ايييييه الله مش عارفة انام دا ايه اليوم الاسود دا يا ربي.
- تنامي ايه قومي حضرتك انا عايز اذاكر وانا بقعد هنا دايما.
- بقولك ايه يا اسمك ايه ذاكر على الترابيزة دي براحتك واعتبرني مش موجودة وادي شنطتي حطيتها على الارض يكش تسيبني في حالي بقى.
لسه بقول بسم الله وهروح في النوم لقيت ايده بتزقني تاني.
- انتي يا بنتي.
- منه لله الدكتور اللي خرجني من المدرج ومسابنيش انام في اليوم المهبب دا عايز ايه يا زفت انت كمان.
- يا ساتر كل دي شتايم.
- اخلص مش فايقالك عايز مني ايه؟
- عايزك توطي صوتك وانتي بتتكلمي وانتي نايمة.
- حاضر اما يخترعوا ريموت للتحكم في الانسان اوعدك اني هشتريه واعمل ميوت لصوتي عشان مزعجكش جنابك.
حطيت راسي تاني عشان انام بس ازاااي لازم البت حور متنامش انهاردة.
- انتي يا بنتيـــ
- بقولك ايه اولا اسمي زقتة حور ثانيا هسفخك حتة قلم عنب لو متقيتش شري وسبتني انام.
- طيب يا زفتة حور شيلي ايدك من على ورقي عشان هتقطعيه.
- اوففففففف.. اللهم طولك يا روح والله ما انا ساندة على الترابيزة.
رجعت بجسمي لورا وسندت ضهري على الكرسي ونمت.
- ااااخخخ.. راسي.
راسي اتخبطت في الترابيزة بعد ما نمت هو يوم منيل اصلا والجدع دا بيضحك على ايه نفسي افهم.
- مش نايمة مش نايمة كان يوم اسود سوم ما قررت انام.
سكت شوية وبصيت على اللي قاعد قدامي ولسه لحد دلوقتي معرفش اسمه.
- انت مين يا جدع انت؟
- انتي جاية تسالي دلوقتي.
- يا عم قول هو اسمك سر دولي ولا حاجة.
- انا جواد احمد التهامي.
انا بشبه عليه.. جواد احمد التهامي.. حاسة اني سمعته في حتة بس مش فاكرة فين.
- انا سمعت الاسم دا فين؟
- ابن مدير الجامعة احمد التهامي.
يا وجعة مربربة ما هو انا بردو مكنش ينفع اسهر الليل كله على الروايات واجي انام هنا واشتم في الخلق كدا.
- طيب اما اروح اودع اصحابي عشان هيوحشوني.
قبل ما امشي لقيته وقفني: ليه؟
- انت اهبل يابني ولا حمار ولا دماغك مفوتة ولا انت ايه حكايتك بالضبط انا من الصبح قاعدة اشتم في الدكتور اللي ربنا لا يسامحه وشتمت المدرج بالجامعة كلها ونازلة فيك انت شخصيا شتايم اكيد مش هعمر كتير.
لقيته ضحك جامد هو انا بزغزغه مثلا ولا بقول نكتة وانا معرفش.
- لا هتعمري اقعدي بس.
- اه صح انت متعرفش غير اسمي الاول فمش هتقدر ترفدني انا اسمي حور حسان ابراهيم اخر سنة الحمد لله وهتكل على الله اصلا هتعرفني اول ما تدور على اسمي عشان عندي حبايب كتير هنا من الدكاترة.
ضحك جامد: لا انتي اكيد مش طبيعية انتي فظيعة.
- شكرا هترفد امتى بقى؟

عدى شهرين ومترفدتش ولا حاجة واتصاحبت انا وجواد وتفهم ان دي مشاكل نومي مش اكتر وان انا انسانة طبيعية وطلع الواد دمه خفيف وبيجاريني في تفاهتي وحقيقي مشوفتش في خفة دمه وحلاوته وجمال عيونه العسلي دي وضحكته القمر وهو كله على بعضه قمر اصلا وعايز يتاكل وايه دا الموضوع اخد منحتى تاني وكدا هزعل وجامد كمان.

- بتبصيلي كدا ليه؟
- والا ما تحبني ونخلص.
- اشمعنا؟
- محدش مستحملني غيرك حتى اهلي شوية كمان وهيتبروا مني.
- وماله نحبك بس نامي يلا عشان متطلعيش عفاريتك عليا وتترفدي من المخاضرة دي كمان وبعدها هحبك.
- هتحبني جامد؟
- جامد اوي.
- اذا كان كدا يبقى اشطا هنام.
منمتش طبعا بس مثلت اني نمت لاني بحس انه بيقعد يبصلي وانا نايمة بس مش متاكدة اذا كان بيحبني ولا لا.
- هاي جواد.
ايه دا دا صوت بنت لا مش بنت دي حرباية مايعة عايزة الحرق.
- ازيك يا مايا؟
مايا يع اسم وحش اوي وــــــ ثواني كدا هو بيكلمها ليه اصلا. فتحت عيني بالراحة قال يعني لسه صاحية وانا مكملتش خمس ثواني نايمة اصلا.
- مش تعرفنا يا جواد.
- حور انتي صحيتي.
- لا بكلمك وانا نايمة يا خفيف.
- مين دي يا جواد؟
الحرباية دي كل ما تتكلم بتعصبني.
- دي حور—
قاطعته بدون تفكير: حبيبته.
شوفت علامات الصدمة على وشها ووشه وتقريبا وشي انا شخصيا.. هو انا نيلتها اوي يعني؟
- مكنتش اعرف انك ارتبطت يا جواد.
- معلش ياختي جات فجاة.
- طب انا همشي دلوقتي اشوفك بعدين يا جواد.
امشي داهية تاخدك مكان ما انتي رايحة فضلت باصة عليها لحد ما مشيت وبعدها لفيت ليه بسرعة.
- مين دي يا جواد وازاي تكلمك كدا وانا معرفهاش ليه و—
- اششششش.. دي مايا زميلتي مش اكتر السؤال هنا بقى ايه الي انتي قولتيه دا؟
هو ليه مفيش حفرة بتنشق وتبلعني ليه؟ ها فهموني ليه ولا ليه مفيش ريموت يرجعني بالزمن لورا عشان اسحب كلامي؟ ولا لا لا مش هسحبه ها.. بس هعمل ايه في المصيبة دي.
- حور انتي روحتي مني فين؟
- ها معاك اهو.
- طب ردي.
طب يعني ارزعه واحدة انا بحبك تجيب اجله ولا اعمل ايه في الوقعة السودا دي.
- هو انت مينفعش تعمل مخدتش بالك؟
هز راسه بلا بهدوء.. طبعا مينفعش ما انا مشتمتوش يعني وعمل مش واخد باله انا تقريبا اعترفت بحبي بطريقة غير مباشرة واي عيل صغير هفهم اني بحبه.. يا كسفتك يا دودي.
- حور.
- امم.
- بصيلي.
رفعت راسي لبه وكان بيبتسم بمكر.
- انتي بتغيري؟
- ها؟ مين؟ انا؟ لا طبعا.
بصلي شوية اللي هو على بابا.. ما هو انا مكنش ينفع بردو اتسحب من لساني واتكلم.
- حور.
- اه بغير ارتحت؟ اتبطيت؟
لقيته ضحك بصوته كله يا شيخ يا شيخ هي ناقصة ضحكتك ما هي متنيلة اصلا من غير حاجة.
- جواد ممكن تبطل ضحك؟
- عشت وسمعتك بتقولي ممكن دا انا افتكرت نطقها تقيل على لسانك.
- يا جواد الله!
- عيونه.
قلبي في ذمة الله هو ليه الانسان بيعمل في قلب اخوه الانسان كدا لا ثواني دا مش اخويا دا حبيبي وهيكون زوجي قرة عيني ان شاء الله بس نطلع من الموقف القذر دا.
- انت بتقول ايه جواد متهزرش.
- مين قالي اني بهزر.
- يا جواد.
- قلبه.
- والله انت اللي قلبي.. ياختاااي ايه اللي انا بقوله دا انت مهكرني يا جدع ولا ايه.
- لا بحبك.
- اه بحسبـــ يا نهار اسود!
- ايه؟
- وانا كمان بحبك.

#جواد_وحور
#توليب
#مريم