إغتصبني لينقذ حياتي فأحببته [ باللهجة الجزائرية ]

Part 16

سلام عليكم لبنات هاد الكرونيك أول كرونيك ليا هنا ومداتش تفاعل كبير عليها مي بيها نتفكر بواش بديت وكيفاه درت كرونيك عن ظهر قلب ❤من قلبي نكتب مش بدافع متابعين وشهرة مستحيل لانو كل كرونيك تمد عبرة مغزى صغير توريك توجهك وتبين كميات المعاناة لي يقدر يعانيها الانسان في الحياة فمن خلال كرونيكات تكون تجربة واقعية لي تبين مسؤولية الانسان ومهمته في الحياة فالحياة مدرسة اذا رسبت تكون لك فصول وفرص ولكن اذا طردت من تلك المدرسة فعلم ليس لك قيمة في المجتمع وخصوصا في هاد الجيل
اتمنى تكونو تستافدو كي تقرو نقراو باش نحو لفيد وفي نفس الوقت العبرة تبقى راسخة والحمدالله على كل شيء اشكر كل من زارني في هذه القصة وعلق وصوت اشكرك جزيل شكر فبدعمكم تغلبت على مشاكل وأسلاك التي كادت توقعني وتدمرني شكرا واحبكم
و رمضان كريم لكم ولكل الامة الاسلامية 🙏🏻
♕♡•♕♡•♕♡•♕♡•♕♡•♕♡•♕♡•♕♡•♕♡•♕♡•
رسيم: ريم سمحتيلي
ريم: رسيم يا حبيب قلبي صح ليفات عليا مش بساهل مي نشكرك لي وليت جزء من حياتي نشكرك لي سلكتني ونا ني سمحتلك
رسيم:ماشي كي راني مريض ايا شفقتي عليا
ريم:نخاف نضربك تولي فيا
رسيم:هههههه امالا سيي يديك ألالا
قعدو يهدرو ويضحكو على رواحك رسمو عائلة صغيرة لي يتمناها كل واحد ناضو دارو روتيناتهم كي العادة وراحو يوجدو فاليزاتهم باش يروحو لأمريكا باش يتعالج تم ويولي لعايلته صغيرة
ريم:رسيم هيا رراح تروح طيارة
رسيم:واللع مليحة تقوليلي هيا خف وناسية بلي خليتيني نبدل لأيلا والله متحشمي لومان نجيك وتشوفي
حمارت مسكينة عارفة نيته واش يقصد راحت بلا متهدر وبلا متسنى دخلت للوطو ركبت فتالي باش تجي قدام أيلا بيسكو صغيرة لازم تكون قدامها في كرسي تاعها جا رسيم وهو بضحك على ريم وعلى ملامح وجها حط بنتو رواح للقدام باش يسوڨ
رسيم:ياه حقا نسيت بلي متوليش تقعدي قدامي
ريم:لعيد ماشي كل يوم اسي
رسيم:ممممممممم
ريم تشوف فيه بنظرة حب وفي قلبها ياريت عرفاتو فظروف أحسن وعاشت معاه فترة الخطوبة تمنات لوكان كان فحياتها من قبل مي حمدت ربي لي هو معاها شافت فبنتها وتشوف فيه وتقول في قلبها ايه حتى بنتي تشبهلو كلشي داه هو مديت والو انا مي معليش المهم من انسان نحبو هو يسوق ويغني وفرحان وهي فرحانة تهنات من لغبينة ولكآبة لي كانت فيها رتاح قلبها تشوف فيه كيفاه متحمس فرحانة لكلشي وصلو للمطار ودعت اهلها بالخناين وبكا وش من تعناق وتسلام بلا ما نحكو على الفراق صعيب ركبو الطيارة وكل واحد شاد تيليفونو ويكونيكتي مي ريم رقدت هي وبنتها صغيرة خصصولها جناح خاص لي بيبي صغار باش يلقاو راحتهم
وصلو لأمريكا وراحو لوتيل يبقاو فيه بيلاما يشوفو دار على حسابهم وجا نهارلي يبدا رسيم يتعالج ريم ملي جات وهي تخمم فيه خايفة عليه دخل رسيم يتعالج ودارعملية جراحية لي ينحي فيها لمرارة ولحسن الحظ المرض كان في بدايتو ولا فأحسن حال وطمأنوهم طبا بلي مكاين حتى خطر عليهم بقاو يمات رتاحو فيهم في أمريكا حوسو وشبعو تحواس
♕بعد ثلاث سنوات♕♡
أيلا:ماما واحي حثمي رسيم (ماما رواحي حشمي رسيم)
ريم جايا وطابيلي تاع الكوزينة دليل على انها في الكوزينة طيب وسروال نوار سليم وبول حمر وشعرها ذيل الحصان تهبل
ريم:أيلا واش تفاهمنا على رسيم نقولو بابا
أيلا:بثح علاه نتي تقولي رسيم
ريم هنا شافت في رسيم وطرطقت بضحك على بنتها واش تقولها دروك
ريم:بيسكو رسيم ماشي بابا انا رسيم باباك نتي
أيلا:ها قوليلي رسيم راذلك (ها قوليلي رسيم راجلك)
هنا ريم تصدمت من واش تقول و طرطقت تضحك هي ورسيم وتحكمها وتبقا تقرص فيها و تسلم عليها وتعاود ويحكمها رسيم يلعب معاها ويعاود لزوج يضحكو معاها
فليل بعثت أيلا عند رحيل يحكم أيلا تحب تروح عند خالتها ديرلها خاطرها بيسكوريم مانعة عليها صوالح
وبقات ريم وحدها فدار رسيم راح يخدم في شركة تاعو راحت ريم تحمت وجدت راسها مكيات لبست غوب فبلونوي طلقت شعرها وجدت لعشا وقاعدة تسنى حتى يجي رسيم حتى تسمع لوطو عرفت بلي جا هابطت تستقلبو غير وصل حلت لباب قبل ما يحله جبداتو من يدو وهو غير يشوف كتلة الجمال لي واقفة قدامو داتو لطابلة نتاع لعشا قعد في بلاصتو كي جا يبعد سارفيات من طبسي لقا لإيكو نتاع لبيبي يشوف فلإيكو يعاود يشوف فيها ماشي مأمن
رسيم:بصح ولا تتمسخري
ريم:هاد صوالح يتمسخرو بيهم
رسيم:قولي والله
ريم: ههه والله
ناض من بلاصتو رفدها وقعد يدور بيها ويقول حنزيدو بيبي جديد يا نحبك نحبك ريم راحو لبيتهم فوتو ليلة حمراء كيما يقولو ههه المهم بين الزوجين هادو احشمو هادو عواشير ههه
صباح ناضت ريم دوشت وبدلت لبست جوب جين وبيل في نوار وباسكات فبلان وطلقت شعرها راحت جابت بنتها وجات لقات رسيم ناض ويحوس عليها هي داخلة تا شافها معا أيلا عرف بلي راحت تجيب بنته رفد بنتو وسلم عليها بحب وعلى ريم عنقها هي وأيلا راحو يتقهواو وبدا لحديث مع أيلا
رسيم:أيلا واش رايك نجيبولك ختك
ريم قرصاته من يده باش يسكت سوجي ماشي تاع صغار
أيلا: ياي ياي ياي بثح خاثني ختي ماثي ولد يديلي ماماتي
رسيم عند وذن ريم:لوكان تعرف بلي باباها هو لي يديلها ماماها متزيدش تقولي بابا هه
ريم:اسكت،أيلا بنتي بنت ولا ولد نورمال مهم يكون عندك اخوة مش تفاهمنا هاك
أيلا:ايه ماماتي تفاهمنا
ريم:بنتي ذكية وشاطرة نتاعي
وهاك كملت حياتهم مع بنتهم وولادهم لي جايين هاك كانت نهايتهم سعيدة
♕♡♕♡♕♡♕♡_♕_♡♕♡♕♕♡♕♡♡♡♕♡♕♡♕
حبيت تكون سعيدة بيسكو منحبش نهايات تعيسة ضيقلي خاطري عليها نحب تكون متفاءلة و تشرح لقلب نتمنى نكون عند حسن ضنكم وتعجبكم نشالله وربي يفرج على كل مغبون وكل واحد كاره نقولكم كلشي مكاتيب وكلشي بيد ربي وكلشي مسطر عند ربي غير حمدو ربي وتفكروه دايمن ماشي في غير اوقات صعبة ربي حنين كريم هو يقضيلك حاجتك هو لي معاك وثقة في الله برك
باي باي صح رمضانكم تصومو بصحة نشالله وربي يوفقكم في مشاوركم سواء الدراسية ولا عملية ولا فلكشي
نتلاقاو في كرونيك وحدوخرى
لي تحبني ندير كرونيك جديدة غير في التعليقات تقولي
دمتم لبنات باي ❤