Isang maikling kwento tungkol sa babe mo, babe nya, at babe nating lahat.
sinulat ni Darwin Taylo
Sa restaurant..
BOY: Tayong mga Pinoy minsan kasi kala mo kung sino tayo. Nakita mo yang isyu sa China?
GIRL: O, bakit? Tama naman ginagawa ng Pinoy dun a. Sila ung nang-bubully e.
BOY: Tingin mo sa liit ng Pinas ibubully pa tayo ng China? Yang Scarborough Shoal, historically, China na talaga nagmamay-ari nyan.
GIRL: E bakit, within 100 nautical miles naman talaga yun ng PAR, so technically sa Pinas un.
BOY: Kahit tanungin pa natin United Nations, history supercedes area of responsibility.
GIRL: May pruweba ba China na sa kanila yan historically?
BOY: Oo naman, mula elementary tinuturo na sa mga Chinese na kasama yan sa bansa nila. Di ko nga magets ang Pinas at sila pa nagmamalaki!
GIRL: Ganun?.. E kung ganun, wala nga tayong karapatan ano. Bakit nga ba tayo nakikipag-away sa sobrang laking China? Pinoy talaga.
(Tumatangu-tango.)
BOY: Alam mo, yan ang gusto ko sa babae, may sense at nakikinig.
GIRL: Yan din gusto ko sa lalaki e, matalino at solid ang personality.
BOY: So gusto mo ako?
GIRL: Bakit, gusto mo ba ako?
BOY: Aba, naniniguro pa a. May nanliligaw ba sayo ngaun, ka-date o baka may jowa?
GIRL: Bakit, ikaw may nililigawan ka ba ngayon, baka may girlfriend ka na o baka asawa’t mga anak?
BOY: Loko. Ano nga? Medyo istrikto ako ‘pag ako naging boyfriend mo. Nasan phone mo?
GIRL: At bakit? Akin na rin phone mo.
Nag-abutan ng cellphone.
BOY: Gusto ko burahin mo lahat ng contacts mo na nanligaw, nanliligaw at may balak manligaw sayo.
GIRL: Burahin mo muna lahat ng babae sa contacts mo, maliban sa Nanay mo.
Nagkalikot ng sari-sariling cellphone.
BOY: Baguhin mo name ko sa contacts mo. Gusto ko lagay mo “Babe”.
GIRL: Ilagay mo rin jan sa phone mo na “Babe” ang pangalan ko at gawin mong wallpaper pic natin. Wait, tingin ka dito.
Pinwesto ang mga cellphone at nagpiktyur magkasama.
BOY: O, bakit nakatingin ka dun sa waiter? Type mo nu?
GIRL: Ha? E ikaw nga yang nakatitig sa boobs ng babae sa tabi natin nu. Trip mo ba?
BOY: Sige sa kin ka lang tumingin.
GIRL: Ang sarap titigan ng perfect ko. Kung ganto lahat ng relasyon, wala nang mag-isa.
BOY: Sige, mauna na ko babe. May lakad pa kami ng family.
GIRL: Sige babe. Wag nang tumingin sa ibang babae jan sa paligid a, tutusukin ko mata mo.
Naghiwalay ang dalawa.
Pareho silang may tinawagan.
BOY: Oo mahal, pauwi na ko jan. Sori may meeting lang sa ofis.
Sa kabilang parte ng mall,
GIRL: Oo na baby, sori na-late. Nag-girls’ night out lang kami nina Kat.
Bago makalabas ng mall, tinext nila ang isa’t isa. Halos sabay pa nila nabasa ang text.
“Ano ulit pangalan mo Babe?”
