|17|
ضرب النار مازال مستمر وكله بيصوت
بدر بعصبية : يولاد ال *****
بدر بصوت عالي : أنا هتسحب لجوا أجيب سلاح
كينان بقلق : حاسب على نفسك تاخد طلقة !
بدر : سيبها على الله ، متتحركيش إنتي من هنا فاهمة !!
إتسحب بدر بحذر لجوا عشان يجيب السلاح ، جاب الرشاش وخرج وهو واقف وفضل يضرب بغباء
رمى مفتاح عربيته لكينان وقاله : روحوا واحد واحد وهحمي ضهركم
كينان جري وهو موطي على العربية وفتحها ، ركبت ريما ورا ونزلت تحت ووراها سيا على طول
ركب بدر مكان السواق وطلع بسرعة وجمبه كينان بعد ما كان في إتنين بس تقريباً اللي عايشين وبيضربوا نار
خرج بعيد عن البيت وبقوا في أمان وريما بتعيط وبتصرخ : يالهووي إنت متورط في إيه يابدر !
بدر بعصبية : هخلصلك ورقك مع واحد معرفة وهجبلك التذكرة وتغوري من هنا !! إنتي جاية بعد السنين دي كلها تعاتبيني !!!
كينان بتعب : لازم نعرف مين دول يا زعيم ! مين فيهم اللي عمل فينا الحركة الوسخة دي
بدر بغضب : مفيش غيره إبن ال *** وديني لأروح أخربها على دماغ اللي جابوه
كينان بغضب : قولتلك بلاش يابدر بلااش
بدر بصوت عالي : إنت عاوزني أوافق على شغلهم الشمال دا !!
كينان بعصبية : طب هنروح فين دلوقتي ! إحنا في الشارع
بدر بغضب : مين دول اللي في الشارع يالا ! أنا قادر أقعدكم في أفخم فنادق مصر بفلوسي ، بس هيتعرف مكاننا ف هاخدكم مكان أمان ومحدش يعرفه
فتح بدر شقة جدته وهما واقفين وراه ، دخل وقفل الباب وراهم وقال بحزن : دا البيت اللي إتربيت فيه وإشتريته من صاحب العمارة عشان ذكرياتي في متروحش بسبب ناس تانية ، أنا هنا كنت بنام متطمن في حضن جدتي الله يرحمها ف أظن مفيش مكان أمان أكتر من دا
سيا كانت بتسمع بدر ووشها بيتحول لملامح حزن عليه ، هو حقيقي موجوع من كل شيء ومحدش حاسس بيه غيرها
مفتقد حنان الأم وحياته ك طفل راحت في حوادث ومشاكل وكبر وهو تعبان ومرهق من كل شيء ، محتاج حد يعوضه عن كل اللي حصل دا
بدر بجدية مرة واحدة : خدوا راحتكم يا جماعة في البيت ، أنا ورايا مشوار مهم لازم أروحه
مسكت سيا دراعه ، لف بدر وبص ليها
لقاها بتقول برعب وتعب : بلاش إنهاردة ، خلينا نرتاح ونستجمع نفسنا بعدين روح مطرح ما تحب ، عشان خاطري يابدر متروحش في حتة إنهاردة
بدر إتنهد وقال : أنا لو مروحتش إنهاردة ه ..
قاطعته هي وقالت : هتريح قلبي ، وتريح نفسك اللي أتقطع من كتر الجري في الطريق دا
غمض بدر عينه وقال ببرود : حاضر
إتنهدت سيا براحة وقالت : غريبة أن الشقة نضيفة
بدر : كنت بجيب واحدة بتنضفها وبديها فلوس كل إسبوع بتيجي تنضف وتغسل وتمسح ..
سيا بحب : للدرجة دي بتحب جدتك
بدر بضيق وتكشيرة : هي اللي ربتني وكبرتني ، أنا دي الست الوحيدة اللي حبيتها من صنفكم
سيا بثقة : بس مش هتكون الأخيرة
بدر بصلها بطرف عينه وهي نظراتها تاهت فيه راح لافف وشه وإداها ضهره
سيا بهمس وهو مديها ضهره : بحبك .. أنا بحبك إنت وبس
دخل بدر أوضة جدته ، كل شيء زي ماهو كأنها لسه موجودة ، كتير كان بيتخيلها نايمة على سريرها أو صاحية بتحمر بطاطس في المطبخ عشان بدر بيحبها ، أول ما شاف أوضتها قلبه وجعه ، ف خرج بهدوء وقفل الباب وراه
لقى كينان في وشه وهو بيقول : يا زعيم ، البت ريما بتعيط في المطبخ
بدر بتأفف : يعم يخربيت العياط ، أنا لو شاري غراب مش هيجبلي الفقر زي البت دي
كينان : طب ما تروح تهديها يا زعيم دي مهما كان من دمك
بدر بعناد : أنا دمي مش زفر ، ومش ههدي حد وإقعد بقى إتهد
سيا من وراهم : بدر عنده حق ، ما تروح تواسيها إنت يا حنين
كينان : وإنتي مالك يا ست إنتي حد كان خد رأيك ! ما تلحقونا يجدعااان .. إلحقونا
بدر بملل : خلاص بس أتكتموا ، سيبها تعيط براحتها عشان لو كتمت جواها هتزعل أكتر ، خليها تاخد مساحتها من الحزن
كينان بإحراج : حاضر يا زعيم ، بس بصراحة أنا جعان إحنا ملحقناش نتغدى حصل علينا هجوم
بدر بتأفف : تعالى معايا نجيب أي حاجة من السوبر ماركت
كينان بص ل سيا وبعدين قال بحجة : أصل يا زعيم ضهري بيوجعني أوي يا زعيم
بدر من بين سنانه : ولما إنت مش قادر بتطلب أكل ليه !! خلاص هروح لوحدي
كينان بتكشيرة : زعيم والنبي خد البت سيا معاك
بدر بضيق : سيا إيه يابني دي رجليها بتوجعها هتفضل ماشية جمبي تعرج
كينام بتصفيرة : لا ماهو الدكتور نصح إنها لازم تضغط على رجليها وتمشي
بدر بص ل سيا وقال : فيكي حيل تمشي ؟
سيا بسعادة : وبتنطط لو عاوز
أخد بدر المفاتيح وقال : طب تعالي معايا
مشيت سيا ورا بدر وهي بتبعت بوسه في الهوا لكينان
راح لعب في شعره وقال وهو بيغمزلها : أي خدمة
بدر وهما نازلين على السلم : نجيب إيه طيب ؟ جبن ولانشون وكدا ؟ ولا نجيب مثلاً حجات زي فراخ أو لحمة بما إنكم مأكلتوش ؟
سيا حطت إيديها على كتفه وقالت : متقلقش أنا معاك ، هنجيب حجات محتاجينها
بص بدر لإيديها على كتفه وقال : ماشي
أنت تقرأ
خارج قانون الحب ♤ ( مُكتملة)
Romanceيُقال أن الحُب يفسد المنطق ويحول القسوة إلى لين ، ماذا سيحدث عندما تتورط سيا في براثن الخطر والغموض ♡
