حكايه بنات

اسكربت منفصل

            🕊كل سنه وانتم طيبين 🕊️
        🕊️صلوا علي من بكي شوقا لرؤيتنا🕊️
-يالهوووي اتاخرت يارب سامحني يارب سامحني
نزلت من العربيه نطت في توكتوك الطريق كان عند بيتنا واقف اكيد نصار الكلب بيفرق الحاجه من غيري حسبت السواق ونزلت امشي بخطوه سريعه لغيت ما وصلت ل(نصار) حطيت الكتب ومسكت صنيه عليها تمر وبلح وحلويات وبدات اوزع علي الناس اللي في العربيات
الاطفال بديهم حلويات وتمر
والكبار بديهم بلح وتمر عشان يكسروا صيامهم
وصلت عند عربيه وكان باين اللي فيها متعصب اوي ابتسمت بتوتر
-اتفضل
يالهوي ده هو يارب ما تكشف يارب استرها معايا انا عارفه عيوني بطلع قلوب اول ما بشوفه
=شكرا مش عايز حاجه ممكن بقي تفتحوا الطريق كده مينفعش
-علي فكره احنا مش مواقفينه بنلعب حضرتك احنا بنوزع حاجات علي الناس عشان تكسر صيامها
=ماهو لو فتحتوا الطريق الكل هيلحق يروح يفطر في بيته
-مش كل الناس بيوتها قريبه من الطريق ده عن اذنك
اتحركت وانا مدايقه اوي هو ازاي يتكلم معايا كده ولا هو مين اصلا ده احنا بنستني رمضان من السنه لسنه عشان نفرح الناس ويدعولنا وهو يجيي يقولي افتحوا الطريق مغرور وغبي مش حاسس بيا استغفر الله العظيم يارب
رجعت تاني اوزع علي الناس وبعد شويه لقيته جاي ماشي علي رجله
=ممكن كوبايه تمر وبلح
-لا معلش اصل دول
علي قد الناس اللي بيوتها بعيده
=علي فكره انا كمان بيتي بعيد وانتي المفروض عامله ده ثواب يعني مش واحد ياخد وواحد لا
-والله عرضت علي حضرتك تاخد وحضرتك رفضت دي حاجه ترجعلك
=وراجع بقول عايز
-صيغه الامر دي مبحبهاش مفكر نفسك مين... اللي يرفض النعمه تزول من وشه
لقيته بيبصلي وحط ايده في جيبه وطلع فلوس كتير اوي كونت بتحرك وسط العربيات وهو ماشي ورايا ونصار الكلب سبني وراح يجيب تمر وحاجات تاني عشان اللي معانا بيخلصوا لقيته بيمد ايده بالفلوس
=خدي اللي انتي عايزه وهاتي كوبايه
بصتله بقرف ولفلوسه قد كده شايف ان كل حاجه بتحصل بالفلوس بس الحق مش عليه احنا في مجتمع مادي كل حاجه بتحصل بالفلوس
-بص في محل اهو عنده بيبسي وعصير وتمر ومايه روح اشتري بفلوسك
=بس انا عايز منك انتي
مديت ايدي بكوبايه تمر عشان حرام عليا المدفع بيضرب
كونت عايزه اعرفه ان مش كل حاجه بتروح ممكن ترجع بسهوله وانه يركز في كل حاجه بيعملها كونت هعند اكتر لما لقيته مفكر ان عايزه فلوس بس كان الوقت فات مسكت كوبايه انا كمان وكسرت صيامي وهو مشي ونصار جه وفضلت واقفه بعد المغرب بعشر دقايق لغيت ما المكان فضي ودخلنا فطارنا وبعدها روحنا المسجد صلينا التروايح بعد ما خلصنا صلاه لقيت ست جايه تقعد جمبي:اهه عاملين المسجد مكان تلاقي الخطاب
-اتفضلي اقدر اساعدك
=انتي مخطوبه يا قمر
-لا ومش بفكر
=ليه بس انا ابني مهندس قد الدنيا والله ومحترم جدا والعيبه متطلعش من بؤقه واول ما شفتك قولت هي دي مرات ابني اللي هتريحني
-شكرا علي ثقتك بس انا مش بفكر في الموضوع ده
=طب انتي بتدرسي
-ايوه انا اداب علم نفس
=مشالله تبارك الله طيب شوفيه مش هتخسري حاجه
-مش هينفع والله انا لازم امشي
وقومت جريت من قدامها قبل ما تمسكني اصلي عارفه الستات دي كويس فضلت ماشيه بضحك لغيت ما وصلت عند البيت وشوفت شباب واطفال الشارع متجمعين ومسكين فوانيس وزينه وواقفين معاهم سلم
-ايوووه بقي يلاااا بينا
وشديت السلم وطلعت عليه وكونا بنعلق الزينه جه نصار وهز السلم بيا وقعني علي ضهري
-اهههه يخربيتك لبيت هزار البوابين ده ضهرري ياجدع
=انشفي كده يابت الله ده لسه اللعب هيبدا
فجاه لقيته بيولع صواريخ وبيضرب بومب جمب رجلي قومت ونطت علي كتفه ومسكت منه شويه وبقيت افرقعه في دماغه والكل بيلعب زينا وبيضحكوا
=الله الله ولاد اخويا العاقلين اللي مشالله واحد دكتور جراحه قد الدنيا وتانيه خلاص هتتخرج وعاقله
-انت متاكد من الكلام اللي بتقوله ده انت دارس الكلام ده احب اقولك كلامك ده كله غلط
=بجد اومال انا مالي عامل كده ليه
وبدا يضحك وشدني من علي كتف نصار ومسك مني صواريخ وبدا يولع معانا وفضلنا نضحك ونلعب وبعد فتره كبيره دخلنا نجري احنا تلاته وراء بعض كونت انا الاول ونصار ورايا وعمي ورانا واتفاجنا بوجود جدي واقف في وسط الصاله ومربع ايده
=مساء الخير يابابا
=ممكن اعرف كونتم فين وراجعين علي السحور
-اصل... اصل ياجدي انت عارف بقي اننا في رمضان وكونا بنعلق الزينه وعمي ونصار جرجروني للرزيله وفضلوا يلعبوا قدامي بصورايخ وانت بقي عارف الشيطان شاطر
=امممم شيطان ايه اللي في رمضان يابنت ابني
بلمت بمعني كلمه
-هااا
=تعرفي مش هزعقلك لان لا حرج علي المريض وانا فقدت فيكي الامل من الثانويه العامه خشي ياسمااا خشي ياماما
دخلت اجري وقفت وراء جدي اعملهم حركات واطلع لساني وهما هيموتوا ويضحكوا بس مش عارفين عشان جدي كان بيزعق وعلي اخره
=كده خلصت كلامي ودالواتي هبعتكم تجيبوا حاجه من بره
شفت جدي دخل وبيسحب الحزام من بنطلونه بس اظهار كده انه حلف مايطلع راح سايب البنطلون وجاب الجزمه ده كله وعمي ونصار مفكرين انه بيجيب فلوس وفي لحظه الجزمه طارت في نحيتهم نصار انبطح علي الارض الجزمه لبست في وش عمي ياعيني تقريبا كده والله واعلم مناخيره دخلت جوه دريت وشي ووقفت اضحك علي اللي حصل وسمعت جدي بيقول
=ارجعوووا مكان ماكونت منك له يلااااااا
طلعوا يجروا هما الاتنين
ولقيت جدي بيبصلي دخلت اجري علي اوضتي اللي علي الشارع الفجر خلاص فاضل عليه ساعه الا ربع وهما لسه بره وجدي قاعد في الصاله عشان يشوفهم لو حد منهم رجع فتحت شباك اوضتي علي امل اشوفهم وفعلا لقيتهم قاعدين في وشي بيضحكوا والله احنا عيله مجنونه ناديت عليهم
-بس بس عندكوووو شاااامبوووو
=لا ياختشي معندناش
-اووومال عندكوووو ايه دباديشب
=اه عندنا دباديشششب
=ابو تقل دم ابوكم انتم الاتنين
-كده ياعمي انا غلطانه اني هدخلكم خليكم كده
=لا استني ياسمااا قلبي هدخلينا ازاي
-هات خمشتاشر جنيه
=بنت عيب انا عمك
=انتي بعد خمشتاشر دي لا انتي اختي ولا اعرفك
-شكرا يا رجوله هات ياعمي خمشتاشر جنيه
=خدي حرق نار
وطلع فعلا الفلوس من جيبه وخدتهم
-بص همسكم ادخلكم من الشباك وبعد كده هطلع اخد جدو علي السطح لغيت ما انتم تطلعوا علي شقتك يا عمي اشطات يلا هات ايدك
وبدات اشد عمي من الشباك وهو بيطلع علي الحيطه ونصار سانده من ضهره وفجاه منعرفش جالنا الصوت ده منين
=حرررررررررررامي حررررررررررامي
انا من الخضه سبت ايد عمي ووقع علي نصار
وبقيت ابص في الشارع اشوف فين الحرامي والشارع كله طلع علي كلمه حرامي حرامي وببص ورايا لقيت جدي من الخضه وقعت انا كمان من الشباك عليهم وشفته هو نفسه بغباوته وغروره ماسك ابن خالي اللي كان بيحاول يفتح قفل الباب بمايه نار
احنا كلنا في شارع واحد
قومت وجريت نحيتهم
-انت بتعمل ايه سيبه وانت كمان بتهبب ايه يخربيتك
=والله نسيت المفاتيح في الشقه وجدك نايم قولت اتصرف
=تتصرف بمايه نار ياغبي مكنتش عايز تصحي جدك صحيت الشارع كله الله ينور عليك
ده كان صوت جدي اللي كان مدايق اوي شد ابن خالي من ايده ووقفه جمبه وشكره انه مسكتش او خاف وقال انا مالي
=خلاص ياجماعه احنا اسفين
وبصلينا
=جوووه
دخلنا نجري احنا الاربعه
اتسحرنا وصلينا ونمنا صحيت روحت الجامعه ورجعت اجري زي كل يوم وخدت الصنيه وبدات اوزع علي الناس بس وقفت علي صوت حد ورايا
=احم احم ممكن كوبايه تمر اصله حلو اوي
-اتفضل
اديته الكوبايه ومشيت وهو مشي وبقي كل يوم يحصل نفس الموقف وخلص الشهر الكريم
جات فرحه العيد كونت لبسه فستان وبلف حوالين نفسي زي العيال الصغيره وكونت حاسه انهارده يوم مش طبيعي في حاجه هتحصل نزلنا صلينا العيد ودعيت كتير اوي انه يكون من نصيبي ده حب الطفوله والمراهقه والشباب كمان حبيته بيني وبين نفسي علي راي الاغنيه رجعت وقفت علي الطريق قدام بيتي ومعايا بلالين بوزعها علي الاطفال اللي مع اهلها وفجاه لقيت ضوء متسلط علي وجه بيتنا وبدات صور تتعرض وكآن بيتنا شاشه كبيره
الصور دي كانت صور ليا ازاي ده
صوره وانا لسه بيبي وصوره وانا اول مره بمشي وصوره وانا واقعه وبعيط وصوره اول يوم الحضانه وصوره اول يوم مدرسه ونصار معايا
صوره في دروس وصوره ليا في الاعدادي بلبس المدرسه وصوره في ثانوي وصوره وقت نتيجه الثانوي وصور ليا علي مدار الاربع سنين جامعه صور ليا وانا بوزع حاجات رمضان صور كتير لمواقف ليا وانا بساعد الناس وصور وانا بضحك مع الاطفال وفيديوا ليا انا ونصار وعمي واحنا بنلعب في الشارع مين مهتم بيا لدرجه دي معقول قلبي بدا يدق جامد هو موجود يارب كونت بدات ادفن مشاعري واتعمل علي انه انسان مغرور ومينفعنيش
=تتجوزيني
-هااا
=ها ايه بس ولقيته رفع ايده لجدي وبابا والكل وقالهم بصوت عالي:مووافقه
لحظه ولقيت ترابيزه في وسط الطريق وكراسي وقاعد عليها الماذون في نص وجدي من ناحيه وهو من ناحيه وناش بتصور وبتضحك ونصار حضني وبيبوس دماغي فوقت من الصدمه علي جمله الماذون
=بارك الله لكما وبارك عليكما وجمع بينكما في خير
لقيته بيقرب مني ووقفنا في وسط الطريق وجارتنا بتزغرط وواحده شغلت اغنيه كتبو كتابك وواحده بتحدف ورد والاطفال واقفين حوالينا في دايره كبيره وسابو البلالين طارت حوالينا وهو بيضحك ومش مصدق لحظه وكونت في حضنه او بمعني اصح بتعصر
=مجنون بيكي سبحان من صبرني عليكي بتكبري كل يوم قدام عيني ومش عايز اقرب منك خايف عليكي وعدت نفسي انك مش هتكوني لغيري واني هقولك بحبك في الوقت المناسب ودالواتي حياتي جاهزه لاستقبالك لفيت وراكي سنين طويله اكبر منك بتلات سنين بس حبيتك اول ماعيني وقعت عليكي كل الصور دي صورتها وانا مستخبي وبراقبك ماعدا اول ذكرياتك معرفتش اكون معاكي فيها لكن نصار قام بالواجب سامحيني علي كل مره اتكلمت ببرود او برخامه مكنتش عايز اعلق قلبي بيكي خايف ان النصيب يبعدك عني وعشان اثبت لنفسي ان ممكن انساكي بسهوله بس كونت غلطان ياسما القلب
جه الوقت اللي اقولك فيه
خرجني من حضنه وصوته كان عالي:بببببببحححححببببك وعاشق لسماكي ياسما قلبي
ضحكت براحه وحمدت ربنا كتير في سري حلمي اتحقق اتجمعت معاه في حلال ربنا مش مصدقه رميت نفسي في حضنه وسط صوت الناس اللي بتضحك بفرحه واللي بتصفر واللي بتصقف وطبعا اللي بيصور ده موقف تاريخي لاول مره يكتب كتاب حد في وسط الطريق كده وتشهد عليه بلاد كامله
-مكنتش متخيله اني هكون في حضنك في يوم انت حب طفولتي ومراهقتي وشبابي قلبي مداقش غير ليك بحبك والله بحبك فرحانه اوي لفرحه الناس
=ومين ميفرحش لسما القلب الناس كلها بتحبك يانور عيني وفرحانين عشانك زي مابتفرحيهم
ده كان صوت جدي اللي جريت وحضنته
-فرحانه اوي ياجدو
=ربنا يفرح قلبك اكتر ياروح جدو وحياته كلها خالي بالك منها
=متخيل ان ممكن ازعل سما دي جنه الرحمن علي الارض
وشدني من ايد جدي وحضني
جمل كتير اترددت في عقلي
"ادعوني استجيب"
"انقطاع الخير عنك لفتره هو تهيئه لفيضان خير جديد"فهمت دالواتي حكمه ربنا في ان حب احمد يفضل في قلبي وافضل متابعه حياته كلها وهو ميعرفش اني متابعه حياته من علي مواقع السوشيال ميديا واعرف كل حاجه عنه بيحب ايه وبيكره ايه فهمت ان حلال ربنا احلي بكتير وان صبرت وكانت ثمره صبري هو اني بقيت علي اسمه ووقفت معاه قدام الناس كلها من غير خوف واعلنت حبي

#ميار طوخي#