#خنجر_الغضنف
#البارت_السابع_والعشرون٢٧
#حنين_حاتم
بلقيس...
خلصت لفاتحة وطشت لناس وخلة لبيت علينة اني وامي
مامصدكة لحد هاي اللحضة
يمكن لموت هوة اصدق شي بلحياة بس كأني دااتعامل وية كذبة
عقلي رافض تصديقها
لضوضاء الي بداخلي جانت اعلى من اصوات صراخ لفاتحة
جنت احس دواخلي تنهار
اعضائي تحتضر
حلفت ماارجع لزياد لو تنكلب لدنيا
امي جانت تعبانة حيل ماناقشتني بقراري رغم حسيتها ماراضية
وعدت لأيام احنة يومية نتكابل ونبجي
لانطلع لا احد يجينة
بس لحزن مخاوينا
شما احاول انسة تصد عيني على مكانة على كرسية على زرعاتة الي جان يحبهن
طلعت عصرية جان لجو بي برودة بس جنت محنوكة لبست لروب مالتة وطلعت بلبستان
نداريت ورة لبيت
وتحديدا بلمكان الي وكفنا بي اني وقيصر
صوتة من همسلي مااطلع منا إلة وانتي وياي
اثاري الحب حلم ونباك من عدنة
واثاري لقسمة مكتوبة إعلى جبهتنا
عذاب ولوع
شباب يضيع
موت مكدر ومكتوب بس شيطفي لوعتنا ....حنين حاتم
اذكر فزة كلبي من تخلة لسلاح براسة وصوتة صاح
طاهر شجابك هنا
صوتة من همسلي
وصليها لأبن عمج احنة نرد لشينة بأضعاف والي يضرنا يعد ايامة على اصابع ايدة
عقلي توقف عد هاي لجملة
شنو جان يقصد بيها
وليش طلب مني اكولها لزياد وهوة يدري زياد ميعرف بية احبة
كعدت بلكاع احس حيل بعد مابية
معقولة زياد الة يد بلصار لقيصر
عقلي صار يربط شي بشي
الي اسمة طاهر شمدري بمكان قيصر وشلون يندل بيتنا
قيصر اكدلي انو هوة جاي بدون علم اهلة
محد يدري بي جاي يخطبني
شلون جدة دزلة طاهر واخذة غصب
لا لا مستحيييل
ركضت للبيت
دكيت عليهم
رد علية صوت ولد طلبت احجي وية بسعاد
نطاهة الي
اول ماكالت الو بجت
بسعاد سمعيني حبابة لتبجين
اريد منج شغلة
وهلشغلة كلش مهمة بلنسبة الي سمعيني زين ونفذي الي راح اكولة الج
احجي ترة راح كلبي خير شصاير
اريدج ترحين لأبو خليل وتسألي بس بدون متجيبين طاري
تسألي شلون ندل مكان قيصر وعرف بي جاي،يخطبني
ليش هوة قيصر اجة خطبج
يااا اشو ماكالو
عرفتها ثولة مثل لعادة اخر من يعلم غيرت لموضوع وكلتلها تصيحلي انعام
صاحت عليها علما نزلتلي اني اتكرضم وجسمي يرجف واعصابي منتهية
بدون مااسلم سألتها
انعام جدو ابو خليل شمدري بمكان قيصر من اجة يخطبني ودزلة طاهر اخذة بلسلاح
_بلقيس عيوني شللج بهاي لسوالف لولد سافر وانتي تزوجتي انسي وعيشي حياتج ليش تتعبين نفسج بهلتفكير
