#خنجر_الغضنفر
#الجزء_الثاني_بارت55
#حنين_حاتم
بلقيس
ماتصورت هذا ليوم رح يجي
خمس سنين نسنني حتة وجهة
صدمتي من فتحت لباب وصار بوجهي والي صار بعدها ماجنت واعية علي مثل حلمان وفز من حلمة
اتصالي بقيصر جان الغلطة الي مااسامح نفسي عليها للموت
الغلطة الي نطت الحق لزياد وللكل بأتهامي
وصار الحق كلة وية زياد
ربطو شردتي من زياد بقيصر وكبرت لسالفة مثل كل سالفة يتدخلون بيها بيت عمو
لازم تكبر وتاخذ اكبر من حجمها
وتدخل خوالي جان القشة الي فصمت ضهري
اخذونا يمهم غصب هلمرة ماكدرت اسوي كلشي
هلمرة لوحيدة الي استسلمت بيها
احس حقي بلدفاع عن نفسي وتبرأتها نسلب مني وبعد ميحقلي افتح حلكي بحرف
كبرت لسالفة وصارت عشائرية وقيصر جاب عشيرتة ونحجت على كل لسان
(حبيبها لازملها لدرب ومنهزمة ويا من رجلها )
هذا الكلام اخرسني تماما
من تحس انو التبرير فقد قيمتة
وماعادلة قيمة يم ناس همة ميردون يسمعوك اصلا
رحت وية خوالي مكسورة واكثر كسرتي جانت على نصير الي بطل يحجي من يوم ضربت ابو كدامة
جان قبل يحجي يهذي بعض كلامة بصعوبة افهمة ولبعض افهمة بحكم تعودي علي
بس من يومها مانطق حرف
يكتفي بلأشارات
طول هلفترة جان زياد يتردد علينة يجي يعارك ويهين ويهددني بنصير ياخذة مني
جنت منهارة ادك والطم مااعرف شسوي
وامي تلوم اكلت كلبي
ورة روحتي وية خالو محمد الي شافلنا مشتمل بلفرع الي وراهم اخذت نصير لطبيب كال مشكلتة نفسية حبالة لصوتية وحنجرتة وكلشي عندة سليم
حاولي تخلقيلة جو عائلي هادء وابتعدي عن المشاكل قدر لأمكان
خالو بلبداية حجة ولام
بس امي فهمتة لسبب الي خلانة ننهزم من زياد
وبقت تلوم كلتلة محد سوالها حل لاعمام ولاخوال شتسوي لعد
اول مرة شفت امي توكف وياية وتدافعلي
بس اتصالي بقيصر ماجانت راضية علي واني نفسي ماراضية ولا اعرف شلون سويتها جنت بوضعية متسمحلي حتة بلتفكير على كد ماجنت مرعوبة وخايفة يكون مات
عدت علينة ايام وتفاجئت بورقة طلاكَي توصلني للبيت
على كد ماعانيت وتعبت حتة احصل عليها ماحسيت بذرة فرح
على كد ماتمنيت الطلاك كرهتة
على كد ماتعبت واني اسعى للتحرر كرهت حتة تحرري
جنت ابجي واعاتب ربي اكلة
ليش حتة بطلاكَي نفضحت ونحجة بشرفي وسمعتي
ليش من دون الخلكَ حتة بهجمان البيت انذل واكل وحل
حاولت افرح وانسا لصار واتوجه لأبني الي طلعت بي من هلدنية
نوفل ترك بيتنا ورجع كعد وية اهلة بعد ماصارو عندة ٣ اطفال وميكدر على لأجار
امي كلتلة اكعد بي ببلاش مااريد منك فلوس بس هوة ماقبل كللها هذا بيت اليتيمات حرام علية
طلع من لبيت وجواريننا اجر لبيت لبنتة ارملة وعدها جهال اجارة شي كلش قليل لإن محد اجة علي ضطرينا نقبل
لأجار وراتب بابا ندفعة للمشتمل الي كعدنة بي لأن المنطقة اجاراتها غالية
زغير شوية
استقبال ومطبخ بلوسط وغرفة نوم وصحيات وطارمة زغيرة كلت مؤقت بينما نستقر ونشوف بيت اكبر منة
ورا مدة اجتنا بسعاد وصميدع وجهالها علوصف وصلولنا بقو يمنة باتو
بليل ضلينة سهرانين نسولف
فاجئتني من كالت
شفتي النذل اخذت فليسات قيصر المسكين وصفا علحديدة
والله صميدع كالي نبيع ذهبي وننطيهن الة خطية عاد يحصلة قطعة باجر عكبة ورا زواج ولبيت ميكفي
