Yon dimanch aprè midi, Soraya ki te fin fè manje, te fon ti kouche jis pou l te ka fè kò l frèt. Aprè sa, pou l te ka al benyen. Li te nan twazè yo. Se pa ti cho solèy la te cho nan lè sa yo ! Kòm manje, Soraya te kwit diri kole ak djondjon epi sòs pwason ; manje prefere Boutpatat. Nonm sila se te mari manmzèl. Oubyen pou pi senp, yo tap viv nan menm kay men yo pat marye. Boutpatat te renmen pwason bouyi nan menm dimansyon ak pwason fri. Donk li te konn mande pou Soraya fè toulède yon sèl kou pou li. Soraya menm ki te renmen mari l, te konn toujou fè yon fason pou l satisfè misye.
De pèsonaj sa yo — Soraya ak Boutpatat — te ansanm depi yon bon moman. Anviwon de zan. Yo te rankontre yon fason ki dwòl, nan yon pwogram. Jou sa manzè te sou bay plezi, misye menm te sou pran plezi. Epi saw tande a, koneksyon an te tou fèt antre yo. Depi lè sa se fanm ak nonm yo te ye. Yo te fè kont voksal yo ansanm. Sou yon ane, lè Soraya te resi gwòs pou Boutpatat, misye te deside mete l nan kay. Paske selon prensip li, toutotan l pa gen pitit ak yon fanm, gen de bagay li pap fè pou li. Donk se yon ti jan akoz de Wilyam, pitit gason yo an, kifè Soraya te ka jwi kèk avantaj.
Jan nou te di l nan kòmansman an, Soraya tap pran yon ti van answit pou l te ka al pran yon bon beny. Manje a te fatige l, li te bezwen bon jan repo. Jou dimanch se jou li te pi rayi nan semèn nan. Paske depi w tande legliz lage, ou mèt tou konnen jounen an fini. Yon ti kadè l gentan katrè epi se rete w rete ou wè li fènwa nan men w. Soraya pat konn al legliz. Bon, li te konn ale, dènye ak premye jou nan ane an sèlman. Li te konn al mande Bondye gras. Men aprè sa, manzè te konn al legliz lè gen maryaj ak antèman sèlman. Donk jou dimanch, kon l fin fè manje, tout plezi l se te rezo sosyo yo. Boutpatat pat ba l zanmi nan zòn nan. Men malgre sa, gen kèk moun ki te fofile antre sou li.
Yon ti dòmi te gentan pran Soraya lè pòt lan te ouvè ak yon sèl fòs. Boutpatat te antre, met sou sa li te antre tou sou. Se te nan abitid li lè l antre tou pou l kòmanse fè vakam depi devan pòt la. Soraya te gentan tande l ki tap joure. Apèn manzè pral leve sou kabann nan, misye parèt sou li :
— Kòmsi la, manman bouzen, se anyen w pa jwenn pou w fè kifew vin kouche la ? Koman ? Manje a se mwen ki pou al pran l pou m boure tou ? Ou pap fout sèvi m manman kaka ?
Soraya ta pral ouvè bouch li pou l replike lè yon sèl souflèt pati. Boutpatat fèmen bouch li.
— M pa mande w koze. Fout leve al ban m manje a, malpwòpte !
Se te konsa depi yon bon moman. Depi Boutpatat sou, se kou sèlman li tire, ni sou madanm li ni sou pitit li. Yèswa, manzè te pran yon vole baton poutèt yon kòmantè « ou bèl anpil cheri doudou » yon nèg te fè anba yon foto l. Nan kòmansman, Soraya pat kapab. Lè l te resi di Boutpatat sa, misye te fè l gwo menas. Donk li te oblije rete avè l. Dèfwa misye te konn bat li jiskaske l prèske touye l. Souvan se pou nenpòt ti bagay ; vye jalouzi, manje ki pa gou, kouran yo pa bay, elatriye. Dèfwa misye te konn pran pòz lap bat Wilyam jis pou manman an te ka fache pou l te ka bat li tou.
Men nan jou dimanch sa, Soraya te pran yon desizyon. Papa l ki papa l pat konn leve men sou li, li pral desitire abitid vakabon sa. Vire l vire nan kwizin lan, li tonbe kriye. Chak fwa Boutpatat te fin bat li se te konsa. Li te toujou ap regrèt li te ak nèg sa. Men se la lavi a te deside mennen l. Se la plezi te voye l. Anba vant yon mòdèfòkè konsa ! Kou manzè vire tèt li, li wè yon bonm dlo ki te sou dife a. Depi lè Wilyam te fè tifoyid lan, doktè te tou di Soraya se dlo bouyi pou l ba l bwè. Lamenm manzè jwenn yon ide. Pou dat Boutpatat ap fè aksyon sou li, li pral resi retire zewo a. Anvan sa, li te gen yon ti krent men lè l sonje ak sa l te pran yèswa a, li te rejwenn fòs.
Nan jou dimanch aprè midi sa, Soraya ta pral touye Aleksann alyas Boutpatat, premye chèf gang Kafoufèy.
