Aprè aksyon an, Soraya te met de men nan tèt li l tèlman l te sezi. Li te ret kanpe la, tankou yon moun yo te friz oubyen tankou yon estati. Annaprè, de men sa yo ki te nan tèt li a te al nan bouch li. Manmzèl te anvi pale men okenn son pat sòti nan bouch li. Sezisman an ki te koupe lapawòl li konsa. Boutpatat li menm te tonbe de pye long, misye pat menm bat menm, li te tou rete tou rèd. Yon gwo lafimen tap sot sou kò nonm nan. Boutpatat te kangannen nèt, watadi se yon babekyou Soraya tap prepare.
Soraya te tèlman sezi, li te voye bonm nan jete epi li te kouri al souke mouche l. Boutpatat pa voum li pa pwèt. Lafimen te toujou ap soti sou kò l ki te gentan vin tou nwa. Premye reflèks Soraya se te rele « anmweyy men Boutpatat mouri !! » Men lè l te vin sonje se li menm ki te lakoz lanmò chèf la, li pat fè sa. Donk sa manzè te fè se kouri al chèche Wilyam. Aprè yon zak konsa, Soraya pat fouti ka rete nan bren an pou plis tan.
Answit manzè te ale nan chanm li an, li leve matla a epi l pran yon bouchon lajan. Depi lè Boutpatat te anpeche l gen kòb nan men l lan, se la li te fè bwat sekrè l. Chak lajan posib ki te konn pase nan men l te toujou konn al anba ti matla sa. Gen yon lè, Boutpatat te manke kenbe l. Jou sa li te met de jenou l atè di Bondye mèsi gwo salopri a pat sou men l. Paske sinon se li ki konn ki koulè misye tap fè l wè. Bouchon lajan Soraya te pran anba matla a, li te mete l nan yon valiz ki te tou prè an.
Toupre kabann nan te gen yon ti tab ki fèt anbwa ki te gen 2-3 tiwa pa anba. Soraya te ouvè premye a, li te rale yon nèf milimèt. Lè l te rale dezyèm tiwa a se te pou l te pran yon lo bal ki nan yon sachè. Nan dènye tiwa a li te gen yon lòt sachè ki te gen tout bagay enpòtanl, Soraya te pran l mete l nan valiz lan. Aprèsa li pat fè ni de ni twa ke lage pye l. Li pat bezwen plis ke sa. Kote l te fin delivre anba nèg sa, li pa tap kite pyès lòt moun kenbe l la toujou.
Kay kote Soraya tap viv ak Boutpatat la te gen yon pòt pa dèyè. Pòt sa te tou bay sou lari a. Kanta pou pòt devan an, li menm li te bay nan lakou a. Yon lakou ki te toujou chaje moun paske se la nèg yo te konn reyini. Donk Soraya te evite pase devan an pou pil chen anraje sa yo pat wè l. Malgre sa, apèn li tap sòti ak Wilyam sou ponyèt li, li te kwaze ak Dorestal. Misye se te youn nan jeneral yo. Soraya ki tap fè prese te oblije mete tèt li byen poze pou misye pat sou men l.
« Sa kap fèt madan bòs ?
Se konsa nèg yo te konn amize yo rele Soraya.
— Poze Dodo e ou menm kijan w ye ?
— M la cheri, nan men granmèt la. Genlè se sòti w pral sòti la ?
Dorestal te mande Soraya sa paske se te nan moman sa manzè tap fèmen pòt la dèyè l.
« Anh wi se sòti map sòti ak bebe la, m pral pase wè yon bon pwochen pi devan an.
— A lè sa cheri ! ? Fè pridan sèlman madan bòs ! Kot Patat ? Li la ?
Soraya te kouri reponn :
« Patat pa la non Dodo, misye poko rantre toujou. Li te di m li tap pase kot 2-3 nèg. Siman yo kenbe l nan vale byè !
— Anh eben ok. Antouka nou menm nou la, nap monte gad la.
— Alèz bb !
Kite Dorestal te tankou yon delivrans pou jèn dam nan. Li te vle kite kote sa rapid rapid anvan nèg yo te dekouvri sak te pase a. Epi pou mouche yo bay pou Dorestal la te panse li tap ka kanpe l nan wout li. Kèk minit aprè sa, Soraya te gentan rive bò lari a ap tann yon kamyonèt, Wilyam te sou ponyèt li. Tout lè li tap mache a, kè l te tèlman ap bat fò ke li te panse l tap tou rete.
Nan tèt li se te yon sèl kote li te wè ; kay Minouch. Se sèl kay zanmi li te santi li tap ka alèz pou moman sa. Dayè se te youn nan meyè zanmi Soraya Minouch sa te ye.
Men, bò lari a, kote Soraya te kanpe a te chaje moun. Sa kap monte, sa kap desann, chak ap regle yon bagay. Tout bagay tèt glas. Men zen an ta pral melanje se lè yon prado vit tente te fè yon sèl pakin nan mitan lari a. Alasegond pòt prado a te ouvè se katouch ki te kòmanse simaye.
Kat nèg te desann ak gwo zam lou nan men yo, kagoul nan tout figi yo. Sèl ti tou je yo ou te ka wè. Foul la te tou gaye, moun yo ki te la te vin tankou foumi fou. Sa kap kouri monte, sa kap kouri desann. Nenpòt sis moun gentan ap benyen nan san yo. Lari a ki te chaje moun te gentan vid yon sèl kou.
Lè Soraya vin sou men l, li te gentan twò ta. Nèg yo te rive sou li, yo rape ti bebe a nan men l epi yo fout li 2 bal nan pye. Lè yo pral fini avè l lan, gen youn nan nèg nan yo ki di :
« Pa touye l ! Se ti bebe a ki misyon nou. »
Lamenm Soraya te tonbe kriye tout lè l wè nèg yo prale ak Wilyam nan. Men li pat kapab fè anyen pou l sove pitit gason cheri l lan yo tap kidnape a. Anvan l pèdi konesans, Soraya te retande menm nèg lan pale ankò. Vwa misye pat etranje ditou pou manzè, tankou yon vwa li te konn tande deja.
