أسكريبتات بالعاميه

الدعم النفسى⁦♥️⁩

خلاص قررت أتوقف عن الكتابه ، قررت أتوقف عن أى حلم ليا ، قررت أنسى أنى بحلم أبقى من الروائيين والمشاهير ، نسيت الحلم أصلاً ونسيت أنا بحلم بـ أيه ، توقفت والمرة دى بجد ، مش مجرد كلام فى الهوا .
هقفل أكونت الفيس والبيدج ، وهقفل الوتباد ، هشيل كل الأبليكيشنز اللى عندى ، وعلى الحلم السلنكاتيه ، وأتمنى أنى أكون زوجه وأم ناجحه وست بيت شاطرة بعد ده كله .

قولت الكلمتين دول لمحمد وأنا كلى عصبية ونرفزة وأنا كلى حسرة وقهر على حلم بيضيع منى ومن إيديا ، وبسبب أيه ، بسبب ناس مبتقدرش المحتوى اللى بنزله ولا بتهتم بيه ولا بيتفاعلوا معايا نهائي .

لقيته بكل الهدوء والحنية اللى موجودين فى الدنيا قالى
" عنه لا حد قرألك أنا هقرأ وهسقفلك كمان ، أنا هعملك ريأكت على كل البوستات وهعلقلك ، وأنا هسمع قصايدك ياستى ، وأنا مش موقفنى شئ عن أنى أخدك من أيدك لأكبر دار نشر وأعملك كتاب غير أنى لسه خطيبك ، وميصحش أسافر بيكى ، أتجوزينى أنتِ بس وأنا هفتحلك دار نشر وأنشرى فيها لوحدك كتب ياست البنات ، أوعى تتوقفى عن الكتابه فى يوم أنا حقيقى بستفاد منك ومن كتاباتك ، بحب أقرألك ، بحب أفتح كل يوم الأكونت بتاعك أشوفك نزلتى أيه وأستفاد منه ، كل يوم بفتح الفيس أقول أنا هتعلم أيه حلو من وفاء النهارده ، أنتِ ربنا أداكى موهبه نميها خلال الفترة دى وأقرئ كتير لغه عربيه وأقرئ لكُتاب كبار ، علشان تعملى كتاب يليق بـ أنه يحمل أسم وفاء صلاح ، أجتهدى وأشتغلى على نفسك جامد الفترة دى ، سيبى اللى يعمل ريأكت يعمل واللى ما يعملش براحته ، متربطيش نجاحك بـ الناس ، النجاح الفعلى أنك من جواكى أتغير للأفضل وده أفضل شئ ممكن يوصله الأنسان ، وأنك تساعدى الناس يغيروا تفكيرهم ده شئ مش سهل ، صعب شويه ، محدش بيتغير من أسكريبت يقرأه ولا روايه يقرأها ، الناس عايزة السهل يا وفاء ، صدقينى محدش بيقرألك فعلاً وفاهم أنتِ تقصدى أيه بـ أسكريبتاتك دى غير العقول الناضجه ، ووعد منى كل أسكريبت ولا روايه تعجبنى هيجيبلك هديه ، ويلا بقا أكتبى حاجه عظمه زى عادتك "

قفلت منه المكالمه وأنا جوايا كميه طاقه إيجابية متتوصفش ، عايزة أعمل كتب كتير جداً علشانه وعلشان أثبتله أنى عند حسن ظنه بيا ، عايزة أوصل لحلمى بس علشان هو يتباهى بيا وسط الخلق .

وبعدها كلمنى تانى وكانت مكالمه رومنسيه قمر اوى اوى وقفل ، وبعدها بعتلى المسدجات اللى لمست قلبى دى ع الوتس .

حقيقى هو أكبر داعم نفسى ليا ، وأحسن أختيار وأعظم شريك حياه ، ده اللى كنت بتمناه طول عمرى .
عوض الكون كله جالى فيه ، وحنية الكون كلها أتشالت وسكنت قلبه ، متهيألى مش هبقى محتاجه حاجه تانى من الدنيا وأنا معايا راجل زى ده ، وهفضل طول عمرى اعافر علشان أوصل وأحقق حلمه قبل ما يكون حلمى .
هعافر علشان هو يستاهل زوجه يتباهى بيها وسط الخلق ، يستاهل أنه يتعمل علشانه المستحيل ، يستاهل يتحب ⁦♥️⁩