أسكريبتات بالعاميه

الحب مش بالسن ⁦♥️⁩

قاعدة في أوضتى ببكى للمرة العاشرة تقريباً لنفس السبب اللى هو رفض جوازى من حبيبي اللى مفيش حد في الدنيا دى بيحبنى أد ما هو بيحبنى .
أنا واثقه أنى لو لفيت الكون كله حافيه علشان ألاقي راجل جدع زيه مش هلقي ، هو فيه كل حاجه حلوة ، حنين ولطيف وذوق وبيفهم أوى في الأصول ، بـ أختصار أى بنت تتمناه .

وبعدين هو مش مجرد حد معرفه سنه ولا أتنين ده عشرة عُمرى .
ده أنا اللى مربياه ، فاكرة أوى أول لما أتولد كان عندى 7 سنين .
فـ اليوم ده ماما خدتنى أنا وأخواتى بيت خالتو علشان خالتو بتولد أول طفل ليها ، أول لما أتولد كان بيصرخ أوى ولون وشه أحمر وشعره خفيف ، كان طفل جميل جداً ، كان وزنه يدوب كيلو ونص .

فاكرة ماما ساعتها سألت خالتو .
- ها هتسميه أيه ؟
= المُحمدى أنا بحب الاسم ده أوى ياختى .
- الله ، المُحمدى أسم جميل وروعه ، يتربي فـ عزك وعز الحج ياختى (كان جوز خالتى عايش في السعوديه وبيطلع عمره كتير أوى فـ كانو يقولوله حج رغم أنه سنه صغير مكملش 30 سنه ) .

وفاكرة بردو أيام حمل خالتو فيه أنا كنت بفضل أحط إيديا على بطنها وألعب مع النونو وأحكى معاه .

كبر المُحمدى شهر ورا شهر لحد ما بقي سنه وبدأ ينطق الحروف ويتعلم المشي .
أول خطوة خطاها كنت أنا ماسكه إيده ، كان سنى وقتها 8 سنين .
وبعدين بدأ ينطق أسمى ' أزة ' .

أتعلقت بيه جداً زى أى طفل صغير ، ومعروف يعنى الطفل الصغير ليه بهجه وخطفه بيخطفها لكل القلوب عن أى حد تانى غيره .
كنت بروح ديماّ عند خالتو ، أشيلها المُحمدى وألعب معاه وهى تنضف البيت .

كبر المُحمدى بقا ، وراح الحضانه وبقيت أعمله الواجب وأكتبله أسمه وأسم خالتو ، وأسمى أبوه .
لحد ما في يوم قالى :
- عزة ! (خلاص كبر وبقي يقول عزة بدل أزة )
= نعم يا مدميدو .
- علمينى أكتب أسمك .!
= ماشي يلاا .

مسكت القلم وكتبت أسمى وبدأ يكتب الأسم تحته أكتر من مرة ، لحد ما أتعلمه .
كنا أنا وهو مبسوطين جدآ جدآ بالاسم اللى أتعلمه ، كان كل شويه يكتب عزة .

وصل المُحمدى سنه رابعه ، وأنا كنت ساعتها 17 سنه يعنى تانيه تجارة ، مروحتش ثانوى عام مكنتش شاطرة نهائي !
وفـ يوم كان راجع من المدرسه فـ جالى سألنى :
- عزة أنتى بتحبي سيدنا محمد ؟!
= أكيد عليه افضل الصلاه والسلام في حد يكره النبي !؟
- وأنا كمان بحبه أوى ونفسي أعمل زيه !؟
= تعمل أيه بقا النبي أعماله كلها جميله وتسكن القلوب ، عايز تصلي ولا تتصدق ولا تعطف ع اليتيم ولا أيه بالظبط .؟!
- ولا حاجه من ده كله أنا عايزة أتجوز  وحده أكبر منى علشان أبقي أقتديت برسول الله علشان أنا بحبه خالص .
= لو لقيت وحده زى السيدة خديجة أبقي أتجوزها يا مدميدو .
- وأنا هلاقي فين زي السيده خديجه الأستاذ قالنا مفيش زيها تانى أنا ممكن ألاقي وحده تانى أكبر منى وأتجوزها .
= جدع برافو عليك لما تلقاها أتجوزها (كنت ساعتها باخده ع أد عقله )
- منا لقيتها .
= تلقيك بتحب وحده فـ 6/1 ولا حاجه يخيبك يامدميدو .
- لا هى مش في 6/1 هى في التجارة .
= أحييه معايا يعنى أدى ، مين دى ياولاه !!
- أنتى !
= عايز تتجوزنى أنا !!!!!! طيب موافقه يلا روح زاكر بقا .
- ماشي ياحبيبتى .