اسرار

اسرار 2

اسرار
الفصل 21

ذَٰلِكَ لِيَعْلَمَ أَنِّي لَمْ أَخُنْهُ بِالْغَيْبِ وَأَنَّ اللَّهَ لَا يَهْدِي كَيْدَ الْخَائِنِينَ  (52 يوسف)
الموظف: انا جاي اوصل اوردر الهدوم ده
ساره خدتهم منه بحماس وفرحة وداخلة تفرج شمس : تميم بعتلي دول عشان يصالحني
الموظف  دخل خطوتين وراها : لو سمحتي يا مدام جنة امضي ليا انك استلمتي هنا
ساره وشها كله اتقلب ورمت الشنط من ايديها ولفت للموظف... انت قولت يا مين ؟!!
الموظف بتوتر: جنة مدام جنة
ساره بصتله لحظات و دمعت وطلعت علي اوضتها ... اتنهدت شمس و مضت للموظف علي الاستلام
شمس : دادة منى
منى : نعم يا هانم
شمس شاورت علي الشنط المرمية : طلعي دول في أوضة جنة وخلي بنتك لو فوق ترتبهم
منى : بنتي فوق يا هانم مع علي هقولها حاضر
رجعت شمس مكانها تفكر و سمعت صوت نزول حد وبصت كانت ساره  لابسه بنطلون واسع و تيشتيرت مريح بكم وكوتشي
شمس : انتي رايحه فين؟
ساره : هروح لتميم !
شمس : انتي الدكتور قالك ارتاحي
ساره : مش هرتاح غير لما اروح
شمس اتنهدت: طيب خلي بالك من نفسك 
خرجت ساره وهي متعصبة تشوف تميم
في الشركة تميم كان رايح جاي بيبص علي الشغل والموظفين وطبعا جنة
كانت جنة قاعدة علي المكتب و جنبها سليم بيوريها ورق ويعرفها الشغل تميم مقدرش يتحمل وراح عندهم
تميم : ايه يا سليم هنسيب الشغل والشركة ونقعد مع المساعدين
سليم : انا بعرفها شغلها !!
تميم : شوف انت شغلك وهي ممكن تعرف شغلها من اي موظفة هنا
جنة بهدوء : انا كده خلاص عرفت كل حاجه اصلا شكرا جدا يا سليم.. مستر سليم
تميم بعصبية: قوم يا سليم شوف الطلبية الجاية قوم
سليم : حاضر هنزل اشوفها
نزل سليم وتميم قعد قدام جنة علي المكتب وهي بصتله ورجعت تبص للورق
تميم: الأنتي بتعمليه ده مينفعش كلهم هنا مفكرين انك مراتي !!
جنة : وانا عملت ايه يعني وبعدين انا هنا موظفة لا اكتر ولا اقل
تميم : ايه الأنتي لبساه ده
جنة : فستان
تميم بتريقة: بجد والله ايه المعلومات القيمه دي... بتكلم عن فتحة الفستان
جنة بإستعباط بصت علي الفستان من قدام : ما هو مقفول اهو ماله
تميم مد ايده وشاور علي ضهرها من ورا وهو كل ده قاعد قدامها علي المكتب .. في اللحظة دي دخلت ساره
ساره بزعيق : ما شاء الله علي الشغل وجماله
تميم قام وقف بخوف : حبيبتي جيتي ليه تعبانه ولا حاجه
ساره : تميم تعالي ندخل مكتبك نتكلم عشان معليش صوتي هنا
تميم مسك ايد ساره ودخل بيها المكتب وقبل ما ساره تقفل الباب بصت علي جنة بغل وقفلته
ساره خدت نفس : بتعمل ايه هنا ؟
تميم : بشتغل
ساره : تميم متعصبنيش جنة بتعمل ايه هنا ؟!
تميم : بتشتغل برضو هي جت لسليم وخدها سكرتيرة فترة عنده
ساره : تمام انا كمان عايزة ارجع اشتغل
تميم : لاء انتي عارفه كويس ان الدكتور منع ده
ساره: يعني اسيبك ليها في الشركة والبيت ما تروحو شهر عسل احسن
تميم على صوته : علي فكره ممكن اعملها عادي متعنديش معايا تمام
خرجت ساره من عند تميم وبصت لجنة بكره و مشيت
في كافيه نجلاء قعدت نجلاء و رحمه وساره وسمعو ساره للأخر وهي متعصبة
نجلاء: يعني واخده جوزها منها وبتعملي كده؟!! .. بس ده العدل حسيتي بنص احساسها تقريبا
ساره : نجلاء انتي المفروض تبقي جنبي !!
نجلاء : ابقي جنبك في الصح لكن الغلط مستحيل
رحمه: براحة يا نوجا عليها
نجلاء : من الأول قولتلها بلاش حصل ولا لاء
قامت نجلاء متعصبة دخلت المطبخ ورحمه استنتها تدخل
رحمه بهمس: ساره انتي غبية مش هتبطلي عصبيتك دي
ساره بصوت واطي : اعمل ايه بقولك رجع يحن ليها!!!
رحمه: لو كان بيحبها مكنش اتجوزك اصلا اسمعي مني بس اهدي وخليكي زي ما انتي (غمزتلها)  ثابته و واثقة و ناعمه
تميم خلص شغله وخرج ياخد جنة عشان يروحو بس مشفهاش علي مكتبها راح يشوفها في مكتب سليم وهو عاصر علي نفسه ليمونه وفعلا خبط ودخل وهي كانت واقفه بتلم ورق
تميم بإبتسامه مزيفة: مساء الخير يلا يا جنة عشان نلحق نروح
سليم من غير ما يرفع عينه في تميم ومن غير اهتمام: تقدر تروح انت وانا هجيبها معايا
تميم : نعم ليه ان شاء الله انت معاك عربية وانا هروحها جري!!!
سليم قام وقف : انت عارف ان في غدا شغل دلوقتي وهي لازم تكون معايا ولا نسيت
تميم بص لجنة بلوم: ماشي هاجي معاكو
سليم : هو في ايه يا تميم ده شغل الا لو انت مش واثق في مراتك!!!
تميم بصلهم بقلة حيلة ورزع الباب ومشي.
سليم ابتسم بحزن: كويس كده يا جنة عارف اساعدك
جنة بعدم فهم : قصدك ايه؟
سليم: انتي بتعملي كل ده عشان تخليه يغير ويطلق ساره وتبقي انتي بس مراته
جنة بصدق وبراءة: لاء خالص
سليم بإستغراب : امال ايه
جنة : عادي جدا بس مش حبه اتكلم في تفاصيل ... علي الاقل دلوقتي ممكن
سليم ابتسم: اكيد
يسرا في مكتبها خبط عليها الباب
يسرا : ادخل ..
رفعت عينها وابتسمت ... اتمني تكون جايب أخبار كويسة
عمر ضحك : الأنتي طلبتيه ... اعتقد ساره راحت النهارده وهي هتولع عند خالتها انا عارف شكلها ده لما تبقي متضايقة جدا وفي نفس الوقت مش قادرة تعمل حاجه
يسرا ضحكت : كويس وانت برضو خد الظرف بتاعك من بره سيباه ليك وسرك في بير
عمر : انا بس عايز وظيفة ثابته شغليني هنا انا اتبهدلت ارجوكي
يسرا بصتله بتفكير شوية : تمام بكره تعالى وهقولك علي مكان في قسم الحسابات هنا
عمر : شكرا جدا
خرج سليم مع جنة في الاجتماع و ساب ليها فونه وهو في الاجتماع مهند رن اكتر من مره ف قامت جنة بعيد ترد
جنة : الو
مهند : الو جنة!!! مش ده رقم سليم
جنة : اه هو بس هو مشغول ف انا رديت
مهند : انا مش فاهم حاجه بس عمتا خليه يجي ياخد اخته من المستشفي
جنة بخضة : مريم مالها ؟!!'
مهند : كويسة تعالو بس بسرعه انا هبعتله العنوان دلوقتي اهو سلام
سليم قام  وراح لجنة : في ايه يا جنة ؟!!
جنة بتوتر : مهند بيقولك روح خد مريم من المستشفي وبعت العنوان
سليم اتخض علي اخته واعتذر من الاجتماع ومشي
مريم في المستشفي في الأوضة ومهند قافل عليها من بره وهي جوه بتخبط
مريم بزعيق: بقولك افتح عايزة اروح
مهند : قولتلك لاء يا انا اوصلك يا هتستني سليم
مريم : انت مالك انا كويسة وهعرف اروح سيبني بقي وبعدين متخافش مش هرفع عليك قضية
مهند ضحك بسخرية: بتهزري صح !!! انتي الغلطانه اصلا
في الوقت ده وصل سليم وجنة ولقو الممرضين بيضحكو ومهند ومريم صوتهم عالي وبيتخانقو
وصل سليم  عندهم بإستغراب: ايه البتعملوه ده افتح الباب يا مهند
فتح مهند الباب لسليم و مريم زعقت في مهند وبعلو صوتها: لاء انت كنت قاصد تخبطني عشان سيبتك وروحت للأحسن منك وانا عارفه انك هتموت عليا
مهند اتصدم من كلامها واتحرج في نفس الوقت وفاق علي صوت سليم وهو بيضرب اخته بالقلم .
سليم بعنف: انتي قليلة الأدب اصلا ومفيش حد عارف يوقفك عند حدك
مهند بإحراج استأذن منهم ومشي بسرعه ... ساره فضلت واقفة متنحة حاطه ايديها علي بوقها من الاحراج 
خرج مهند بأقصى سرعة بعربيته و كان ندمان ندم عمره
وصل سليم و جنة و مريم البيت و ساره و تميم كانو قاعدين تحت واول ما سليم دخل زق مريم علي امه
سليم بعصبية : ابعدي بنتك عن وشي عشان مموتهاش
طلع سليم علي اوضته وهو حاسس كل الدنيا قفلت عليه صاحبه زعلان و اخته.... وضعه مع جنة مش عاجبه مكنش المفروض يقربها منه تاني !!
تميم تحت بيكلم جنة بزهق: ايه يا جنة بيقولولي اني جبتلك  هدوم وانا معرفش 
جنة ركزت لحظات وردت: لاء مش انت طبعا انا الجيباهم
جت جنة تطلع اوضتها تهرب من الواقفة معاهم وقفها صوت تميم الشديد
تميم: استني يا جنة
وقفت جنة وحاولت تثبت: نعم يا تميم عايزة اطلع اشوف ابني
تميم بحزم: انتي جبتي الهدوم دي كلها ازاي يا جنة هو انتي كنتي بتشتغلي
جنة: ايوه في واحده صاحبتها واشتغلت معاها ... عن اذنك بقى اشوف علي
تميم وقف شوية يفكر مين صاحبتها واصلا جنة ملهاش اصحاب ومتعرفش حد غيره ... قطع تفكيره ايد ساره
ساره : مش هنطلع بقي ولا ايه؟!
تميم طلع مع ساره بس عقله مع جنه وفضل يفكر لحد ما وقف قدام باب الأوضة
ساره : هتفضل واقف بره مش هتدخل
تميم : ادخلي يا ساره وانا دقيقة وجاي
ساره بغيرة مكتومة: ماشي يا حبيبي متتأخرش عليا
راح تميم علي أوضة جنة وفتح الباب ودخل علي طول وجنه اتخضت وقامت من علي السرير مفزوعه( كانت جنة لابسه طقم نوم شورت و تيشيرت ) 
جنة : ايه يا تميم ده مش تخبط
تميم بإحراج لف وشه : انا اسف متعود بدخل عليكي عادي
لبست جنة روب وقفلته: خلاص يا تميم اتفضل
تميم : مين صاحبتك دي و بتشتغل ايه
جنة : وانت بتسأل ليه ؟
تميم : أصل كده انا فهمت تغير لبسك و اسلوبك ورجوعك
جنة قربت من تميم ومسكت ياقته واتكلمت بهدوء :  تميم هو انت مش عايزني اقعد هنا
تميم كان حاسس انه واقف قدام شخص جديد ...
تميم : اتغيرتي اوي يا جنة ؟
جنة بدلع: للأوحش؟
تميم : ليه مكنتيش كده من الأول
جنة : انت معرفتنيش انك عايز كده
تميم اتنهد: وبعدين
جنة : هناخد شوية وقت نعرف لو هنقدر نكمل نرجع مش هتقدر خلاص
تميم: ماشي يا جنة هشوف علي شوية وهمشي
جنة : طبعا براحتك
دخل تميم شال ابنه و قعد معاه شوية بس كل شوية عينه تروح لجنة وهي قاعده ماسكه الفون بتكلم يسرا وتحكي ليها
يسرا : جدعه يا جنة بس اوعي تحني
جنة : عمري يا يسرا كل ما اشوف ساره دي دمي يغلي اصلا
يسرا : كملي كده وبكره نتقابل تمام
جنة : تمام
تميم قام وقف وساب علي : انا همشي بقي لو عايزين حاجه قوليلي
جنة : تمام
وتميم خارج من أوضة جنة مبتسم وبيكلمها كان سليم خارج من أوضته وشافهم وبص لجنة بصة صعبة اوي بعدين دخل لمريم الأوضة
دخل تميم لساره وكانت عاملة نفسها نايمه عشان متتخانقش وتميم كان فاهم كده ونام برضو
مريم في اوضتها ماسكه الفون بصاله وساكته لحد ما سليم خبط عليها ودخل
مريم بإحراج: تعالى يا سليم
قعد سليم قدامها علي السرير : عاملة ايه دلوقتي
مريم ابتسمت: الحمد لله احسن
سليم : متزعليش مني علي الحصل بس
مريم وقفته: انا عارفه اني غلطت
سليم : ليه عملتي كده ؟!
مريم : معرفش حقيقي بجد معرفش بس انا هعتذرله
سليم قام وقف : ياريته هيقبل اعتذارك يلا تصبحي علي خير
دخل سليم اوضته ولف عشان يدخل الحمام سمع صوت قفلة الباب بيبص و راه شاف جنة
دخلت جنة اوضة سليم وقفلت بالمفتاح من جوه  وحطت المفتاح في جيبها
سليم اتخض وقام وقف ...
سليم : انتي اتجننتي افتحي الباب يا جنة
جنة : مش هفتحه غير لما اتكلم معاك
سليم بعصبية ومش قادر يبص ليها : لو سمحتي
جنة: لو سمحت انت يا سليم .... مش هقولك حاجه غير بلاش تظلمني قريب هتفهم كل حاجه وقريب كل حاجه هتمشي زي ما انت عايز بالظبط
لفت جنة وفتحت الباب وخرجت مبتسمة وسليم واقف تايهه مفهمش قصدها بس قلق لتعمل حاجه تضر بيها نفسها ....
جنة كانت خارجه من الأوضة لقيت في وشها ساره واقفه ايديها في وسطها ورافعة حاجبها وماسكة فون صورتها  وبتضحك بتريقة .... في واحدة محترمه تخرج من أوضة شاب دلوقتي