سميرة: يلا نبدا حدوتة جديدة؟
فريدة: يلا يااحلى تيتة
سميرة: كان يا مكان ياسادة ياكرام، ما يحلى الكلام إلا بذكر النبي عليه الصلاة والسلام،صلي على النبي
فريدة: عليه افضل الصلاة والسلام
سميرة: كان في مدينة زمان اسمها مملكة الحُب، كان فيها الناس بيستأذنوا يحبوا
فريدة: هو الحب باستأذان ياتيتة؟
سميرة: الحب من عند ربنا، وقلوبنا ملناش عليها مِلك
فريدة: كلامك صعب ياتيتة، بس كملي
سميرة ضحكت ضحكة خفيفة وكملت: كيان كان ماشي من غير حبيبة و...
فريدة: كيان مين؟
سميرة: بطل الحدوتة يافيري، ولو قاطعتيني تاني مش هحكي
فريدة بتذمر: طب متقوليش كلام صعب ووضحي
سميرة: حاضر؛ كيان دَ كان راجل في المملكة دي، مش لاقيله حبيبة كل مايروح لواحدة يلاقيها عندها حبيب.
وفي يوم اعجب ببنت جميلة اووي اسمها روضة، راحلها قالها ممكن احِبِك؟، روضة اتكسفت ورجعت شعرها لورا وخدودها احمرت وذادها الخجل جمال، كيان كان خايف اوي ترفض او يكون عندها حبيب لكن روضة قالتله
روضة بخجل: م. ممكن
كيان بفرحة: انا متشكر اوي، هاتي رقمك اكلمك ياساكنة اعماق الفؤاد
روضة برفعة حاجب: ازاي؟
كيان: مجازًا ياانسة
روضة: اسمي روضة،وبيقولولي رودي
كيان: وانا كيان وبيقولولي كينو
روضة: تمام، رقمي اهو، 58............
كيان شكرها بفرحة وكان مبسوط اوي، ورجع البيت وهو فرحان انه بقى عنده حبيبة وبليل رن عليها واتكلموا، ومع الأيام حبوا بعض جدًا، وكان هناك مفيش حاجه اسمها جواز، كان كله حُب عشان كدة اتسمت مملكة الحُب ومكانش فيه هناك فراق لأن مكانش فيه حد وحش عشان يتفارقوا ومكانش حد عينوا زايغة وكلهم كانو من برا المملكة لأن طبعا مفيش هناك جواز فبالتالي مفيش تزاوج ومفيش خلفة، وجه يوم وروضة قابلت كيان زاي كل مرة واتكلمت معاه.
روضة بخجل: كيان، متيجي نتجوز
كيان بأندهاش: نتجوز؟ بس دي محصلتش قي تاريخ المملكة ابدًا
روضة: خلينا نكسر الروتين ونتجوز ونعمر الأرض، ربنا خلقنا عشان نعمرها مش عشان نحب بعض في الحرام لأن دَ مش شرع ربنا
كيان بحب: وانا موافق يلا
وخرجوا برا المملكة، ونزلوا مصر أتجوزوا ورجعوا متجوزين، وهما ماشين ماسكين ايدين بعض قابلهم واحد معندوش حبيبة، فراح لروضة وسألها
.../ممكن احِبِك؟
كيان اتنرفز جدًا وقالها بكل غضب: تحب مراتي؟ لييييييه؟
الراجل خاف جدًا وطلع جري على امير المملكة حكاله وهو استغرب وجابهم قدام الشعب كله وسألهم انتم اتجوزتم؟ قالوله اه
الامير جاب مشنقتين وشنقهم بكل قسوة قدام الشعب كله، وقال بكل جبروت ان دَ عقاب اللي يخالف قوانين مملكة الحُب
طبعًا الكل خاف من الجواز وحزنوا على شهيدين الحُب، لأن الكل كان بيشهد بحبهم الأسطوري واللي متوجدش في المملكة دي من الآف القرون
وكلمة ممكن احِبِك دي اتمسحت من قانون مملكة الحُب عند الشعب كله ومحدش بقى يقولها، احترامًا لشهيدين الحُب
واتعرفت قصة كيان وروضة شهيدين الحُب بأجمل كلمة على وجه الأرض "ممكن احِبِك؟"
فريدة بدموع: الله ياتيتة، الحدوتة دي حلوة اوي
سميرة وهي بتمسح دموعها: من اكتر الحواديت اللي بحب احكيها
فريدة: تيتة! نسيتي تقفلي الحدوتة
سميرة بأبتسامة وبقايا دموع: توتا، توتا، توتا كتبتلنا الحدوتة
#سلسلة حواديت توتا
#توتا خالد
#لا خلاف إن رأيكم يهمني
