سميرة: فيري!
فريدة: ايوة ياتيتة
سميرة: بتعملي ايه؟
فريدة: بشوف البنات على السوشيال ميديا عمالة تقول اتخطبت، اتجوزت، خلفت، اتطلثت، وهكذا
سميرة: طب سيبي الموبايل ده وتعالي احكيلك حدوتة حلوة
فريدة بملل: لا ياتيتة انتي حواديتك كلها قديمة
سميرة: تعالي بس، هحكيلك حدوتة جديدة حصلت في زمن 2021
فريدة بحماس: واااو طب يلا احكي
سميرة: كان يا مكان ياسادة ياكرام، مايحلى الكلام إلا بذكر النبي عليه الصلاة والسلام، صلي على النبي
فريدة: عليه افضل الصلاة والسلام
سميرة: كان في بنت جميلة اوي بتحب ربنا ونفسها تقربله واتعرفت على بنت تانية معاها في نفس الكلية بس اتعرفت عليها عن طريق جروب الدفعه، الاول كانوا بيكلموا بعض عادي كاصحاب وكدة، لكن بعد كدة بقوا اكتر من الاخوات وبقوا يحبوا بعض اووي
صاحبتنا اسمها مي، مي قربت من ربنا وبقت تحفظ قرأن واحاديث، المهم في يوم كانت بتلعب بابجي مع صحبتها ف دخل عليهم حد غريب، قالت لصاحبتها انها هتروح تصلي عشان مصلتش
مشيت مي وهو فضل يكلم صاحبتها ويسأل كل شوية عن مي وخد معلومات عنها من زميلتها، طبعا مي لما عرفت بهدلت الدنيا وقالتلها ازاي تديله معلومات عني، ده بني ادم منعرفهوش
المهم، عدى فترة كل يوم محمود يسأل عليها عن طريق صاحبتها وهي بتوصل لمي، وفي يوم مسألش عليها ف دخلت مي اللي اتعودت على اهتمامه وحبت الاهتمام ده سألت عليه صاحبتها اللي بتجيبلها الاخبار قالتلها ده عمل حادثة،والكلام ده كان يوم 14/1/2021
مي فضلت تعيط وكانت زعلانة واكتشفت انها حبته، طبعا هو كان ماسح اللعبة فلما خف نزلها تاني وقالها ياريتني كنت عملت الحادثة من زمان،بعدها بقوا يلعبوا لوحدهم وخدوا على بعض ويوم 20/1/2021مي قالتله بحبك
طبعا قبل ماتقوله كدة جه قالها ينفع اجي اتقدملك قالته لا طبعا انا مبفكرش في الموضوع ده خالص، لانها مكانتش فعلًا بتفكر في الموضوع ويوم 24/1/2021 جه محمود اتقدملها واترفض وفضل 9شهور يتقدملها ويترفض يتقدملها ويترفض لحد ما جه يوم 10/8/2021 اتقبل فيه خلاص ومستنين لما عمه يربعن عشان يقروا الفاتحة وحلم مي يتحقق.
فريدة: حدوتة حلوة اوي ياتيتة ومي دي انا حبيتها اوي مع ان في غلط كتير عملته بس هي اكيد طيبة ومما لا شك فيه انها محترمة ومتربية وده بعيد عن الغلط
سميرة: عندك حق
فريدة: تييييتة!
سميرة بضحك: توتا توتا توتا كتبلنا الحدوتة
<ملحوظة: الحدوتة حقيقية ومش من خيالي>
#سلسلة حواديت توتا
#توتا خالد
#لا خلاف ان رأيكم يهمني
