سجينة كارلس (مكتملة)

الحلقة التاسعة

                     ❤الحلقة 9 ❤:
يومها كانت جيهان في بيتها تقلب في البيسي تعها حتى تفكرت لؤي تبسمت ، صح بدات تتعلق بيه و جاتها في بالها تروح تقابل البحر اما هاذ المرة مش لانها مهمومة و لا موجوعة ، حبت تروح برك بلاك تلقى لؤي تما ، بدلت حوايجها كانو يامات البرد و الشتا لبست سروال جين و فاست نواغ تع ريش بوت في رجليها طلقت شعرها و دارت بيري نواغ ، رفدت ساكها ، و خرجت راحت تمشي لانو البحر كان قريب منهم ، كي وصلت لمحاتو من البعيد كان متكي على طونوبيلتو و عاطيها بظهرو بدات تغصب باه تلحق عندو بلخف ، هي كيجات راح توصل حتى شافت مرا جات عندو عنقاتو و باستو في شفايفو ، حبست في بلاصتها ساعتها عينيها تعمرو دموع كان ماشية خطوة للقدام ورجعت للوراء دارت و مانجمتش تحبس دموعها بداو يسلو مع خدودها و عاودت مشات و هي تحكي مع روحها
جيهان: يعني وش كنت متوقعة يحبني ! هه قداشني بهلولة و انا جايا لعندو نجري، هاه عندو حبيبتو
بقات تمشي و تمتم حتى لحقت للدار
جميلة (يماها): بلخف جيتي ماطولتيش
جيهان: كنت غير هنا قضيت صلاح اوليت ( تحكي و طالعة في الدرج)
جميلة: تاعش صلاح
كملت مشات و ماجاوبتهاش دخلت بيتها و غلقت على روحها و نحات بيري تعها قاستو فوق البونك و زادت نحات الفيستا ورماتها في الفوتاي و ترمات في فراشها على كرشها يديها تحت راسها و بدات تبكي
جيهان: يعني شعال لازم نسوفري في حياتي انا ااااوف

بعد يومين :
كان قاعد في البيرو تاعو في مؤسستو بعدها عيط لسيف
كارلس: الو سيف وش عندك اليوم مواعيد
سيف: نظن ماعندي والو حتى ضرك راني قاعد
كارلس : مليح مالا نتلقاو في **** بعد نص ساعة نحتاجك
سيف: اوكي ان شاء الله مي غير الخير ياك ماكان والو
كارلس: ههههه وشبيك تنخلع بلخف ماكان والو امر ضروري و حبيت نتناقشو فيه
سيف: هي صاحبي مالا ضرك شوي

_______________
بعد نص ساعة تلاقاو وين تفاهمو حكمو طابلة و قعدو يحكو و يشربو في القهوة
سيف: ايهيه وش كاين وشنو هذا الامر المهم لي جبتني حتى لهنا على جالو
كارلس: ماعدتش صابر ياصاحبي خلاص حابها تكون معايا، يزيني صبرت 4 سنين و انا نستنى فيها تكبر و ضرك خلاص
سيف: كح كح كح (شرق) ، وش قلت 4 سنين و نتا تسنى فيها مافهمتش وضحلي
كارلس: ايه 4 سنين وقيل كان عندها 14 سنة كي شفتها اول مرة ، تشفى هذيك البلاصة تع البحر وين شفناها انا وياك
سيف: ايه وشبيها
كارلس: ثما شفتها اول مرة، كان الصيف و كانت وحدها تما دخلت تعوم بحوايجها ممبعد مانعرف وش صرالها قريب غرقت حتى جيت رايح نسلكها اما في اخر دقيقة لحقت روحها و سلكت وحدها و خرجت من البحر و قاست روحها في الرملة تكسلت على ظهرها ترد في النفس، بقيت نراقب فيها ماعلاباليش وش لي شدني ليها خفتها تعاود تدخل تعوم و تزيد تغرق بقيت تم نعس فيها حتى رفدت روحها و راحت، و هكذا كان الحال كنت كل مرة نجي تما نلقاها نقعد نراقب فيها وش دير مرات تكون فرحانة مرات تحسها زعفانة مرات نشوفها تبكي حتى تغيضني مي ماكنتش نتجرا بش نروح نسقسيها و لا نحكي معاها حتى هي كانت صغيرة بقيت هكذاك 4 سنين، كنت نتعمد نروح لهذيك البلاصة غير باه نشوفها و نراقبها ، حبيتها صح من غير مانحكي معاها و مادرتش في بالي كامل بلي رح نحب طفلة صغيرة هكذا حتى تكبر راقبتها و كنت نشوفها كل مرة تكبر و تزيد تزيان كنت نشوف شعرها كل مرة ملي كان قصير حتى طوال هههه
سيف: هههههه علاذاك كي كنت نسقسيك علاه ديما تجيبني هنا ماتجاوبنيش و هي كان كاين لي دايلك عقلك
كارلس: ههه ايه كنت نفرح كي نشوفها فرحانة و نهار نشوفها تبكي كنت نتوجع مانحملش نشوفها تبكي كان يقيسني هاذ الشي
سيف: مي علاه ماحولتش تحكي معاها هاذ الشي بلاك كان حايسهلك بزاف امور
كارلس: قتلك ماتجراتش ، خفت نحكي معاها و ماتحبش و لا ترفضني و تخاف مني بصفتي غريب و لا مانعودش نشوفها كنت مستمتع بمراقبتها برك و هاذ الشي خلاني نعشقها لا اراديا ، حتى نهار لي قتلي بلي هي موافقة تتزوجني شعال فرحت ، يعني كيفاش حتى وافقت بالسرعة هاذي يعني ممكن ححتى هي كانت شايفتني كامل هاذوك السنين و ممكن تكون حتى هي حبتني هههه
سيف كان يسمع فيه و ضميرو مانبو لانو سيف هو لي ضغط على باباها بش هي توافق تتزوجو مي ماحكالوش هاذ الشي مماحبش يخسرلو فرحتو يعني في الاخير المهم رح تتزوجو ذا هو الصح.