Dina

1

Malam nya pengudah tembu ngunchi pump Dina enggau Jenny ngangkut barang bukai ke setor. Pengudah tembu nusun utai dalam setor seduai iya pansut ngemai kayu panjai siti, laban seduai iya deka nyukat laluh minyak ke agi bisi dalam tangki besai.

"Dina, nama dek pulai tu seretai enggau aku ka?" Jenny nanya Dina ke benung dipping minyak.

"Enda nemu agi Jen, nganti aku nanya Louis dulu engka iya bisi awak ngambi aku," saut Dina.

Pengudah tembu pengawa dipping minyak Dina pan betelefon ngagai laki iya, tang mih kangau telefon nadai disaut Louis.  Jenny endang udah nganti Dina ba atas mutosikal.

"Jen nepan enggau dek mih aku. Nadai nyaut telefon aku Louis, engka iya agi bisi pengawa.

Louis laki Dina gawa Imergesen ba Padang Bilun Sibu nyaga pintu penatai temuai. Seduai iya udah meniga taun jadi melaki bini, tang mih seduai iya lalu bedau bisi purih.

Datai ba belok F endur Dina nyiwa, Jenny  nyangkaika bakih iya. Sinu mih Jenny belematika bakih iya nya. Kasih amat ga tudah bangat enda nemu diri diayahka laki. Jenny nemu Louis bisi gila indu. Laban iya udah sekali bepansa enggau Louis bejalai ba pasar Sibu bepegai jari enggau siku indu. Deka iya madahka Dina hal nya nangika tudah Jenny, irau dikumbai ka ngeruntuhka ruang bilik bakih iya ga. Awak ka aja mih, penyuah ila ditemu Dina mih pengawa laki iya ke ngeladang nya. Baka buah rian udah mansau ukai alah dipelalaika bau dih.

"Terima kasih Jen. Baka selama mih au gaji ila aku nyuaka duit minyak," ku Dina.

"Enda ibuh kiruh mih Na, sama ga pejalai tua dih. Belok aku sepiak dek nya aja ga. Bah ka mupuk aku tu, lagi dikumbai indai aku ngampar meda aku laun datai. Ukai baru nemu pemangah ibu dek nya," ku Jenny lalu nyetat mutosikal.

"Pagila shift pagi aku Jen, nukar shift Shila. Laban tudah deka nganjung anak jik 6 bulan ke Kelinik," Dina sempat madahka bakih iya. Irauka Jenny nganti iya nurun gawa ngalih hari pagila.

Dina enggau Jenny udah gawa ba Petronas Sibujaya pengelama 3 taun. Seduai iya bekelala laban seretai minta gawa dia suba lalu ngujungka seduai iya bebakih nyentukka diatu.

Maya nelengaka pintu, Dina meda indai iya dedugau ba bangku meda cherita ba televisyen. Tang Dina alit ati laban laki iya Louis nadai dipeda, dipelabaka Dina engka mih laki iya udah tinduk ba pangking

"Indai, nama laun amat ga dek tinduk? Jam nyau ka pukul 10 malam tang dek agi dedugau meda cherita. Dek nya emda nemu diri ukai bepengerai baka orang bukai dih,"ku Dina bejaku enggau indai iya.

Sinu amat mih Dina meda mua indai iya ke udah manggai umur. Apai Dina udah lama ninggalka seduai iya meindai maya umur Dina 10tahun. Apai Dina berangkat enggau indu bukai maya Dina agi mit suba. Kenyau berapa hari tu Dina meratika indai iya tak tinubg pendiau. Suah datai sendat seput sereta batuk tambah mega Indai Dina bisi penyakit  darah tinggi.

"Nganti dek datai aku endu. Udah ngalika diri mih aku tu tadi, tang angkat baru belematika dek empai datai gawa. Dom pan pia mega empai ga datai, pulai gawa tadi pengudahka mandi  dom lalu pansut baru. Dom madahka diri ka betemu enggau bakih iya enda lama  ba pasar besai din. Nama iya lalu ngambi dek pulai gawa pia? Lapa dom empai niki dih?" Pia ku indai Dina.

"Nadai ditu Louis pia indai? Dikumbai aku udah tinduk ba bilik mih iya meda iya nadai dipeda."

"Nadai Dom ditu dih, indai nyangka iya lalu ngambi dek pulai gawa."

Dina pan berasai iran ati, sebulan tu suah amat ga laki iya pansut bejalai malam. Kekadang laki iya pulai mabuk. Ka Dina nanya kini tunga pejalai laki iya ngenangi ga iya. Laban kengka keditemu Dina Louis ukai lelaki ti mayuh ulah. Laban Dina ngelala Louis kenyau ari seduai iya sekula suba. Sebedau Louis gawa ba Imergesen seduai iya suba sama gawa ba kedai gari Jun Rong sibu. Kira bisi sebulan seduai iya udah jadi Louis pan bulih pengawa iya kediatu.