Dina

3

CHERITA PANDAK
TAJUK: DINA
DIKARANG: ATON ASAN

Lemai nya pukul 6, Louis datai ke flat kia. Jenny enggau Indai Unin pan sama bisi. Apai Unin nitihka bini iya dudi tadi. Pengudah bala terenah duduk, sida pan ngepunka randau.

"Dom aku enggai mayuh jaku dom. Enda nemu bejaku beputar belit. Kenduai laki bini deka nanyaka pengamat utai ditusi anak kami Will nya," ku Apai Will.

Udah nya Indai Will lalu nusi nama utai ditusi Wilson enggau Dina ngalih hari tadi. Indai Unin tuchum-tuchum nguing mua ketisi.

"Jera asai dek Dina. Buai laki mih dek malam tu," ku Indai Unin bejaku dalam ati.

"Aya, ibu sebedau bejaku panjai, dulu aku minta ampun ngagai kita sebilik. Nyangka penatai aku kemari ngasuh seduai iya laki bini belaya. Nyadi utai kedipeda Will nya amat ibu, aku ngaku," ku Louis, nyau bekuring mata Dina ke merening Louis. Sampai ati iya bejaku munyi nya, mut-mut Dina. Wilson ke duduk sepiak indai iya udah ngengam jari. Indai Unin nyau panjai tuchum nyeling laki iya.

"Tang ibu, pekara disangka Will nya salah magang. Dina enda kala merap aku. Semua nya nyadi enggau enda sengaja magang, tang seninjik ga maya nya Will meda. Dina nya ibu, ukai bansa indu ulih diumbuk enggau jaku. Aku lebih nemu baka ni perangai Dina.

Aku lelaki beli suba ibu, sanggup muai iya. Tang aku gaga iya bulih laki ti menyana lebih mentas ari aku. Kebendar aku enda nemu Dina ngandung. Laban pengudah tua iya sarak aku nadai nemu rita iya agi. Pengudah enam bulan tua iya sarak baru aku nemu, tang maya nya seduai iya Will sigi udah jadi. Nya mih aku nyangka Caca nya anak Will. Tang  maya tua ibu Indai Unin betemu, iya madahka Dina ngandungka anak aku. Nya kebuah aku deka betemu enggau iya. Minta kasih ari iya ambi ngasuh aku betemu enggau anak enda lama. Aku nadai ati deka ngeregau ruang bilik seduai iya.

Tambah mega aku diatu enda pengerai. Nyangka nya mih penulah ulih aku ketegal ngayahka Dina suba. Balas diterima aku ketegal enda bebasaka niang entua. Aku amat nesalka semua utai ti udah nyadi. Nyema baka utai ulih diputarka aku nyamai amat. Enggai aku ngaga penyalah serwta ngayahka Dina ke ngujungka tua iya sarak.

Dina, Will, aku minta ampun. Ketegal penatai aku seduai laki bini belaya. Will nuan anang irau, Dina chukup sayauka dek. Nyentukka iya mekat aku anang sesekali nyebut Caca nya anak aku. Terima kasih Will laban dek mentas enggau seduai iya menyanak. Gaga aku meda seduai iya bisi orang ngibun. Nyangka idup aku enda panjai, nya kebuah aku deka betemu enggau Caca. Aku kena penyakit Ranas (sifilis) tahap tiga. Kemari aku baru nemu diri sakit. Aku empu pan agi tekenyit pengudah nemu diri kena penyakit nya. Penulah aku mih nya, sakit ulih aku ketegal ulah aku empu," udah bejaku munyi nya Louis nyau enda malu agi nyabak.

Bala ke bisi enggau betunga dia sama tekenyit. Dina nyau sinu merening Louis. Enda mih iya nyangka amai, Louis suba lelaki ke imun serta manah ulah. Tang diatu nyau mayuh ulah ngujung ke iya kena penyakit ranas.

"Umbas mih ngenang utai udah Louis. Aku pan enda agi nyimpan dendam ke dek agi," ku Dina.

Wilson mindah duduk sepiak bini iya, digengam iya jari Dina meda mua bini iya merah deka nyabak.

"Louis, tu anak dara dek Caca. Peda dek mua iya segala kuyu besai. Umur baru 4 bulan tang nemu amat meraya," ku Dina, ngambi Caca ari ipar iya lalu disuaka iya ngagai Louis.

Gegetar jari Louis nyambut Caca. Pengudah Caca dipegai iya nya mih Louis nyium kuyu Caca jamah amat. Iya sesikuk nyabak lebuh nyium kuyu anak mit nya. Caca laban enggai dikusuk nyau ngekal nyabak. Beguai Louis nyuaka Dina, agi mih Caca nyabak. Semadi mih diambi Wilson baru Caca badu nyabak.

"Amat anak apai iya endar tu ney," ku Louis lalu nyukil kuyu Caca. Lelekik ga iya ketawa gaga Louis baka nya.

"Wai aku pan minta ampun pasal jaku sebut aku lebuh nya. Bula aku jaku nya wai. Jaku digaga aku ngambika Dina enggau Will belaya lalu ngujungka seduai iya sarak. Laban bai ati aku pedis meda enda ulih bemenantuka Will. Minta ampun aku wai ngagai kita sebilik. Malu amai mih aku wai enggau ulah diri," ku Indai Unin lalu ngeraup jari Sedai.