♥_أسيرة عاشقي_♥

بارت 1

في بيتها...راقدة كي الملايكة...شعرها طايح على وجهها...ترجع فيه ببطئ ورا وذنها مقلقتها أشعة الشمس لي دخلت علي بيتها تقوم فيها...قعدت تتقلب في فرشها حطت راسها على المخدة الا انها فدت رمتها فوق السرير وقامت رجعت الستار حتى ظلامت البيت ورجعت رمات روحها على سريرها بسرعة تخاف لا يطير النوم من عينيها...ورجعت غرقت في نومها....هاذي هيا بطلتنا رغد دوب ما تحط راسها على المخدة سلاما عليها كي الميت...اما نومها خفيف برشا تنجم تقوم من خطاية وعز نومها لأنها سمعتك تحركت في فرشك ....وهي راقدة هكاكا حتى تحس بالستار تفتح مرة اخرى وتسلل ضوء الشمس  حلت عينيها بالسيف عين محلولة وعين مقفولة

رغد:تي بربي علاه يا نانا

نانا:شنوة لي علاه نسيت انك تقرا الصباح قوم اي قرابة التسعة

رغد:يا ربي علاه هكا يا ربي....يا نانا اليوم اول نهار في العطلة...خذينا العطلة باهي هكا سكر الشباك يرحم بوك وخليني نرجع نرقد

نانا:صااار خذيتو العطلة...كون غير حكموك انتي ماسيبوكش حتى العام الجاي...وسيبت ضحكة

رغد:تتبهنس عليا نانا...بصحتك مزال حاكم فيا النوم...علاه يحكموني شكري العساس انا...العام الجاي راو باك بااااك يا نانا افهم يعني خليني نرقد يرحم بوك

ضحكت على هدرة حفيدتها وسكرت الشباك 

نانا:باهي هاني سكرتو ارجع ارقد على روحك انا هاني ماشية للسوق وانت كي تقوم هاو فطورك تحضرهولك فاطمة باهي

عملتلها براسها ايه ورجعت المخدة على راسها تستحلى في كمية النوم الباقية حاكمة فيها بعد ما طارت الف مرة

رغد بطلة القصة طلفة مزيانة برشا راح نحاول نوصفلكم كل تركينة في وجهها....شعرها حريري طويييل لأخر ظهرها ديما مسيبتو طايح على اكتافها وجها مدور تدويرة الشمس و خدودها مليانين وديما حمر وكأنهم حا يتطرشقو تزينهم غمازة محفورة بالقدا زادت لضحكتها حلاوة عينيها واسعين كبار سواد الليل مشفرين مربوعة قد ولاطاي تاعها اي طفلة تتمناها تي بالمختصر المفيد قنبلة تمشي على ساقيها....وهذا الكل وفي عمرها 16 سنة وكيما فهمتو عامها الجاي باك...تلعب مع كلش الا قرايتها خط احمر....صحاباتها الكل كانو حاطينها غير تع لبسة وضحك وتقعوير من النوع لي طلع عامها بسيدي وسيدك اما هذاك الظاهر فقط اما وقت الرسمي تجيب 17 متاعها بكل سهولة لي بروف الكل يحبوها وما نحكوش عاد على الولاد الطايح اكثر من النايض علاها اما هي ما مقيمة حد فيهم تحب ديما تخلي حدود مع معاملتها معاهم باه حد ما يخرط علاها ...لسانها طويل داير برقبتها تسمعلها كلمة ترجعلك عشرة ربي يجير كل مومن منو اما الحقيقة تتقال قلبها ابيض وحنينة الديفوا الوحيد وجهها صحيح ولسانها طويل طالعة لامها الي يقلك....في بالي وصفتها برشا اما حبيت نقرب صورتها لأذهانكم وبالنسبة لصفاتها لوخرين وشخصيتها وكيفماه عايشة و وين ومع شكون وعايلتها التفاصيل هذي الكل تكتشفوهم وحدكم في البارتات الجايين يعني تبعوا بكل تشويق لاني راح نخليكم تعيشوا القصة بكل لحظاتها...ا 

(يتبع)