Witnessing To The MaNaw Land_မနောမြေအား သက်သေတည်လျက်_Complete

အပိုင်း - ၁၈ ( Uni + Zaw )

လရောင်ဖြာကျနေသော မြစ်ရေပြင် ၊
ငြိမ့်ညောင်းစွာ စီးဆင်းနေပါလေသော
ရေအလျင် ၊
မြစ်လည်ရှိ ငါးဖမ်းစက်လှေလေးမှ မီးပြပြ‌အား လှမ်းမြင်နေရသေးသည်။

ကြယ်တွေစုံလင်လှပါသော မဟူရာကောင်းကင်ယံ၊
လဆန်းပိုင်းဖြစ်သော်လဲ အလှပဆုံးအလင်းရောင်တွေ ပေးဆပ်ဆဲ လခြမ်းငယ်၊
အဝတ်အစားတို့ တလူလူလွင့်သည်အထိ တိုတ်ခတ်နေဆဲ လေညှင်း ၊

လက်ထဲမှ ပူ‌ပူနွေးနွေးဖြစ်ဆဲ ကြက်ဥကစော်ခွက်လေး ၊ အနားတွင်ရပ်တည်နေပါလေသော ချစ်ရသူ ၊ ညချမ်းသည် လှပစွာပြည့်စုံသွားလေပြီ ။

အသင် ဧရာဝတီ ကျွန်တော့်ချစ်ရသူကိုပြောပြပေးပါလေ ။
သူ့အပေါ်ထားရှိတဲ့ မေတ္တာတရားတွေဟာ အလှပဆုံးသော အတ္တတွေဆိုတာ ။

ကမ်းနားစပ်လေးမှာ ဧကတို့ ဒီအတိုင်းသာ ထိုင်ချလိုက်မိသည် ။ ပကာသနတို့မပါဘဲ ၊ ဂုဏ်တွေမပါဘဲ ဒီအတိုင်းလေး ချစ်ရသူရယ် ၊ မိတ်ဆွေတွေရယ် လုံလောက်ပါပြီလေ ။

ဦးစိုင်းကတော့ နှောင်းဝေကို အချို့နေရာတွေထပ်လိုက်ပြနေပြီး ထွေးကလဲ အ‌စားအသောက်အသစ်တွေကို ထပ်စားဖို့ဆိုကာ လိုက်သွားလေသည် ။

" ဟူ... "

" ဗျာ "

" ကိုယ်လေ ဟူ့ကိုသာဖွင့်ပြောထားတာ ဟူ့အကြောင်းလဲ မမေးမိဘူးနော် ။ ကိုယ့်ကို ဟူ့အကြောင်းလေးပြောပြပါလား ။ "

တိုးညှင်းစွာတောင်းဆိုမိတော့ ချစ်ရသူက နှင်းဆီရောင် နှုတ်ခမ်းစွန်းလေးညွန့်တက်သွားရုံ ပြုံးလေတယ် ။

" ကျွန်တော့်အကြောင်းက ရိုးရှင်းပါတယ် ။ အဝါးက ခြံစိုက်တယ် ။ အနူးကကျောင်းဆရာမ ။ ကျွန်တော်က တစ်ဦးတည်းသောသားလေ ။ ဒါပေမယ့် အနူးကကျွန်တော့်ကိုမွေးပြီး ခြောက်နှစ်ကြာတော့ နှလုံးသွေးကြောပိတ်ပြီးဆုံးခဲ့တာ။ ကျွန်တော်က ခရီးသွားရာသီတွေမှာ တိုးရစ်ဂိုက်လုပ်တယ် ။ ကျန်တဲ့အချိန် အဝါးခြံစိုက်ကူတယ် ။ ဒါပါပဲ ဘာမှထူးထူးခြားခြားမရှိပါဘူး ။ "

ထူးထူးခြားခြားမရှိပါဘူးဟုဆိုနေသော်လဲ ဟူ၏မျက်ဝန်းအတွင်းမှ ခံစားချက်များကိုမူ တွေ့မြင်နေရလေသည် ။ နာကျင်သော ၊ နာကျည်းသော ၊ ဝမ်းနည်းစိတ်ပျက်သော ခံစားချက်ပေါင်းစုံသည် မျက်ဝန်းညိုတို့အတွင်းမှာ ရောပွန်းနေလျက် ။ ချစ်ရသူသည် လိမ်ညာနေသော်လဲ မျက်ဝန်းများကမူ ရိုးသားလှလေသည် ။