غلطة اختطاف

الحلقة 1

#غلطة_اختطاف

#الحلقه_الاولى

نار والعة في الحوش وطفلة بريئة تبكي في الدار خايفة من لهيب النار
دفعت الباب وتنادي عليها باعلى صوتها ومحاولة انها اتفادى اللهيب
اول ماشافتها شالتها بين يديها وظمتها لصدرها محاولة منها لحمايتها من  لهيب النيران
اتحاول دور علي طريق خروج هيا وبنتها والهروب لكن النار كانت اقوة منها وزادت اكثر وانتشرت بسرعة رهيبة
جزء من السقف  بدا في السقوط
شافت لبنتها تبكي وخايفة بين يديها ظمتها بلقوة وهمستلها في وذنها :متخافيش انا ديما معاك وشافتلها بعيون مليانة دموع وحزن
الطفلة مستغربة كلمة امها ونظراتها بس زاد استغرابها بعد مسكتها وعزقتها برة الغرفة وسقف الغرفة انهار عليها
الطفلة طاحت واغمى عليها
صوت الاسعاف والمطافي والناس تحاول طلع الناجيين من الحريق
الام ماتت والطفلة نجت بس حصلت حروق في جزء من ضهرها ورقبتها من وراء
...................روايات دابي...........

#بعد_مرور_عدة_سنوات

صباح مشمس ☀
منزل بسيط وقديم وسط المدينة تعالو نقربو منه ونسمعو شنو يصير
صوت جدال بين اثنين عالي جدا

عادل:انت حمار اصلا عارف شنو معنى حمار 😡

ادم:قتلك انا ياخالي منبيش نخدم تحت حد انا راسي يابس ومنبيش حد يتحكم فيا تعال جيب وتعال شيل😡خلوني نخدم علي راسي ابروحي

عادل بنبرة استهزاء:وشنو تبي تشتغل انشاء الله حضرتك وزير الخارجية ولا رئيس دولة
ادم حط كراع علي كراع واتكى وشاف لجدته:والله مش عارف خليني انفكر في موضوع  رئاسة قبل 😁

عادل:تي والله مانك نافعه الله واحد صايع ضايع كيفك حتى القراية مانفع فيها😡
ادم وقف بعدم اهتمام:انا طالع مع اصحابي و ياخالي مشكور علي مجهوداتك لكن توا نلقا عمل ابروحي لبس نظاراته وباس راس جدته   هيا بيس 😎 وطلع

عادل زاد تعقد من لا مبالاته:اااخ ياربي الفرخ هضا والله ميجيبلنا الا الصيت المعفن😡
غالية:ياوليدي حراام عليك وليد خيتك قزون ماعنده حد وسعله بالك تربح توا اساع يعقل
عادل:ماهو هضا الي مخليه هكي دلعك له وبعدين وين ماعنده حد باته قاعد طول وعرض ماعند حاله سو توا يرقيها ليا حلال فيه نمشيله يجي ياخده من شعره وهوا يربيه بمعرفته من اول وجديد 😡

غالية:😧امشي حطبة الهد عليها والله تمشيله ولا تحكي معاه لا ولدي لا نعرفك 😡الراجل الي عزق اختك حامل وجابت وميجيب عن العيل علم تبي تمشيله وتحكي معاه ادم وليدي انا الي ربيت وانا الي عانيت وانا الي كبرت والله تفكر حتى التفكير تمشيله وتحكي معاه لا ولدي لا نعرفك خيتك ماتت وواجعها خاطرها علي وليدها وعلي روحها الي تهجلت صغيرة ومعاها عيل 😭
عادل:استغفرالله العظيم يامي والله ماقصدي حاجة لكن ادلع له العيل فسده تي حتى اصحابه شلتت قعد كيفهم شلتوت تي هضا كيف تبيه يقعد راجل توا