مجنونتي نيار

47

حتى وإن كان الطريق اليك محفوفاً بالمسرات
ماعادت خطواتي خفيفة 🍁

َ

____________________شفع

َ

ٕ
كعدت اني بالمستشفى جيلان حاضنتني ونايمة مالك وجيدان هم نايمين ع الكرسي كدامي

احس ضغط قوي ع كصتي ووجع هم
رفعت ايدي ادلكها أطراف أصابعي الاول والثاني ملفوفات الساعة جانت ٣ ونص الليل

رجعت غمضت عيوني ونمت حيل تعبانة وراسي احسة ثكيل ولمن صعدت جيلان ونامت ع صدري حسيت بألم قوي دفعتها بدون ما احس رادت توكع من السدية للكاع ولزمتها من ملابسها بآخر لحضة لأن السدية حيل عالية

بقت ع نومتها حضنت ايدي جريتها توجعني زندي ملفوف بشاش

رجعت مرة ثانية صعدت ع صدري ماوخرتها خفت توكع من السدية وهي اذا نامت هيج بعد ابد ماتتحرك نومها مو عبث

الصبح كعدت هي تبوس بية عيوني وشعري وأيدي وهمة نايمين
بس شافتني فتحت عيوني طاحت دموعها ضمت راسها بركبتي وتنشغ

كعد مالك شال جيدان واجة يباوعلنة
همس ...شكو ؟
نزل جيدي جوة رجلية بنهاية السدية وشال جيلان
...اش بابا شبيج
...ماما
... شبيها
جانت تشهك وكلامها مكسر وعبراتها احسهن يشگن صدرها
...خطية ماما مريضة وجسمها يوجعها ماريد البزونة بعد ذبها حباب بابا بس اريد ماما تصير زينة مو مثل البارحة

...اش حبيبتي مابيها شي امج
مديت ايدي اجت حضنتي وتبجي
حجة هو بغضب
...شفتي سوالفج وين وصلتنة تعبتي نفسيتها وخليتيها خايفة

مارديت علي طلع من الغرفة رفعت راسها تمسح شعري دنكت خلت وجها ع وجهي ودموعها توكع ع خدودي
...ماما اني أحبج بس لاتصيرين مريضة
حتى بابا يحبج بس يكول اذا نكول نحبها بعد ماتحبنة تعوفنة

حضنتها وسكتت
هذا مشوش دماغها بأفكارة اخاف اكوللها شي مامدروس ويتعب نفسيتها أكثر جيلان مثلي جاي تصارع ومتشتتة وهي طفلة

تريكنة وطلعنة للبيت وجيلان كاعدة يمي كل شوية تبوسني ورة هاي الحادثة عدة شهر الوضع هادئ ومالك ساكت جلونة يوم هيج يوم هيج

يعني اني ماعرف شكول بس لمن اجي من ناحية هية تشوفوني الأم الي ماتشبه امهات صديقاتها ولا الها دور وأبوها يحط بعقلها أشياء غلط وخطية بنتي ضحية

فتحت دفتر مذكراتي وابتسمت بحب
شكد جنت احلم اصير ام واروح وي جهالي  للمدرسة اسال عن مستواهم ويمدحولي بيهم  بس هسة راح اروح لروضتهم الخاصة

اجة هذا اليوم ومالك كال باجر راح تروحين
خلاني متفاجأة ومامصدكة وهاي راح تصير السنة الرابعة واني ما واصلة عتبة الباب حسيت نفسي طايرة بالسمة