_ تيام، ايه يا عم استنى، خرجت بسرعة كدة ليه؟
يامن كان بينادي ع تيام وهو خارج من المول متعصب
_ يابني رد عليا الله يحرقك!!
_ بعدين يا يامن
ركب عربيته وساقها بسرعة .. ويامن تمتم لنفسه
_ الله يخربيت جنانك
رجعت رواء بعد ما خلصت تسوق مع شيماء ..
شيماء بفرحة
_ أنا مش مصدقة اللي سيف عمله دة، معقول يجبلي تليفون هدية من غير ما يقوللي!!
_ مهي هدية يا غبية! هيقولك ازاي؟
_ بس دة كان قايلي أن الفلوس اللي معاه ع قد الأجهزة المهمة
_ الولد بيحبك، وعايز يفرحك!!
لمعت عينيها بالدموع، وهتفت رواء بتهكم
_ ايه دة ايه دة! انتي عندك مشاعر يا شميو؟
ضربتها بخفة ودخلت شقتهم بحنق ورواء ضحكت عليها
وصل تيام البيت ودخل اوضته وكله غضب ومش شايف قدامه، خبط الباب،. فضل يتنفس بقوة وهو شايف مشهد رواء مع سيف قدامه..
عيونه طلعت لبرة ووشه بقا أحمر من شدة غضبه .. حاول يسيطر ع نفسه وينسى اللي شافه معرفش لغاية ما دخل الحمام لعله يهدي من النار اللي جواه..
تاني يوم بالليل دينا راحت عند رواء..
_ وحشيني يا رورو
_ وانتي اكتر يا دينا .. أخبارك واخبارك الشغل ايه
ديما طلعت ظرف من شنطتها وادته ليها، وسألت ف غرابة
_ ايه دة ؟
_ دة جواب تحذير ليكي، بعته مستر تيام، وبيقول فيه انك لو مرجعتيش الشغل هيتم فصلك!!
نفخت بضيق وهتفت بزمجرة
_ منا قولت اني مش راجعة، هو اللي هنعيده هنزيده!!
_ يا بنتي وتسيبيه ليه! وبعدين دي إجراءات روتينية، يعني هو مغلطش، وشوفي نفسك بقا إذا عايزة ترجعي أو لأ!!
_ طب اقعدي انتي وقفتي ليه!
_ لا انا لازم اروح، راجعة من البنك هلكانة أوي
مشيت دينا ورواء فضلت تفكر هتعمل ايه!.
بعد يومين يامن كان عند تيام ف البنك وشكله متوتر
_ مالك يابني مش ع بعضك ليه؟
_ تيام انا عايز اتجوز اختك !!
قالها يامن بدون استيعاب، اللي خلى تيام يرفع حواجبه بذهول .. الاتنين فضلوا يبصوا لبعض ببلاهة، وفجأة تيام فضل يضحك ع أسلوب صاحبه الغريب ف طلب أخته للزواج.
_ انت بتضحك ليه!
قالها يامن بضيق، وتابع تيام مستنكرا
_ بقا ف واحد جاي يتقدم لواحدة، يجيبها خبط لزق كدة؟
