هي بت جيرانا بيتهم مقاصد بيتنا ، و رغم اني من زمان معجب بيها شديد بس ماف زول عارف أو لاحظ للحاجه دي حتى هي، لأني عادة ما بتكلم عن الحاجات البتعجبني أو خليني اقول بغنج بالحاجات الحلوه ، كل العارفني ، عارفين اني ولا يمكن يوم أفكر في بت أو في الزواج يمكن لأني كنت مُقضي معظم حياتي في الشغل و دايماً بتهرب من المواضيع الزي دي بس هي بطريقة ما قدر تخليني أفكر في حاجات كتيره ما كنت مركز معاها، قدرت تبهرني و تخليني متلهف لـ شوفتها و دي لا حصلت بخفتها لا بشلاقتها ، بالعكس جذبتني بهدوئها و بأنوثتها و رقة حديثها مع إنها ما بتتكلم كتير ....لا بتتكلم لكن بمزاجها بس ، هي نقية زي حبات الندى ، جميلة زي عقد اللؤلؤ ، و مبهجة زي قطرات المطر ، و هي سري المحتفظ بيهو جواي و هي دقة قلبي 💜🥀
__________________________
صحيت زهجانه و قافله معاي و مصدعه و على العلي نازله اقدم خدمه في مدرسه و يادوووب اليوم ح امشي بعد شهور من العطاله ، طبعاً انا خريجة تربية قسم التاريخ / جامعة الخرطوم ، ساكنه في الكلاكله تحديداً في الشجره ، المهم قمت متكاسله استحميت و اتسوكت و صليت ، جهزت نفسي و لقيت أمي عملت لي الشاي ، قلت ليها كان تخليهو بعملو انا، قالت لي ما مشكله اشربيهو سريع عشان ما تتأخري ، طبعاً المدرسه الماشه ليها في نوباتيا ، شربت سريع سريع و شلت شنطتي و طلعت ، قبل ما اتحرك من مكاني لمحت عامر طالع من بيتهم، ما عارفه الحصل لي شنو بس اتوترت شديد و حسيت أطرافي بقت بارده ، لمن شافني قال لي صباح الخير....بتردد قلت ليهو صباح النور ، قال لي ماشه وين ممكن اوصلك معاي....توتري زاد بقيت بين اتنين، عايزاهو يوصلني و ما عايزاهو يوصلني، قلت ليهو طريقنا ما واحد انا ماشه نوباتيا، قال لي عرفتيهو كيف ما واحد؟! تعالي تعالي انا ذاتي ماشي نوباتيا ، وقفت شويه كدا حتاً مشيت ركبت معاهو ، اول ما اتحركنا قال لي نزلتي خدمه ولا شنو؟ قلت ليهو ايوه ، قال لي مالك مشيتي بعيد كان احسن ليك المدارس الهنا لأنها قريبه و بتريحك من تعب المواصلات، قلت ليهو فعلاً بس صحبتي برضها نزلت خدمه هناك و هي الإقترحت علي ننزل الخدمه سوا و في نفس المدرسه ، قال لي اها تمام ، و سكتنا على كدا ، أصلاً انا بالجلاله كنت بتكلم معاهو، ما عارفه البحصل لي شنو لمن هو يكون واقف قدامي ، بحس نفسي زي الرايحه لي حاجه، بحس بقلق و توتر لمن أطرافي بتبقى بارده و نهائي نهااااائي ما بقدر أخت عيني في عينو ما عارفه دي هباله مني ولا شنو ما عارفه ، شويه كدا اتصلت علي ياسمين صحبتي الح انزل معاها للخدمه ، قالت لي اها اتحركتي ولا لسه؟
قلت ليها بصوت واطي شويه، في الطريق، قالت لي علي صوتك مالك بتتكلمي براحه كدا؟
اعلي صوتي كيف و عامر قاعد جنبي! قلت ليكم ما بعرف بحصل لي شنو لمن اكون معاهو في نفس المكان، حاسه نفسي هبله هبله و غريبة الأطوار ، قفلت الخط و رسلت ليها رساله محتواها: في الطريق +وصفي لي مكان المدرسه تاني لأني نسيت والله 😅 الوصف يكون في رساله ما تتصلي علي كويس؟
ردت لي: انتي عندك زهايمر ولا شنو؟ مهاااا امبارح القريبه دي مش وصفت ليك مكان المدرسه؟ +ما اتصل عليك لشنو يعنى؟ في شنو؟
رسلت ليها:
بس انتي اعملي القلتو ليك
ردت لي:
طيب بعد ما تنزلي في () امشي طويل و بعدين يمين في شمال ، حتلقي مركز صحي ، يلا المدرسه واقعه يمين المركز الصحي دا لونها أخضر و فاتحه شرق
طبعاً قريت الوصف بتاعها مره و مرتين، اقسم بالله ماف حاجه بتلخبطني غير يمين في شمال دي، و ربي انا عارفه الإتجاهات بتاعة شرق و غرب ديك لكن يمين في شمال دي شنو كمان! 😭 لا و كمان يمين المركز الصحي؟ هسي اعرف يمينو كيف! معروف انو اليد اليمين دي البناكل بيها بس المركز الصحي دا عندو يد يمين!؟
رسلت ليها رساله محتواها:
يمين المركز الصحي دي شنو كمان؟ خلي الحركات دي و وصفي لي بـ الإتجاهات الأربعه المعروفه بتاع الشرق و الغرب ديك أو بدل يد المركز اليمين وريني بتقع وين بالنسبه لليد اليمين حقتي انا ما المركز 😭
رسلت لي الإيموشن دا: 🤣🤣🤣🤣 و قالت لي موتيني من الضحك ، احسن ارسل ليك اللوكيشن عديل
قلت ليها طيب، المهم رسلت لي اللوكيشن و قالت لي كمان قولي ما عارفاهو 🤣 على كل الأحوال انتي حتركبي ركشه بعد ما تنزلي بس أدي التلفون لبتاع الركشه و ربعي يدينك، فجأه عامر قال لي مها!
اتخلعت و قلت ليهو ايوه بخلعه كدا ، قال لي من قبيل بتكلم معاك و انتي مندمجه مع تلفونك، قلت ليهو معليش ما ركزت قلت لي شنو؟
_ قلت ليك المدرسه دي وين؟ لأنو خلاص وصلنا نوباتيا ، قلت ليهو لا لا ماف داعي توصلني لحدي المدرسه و تعطل شغلك ، قال لي ماف أي تعطيل بس قولي لي المدرسه في أي حته!
مديت ليهو التلفون بس، عاين فيهو كدا ، رجعو لي و قال لي بعرف المدرسه دي ، المهم وصلني لحدي الباب و قال لي بالتوفيق، نزلت و قلت ليهو شكراً ليك و على طول مشيت سريع سريع من قدامو و من غير ما إتلفت ، دخلت المدرسه و وقفت جنب الباب مسافه و انا خاته يدي على قلبي، شوفة عامر دي بتعمل فيني عمايل و بتجهجهني ، اتصلت على ياسمين و قلت ليها انا وصلت وين انتي؟ جاني صوتها و هي بتضحك و بتقول لي الحمدلله على السلامه، قفلت الخط و مشيت حضنتها قالت لي يا بليده يا ما عندك جغرافيه، قلت ليها معليش والله بس لمن درسوني ما قالوا لي يمين في شمال أو يمين المركز ، هسي دي كيف دي! ضحكت و قالت لي خلاص بعدين بفهمك ، قلت ليها اها عملتي شنو؟
قالت لي من قبيل منتظره المديره بس ما جات، اها ان شاء الله جبتي أوراقك كلها، قلت ليها جبتها ما تخافي، قالت لي بالله شوفي المدرسه دي سمحه كيف عشان كدا قلت احسن نقضي خدمتنا هنا بالإضافة لإني بعرف معظم الناس الهنا، قلت ليها فعلاً المدرسه حلوه ، غيتو أول مره اشوف لي مدرسه حكومه سمحه زي دي، قالت لي دا كلو اجتهاد من المديره والله الشجر و النجيله و المظلات الشايفاهم ديل كلهم من قروشها هي، قلت ليها بالجد؟ قالت لي آيي والله، المديره زينب مديره كويسه شديد بس صعبه شويتين و أهم حاجه عندها المواعيد ، قلت ليها واضح واضح عشان كدا لسه ما جات ، قالت لي يا غبيه نحنا جينا بدري شديد ، قلت ليها ما دا بسبب انتي من امبارح شابكاني بكرا اطلعي بدري! طلاب نحنا لمن نجي من نهاية 6 ؟ قالت لي اعمل شنو والله مليت من قعاد البيت عشان كدا اتحمست شديد و جبتك بدري ، قلت ليها ذكرتيني أيام الجامعه و المحاضرات الكانت من 7 صباحاً و زحمة المواصلات غيتو كنا بنجازف مجازفه، قالت لي و أحلى مجازفه و ربي، الزول ما بحس بشتاق للجامعه و أيامها الحلوه إلا بعد ما يتخرج منها، قلت ليها فعلاً و الله المهم ارح ارح نخش جوه ، قعدنا في مظله كدا و شويه شويه الطلبه و المعلمين بدوا يزيدوا لحدي ما المديره جات ، مشينا ليها في المكتب و قعدنا معاها و عرفناها بنفسنا وريناها شهاداتنا و أوراقنا، قالت لينا جداً ما عندكم مشكله ، المهم طلعنا من مكتبها، ياسمين قالت لي تعالي نحضر معاهم الطابور ، مشينا حضرنا معاهم الطابور و مشينا ركبنا ركشه هي نزلت قبليني لأنها اساساً ساكنه في نوباتيا، و انا واصلت لحدي ما وصلت الموقف، منو نزلت و ركبت مواصلات وحده لحدي الشجره، منها ركشه لحدي البيت، يمكن بعد ساعه كدا ياسمين اتصل علي، قلت ليها خير في شنو؟
قالت لي من قبيل السؤال في بالي بس نسيتو إلا هسي اتذكرتو، انتي قبيل ليه قلتي لي ما تتصلي علي و رسلي لي بس!
ما عرفت اقول ليها شنو و اصلاً اقول شنو و انا نفسي ما فاهمه تصرفاتي الغريبه البتحصل لمن يكون عامر موجود و ذاتي ما قادره اوصف ليها الهبل العملتو قبيل داك ، قلت ليها كان في واحد ماشي وراي و شكيت انو يكون حرامي عشان كدا قفلت الخط ، و مسكت تلفوني قوي و مره مره اعاين وراي و ارسل ليك ، قالت اها كويس ، المهم اتونست معاها لحدي ما الضهر أذن، قلت ليها بعد دا ح أمشي اعمل لناس البيت الجبنه، قفلت منها مشيت صليت و عملت الجبنه لـ أمي و أبوي ، بعد شويه سراج أخوي جا داخل، قلت ليهو شارب جبنه ولا اعملها ليك؟
قال لي انتظري شويه لأنو عامر جاييني، خليهو بعد يجي و اعمليها، اول ما قال "عامر " قلبي عمل شححح و طشيت شبكه، اسمو ساي بفقدني المنطق فما بالكم لما يكون واقف قدامي؟
طبعاً سراج دا أخوي الكبير و انا بت وحده وسط 3 أولاد و انا اصغر وحده ❤️🥀
الكبير سراج بعديهو سمير حتى سيف الدين حتى انا ، سمير و سيف الإتنين برا السودان 🥀
المهم رجعت المطبخ و انا جايطه شديد ، ما عارفه الأحاسيس و اللخبطه دي جاتني متين و من وين! و ليه ما بحسها إلا لما اشوف عامر أو اسمع اسمو!؟
يمكن بعد كم دقيقه كدا سمعت صوت الباب ، قعدت أعاين بالشباك حق المطبخ، شفت سراج مشى فتح الباب و فجأه ظهر عامر ، سلم عليهو سلام سمح كدا و خشوا جوه ، شويه كدا جاني صوت سراج و هو بقول لي يا مها اعملي الجبنه بعد دا ...سكته و ما اتكلمت تاني ردد لي الكلام، بلعت ريقي و حاولت اعلي صوتي عشان يسمعني، قلت ليهو طيب ....
عملت الجبنه و كبيتها في الكبابي بس مستحيل أوديها ليهم بس الحينادي لي سراج منو عشان يشيلها؟!
أمي جات داخله قالت لي الجبنه دي بتبرد وديها ليهم واقفه تسوي شنو؟
قلت ليها انتي طالعه مش؟ وديها ليهم معاك! قالت لي يا زوله هوي مالك انتي؟ ماشه أصلي كمان عايزا ترسليني! قلت ليها ما مرسال يا أمي ما فيها حاجه ، قالت لي سمح انتي مالك؟ في زول غريب معاهم ولا في رجال كتار في المظله؟
قلت ليها لا ، عاينت لي شديد و قالت لي طيب في شنو؟
نظرتها دي خجلتني ولا عملتي لي شنو ما عارفه بس فهمت من حاجه و عشان انهي القصه دي كلها و اشيل الحاجه الجات في بالها دي شلت الصينيه و قلت ليها الزول لو رجلو اتكسرت عديل ماف زول بحن عليهو و بساعدو انا رجلي دي من امبارح واجعاني و ماف زول حاسي فيني، قلت كدا و طوالي طلعت من المطبخ عشان ما تعرفني بكذب
كل ما اقرب من المظله قلبي بضرب شديد ، و حالتي بقت حاله رجليني بقوا يطاقشوا مع بعض و حسيت مشيتي بقت ملولوه كلو و انا لسه ما دخلت المظله ، لمن وصلت الباب وقفت و أخدت نفس و دخلت من غير ما اعاين لزول و انا ما شايفه حاجه غير التربيزه القدامي، ختيت الصينيه فيها و طلعت سريع سريع و انا سامعه سراج قال بسم الله دي مالا دي؟
كنت أشاهدها بطريقة مميّزة، كأنني أستريح بالنظر إليها من تعبٍ ما.💜
يتبع.......
