كلمة مات دي بقيت اشوفها عديل قدامي ما بس سامعاها ، القعاد غلبني وقفت على حيلي و انا بعاين لـ أبوي بخلعه و بقول ليهو كيف يعنى مات ؟
سراج قال لي الموت الواحد دا ، غيتو الله يجيب العواقب سليمه ، أهلو الظاهر عليهم ناس صعبين شديد و ما حيخلوا حق ولدهم
فجأه عامر جا داخل و بقى يعاين لي بإستغراب بس واصل طريقو و قعد جنب سراج و انا عيني على أبوي بس و أمي ختت يدينها في راسها و قعدت تقول لا حول ولا قوة إلا بالله دي مصيبة شنو دي يخواني ....مها انا مش كلمتك يا بتي ....كلمتك مية مره و قلت ليك ما تدخلي نفسك في حاجه ما بتخصك بس انتي ما بتسمعي كلامي.....الليله وووبعلي من الجاتني ....
انا خلاص هبطت و قعدت على الأرض و بقيت اقول انا ما عملت حاجه ولا ما كتلتو يا أبوي ولا ما قربت منو و قعدت أبكي....
فجأه جانا صوت سامر و سراج و هم بيضحكوا ، عاينت ليهم بإستغراب و انا عيوني مليانه دموع، ضحكوا كدا لمن مسكوا بطونهم و بديهياً عرفت الحاصل و انهم كانوا بكذبوا علي و اتأكدت من الحاجه دي لمن شفت أبوي مبتسم، سراج بقى يحاكي فيني و يضحك، وقفت على حيلي و قلت ليهو يعنى كنتوا بتكذبوا علي؟
هز لي راسو و هو بضحك، مشيت عليهو و بقيت اضرب فيهو و اقول ليهو يا حيوان يا متخلف وقفت لي قلبي ، قال لي خلاص ياخ وقفي البتعملي فيهو دا.....خلاص كلنا....وقفت ضرب فيهو و طلعت منهم و انا زعلانه لأنهم دخلوني في حاله زي دي ، امي جات لاحقاني قالت لي والله ما فاضل لي إلا ازغرد الحمدلله الراجل ما مات ، طوالي رجعت لناس أبوي و قلت ليهم حصل شنو للراجل؟
سامر قال لي مش قلت ليك ما حيموت؟ هنداك ليهو زي الحصان ، اظنو كان بستهبل عليك ساي ، قلت ليهو طيب لمن مشيتوا ليهو عملتوا شنو؟
سراج ضحك و قال لي سامر كفتو بيجاي و انا عدلتو بالجنبه التاني طوالي صحى المستهبل ، و بالنسبه للجروح الفي وشو و راسو مليناهم ليهو ملح و شطه حمره من دكانو ، اقسم بالله بكى بدموعو، سامر قعد يضحك و قال ليهو شفت منظرو كان كيف؟
سراج قال ليهو آيي آيي ، ضحكني جنس ضحك ، سامر قال ليهو هسي بكون بلململ في حاجاتو عشان يتخارج من هنا، قلت ليهم هددتوا ولا شنو؟
سامر قال لي أكيد ، واحد وسخ و قذر زي دا ما ليهو قعده لا في حينا لا في الأحياء الجنبنا....
ياداب كدا ارتحت و اتنفست زي الناس و من غير ما أحس ابتسمت ، بس ابتسامتي دي إتلاشت لمن لمحت عامر بعاين لي بنفس نظرة قبيل ، ما عارفاهو مالو معاي و من قبيل كان ساكت و ما قال حاجه ، سامر قال ليهم يلا يا جماعه بعد دا انا ماشي، أبوي و سراج قالوا ليهو ما بتمشي إلا تتغدا معانا بس هو كان مُصر شديد قال عندو شغل ضروري ، المهم لمن جا طالع قال لي المره الجايه ما تجري خليك راجله و أمليهو ملح ، كلنا ضحكنا على كلامو ما عدا عامر ، لمن حيرني و نظراتو لي وترتني و شككتني في نفسي! ....
____________________
رغم اني قررت أبعد عنها و ما اهتم بأي حاجه بتخصها و لو مرت بجنبي ما اشتغل بيها و كنت مفتكر نفسي اني خلاص قادر اشيلها من بالي و المسأله مسألة وقت فقط ، بس كل فكري و قراري ديل اتلاشوا لمن شفتها ماشه مع سامر ، من بعيد كنت شايفهم لحدوا ما وصلها جنب بيتهم ، في اللحظه ديك حاجه وحده بس خطرت على بالي ، نظراتي ليها كانت خليط من غضب و ضيق و حسره ، سامر لما شافني رفع لي يدو و سلم من بعيد و مشى سريع و انا عيوني بس كانت عليها هي ، ما قالت أي شي بس دخلت بيتهم ، زهجت شديد و اضايقت حتى مشواري خليتو و دخلت البيت ، بعد مسافه طلعت عشان امشي الميدان ، مع طلعتي دي ، سامر دخل مع سراج بيتهم ، الحاجه دي خلتني استغرب شديد لأنو سامر و سراج ما أصحاب شديد ، معقوله سامر يكون عايز يطلب يدها؟
عقلي كان حيطق من شدة التفكير ، حسيت نفسي خلاص خسرتها ، اترددت بين امشي ليهم ولا لا ، في الآخر اتوكلت و دخلت بيتهم ، استغربت شديد لمن شفتها مخلوعه و بتعاين لـ أبوها و الجو كان متوتر ، لحظتها اتأكدت من شكي ، سراج كان بضحك من غير صوت و بحاول انو يخفي ضحكتو، اشر لي عشان اسكت و اجي اقعد جنبو، مشيت قعدت جنبو و انا ما فاهم شي، الحاصل شنو و هي ليه كانت بتبكي؟
ما كنت فاهم حاجه المات منو و هي علاقتها بيهو شنو و سامر الدخلو شنو؟ كلو اتضح لي لمن سراج في الآخر حكى لي الحصل و قال لي و هسي غشينا عليها ساي عشان نشوف ردة فعلها ، قعدت معاهم شويه و بعديها استأذنت اصروا علي اقعد اتغدا معاهم بس كنت مُصر شديد و أصلاً القعاد غلبني ، رجعت بيتنا و انا تفكيري كلو في الحصل ، لو كنت انا مكان سامر هل كانت حتحكي لي؟ ياريت لو قبيل مشيت على دكان مُبشر ياريتني لو لاقيتها قبل سامر، اتذكرت كيف هو لمن كان طالع وقف قصادها و قال ليها بهظار: المره الجايه خليك .....الخ و كلهم ضحكوا على كلامو حتى هي و واضح انها مبسوطه شديد و هي بتتكلم معاهو و انا طول قعدتي معاهم ما كنت قادر اقول حاجه و ما شايف أي حاجه بتضحك عشان اضحك معاهم 💔
من يومها انا بقيت عايش في صراع نفسي ، بغصب نفسي و بجبرها على انها تنساها و بحاول قدر الإمكان اتجنبها بس برضو ما قدرت و برضو ما استسلمت ، لحدي ما في يوم كنا بنلعب كوره في الميدان ، سامر ذاتو كان معانا ، فجأه وقف لِعب و قال لينا برجع ليكم هسي و طلع برا الميدان ، كنت مراقبو عشان اعرف هو ماشي وين ، ما اتفاجأت لمن شفتها جايه من بيتهم و هو ماشي ليها، شكلو ما كان عارف إنها قاعده في بيتهم ، سلم عليها و وقف مسافه بيتكلم معاها ، و انا النار كانت مولعه جواي ، واحد من الشباب المعانا قال لي شوف سامر بخلط ساي ، وقف لعبو عشان يمشي لحبيبة القلب ديك 🤣🤣المعاهو قال ليهو سامر طلع ما هين و عرف يختار ، التاني قال ليهو ما هو الإختارها هي الإختارتو و حنكتو ما شايفها 24 ساعه في بيتهم؟
_آيي والله شايف شايف و في الآخر سامر طلع دلوكه ساي و هي قدرت تحنكو
= ما أصلاً دي حركات البنات الزيها ، عامله نفسها شريـ.....
أمجد و ياسر ، اقسم بالله الواحد الأحد اسمع حرف واحد منكم ضدها الميدان دا ما حيشلينا ، أمجد قال لي مالك يا عامر؟ هسي كلامنا دا فيهو حاجه غلط؟
قلت ليهو بنهره و ضيق أمجد! ....ياسر قال لـ أمجد اسكت خلاص يا أمجد و آسفين يا عامر لو اضايقت من كلامنا مع انو ماف سبب يخليك تضايق...
ما رديت عليهم اتحركت من مكاني و مشيت على مها و سامر ، ما عارف لما اقيف قدامهم ح اقول ليهم شنو بس رجليني ساقوني عليهم ، لمن وصلتهم سمعتو قال ليها انا جادي والله و زول عرس و.......سكت لمن شافني و انا مع جملتو دي بقيت ما شايف قدامي ، كلو غضب الدنيا و ضيقها اتكبى فيني من غير ما أحس لقيت نفسي برفع صوتي عليها و بشاكلها مع انو اساساً ما لي حق أو صلاحيه في الحاجه دي ، قلت ليها وقفتك قدام الأولاد دي حاجباك صاح؟ ليك نص ساعه واقفه قدامهم ولا ما حاسه بالزمن من حلاوة الونسه الفي نص الشارع و الناس كلها بتعاين ليك ؟ ولا عاجبك الكلام البنقال عنك؟ سامر عاين لي بإستغراب و قال لي الغلط غلطي انا يا عامر ما كان أوقفها في الشارع بس الموضوع كان ضروري و برضو انا الغلطان ، سامر اعتذر منها و مشى و هي بس كانت بتعاين لي بخلعه عشان رفعت صوتي عليها بالطريقه دي ، دي كانت أول مره ارفع صوتي عليها و أول مره تخت عيونها في عيوني ، بعد مسافه قالت لي إياك إياك تفكري فيني بالطريقه دي و ما عندك أي حق ترفع صوتك علي ، نفسي دي انت ما بتعرفها أكتر مني ، والله ما انا البنقال لي كلام زي دا و بعدين اقيف في الشارع ولا في جهنم الحمره دي حاجه ما بتخصك، انا لو عايزا اعمل حاجه غلط بعملها قدام الناس؟ ما خفت و ما اضاريت من زول لأني ما عملت حاجه غلط....
قالت كلامها دي بضيق و زعل شديد بعديها مشت من غير ما تنتظر مني رد على كلامها ، ضاعفت علي الهم همين و خلتني اضايق من نفسي لأني زعلتها ، بس برضو هي الغلطانه ، اساساً البخليها 24 ساعه تكون في بيت ناس سامر شنو؟
في وقفتي ديك شفت سراج جاي علي ، لمن وصلني سلم علي و قال لي مالك واقف هنا ارح الميدان ، سكت مسافه بعديها قلت ليها عايز اتكلم معاك في موضوع ضروري ، قال لي خير يا زول....تعال نقعد تحت الشجره ديك....
عارف كلامي الح اقولو لـ سراج أناني شديد ، بس ايوه انا اناني لـ مره وحده بس في حياتي ح اتصرف بأنانيه ، لمره وحده بس ما ح اتردد في طلب حاجه انا عايزها ، لمره وحده ما ح اراعي لمشاعر أي زول و ح أدي مشاعري الأولويه ، لمن قعدت معاهو قلت ليهو من الآخر كدا انا طالب يد أختك ......سكت مسافه بعدها قال لي ، والله احسن منك ما بنلقى ليها و انت زول كويس و أخلاقك عاليه و انا لو الموضوع برجع لي ما عندي مانع بس القرار الآخير برجع لـ مها ، ما بقدر أجبرها على أي حاجه هي ما عايزاها ، بس والله مناي توافق لأنو زيك لو لفينا الدنيا دي كلها ما بنلقى....
كنت عارف انو لا سراج لا أبوها حيكونوا عندهم مانع ، المشكله كلها كيف هي توافق؟ و اساساً كيف حتوافق بعد ما سامر سبقاً و عرض عليها فكرة الزواج! متأكد حتقول علي خاين و اناني ، لأني سمعت سامر لمن طلبها للزواج و قال ليها انا زول عرس و رغم السمعتو مشيت طلبت يدها، ما عارف الحيحصل شنو بس متأكد في اسباب كافيه تخليها ترفضني خاصة بعد الموقف الحصل قبل شويه و الأساس انها ما عندها حاجه لي ، و رغم اني حاولت ابعد و ابعد اتهورت تاني و قربت أكتر 💔
كانت تفاصيلك تنتشل روحي مني ، حاولت مراراً ألا ألتفت ، أن أهرب ولا أعود ، لكن في كل مرة هربت فيها خطوة عدت لك بعشر خطوات ،
إنك فخي اللطيف ، إنك وجعي الذي أحب 🥀🍁💜
يتبع.......
