يوميات عريس مجنون
الخامسه
أستغفر الله العظيم و اتوب اليه
.. سلمي : معيش رصيد انا جعانه اوي
خرجت من اوضتها وهي لابسه الطرحه وبدور علي حاجه في التلاجه : مفيش غير جبنه وبيض وانا مش عايزه اكل دي وله دي . نسيت اجيب اندومي
مراد : حرامي الحله بتعملي ايه بليل في التلاجه
سلمي : بس يا عم انا مش طايقه نفسي
مراد : ليه . في حاجه حصلت
سلمي : انا جعانه اوي . ومش معايا رصيد اتصل اجيب حاجه .
مراد : امم . طيب انا هطلع جدع معاكي مع انك متستهليش بصراحه .
سلمي بهمس : أن ليك عند الكلب حاجه قوله يا سيدي ..
مراد : علي صوتك وانتي بتتكلمي ، بتقولي ايه
سلمي : مقولتش حاجه يا مراد . هتصلي بيناه البيتزا
مراد : هتصلك اصلي بصراحه انا كمان جعان ومش عارف انام
سلمي بسعاده: قشطه اوي . اتصل بقي هاتلنا اكل وانا هعملك هوت شوكولت إنما ايه فاخر من الاخر
مراد : سواقه توكتوك
سلمي : معلش يا عم الخواجه. يلا هاتلنا بقي
مراد : انا هنزل في السريع اشتري اكل احسن . لسه هنستنا الدليفري
سلمي : ماشي .
نزل مراد واشتري شورما وبيتزا وبيبسي وحاجات كتير .. رجع وكل مع سلمي وهما بيتفرجو علي T .v
سلمي : ده انا كنت جعانه اوي .
مراد : يكش يطمر فيكي
سلمي. : مليش مزاج للخناق يا مراد . وبعدين انت اللي كنت بتعصبني
مراد : يا شيخه منك لله . ده انتي سودتي عيشتي من كتر التنمر . عارفه انتي هتجيبي عيل شبه الشبشب من كتر ما بتنمري علي الناس
ضحكت سلمي : فاكر اما كنت عايز تحط جيل زي الشباب
مراد ضحك : فاكر يا زفته وانتي وقتها جبتي زيت النعناع وحتطيلي منه
كملت ضحك سلمي وهي بتفتكر : وقتها روحنا نصلي مع خالتي في الجامع والمراوح شغاله وانت توحوح
مراد : كنت حاسس ان دماغي تلجت . انت كنتي مفتريه اوي
سلمي : بعد اما افتكرت اللي عملته فيك . اما بتاسف وانا بكامل قوايا العقليه .. كنت مزودها معاك
مراد ضحك : خلاص عفوت عنك مع اني كنت عايز اسود عيشتك . بس انا قلبي ابيض
سلمي : تشكر يا معلمي. . ايه رأيك اعمل الهوت شوكولت
مراد : ماشي . بس بلاش مقالب
