يوميات عريس مجنون
السادس
لاحول ولا قوة الا بالله العلي العظيم
صوت جرس الباب راح مراد يفتح ولاقي قدامه بنت لابسه نضاره كعب كبايه و قصيره وماسكه في ايدها طبق متغطي
عدلت النضاره بايدها : احم .. انا بوسي جارتكم اللي فوق
مراد : اهلا . اتفضلي ادخلي
دخلت بوسي وبتبص لمراد بإعجاب : ههه
مراد لنفسه : بتضحك علي ايه البت دي
مراد : احم .. اتفضل اقعدي. هنادي خالتو
بوسي : استني بس .. انا جايبلك محشي انا اللي عملته بأيدي
مراد : جايباه ليا انا
بوسي: اه ليك . اصلي عرفت انك جاي زياره من امريكا واكيد نفسك في الاكل المصري قولت اعملك محشي , هديه استقبال وكده
دخلت سلمي اما سمعت صوت في الصالون : ازيك يا بوسي عامله ايه
بوسي أضيقت: كويسه
مراد لسلمي : عملتي ايه للبت مش طايقاكي
سلمي: انا اعمل حاجه وآذي الناس . ده انا طيبه
مراد : وانتي هتقوليلي.. ملاك بجناحات
سلمي : هههه . ايوه ملاك
بوسي : دوق بقي يا مراد المحشي وقولي رأيك ولو نفسك في أي حاجه قولي و انا هعملهالك .
سلمي: وده ليه يعني . احنا مش هنعرف ناكله .
بوسي: لا بس انا اكلي احلي .. دوق ومش هتندم
سلمي لمراد : اوباااا البت دي شكلها بتشقطك بطبق محشي
مراد : انا بحب المحشي علي فكره . بس مقبلش اتشقط ..
ضحكت سلمي : بص بتبصلك ازاي
مراد بص لبوسي لقاها بتلاعب حواجبها لمراد
مراد : هي مالها بتعمل كده ليه
سلمي : بتثبتك . بتعاكسك . بالك انت لو قلعت النضاره مش هتشوف من غيرها ..
مراد : بطلي تنمر بقي. بقيتي شبه فرده الشراب المعفنه
سلمي : هههه . مقدرش ابطل تنمر ..التنمر ده بيجري في دمي مع كرات الدم الحمراء والبيضاء
مراد ضحك ... بوسي : انت مش عايز تدوق ليه المحشي
مراد حس انها زعلت .. كل من الطبق : شكرا يا بوسي . تسلم ايدك المحشي روعه
بوسي ضحكت: شوفت قولتلك هيعجبك . بليل بقي هعملك بسبوسه وكنافه انما ايه هتاكل صوابعك وراها
