#عاصمتي ذو فقار ولبربرية
ﺍﻟﺠﺰﺀ ﺍﻟﺮﺍﺑﻊ ﻭﺍﻟﻌﺸﺮﻳﻦ 💓🔥🌼🌹👑
للكاتبة GomanFared
ﺍﻟﺴﺎﻋﻪ 5:00 ﻣﺴﺎﺀﺍ ..
ﻣﻘﻌﻤﺰ ﻓﻲ ﺍﻟﺼﺎﻟﻪ ﻳﺘﻔﺮﺝ ﻉ ﺍﻟﺘﻠﻔﺰﻳﻮﻥ ..
ﻣﺮﻛﺰ ﻓﻴﻪ ...
ﺣﺪﺍﻩ ﺍﻣﻪ ﻣﺘﻜﻴﻪ ﻭﺍﺧﺪﻫﺎ ﺍﻟﻨﻮﻡ ..
ﻓﻲ ﺍﻟﺪﺍﺭ
ﻣﻘﻌﻤﺰﺓ ﻫﻲ ﻭﺧﻮﺍﺗﻪ ﻭﻳﻬﺪﺭﺯﻭﺍ ﻉ ﻣﻮﺿﻮﻉ ﺭﻭﺿﻪ ﻭﻋﺮﺳﻬﺎ ﺍﻟﻠﻲ ﺗﺤﺪﺩ ﺑﻌﺪ ﺷﻬﺮ ﺑﻌﺪ ﻣﺎ ﻓﻀﻮﺍ ﻓﻴﻬﺎﺍﻷﻳﺎﻡ ﺍﻟﻠﻲ ﻓﺎﺗﻮﺍ ..
ﻛﺎﻥ ﺍﻟﺤﻮﺵ ﺷﺒﻪ ﻋﺎﻳﺶ ﻟﺤﻈﻪ ﺳﻜﻮﻥ ...
ﺻﻮﺕ ﺍﻟﻤﻄﺮ ﺑﺲ ﻫﻮ ﺍﻟﻤﺴﻤﻮﻉ ...
ﻟﻌﻨﺪ ﻣﺎ ...
🔊🔊🔊🔊🔊👐👐👐
ﻧﺎﺿﺖ ﻓﺠﺮﻳﺔ ﻣﻔﺰﻭﻋﻪ : ﻫﺬﺍ ﺷﻨﻮ ..
ﺭﺍﻓﻊ ﻛﺎﻥ ﻣﺮﺑﻊ ﺍﻳﺪﻳﻪ ﻭﻣﺒﺘﺴﻢ ﻭﻫﻮ ﻳﺴﻤﻊ ﻓﻲ ﺍﻟﺪﺭﺑﻮﻛﻪ ﺍﻟﻠﻲ ﻉ ﺑﺎﺏ ﺍﻟﺤﻮﺵ ..
ﻧﺎﺽ ﺑﺼﻌﻮﺑﻪ ﻭﻫﻮ ﻳﻀﺤﻚ ..
ﻓﺠﺮﻳﻪ ﺑﻌﺪ ﺗﻔﻜﻴﺮ ﻭﻫﻲ ﻣﻘﻌﻤﺰﺓ ﺷﺒﻜﺖ ﺍﻳﺪﻳﻬﺎ ﻓﺒﻌﺾ ﻭﻗﻌﺪﺕ ﺗﻀﺤﻚ ...
ﻃﻠﻊ ﺭﺍﻓﻊ ﻟﻠﺒﺎﺏ ﻭﻫﻮ ﻳﺴﻤﻊ ﻓﻲ ﺍﻟﻠﻲ ﻳﻐﻨﻲ ﺑﺮﺍ ﻭﻫﻮ ﻳﻘﻮﻝ
" ﺧﺎﻟﺪ ﻳﺎﺧﺎﻟﺪ ﻃﻮﻟﺖ ﺍﻟﻐﻴﺒﻪ "
ﻳﻔﺘﺢ ﺭﺍﻓﻊ ﻭﻳﻜﻤﻠﻮﺍ ﺍﻟﺰﻭﺯ ..
ﺳﻴﻮﺭﻩ ﺍﻟﺤﺒﻴﺐ ﻳﺎﻋﻴﻨﻲ ﻳﺮﺟﻊ ﻟﺤﺒﻴﺒﻪ ..
ﺭﺍﻓﻊ ﺑﺪﻱ ﻳﺪﺭﺑﻚ ﻭﻳﻐﻨﻲ ... ﻭﺧﺎﻟﺪ ﻳﺼﻔﻖ ﻭﻳﻐﻨﻲ ..
" ﺧﺎﻟﺪ ﻳﺎﺧﺎﻟﺪ ﻃﻮﻟﺖ ﺍﻟﻐﻴﺒﻪ ﺳﻴﻮﺭﻩ ﺍﻟﺤﺒﻴﺐ ﻳﺎﻋﻴﻨﻲ ﻳﺮﺟﻊ ﻟﺤﺒﻴﺒﻪ "
ﻛﺎﻧﻮﺍ ﻭﺍﻗﻔﺎﺕ ﻳﺘﻔﺮﺟﻮﺍ ﻋﻠﻴﻬﻢ ﻭﻳﻀﺤﻜﻮﺍ ..
ﻭﻓﺎﺀ ﺗﺘﺄﻣﻞ ﻓﻴﻬﻢ ﻭﺗﻀﺤﻚ .. ﺍﻟﺰﻭﺯ ﺯﻱ ﺑﻌﺾ ﻓﻲ ﺍﻟﻬﺒﺎﻝ ﻭﺣﺘﻰ ﻓﻲ ﺍﻟﺸﻜﻞ ...
ﻏﻴﺮ ﺧﺎﻟﺪ ﺭﻗﻴﻖ ﺷﻮﻳﻪ ﻭﺍﺻﻔﺮ ﺍﻛﺜﺮ ﻣﻦ ﺭﺍﻓﻊ ...
ﻓﺠﺮﻳﻪ ﺑﻀﺤﻜﻪ : ﺗﻲ ﺑﺎﻫﻲ ﻳﺎﺳﺮﻛﻢ ﻳﺎﺯﻣﺰﺍﻣﻪ ﺍﻧﺖ ﻭﻳﺎﻩ ..
ﻭﻗﻔﻮﺍ ﺍﻟﺰﻭﺯ ﻭﺷﺒﺤﻮﺍ ﻷﻣﻬﻢ ﻭﺿﺤﻜﻮﺍ ...
ﺧﺎﻟﺪ : ﺍﻭﻭﻭﻭ Mylove ...❤ ﺣﻀﻨﻬﺎ ﻭﻫﻲ ﺗﺤﻀﻦ ﻓﻴﻪ ...
ﻓﺠﺮﻳﻪ : ﺍﻣﺘﻰ ﺗﺒﻄﻞ ﺳﺮﺍﻛﺘﻚ ﻫﺎﺩﻱ ﺗﺮﻭﺡ ﻭﻣﺎﺗﻘﻮﻟﺶ ﻗﺒﻠﻬﺎ ...
ﺧﺎﻟﺪ ﻭﺧﺮ ﻭﻫﻮ ﻳﻀﺤﻚ : ﻭﺟﻪ ﺍﻟﺸﻮﻡ ﻳﻌﺮﻑ .. ﺗﻠﻔﺘﻠﻪ ﻫﻮ ﻋﺎﺭﻑ ﻛﻞ ﺧﻄﻮﺍﺗﻲ ﻭﺗﺤﺮﻛﺎﺗﻲ ..
ﺭﺍﻓﻊ ﺿﺤﻚ ﻭﺿﺮﺑﻪ ﻉ ﻇﻬﺮﻩ : ﺗﺒﻴﻨﻲ ﻧﺨﻠﻴﻚ ﺗﻤﺸﻲ ﻉ ﺣﻞ ﺷﻌﺮﻙ ﻳﺎﺯﻭﻓﺮﻱ ..
ﺿﺤﻚ ﺧﺎﻟﺪ : ﻟﻴﻚ ﻭﺣﺸﻪ ﻭﺣﻖ ﺍﻟﻠﻪ ﻳﺎﻧﻤﺲ .. ﻭﺣﻀﻨﻪ ﺑﻘﻮﺓ ..
ﻭﻓﺎﺀ ﺑﺘﻠﻘﺎﺋﻴﻪ : ﺑﺎﻟﺸﻮﻭﻳﻪ ..
ﺧﺎﻟﺪ ﻭﺧﺮ ﻭﺷﺒﺤﻠﻬﺎ ﺑﻌﺪﻳﻦ ﺷﺒﺢ ﻟﺨﻮﻩ : ﺍﻟﻤﺪﺍﻡ ..
ﺭﺍﻓﻊ ﻳﺸﻮﻓﻠﻬﺎ ﺑﺘﻔﻨﻴﺺ ﻭﻭﺟﻬﻪ ﺍﺣﻤﺮ ..
ﻫﻲ ﻭﺟﻬﻬﺎ ﺍﺣﻤﺮ ﻧﺎﺭ ... ﺍﺳﺘﺎﻗﻀﺖ ﺍﻧﻬﺎ ﻣﻦ ﻏﻴﺮ ﺣﺠﺎﺏ ﺣﻄﺖ ﺍﻳﺪﻳﻬﺎ ﻉ ﺭﺍﺳﻬﺎ ﻭﻟﻔﺖ ﻭﺧﺸﺖ ﺗﺠﺮﻱ ...
ﺿﺤﻜﻮﺍ ﻛﻠﻬﻢ ...
ﺧﺎﻟﺪ ﺷﺒﺤﻠﻪ ﻭﻫﻮ ﻳﻀﺤﻚ : ﺧﻴﺮﻫﺎ ﻛﺸﺨﺖ ﻫﻜﻲ؟
ﻓﺠﺮﻳﻪ : ﺧﻮﻙ ﻣﻨﺼﺎﺏ ﻓﻲ ﻛﺘﻔﻪ ﺍﻣﺲ ﺑﺲ ﻃﻠﻊ ﻣﻦ ﺍﻟﻌﻴﺎﺩﻩ ..
ﺧﺎﻟﺪ ﺷﺒﺤﻠﻪ ﺑﻐﻀﺐ : ﻣﻨﻲ؟ !!
ﺭﺍﻓﻊ : ﻛﻠﺐ ﻭﺗﻮ ﻧﺮﺑﻮﻩ ... ﺧﺶ ﻫﻴﺎ ﺧﺶ .. ﺷﺒﺢ ﻷﻣﻪ .. ﻳﺎﻡ ﻛﻠﻤﻲ ﺍﻟﻌﻴﻠﻪ ﻭﻗﻮﻟﻴﻠﻬﻢ ﻳﺠﻮﺍ ﻳﺘﻌﺸﻮﺍ ..
ﺧﺎﻟﺪ ﺧﺶ ﻭﻫﻮ ﻣﻀﺎﻳﻖ ...
ﻣﺎﻳﺘﺤﻤﻠﺶ ﻓﺮﺍﻓﻊ ﺷﻲ .. ﺑﻮﻩ ﻭﺧﻮﻩ ﻭﺻﺎﺣﺒﻪ .. ﻭﻛﺎﻥ ﻓﻲ ﻓﺘﺮﺓ ﻳﺒﻲ ﻳﻘﻌﺪ ﺟﻨﺐ ﺧﻮﻩ ﻓﻲ ﺍﻟﻜﺘﻴﺒﻪ ﻟﻜﻦ ﺭﺍﻓﻊ ﺭﻓﺾ ﺗﻤﺎﻣﺎ ..
ﻭﺑﻌﺘﻪ ﻳﻜﻤﻞ ﻗﺮﺍﻳﻪ ﺑﺮﺍ ...
***
ﻃﺎﻟﻌﻪ ﻣﻦ ﺍﻟﻤﺴﺘﺸﻔﻰ ﺑﺴﺮﻋﻪ ...
ﻭﺗﺘﻜﻠﻢ ﺑﺎﻟﺘﻠﻴﻔﻮﻥ
ﻧﻮﻣﻴﺪﻳﺎ : ﺍﻳﻪ ﺇﻥ ﺷﺎﺀ ﻧﻠﺤﻖ ﻧﺸﺮﻱ ﻛﻨﺪﺭﺓ ........ ﺗﻤﺎﻡ ﻧﺘﻼﻗﻮﺍ ﻓﻲ ﺍﻟﺼﺎﻟﻪ .... ﺑﺎﺍﺍﻱ ... ﺻﻜﺮﺕ ﻭﺗﻮﺟﻬﺖ ﻟﺴﻴﺎﺭﺗﻬﺎ ﺗﺠﺮﻱ ..
ﻫﻮ ﻛﺎﻥ ﻳﺮﺍﻗﺐ ﻓﻴﻬﺎ ﻣﻦ ﺑﻌﻴﺪ ﻭﻫﻮ ﻣﻘﻌﻤﺰ ﻓﻲ ﺳﻴﺎﺭﺗﻪ ﺍﻟﻌﺎﻟﻴﻪ ﺍﻟﻤﻈﻠﻤﻪ ..
ﻣﺘﻜﻲ ﺑﻤﺮﻓﻘﺔ ﻉ ﺍﻟﺒﺎﺏ ﻭﺷﺎﺩ ﺫﻗﻨﻪ ﺑﺴﺒﺎﺑﺘﻪ ﻭﺇﺑﻬﺎﻣﻪ ...
ﻋﺠﺒﻪ ﻣﻨﻈﺮ ﺷﻌﺮﻫﺎ ﻭﻫﻮ ﻳﺘﻄﺎﻳﺮ ﻭﻛﻴﻒ ﻳﺒﺮﻕ ﻟﻤﺎ ﺟﺖ ﻋﻠﻴﻪ ﺍﻟﺸﻤﺲ ..
ﺭﻛﺒﺖ ﻟﻠﺴﻴﺎﺭﺓ .. ﺳﻜﺮﺕ ﺍﻟﺒﺎﺏ ...
ﻛﻴﻒ ﺣﻄﺖ ﺍﻟﻤﻔﺘﺎﺡ ﻭﺟﺎﻳﻪ ﺑﺘﺸﻐﻠﻬﺎ ﻟﻤﺤﺖ ﺣﺎﺟﻪ ﻓﻲ ﺍﻟﻜﺮﺳﻲ ﺍﻟﻠﻲ ﺟﻨﺒﻬﺎ ...
ﺿﻴﻘﺖ ﻋﻴﻮﻧﻬﺎ ﺑﺈﺳﺘﻐﺮﺍﺏ ﺷﺪﻳﺪ : ﺷﻦ ﻫﺪﺍ؟؟؟
ﻛﺎﻥ ﻓﻲ ﺑﻮﻛﺲ ﻟﻮﻧﻪ ﺭﻣﺎﺩﻱ ﻣﺤﻄﻮﻁ ﻉ ﺍﻟﻜﺮﺳﻲ ..
ﺧﺪﺍﺗﻪ ﺣﻄﺎﺗﻪ ﻉ ﺭﺟﻠﻴﻬﺎ .. ﺣﻮﻟﺖ ﺍﻟﻐﻄﺎ ﻭﺗﻔﺎﺟﺌﺖ ﻣﻔﺎﺟﺄﺓ ﺷﺪﻳﺪﺓ ...
ﻛﺎﻥ ﻓﻴﻪ ﻛﻨﺪﺭﺓ ﺣﻠﻮﺓ ﻭﻣﻨﺎﺳﺒﻪ ﻫﻠﺒﻪ ﻟﻠﺒﺴﺘﻬﺎ ..
ﻣﻄﺖ ﺷﻮﺍﺭﺑﻬﺎ ﺑﻤﻠﻞ ﻭﻫﻲ ﺗﻮﺯﻉ ﻓﻨﻈﺮﻫﺎ ﺣﻮﺍﻟﻴﻬﺎ .. ﺑﻌﺪﻳﻦ ﺭﺟﻌﺖ ﺷﺎﻓﺖ ﻟﻠﻜﻨﺪﺭﺓ .. ﻗﺎﻣﺖ ﺍﻟﻔﺮﺩﺗﻴﻦ ﻣﺎﻟﻘﺖ ﺷﻲ ..
ﺷﺎﻓﺖ ﺍﻟﺴﺎﻋﻪ ﻓﻲ ﺍﻟﺴﻴﺎﺭﺓ ﻟﻘﺘﻬﺎ 5:40 ﺩﻗﻴﻘﻪ .
ﺭﺟﻌﺖ ﻧﻈﺮﻫﺎ ﻟﻠﻜﻨﺪﺭﻩ ﺷﺒﺤﺘﻠﻬﺎ ﺷﻮﻳﻪ ﺑﻌﺪﻳﻦ ﺭﺟﻌﺖ ﺷﺎﻓﺖ ﻟﻠﺴﺎﻋﻪ .. ﺗﻨﻬﺪﺕ ﻭﻗﺎﻟﺖ : ﻣﻌﺎﺵ ﻓﻲ ﻭﻗﺖ ...
ﻏﻄﺖ ﺍﻟﺒﻮﻛﺲ ﻭﺣﻄﺎﺗﻪ ﻉ ﺍﻟﻜﺮﺳﻲ ﺷﻐﻠﺖ ﺳﻴﺎﺭﺗﻬﺎ ﻭﺗﺤﺮﻛﺖ ..
ﻫﻮ ﺍﺑﺘﺴﻢ ﻭﻗﺎﻝ ﻟﻠﺴﻮﺍﻕ : ﺗﺤﺮﻙ ...
***
ﻭﺍﻗﻔﺔ ﻓﻲ ﺍﻟﻜﻮﺟﻴﻨﻪ ..
ﺗﺘﻜﻠﻢ ﻓﻲ ﺍﻟﺘﻠﻴﻔﻮﻥ ﻭﻫﻲ ﺍﺩﻳﺮ ﻓﻲ ﺍﻟﻘﻬﻮﺓ ..
ﺳﻠﺴﺒﻴﻞ ﺑﺤﻤﺎﺱ : ﺧﺴﺎﺍﺭﺓ ﻧﻮﻣﻴﺪﻳﺎﺍ ﻋﻨﺪﻫﺎﺍ ﻣﻨﺎﺍﺳﺒﻪ ﺍﻟﻠﻴﻠﻪ ﺑﻴﻔﻮﻭﺗﻬﺎ ............ ﺍﻳﻴﻪ ....... ﻫﻬﻬﻬﻬﻬﻬﻬﻪ ... ﻣﻦ ﺑﻜﺮﻳﻲ ﻧﻌﺪ ﻓﺎﻟﺴﺎﺍﻋﺎﺍﺕ .... ﺍﻳﻴﻪ ..... ﺗﻤﺎﺍﻡ ﺣﺒﻴﻴﺒﺘﻲ ﻣﺶ ﺗﻨﺴﻴﻲ ... ﺑﺎﺍﺍﻱ ...
ﺻﻜﺮﺕ ...
ﻃﻔﺖ ﻉ ﺍﻟﻘﻬﻮﺓ ..
ﻭﻟﻬﺖ ﺑﺎﻟﺘﻠﻴﻔﻮﻥ ﺧﺸﺖ ﻉ ﺍﻟﻤﺴﻨﺠﺮ ﻭﺑﻌﺘﺘﻠﻪ ﺭﺳﺎﻟﻪ ..
( ﻣﺎﺗﻨﺴﺎﺵ ﺗﺼﻮﺭﻟﻲ ﺍﻟﻜﻮﺍﻟﻴﺲ .. ﻧﺤﺒﻚ ﻳﻮﺳﻲ )
ﺍﻟﺮﺳﺎﻟﻪ ﻭﺻﻠﺖ 💌
ﻷﺣﺪ ﺍﻟﻬﻮﺍﺗﻒ ... ﻓﻲ ﺩﻭﻟﺔ ﻋﺮﺑﻴﺔ ﻣﺎ ...
ﻃﻠﻊ ﻣﻦ ﺍﻟﺪﻭﺵ ﻉ ﺭﻧﻪ ﺭﺳﺎﻟﺔ ﺍﻟﻤﺎﺳﻨﺠﺮ ...
ﻣﺸﻲ ﻟﺘﻠﻔﻮﻧﻪ ﻃﻮﻝ ﺧﺶ ﻉ ﺍﻟﻤﺎﺳﻨﺠﺮ ...
ﺗﺄﻓﻒ ﺑﻤﻠﻞ ﻟﻤﺎ ﺷﺎﻑ ﺍﻟﻤﺮﺳﻞ ﻭﻣﺎﺑﺎﺵ ﻳﻘﺮﺍ ﺍﻟﺮﺳﺎﻟﻪ ﻣﻦ ﺍﻷﺻﻞ ..
ﺭﺩ ﺍﻟﺘﻠﻴﻔﻮﻥ ﻟﻤﻜﺎﻧﻪ ..
ﻭﺑﺪﻱ ﻳﻠﺒﺲ ﻓﻲ ﺣﻮﺍﻳﺠﻪ ﻭﻫﻮ ﻳﻘﻮﻝ : ﺩﺭﻫﺘﻠﻲ ﻛﺒﺪﻱ ﻻﺻﻘﺔ ﻟﺼﻮﻕ ﺍﻟﺒﻠﻮﺓ ﻫﺎﺩﻱ .. ﻧﺪﺭﻳﻠﻬﺎ ﺑﻠﻮﻙ ﻭﻧﺮﻳﺢ ﺭﺍﺳﻲ .....
ﺭﻥ ﺗﻠﻴﻔﻮﻧﻪ ﻭﻻﻟﻪ ﻃﻮﻝ ... ﺍﺑﺘﺴﻢ ﺑﺨﺒﺚ ﻟﻤﺎ ﺷﺎﻑ ﺍﻟﻤﺘﺼﻞ ﺭﺩ
ﻳﻮﺳﻒ : ﻳﺎﻫﻼ ﺑﺎﻟﻌﺴﻞ ... ﻫﻬﻬﻬﻬﻬﻬﻬﻬﻪ .... ﺷﻦ ﺟﻮ ... ﺍﻳﻪ ... ﻣﺘﺤﻤﺴﻪ ﺍﻛﺘﺮ ﻣﻨﻲ ... ﻫﻬﻬﻬﻪ .. ﺍﻳﻪ ﺻﺢ ﺍﻧﺘﻲ ﻣﺪﻳﺮﺓ ﺍﻟﻘﻨﺎﺓ ﻭﻧﺠﺎﺡ ﺍﻱ ﺑﺮﻧﺎﻣﺞ ﻓﻴﻬﺎ ﻧﺠﺎﺡ ﻟﻴﻚ ... ﺗﻤﺎﻡ OK..... ﻳﺎﻣﻠﻜﻪ ... ﻫﻬﻬﻬﻬﻬﻪ
See you .... ﺻﻜﺮ .. ﺿﺤﻚ ... ﻭﻭﻗﻒ ﻉ ﺍﻟﻤﺮﺍﻳﻪ ﻭﻫﻮ ﻳﻤﺸﻂ ﻓﺸﻌﺮﻩ ﻭﻳﻘﻮﻝ ... ﻳﺎﻣﺪﻭﺧﻬﻢ ﺍﻧﺖ ...
ﻋﻠﻖ ﺍﻹﺳﺘﺸﻮﺍﺭ ﻓﻲ ﺍﻟﻀﻲ ﻭﺑﺪﻱ ﻳﺴﺘﺸﻮﺭ ﻓﺸﻌﺮﻩ ...
***
ﻃﻠﻊ ﻣﻦ ﺍﻟﻜﻮﺟﻴﻨﻪ ..
ﻣﺤﻤﺪ : ﻫﺎﻩ ﻣﺎﺗﺒﻮﺍ ﺷﻲ ..
ﺯﻳﻨﺐ : ﺳﻼﻣﺘﻚ ﻭﻟﻴﺪﻱ ...
ﻣﺤﻤﺪ : ﺗﻤﺎﻡ .. ﻭﺗﻮﺟﻪ ﻟﻠﺒﺎﺏ ..
ﻓﺘﺤﻪ ﻟﻘﻲ ﺍﺧﺘﻪ ﻗﺪﺍﻣﻪ ﺑﺼﻐﺎﺭﻫﺎ ..
ﻣﺤﻤﺪ : ﻭﺭﺩﻩ ﺷﻦ ﺟﻮ ..
ﻭﺭﺩﺓ ﺍﺑﺘﺴﻤﺖ ﻣﺠﺎﻣﻠﻪ : ﺍﻟﺤﻤﺪ ﻟﻠﻪ ..
ﺧﺸﺖ ﺩﺍﺧﻞ ﻭﺍﻟﺼﻐﺎﺭ ﻣﻊ ﺧﺎﻟﻬﻢ ..
ﻭﺭﺩﻩ ﻭﻫﻲ ﺗﺸﺒﺢ ﻷﻣﻬﺎ ﻭﺍﺧﺘﻬﺎ ﺍﺑﺘﺴﻤﺖ ﺑﺄﻟﻢ : ﺍﻟﺴﻼﻡ ﻋﻠﻴﻜﻢ .
ﺯﻳﻨﺐ : ﺍﻫﻼ ﻭﺭﻳﺪﻩ ...
ﻗﺪﻣﺖ ﺳﻠﻤﺖ ﻉ ﺍﻣﻬﺎ ...
ﺻﻠﻴﺤﻪ ﺭﻛﺰﺕ ﻋﻠﻴﻬﺎ ﻭﺟﻬﻬﺎ ﺷﺎﺣﺐ ﻭﻋﻴﻮﻧﻬﺎ ﺗﺤﺘﻬﻢ ﻫﺎﻻﺕ ﺳﻮﺩ ...
ﻭﺭﺩﺓ : ﻛﻴﻒ ﺣﺎﻟﻚ ﻳﺎﻡ ...
ﺯﻳﻨﺐ : ﺍﻟﺤﻤﺪ ﻟﻠﻪ ﻛﻴﻒ ﺣﺎﻟﻚ ﺍﻧﺘﻲ ﻭﺭﻣﻀﺎﻥ ..
ﺭﺩﺕ ﻭﻫﻲ ﺗﺴﻠﻢ ﻉ ﺍﺧﺘﻬﺎ : ﺍﻟﺤﻤﺪ ﻟﻠﻪ ...
ﺷﻮﻳﻪ ﻭﺧﺸﻮﺍ ﺍﻟﺼﻐﺎﺭ ﺟﺮﻱ ﻟﺤﻨﺎﻫﻢ ﻳﺴﻠﻤﻮﺍ
ﻳﺴﻠﻤﻮﺍ ﻋﻠﻴﻬﺎ ...
ﺻﻠﻴﺤﻪ ﺗﺸﻮﻑ ﻷﺧﺘﻬﺎ ﺍﻟﻠﻲ ﻗﻌﻤﺰﺕ ﻭﻳﺒﺎﻥ ﻋﻠﻴﻬﺎ ﺍﻟﻬﻢ ..
ﺟﻮﻫﺎ ﺍﻟﺼﻐﺎﺭ .. ﺳﻠﻤﺖ ﻋﻠﻴﻬﻢ ﻭﻫﻲ ﺷﺎﺭﺩﺓ ﺑﺘﻔﻜﻴﺮﻫﺎ ﻓﺤﺎﻝ ﺍﺧﺘﻬﺎ ﻭﻗﻠﺒﻬﺎ ﻣﻘﺒﻮﺽ ..
ﺯﻳﻨﺐ ﺣﺘﻰ ﻫﻲ ﺭﻛﺰﺕ : ﺧﻴﺮﻙ ﻭﺭﻳﺪﺓ ﻭﺟﻬﻚ ﺍﺻﻔﺮ ﻭﻋﻴﻮﻧﻚ ﻣﺤﻠﻘﺎﺕ ..
ﻭﺭﺩﻩ : ﺍﻟﻌﺬﺭ ﻳﺎﻡ ..
ﺯﻳﻨﺐ : ﺍﺍﺍﻩ ...
ﺻﻠﻴﺤﻪ ﺗﺸﺒﺤﻠﻬﺎ ﺑﺸﻚ ..
ﺷﺒﺤﺘﻠﻬﺎ ﻭﺭﺩﺓ ﻭﺯﺑﻄﺘﺖ ﺍﻧﻬﺎ ﻣﺮﻛﺰﺓ : ﺍﻳﻪ ﺷﻦ ﺟﻮ ﺻﻠﻮﺣﻪ ..
ﺻﻠﻴﺤﻪ ﺷﻘﻠﺒﺖ ﻋﻴﻮﻧﻬﺎ ﺑﻨﻔﺎﺩ ﺻﺒﺮ : ﻣﺒﺮﺩﻙ ..
ﺯﻳﻨﺐ ﻭﻭﺭﺩﺓ : ﻫﻬﻬﻬﻬﻬﻬﻬﻬﻬﻪ
ﺻﻠﻴﺤﻪ : ﻣﻦ ﻏﻴﺮ ﺷﻲ ﻣﺴﺒﺒﻠﻲ ﻋﻘﺪﺓ ﻫﺎﻷﺳﻢ ..
ﺯﻳﻨﺐ : ﺍﺳﻢ ﺣﻨﺎﻙ ﻳﺎﺑﻨﺖ ..
ﺻﻠﻴﺤﻪ : ﺍﻟﻠﻪ ﻳﺮﺣﻤﻬﺎ ... ﺭﺑﻲ ﻳﺴﺎﻣﺤﻚ ﻳﺎﺑﻮﻱ ﻭﺧﻼﺹ .. ﻓﺎﺗﻬﻢ ﻛﻠﻬﻢ ﻭﺟﻲ ﻋﻨﺪﻱ ﺍﻧﻲ ﻭﺳﻤﺎﻩ ..
ﻭﺭﺩﺓ ﻭﺯﻳﻨﺐ 😂😂:
****
ﺍﻟﺴﺎﻋﻪ 7:00 ﻣﺴﺎﺀﺍ ..
ﺭﻏﺪﺓ : ﺗﻬﺒﺒﺒﺒﺒﺒﻠﻲ ...
ﻧﻮﻣﻴﺪﻳﺎ ﻭﻫﻲ ﺗﺸﻮﻑ ﻟﻠﻤﺮﺍﻳﺎ ﻣﺘﺎﻉ ﺍﻟﻤﺪﺧﻞ : ﺣﻘﻪ؟؟
ﺭﻏﺪﺓ : ﻭﺍﻟﻠﻪ ﺍﺳﺄﻟﻲ ﺣﺘﻰ ﻣﺎﻣﺎ ..
ﻉ ﺟﻴﺔ ﻋﻴﺸﻪ : ﺍﻟﻠﻬﻢ ﺑﺎﺭﻙ ﻏﺰﺍﻻﺕ ﺍﻟﺰﻭﺯ ...
ﻧﻮﻣﻴﺪﻳﺎ : ﺑﺎﻫﻲ ﻫﻲ ﺳﺄﻻﺗﻚ ﻋﻠﻴﺎ ... ﺣﻄﺖ ﺍﻳﺪﻳﻬﺎ ﻓﻲ ﻧﺼﻬﺎ ﻭﻣﻴﻠﺖ ﺧﺼﺮﻫﺎ ﻭﻫﻲ ﺗﻘﻮﻝ ﺑﺪﻟﻊ ﻣﻊ ﺗﺸﻘﻠﻴﺒﺔ ﻋﻴﻮﻥ ... ﻧﻬﺒﻞ ﻣﺎﻣﺘﻲ ﻭﻻ ..
ﻋﻴﺸﻪ : ﻫﻬﻬﻬﻬﻬﻪ .. ﺍﻳﻪ ﺗﻬﺒﻠﻲ ﻭﺗﺠﻨﻨﻲ .. ﻫﻴﺎ ﺍﻟﺒﺴﻮﺍ ﻋﺒﺎﻳﺎﺗﻜﻢ ﺧﻮﻛﻢ ﺟﻲ ..
ﺿﺤﻜﻮﺍ ﺍﻟﺰﻭﺯ .. ﻟﺒﺴﻮﺍ ﻋﺒﺎﻳﺎﺗﻬﻢ ﻭﻃﻠﻌﻮﺍ ﻣﻊ ﺍﻣﻬﻢ ...
ﻃﻠﻌﻮﺍ ﻣﻦ ﺍﻟﺤﻮﺵ .. ﺭﻛﺒﻮﺍ ﺳﻴﺎﺭﺓ ﻧﻮﺡ ..
ﻭﺗﺤﺮﻛﻮﺍ ..
ﻭﻉ ﺑﻌﺪ ﻣﺴﺎﻓﺔ ﺑﺴﻴﻄﻪ .. ﻛﺎﻧﺖ ﻓﻲ ﺳﻴﺎﺭﺓ ﻭﺍﻗﻔﺔ ﺗﺮﺍﺟﻲ ﻓﻴﻬﻢ ﻳﺘﺤﺮﻛﻮﺍ ﻟﺤﻘﺘﻬﻢ ﻃﻮﻝ ..
***
ﻭﺍﻗﻔﺔ ﻓﻲ ﺍﻟﻜﻮﺟﻴﻨﻪ ﻉ ﺃﻋﺼﺎﺑﻬﺎ .. ﺗﻮﺗﻲ ﻣﻊ ﺍﻟﻨﺴﺎﻭﻳﻦ ﻓﻲ ﺍﻟﻌﺸﻲ .. ﻭﻛﺎﻧﺖ ﻛﻞ ﻛﺮﻳﺔ ﺩﻡ ﻓﻴﻬﺎ ﻭﺍﻟﻌﻪ ﻓﻴﻬﺎ ﺍﻟﻨﺎﺭ ...
ﺑﺮﺍ ..
ﻓﻲ ﺍﻟﺼﺎﻟﻪ ﺗﺤﺪﻳﺪﺍ ..
ﺭﺍﻓﻊ ﻭﻫﻮ ﻳﻤﺴﺢ ﻉ ﺷﻌﺮﻫﺎ : ﺧﻼﺹ ﻳﺎﺑﻨﺖ ﻳﺎﺳﺮﻙ ﺑﻜﻲ ..
ﺍﻳﻪ ﺑﺒﻜﻲ : ﻣﻌﺎﺵ ﺍﺩﻳﺮ ﻓﻴﻨﺎ ﻫﻜﻲ ..
ﺭﺍﻓﻊ : ﻫﻬﻬﻬﻬﻬﻪ ... ﺣﺎﺿﺮ ..
ﺧﺎﻟﺪ ﻭﻫﻮ ﻳﺸﻮﻓﻠﻬﻢ : ﺍﻟﻮﺿﻊ ﻣﻮﻟﻲ ﻳﺪﺭﻩ ﺍﻟﻜﺒﺪ ..
ﻧﺠﻼ ﺑﻀﺤﻜﻪ : ﺣﺘﻰ ﺍﻧﺖ ﻣﻼﺣﻆ
ﺧﺎﻟﺪ : ﺗﻲ ﻣﻦ ﺍﻟﻌﻴﺪ ﺍﻟﺼﻐﻴﺮﺓ ﺍﻟﻠﻲ ﻓﺎﺗﺖ .. ﻗﻠﺖ ﻋﺎﺩﻱ ﺑﺎﻟﻚ ﻳﺼﻴﺮ ﻣﻨﻬﻢ ﻭﻳﺎﺧﺪﻫﺎ ﺭﻏﻢ ﺍﻧﻬﺎ ﺻﻐﻴﺮﺓ ﻋﻠﻴﻪ .. ﻟﻜﻦ ﺗﻮﺍ ﻋﻨﺪﻩ ﻣﺮﺍﻩ ﺍﻟﻠﻲ ﺩﻳﺮ ﻓﻴﻪ ﺟﻮﻭ ﺭﺍﻣﺾ ﻭﺧﻮﻙ ﻋﺎﻃﻴﻬﺎ ﻭﺟﻪ ..
ﻧﺠﻼ : ﺭﺍﻓﻊ ﻃﻴﺐ ﻫﻠﺒﻪ ﻭﺍﻧﺖ ﻋﺎﺭﻓﻪ ﻭﻧﻴﺘﻪ ﺩﻳﻤﺎ ﺻﺎﻓﻴﻪ ﺗﻠﻘﺎﻩ ﻣﺶ ﻣﺮﻛﺰ ﻉ ﺣﺮﻛﺎﺗﻬﺎ ﺑﻜﻞ ..
ﺧﺎﻟﺪ : ﻫﻲ ﻫﺎﺩﻱ ﺍﻛﺒﺮ ﻣﺸﻜﻠﻪ ﻋﻨﺪﻩ ﺧﻮﻙ ﺍﻟﻄﻴﺒﻪ ﺍﻟﺰﺍﻳﺪﺓ ..
ﻧﺠﻼ : ﻻ ﺍﻟﻄﻴﺒﻪ ﻓﻲ ﻏﻴﺮ ﻣﺤﻠﻬﺎ ..
ﺧﺎﻟﺪ ﺑﻀﺤﻜﻪ : ﻛﺒﺮﻧﺎ ﻭﺑﺪﻳﻨﺎ ﻧﻌﺮﻓﻮﺍ ﻧﺘﻜﻠﻤﻮﺍ ..
ﻧﺠﻼ ﺿﺮﺑﺎﺗﻪ : ﺗﺤﺴﺎﺏ ﻏﻴﺮ ﺍﻧﺖ ﺑﺲ ..
ﺷﻮﻳﻪ ﻭﺧﺸﻮﺍ ﺍﻟﺒﻨﺎﺕ ﺑﺎﻟﻨﺴﻜﺎﻓﻴﻪ ﻭﺍﻟﺒﺎﻥ ﻛﻴﻚ ..
ﺧﺎﻟﺪ ﻋﻴﻮﻧﻪ ﻉ ﻭﺣﺪﻩ ﻓﻴﻬﻢ ﻣﺎﻧﺰﻟﺘﺶ ﻭﻫﻲ ﻣﺶ ﻣﺮﻛﺰﺓ ﻧﻬﺎﺋﻲ ﻭﻻﺣﺎﻃﻪ ﻓﺒﺎﻟﻬﺎ ﺣﺎﺟﻪ ..
ﻧﺠﻼ ﺑﻀﺤﻜﻪ : ﻋﻴﻮﻧﻚ ﻳﺎﺩﻛﺘﻮﺭ ..
ﺧﺎﻟﺪ ﺷﺒﺤﻠﻬﺎ ﺑﺘﻔﻨﻴﺼﻪ : ﺳﻜﺮﻱ ﻓﻤﻚ ..
ﻧﺠﻼ 😂:
***
ﻃﻠﻌﻮﺍ ﻣﻦ ﺍﻟﺤﻤﺎﻡ ﺑﻌﺪ ﺣﻮﻟﻮﺍ ﻋﺒﺎﻳﺘﻬﻢ ..
ﺳﻠﻤﻮﺍ ﻉ ﻋﻴﻠﺔ ﺍﻳﻤﺎﻥ ...
ﻭﻛﺎﻧﺖ ﺍﻟﻌﻴﻮﻥ ﻣﺮﻛﺰﺓ ﻉ ﻧﻮﻣﻴﺪﻳﺎ ﻫﻠﺒﻪ ...
ﻛﺎﻧﺖ ﺣﻠﻮﺓ ﻫﻠﺒﻪ ﻭﺟﺬﺍﺑﻪ .. ﺑﺘﺴﺮﻳﺤﺔ ﺷﻌﺮﻫﺎ ﻭﻗﻔﻄﺎﻧﻬﺎ ﺍﻟﻠﻲ ﻛﺎﻥ ﻟﻮﻧﻪ ﻛﺮﻳﻤﻲ ﻏﻠﻴﻆ ﻳﻠﻤﻊ ﺑﺎﻟﺬﻫﺒﻲ ... ﻛﺎﻥ ﻛﻢ ﻭﻃﻮﻟﻪ ﻟﻔﻮﻕ ﺍﻟﺮﻛﺒﻪ ﻭﻓﻲ ﺍﻟﺮﺟﻠﻴﻦ ﻛﻨﺪﺭﺓ ﻛﺮﻳﻤﻴﻪ ﺷﺎﻣﻮﺍ ﺣﻠﻮﺓ ﻉ ﺍﻵﺧﺮ ...
ﻭﻣﻜﻴﺎﺟﻬﺎ ﻛﺎﻥ ﺑﺴﻴﻂ .. ﻭﺣﻠﻮ ﻓﻨﻔﺲ ﺍﻟﻮﻗﺖ ..
ﺟﻴﺎﻧﺎ ﺑﺈﺑﺘﺴﺎﻣﻪ : ﺧﻴﺎﺍﺍﺍﻝ ﻧﻮﻣﻲ ..
ﺍﺑﺘﺴﻤﺖ ﻧﻮﻣﻴﺪﻳﺎ ﻭﺑﻌﺘﺘﻠﻬﺎ ﺑﻮﺳﺔ ﻃﺎﻳﺮﺓ ..
ﺭﻳﻢ ﺑﻀﺤﻜﻪ : ﺍﻟﻴﻮﻡ ﻳﺎﻋﻮﻳﺸﻪ ﺗﻄﻠﻘﻚ ﻣﺮﺍﺓ ﺗﺸﺪﻙ ﺍﻟﺘﺎﻧﻴﻪ ﻭﺍﻧﺘﻲ ﺗﻘﻮﻟﻴﻠﻬﻢ ﻣﺎﺯﺍﻝ ﺗﺒﻲ ﺗﻜﻤﻞ ﻗﺮﺍﻳﺘﻬﺎ ..
ﻋﻴﺸﻪ : ﻻﻻ ﻣﺶ ﻗﺎﻳﻠﺔ .. ﻗﺮﺍﻳﺘﻬﺎ ﻭﺗﻜﻤﻠﻬﺎ ﺍﻟﺴﻨﻲ ﻣﺎﻋﻨﺪﻱ ﻋﻼﺵ ﻧﺮﺩ ..
ﻧﻮﻣﻴﺪﻳﺎ : ﻫﻴﻴﻲ ﺗﺒﻲ ﺗﻔﺘﻚ ﻣﻨﻲ ﻋﻮﻳﺸﻪ ﺭﻳﺘﻮﻫﺎ ..
ﻋﻴﺸﻪ ﺑﻀﺤﻜﻪ : ﻭﻳﺮﺗﺎﺡ ﺭﺍﺳﻲ ..
ﺍﻟﺒﻨﺎﺕ ﺿﺤﻜﻮﺍ ..
ﻧﻮﻣﻴﺪﻳﺎ ﺑﺘﻀﻴﻴﻘﺔ ﻋﻴﻮﻥ ﻭﻫﻲ ﺗﺸﺒﺢ ﻉ ﺟﻨﺐ : ﺑﺎﻫﻲ ﻳﺎﻋﻴﻮﺷﻪ ﺑﺎﻫﻲ ..
ﺿﺤﻜﻮﺍ ...
ﺭﻳﻢ ﺗﺸﺒﺢ ﺣﻮﺍﻟﻴﻬﺎ ﺑﻌﺪﻳﻦ ﻗﺎﻟﺖ : ﺧﻮﺍﺗﻬﺎ ﻣﺘﺮﻳﺴﺎﺕ ﻉ ﻛﻞ ﺷﻲ ..
ﻧﻮﻣﻴﺪﻳﺎ : ﻭﻣﻦ ﺍﻣﺘﻰ ﻣﺶ ﻣﺘﺮﻳﺴﺎﺕ ﻫﻤﺎ ..
ﺟﻴﺎﻧﺎ : ﻭﺳﻦ ﺑﻜﺮﻱ ﻧﺎﺩﻱ ﻓﻴﻬﺎ ﻣﺶ ﻣﻌﺒﺮﺗﻨﻲ ﺑﻜﻞ ﺷﺎﺩﻩ ﻓﺨﺎﻻﺗﻬﺎ ﻭﺣﻨﺎﻫﺎ ﻭﺧﻼﺹ ..
ﻋﻴﺸﻪ ﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ...
ﻧﻮﻣﻴﺪﻳﺎ ﺷﺒﺤﺖ ﻷﻣﻬﺎ ﻭﻗﺎﻟﺖ : ﻳﻌﻮﺿﻨﺎ ﺭﺑﻲ ﻓﻲ ﺍﻳﻤﻦ ﻭﺧﻼﺹ ..
ﻋﻴﺸﻪ : ﺑﺎﻫﻲ ﻏﻴﺮﻭﺍ ﺍﻟﻤﻮﺿﻮﻉ ﻣﺶ ﺟﺎﻳﻪ ﺑﺶ ﻧﺤﺮﻕ ﺩﻣﻲ ..
ﺟﻴﺎﻧﺎ : ﺍﺳﻔﻴﻦ ﻣﺎﻣﺎ ..
ﻋﻴﺸﻪ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻫﻲ ﺷﺎﺩﻩ ﺩﻣﻮﻋﻬﺎ ..
ﺭﻏﺪﺓ ﺍﻟﻠﻲ ﻛﺎﻧﺖ ﻣﺤﺮﻭﻗﻪ ﻣﻦ ﺩﺍﺧﻞ ﺣﺒﺖ ﺗﻐﻴﺮ ﺍﻟﺠﻮ : ﻳﻌﻄﻴﻨﻲ ﺭﺑﻲ ﺭﺑﻊ ﺛﻘﺔ ﺍﺧﺘﻬﺎ ﺍﻟﻜﺒﻴﺮﺓ ..
ﺷﺒﺤﻮﺍ ﻭﻳﻦ ﻣﺎﺗﺸﺒﺢ ﺭﻏﺪﻩ ..
ﻟﻘﻮﺍ ﺍﺧﺘﻬﺎ ﺍﻟﻠﻲ ﺟﺴﻤﻬﺎ ﺟﺴﻢ ﻭﺣﺪﻩ ﻓﺴﺪ ﺑﻌﺪ ﺍﻟﺰﻭﺍﺝ ﻻﺑﺴﻪ ﻗﻔﻄﺎﻥ ﻣﻜﺸﻮﻑ .. ﻭﻣﺒﻴﻦ ﻃﺒﻘﺎﺕ ﺑﻄﻨﻬﺎ ﻭﺍﻣﺎﻛﻦ ﺯﻳﺎﺩﺓ ﺍﻟﻮﺯﻥ ﺍﻟﻤﺒﺎﻟﻎ ﻓﻴﻪ ﻏﻴﺮ ﻣﺮﻏﻮﺏ ... ﻣﻨﻈﺮﻫﺎ ﻏﻴﺮ ﻣﻘﺒﻮﻝ ﺑﻜﻞ ..
ﻧﻮﻣﻴﺪﻳﺎ ﺑﺈﺯﺩﺭﺍﺀ : ﺯﻱ ﺍﻟﻤﺼﺮﺍﻥ ﺍﻟﻠﻲ ﺯﺍﺩﻭﻩ ﺣﺸﻮﺓ ﻭﺍﻧﻔﻠﻖ ..
ﺿﺤﻜﻮﺍ ﺍﻟﺒﻨﺎﺕ ..
ﻋﻴﺸﻪ ﺑﻀﺤﻜﻪ : ﺗﺤﺸﻤﻲ ﻳﺎﺑﻨﺖ ..
ﻧﻮﻣﻴﺪﻳﺎ ﺷﻘﻠﺒﺖ ﻋﻴﻮﻧﻬﺎ ﻭﻫﻲ ﺗﺒﺘﺴﻢ ﺑﻤﻜﺮ ...
***
ﻣﺎﺻﺪﻗﺖ ﻗﺪﺭﺕ ﺗﻄﻠﻊ ﻣﻦ ﺍﻟﻜﻮﺟﻴﻨﻪ ﺗﻮﺟﻬﺖ ﻃﻮﻝ ﻟﻠﺼﺎﻟﻪ ..
ﻭﻳﻦ ﺟﺖ ﺧﺎﺷﻪ ﻗﺮﻳﺐ ﻣﺎﺗﺖ ﻟﻤﺎ ﺷﺎﻓﺘﻬﺎ ﺍﻟﻮﺣﻴﺪﻩ ﻣﻘﻌﻤﺰﺓ ﺣﺪﺍﻩ ﻭﻳﻬﺪﺭﺯﻭﺍ ﻭﻳﻀﺤﻜﻮﺍ ...
ﻧﺠﻼ ﺷﺎﻓﺘﻬﺎ : ﺗﻌﺎﻟﻲ ﻭﻓﻮ ..
ﺷﺒﺤﺘﻠﻬﺎ ﺍﺑﺘﺴﻤﺖ ﻣﺠﺎﻣﻠﻪ ﻭﺟﺖ ﻗﻌﻤﺰﺕ ﺣﺪﺍﻫﺎ ﻫﻲ ﻭﺧﺎﻟﺪ ..
ﺧﺎﻟﺪ ﻛﺎﻥ ﻳﺸﺒﺢ ﻟﺸﺨﺺ ﺑﻌﻴﻨﻪ ﺑﻌﺪﻳﻦ ﻭﻳﻦ ﺟﺖ ﻣﺮﺕ ﺧﻮﻩ ﺷﺒﺢ ﻟﺨﻮﻩ ﻟﻘﺎﻩ ﻻﻣﺒﺎﻟﻲ ﺑﻤﺮﺗﻪ ﺍﻟﻠﻲ ﺧﺸﺖ .. ﺍﺳﺘﻐﺮﺏ ..
ﺑﻌﺪﻳﻦ ﺷﺒﺢ ﻟﻮﻓﺎﺀ ﻟﻘﺎﻫﺎ ﺗﺸﻮﻓﻠﻬﻢ ﻣﻦ ﻃﺮﻑ ﻋﻴﻨﻬﺎ ﻭﺍﻟﺪﻣﻮﻉ ﻣﺤﺒﻮﺳﺎﺕ ...
ﺧﺎﻟﺪ : ﺷﻦ ﺟﻮ ﻣﺮﺕ ﺧﻮﻱ ..
ﺷﺒﺤﺘﻠﻪ ﻭﻓﺎﺀ ﺍﻟﻠﻲ ﻛﺎﻧﺖ ﻣﺮﺑﻌﻪ ﺍﻳﺪﻳﻬﺎ ﺑﻘﻮﺓ ﻣﻦ ﺣﺮﻕ ﺍﻻﻋﺼﺎﺏ : ﺍﻟﺤﻤﺪ ﻟﻠﻪ .. ﺍﻧﺖ ﺷﻦ ﺟﻮﻙ .. ﺷﻦ ﻣﺪﺍﻳﺮ ﻓﺒﺮﻳﻄﺎﻧﻴﺎ ..
ﺧﺎﻟﺪ ﺑﺈﺑﺘﺴﺎﻣﻪ : ﺍﻫﻮ ﻗﺮﺍﻳﻪ ﻭﺧﻼﺹ ..
ﻧﺠﻼ : ﻭﺩﻫﻮﺍﺭﻱ ..
ﺧﺎﻟﺪ : ﺧﻮﻙ ﻣﺨﻠﻲ ﻓﻴﻬﺎ ﺩﻫﻮﺍﺭﻱ ﺣﺎﻁ ﻋﻠﻴﺎ ﺣﺮﺍﺳﺎﺕ ﻭﻳﻦ ﻣﺎﻧﻤﺸﻲ ..
ﺿﺤﻜﺖ ﻧﺠﻼ : ﺗﺴﺘﺎﻫﻞ ..
ﺧﺎﻟﺪ ﺭﻳﺸﻬﺎ ..
ﻧﺠﻼ : ﺍﻩ ﻫﻬﻬﻬﻬﻬﻪ ...
ﺿﺤﻜﺖ ﻭﻓﺎﺀ ﻭﻫﻲ ﺗﺸﻮﻓﻠﻬﻢ ...
ﺧﺎﻟﺪ : ﺍﻳﻪ ﻣﺮﺕ ﺧﻮﻱ ﺷﻦ ﺣﺒﺘﻴﻨﺎ ..
ﻭﻓﺎﺀ ﺑﻀﺤﻜﻪ : ﺣﺒﻴﺘﻬﻢ ﻫﻤﺎ ﺍﻧﺖ ﻣﺎﺯﺍﻝ ﻣﺎﻧﻌﺮﻓﻜﺶ ..
ﻧﺠﻼ ؛ ﺍﻭﻭﻭﺑﺎ ..
ﺧﺎﻟﺪ : ﻫﻬﻬﻬﻬﻬﻪ ﻋﻼﺵ ﻫﻜﻲ ﺑﺲ ﺟﺎﻣﻠﺘﻲ ﺑﺎﻩ ..
ﻭﻓﺎﺀ ﺑﻀﺤﻜﻪ : ﻣﺎﻧﻌﺮﻓﺶ ﻧﺠﺎﻣﻞ ..
ﺧﺎﻟﺪ ﺑﻀﺤﻜﻪ : ﺍﻭﻛﻲ ﻳﺎﺳﺘﻲ ﺗﻮ ﺗﻌﺮﻓﻴﻨﻲ ﺍﻟﺸﻬﺮ ﻫﺪﺍ ﻭﺗﺤﺒﻴﻨﻲ ﺍﻛﺜﺮ ﻣﻨﻬﻢ ...
ﻧﺠﻼ : ﻣﺶ ﻣﻬﻢ ﺗﺤﺒﻚ ﻫﻲ ﺍﻟﻤﻬﻢ ﺍﻟﻌﺮﺏ ﺍﻟﻠﻲ ﺣﺪﺍﻧﺎ ..
ﺧﺎﻟﺪ ﺣﺎﻭﻁ ﺭﺍﺳﻬﺎ ﺑﺪﺭﺍﻋﻪ : ﻗﺼﻴﻪ .. ﻟﺴﺎﻧﻚ ﻫﺬﺍ ﻗﺼﻴﻪ .
ﻧﺠﻼ ﻣﻴﺘﻪ ﺑﺎﻟﻀﺤﻚ
ﻭﻓﺎﺀ : ﻫﻬﻬﻬﻬﻬﻬﻬﻬﻪ ...
ﻛﻠﻬﻢ ﺷﺒﺤﻮﻟﻬﻢ ﺑﻤﺎ ﻓﻴﻬﻢ ﻫﻮ ﺍﻟﻠﻲ ﻫﺪﺍ ﻭﻳﻦ ﺭﻛﺰ ..
ﻓﺎﺭ ﺩﻣﻪ ﻭﻳﻦ ﺷﺎﻓﻬﺎ ﻣﻘﻌﻤﺰﻩ ﺣﺪﺍ ﺧﻮﻩ ﻭﺗﻀﺤﻚ 🔥...
ﻃﻠﻖ ﺧﺎﻟﺪ ﺍﺧﺘﻪ ...
ﻧﺠﻼ ﺷﺎﺩﻩ ﺭﺍﺳﻬﺎ : ﺍﺍﺍﻩ ﺭﺍﺳﻲ ﻳﺎﺟﻴﻔﻪ ..
ﺧﺎﻟﺪ : ﺗﺴﺘﺎﻫﻠﻲ
ﻭﻭﻓﺎﺀ ﻣﺎﺯﺍﻟﺖ ﺗﻀﺤﻚ ..
" ﺧﺎﺍﻟﺪ .."
ﺷﺒﺤﻮﻟﻪ ﻟﻤﺎ ﻧﺎﺩﻯ ﺧﻮﻩ ﺑﺤﺪﻩ ...
ﺭﺍﻓﻊ : ﻫﻴﺎ ﻧﻮﺽ ﻣﻌﺎﻱ ﻟﻠﻤﺮﺑﻮﻋﻪ ﺟﻤﺎﻋﻪ ﻉ ﺟﻴﻪ ..
ﻧﺎﺽ ﺧﺎﻟﺪ ﺍﺑﺘﺴﻢ : ﺗﻤﺎﻡ ...
ﻧﺎﺽ ﺭﺍﻓﻊ ﻭﻫﻲ ﺗﺸﺒﺤﻠﻪ ..
ﺷﺒﺤﻠﻬﺎ ﺑﻨﻈﺮﺓ ﺣﺎﺩﺓ ﺗﺤﺮﻕ .. ﻃﻠﻊ ﻭﻭﺭﺍﻩ ﺧﻮﻩ ..
ﻧﺠﻼ ﻗﺮﺑﺘﻠﻬﺎ : ﻏﺎﺭ ﻣﻦ ﺧﺎﻟﺪ ...
ﻭﻓﺎﺀ ﺷﺒﺤﺘﻠﻬﺎ : ﺣﻲ ﻋﻠﻴﺎ ﺗﻮ ﻳﻮﺭﻳﻨﻲ ﻉ ﺗﻘﻌﻤﻴﺰﺗﻲ ﻣﻌﺎﻩ ... ﻧﺤﺴﺎﺑﻪ ﻋﺎﺩﻱ ..
ﻧﺠﻼ : ﻋﻼﺵ ﻋﺎﺩﻱ ﺗﻘﻌﻤﻴﺰﺗﻪ ﻣﻊ ﻫﺪﻳﻜﺎ ﺍﻟﺸﺒﻴﻄﻪ؟ !
ﺿﺤﻜﺖ ﻭﻓﺎﺀ .. ﻭﻧﺠﻼ ﻛﺬﻟﻚ ...
***
ﻣﻘﻌﻤﺰﺓ ﻗﺪﺍﻡ ﺍﻟﺘﻠﻔﺰﻳﻮﻥ
ﺗﺘﻔﺮﺝ ﺑﺸﻮﻕ ﻭﺣﺐ ﻋﻠﻴﻪ ﻭﻓﺮﺣﺎﻧﻪ ﺑﻴﻪ ﻫﻠﺒﻪ ...
ﻭﻫﻮ ﻳﻘﺪﻡ ﻓﻲ ﺑﺮﻧﺎﻣﺞ ﺳﻴﺎﺳﻲ ﻭﻳﺪﻳﺮ ﻓﻲ ﺍﻟﺤﻮﺍﺭ ﺑﺄﺣﺘﺮﺍﻓﻴﻪ ..
ﺍﻳﻪ ﻫﻮ ﻣﻮﻫﻮﺏ ﻭﺷﺎﻃﺮ ﻓﻤﻬﻨﺘﻪ ...
ﺍﻟﻠﻲ ﻳﺸﻮﻓﻪ ﻳﻘﺪﺭﻩ ﻭﻳﺤﺘﺮﻣﻪ ﻭﻳﺸﻮﻓﻪ ﻭﺍﺣﺪ ﻋﻠﻴﻪ ﺍﻟﻘﻴﻤﻪ ..
ﺑﺲ ﻫﺬﺍ ﻛﻠﻪ ﻗﺪﺍﻡ ﺍﻟﻜﺎﻣﻴﺮﺍ ﻭﺑﺲ ..
ﻭﻣﺎﻭﺭﺍﺀ ﺍﻟﻜﻮﺍﻟﻴﺲ ﺍﻟﻌﻜﺲ ﺗﻤﺎﻣﺎ ..
🌟 ﻭﻫﻠﺒﻪ ﻣﻨﻬﻢ ﺗﻮﺍ ﺍﻟﻠﻲ ﺯﻱ ﻳﻮﺳﻒ ﺭﻩ ﻣﻌﺒﻴﻴﻦ ﻗﻨﻮﺍﺕ ﺗﺘﻜﻠﻢ ﺑﻠﺴﺎﻥ ﻟﻴﺒﻲ ﻭﺗﺪﻋﻲ ﺍﻧﻬﺎ ﻟﻴﺒﻴﻪ ﻭﻫﻲ ﺍﺑﻌﺪ ﻣﺎﻳﻜﻮﻥ ﻋﻦ ﻟﻴﺒﻴﺎ ﻭﺍﻟﻠﻴﺒﻴﺒﻦ 🍃
***
ﻓﺮﻗﻮﺍ ﺍﻟﺮﻭﺯﺍﻃﻪ ﻭﺍﻟﻌﺒﻤﺒﺮ ...
ﺭﻏﺪﻩ : ﺑﺪﺍﻝ ﻣﺎﻳﺪﻳﺮﻭﺍ ﻫﺎﻓﺎﻧﺎ ﻭﻣﺎﻛﺮﻭﻥ .. ﺷﻼﻓﻄﻴﻪ ..
ﺟﻴﺎﻧﺎ ﺿﺤﻜﺖ ..
ﺭﻳﻢ : ﻣﻦ ﻧﻬﺎﺭ ﻋﺮﻓﻨﺎﻫﻢ ﺷﻼﻓﻄﻴﻪ .. ﻛﺘﺮﺓﻓﻠﻮﺱ ﻉ ﻣﺎﻓﻴﺶ ..
ﻋﻴﺸﻪ ﺑﻀﺤﻜﻪ : ﻣﺎﺧﺪﻳﺘﻮﺍ ﻛﺎﻥ ﺫﻧﻮﺑﻬﻢ ..
ﺭﻏﺪﻩ : ﺣﻲ ﻧﻬﺎﺭﻱ ﻧﺴﻴﺖ .. ﻛﺎﻥ ﻧﺎﺧﺪ ﺫﻧﻮﺑﻬﻢ ﻧﺨﺶ ﺟﻬﻨﻢ ﻣﻊ ﺍﺑﻮﻟﻬﺐ ...
ﺿﺤﻜﻮﺍ ﻛﻠﻬﻢ ﻣﺎﻋﺪﺍ ﻧﻮﻣﻴﺪﻳﺎ ﺍﻟﻠﻲ ﻛﺎﻧﺖ ﺗﺸﻮﻑ ﻟﻠﻌﺒﻤﺒﺮ ﺑﺴﺮﺣﺎﻥ ﻭﻫﻲ ﻣﺒﺘﺴﻤﻪ ...
ﺍﺫﻛﺮﺕ ﺍﻟﻤﻮﻗﻒ ﺍﻟﻠﻲ ﺣﻜﺎﻫﻮﻟﻬﺎ ...
ﺧﻄﺮﺗﻠﻬﺎ ﺣﺎﺟﺔ ... ﺷﺒﺤﺖ ﻟﺨﻮﺍﺗﻬﺎ ﻭﺍﻣﻬﺎ ﻟﻘﺘﻬﻢ ﻻﻫﻴﻴﻦ ﺑﺎﻟﻬﺪﺭﺯﺓ
ﻟﻔﺖ ﺍﻟﻌﺒﻤﺒﺮ ﻓﻲ ﻛﻠﻴﻨﻜﺲ ﻭﺩﺳﺎﺗﻪ ﻓﺸﻨﻄﺘﻬﺎ ..
ﺷﻮﻳﻪ ...
ﻭﺍﻟﻤﺮﺍﺓ ﺍﻟﻤﻘﻌﻤﺰﺓ ﻉ ﺍﻟﻤﻨﻈﻮﻣﻪ ﻧﺒﻬﺖ ﺍﻟﺤﺎﺿﺮﺍﺕ ﻳﺘﺤﺠﺒﻮﺍ ﻷﻥ ﺍﻳﻤﺎﻥ ﻫﻲ ﻭﻟﺪﻫﺎ ﺑﻴﺨﺶ ﻣﻌﺎﻫﻢ ﻧﻮﺡ ...
ﺷﻮﻳﻪ ﺗﺎﻧﻴﻪ ..
ﻇﻠﻤﺖ ﺍﻟﺼﺎﻟﻪ ..
ﻭﻭﻟﻌﺖ ﺑﺮﻫﺔ ﺿﻲ ﻉ ﺍﻟﻤﺪﺧﻞ ﻭﺧﺸﻮﺍ ..
ﺍﻳﻤﺎﻥ ﻻﺑﺴﻪ ﺍﻟﺒﺪﻟﻪ ﺍﻟﺼﻐﻴﺮﻩ ﻭﻣﻌﺎﻫﺎ ﻧﻮﺡ ﺑﺎﻟﻌﺮﺑﻲ ..
ﻭﺍﻟﺰﻭﺯ ﺷﺎﺩﻳﻦ ﻳﺪ ﺍﻟﻜﺮﻭﺳﻪ ﻭﺧﺎﺷﻴﻦ ﻉ ﺍﻏﻨﻴﺔ ﺳﺎﻣﻲ ﻳﻮﺳﻒ
" ﺍﻟﻠﻬﻢ ﺻﻞ ﻉ ﻣﺤﻤﺪ ..."
ﻛﺎﻧﺖ ﻋﻴﺸﻪ ﺗﺸﻮﻓﻠﻬﻢ ﺑﺤﺰﻥ ﺷﺪﻳﺪ ...
ﻭﻟﺪ ﻭﻟﺪﻫﺎ ﻣﻦ ﻟﻤﺎ ﺟﺎﺑﺘﻪ ﻣﺎﺷﺎﻓﺘﺎﺵ ﺍﻹ ﻣﺮﺍﺕ ﻣﻌﺪﻭﺩﺓ ﻓﻲ ﺍﻟﻤﺴﺘﺸﻔﻰ ﻭﻣﺮﺓ ﻭﺣﺪﻩ ﻟﻤﺎ ﺟﻮﻫﺎ ﻭﻫﻤﺎ ﻣﺮﻭﺣﻴﻦ ﻣﻦ ﺗﻮﻧﺲ ..
ﻛﺎﻧﺖ ﻋﺎﺭﻓﻪ ﺯﻱ ﻣﺎﻛﺒﺮﺕ ﺍﻟﺒﻨﻴﻪ ﻣﻊ ﺍﻫﻞ ﺍﻣﻬﺎ ﺣﺘﻰ ﺍﻟﻮﻟﺪ ﻧﻔﺲ ﺍﻟﺸﻲ ...
ﻫﻲ ﺟﺪﻩ ﺑﺲ ﻋﻤﺮﻫﺎ ﻣﺎﺣﺴﺖ ﺑﻤﻌﻨﻰ ﻫﺎﻟﻜﻠﻤﻪ ..
ﻭﻟﻮ ﻓﻲ ﺣﺪ ﻳﺴﺘﺎﻫﻞ ﺍﻟﻠﻮﻡ ﻫﻨﻲ ... ﻫﻮ ﻭﻟﺪﻫﺎ .. ﻭﻟﺪﻫﺎ ﻭﺑﺲ 💔
🍁 ﺻﻮﺭ ﻧﻮﺡ ﻣﻊ ﻣﺮﺗﻪ ﻭﺻﻐﺎﺭﻩ ... ﺑﻌﺪﻳﻦ ﻣﻊ ﺍﻣﻬﺎ ﻭﺧﻮﺍﺗﻬﺎ .. ﻣﺎﺧﻄﺮﺗﺶ ﻉ ﺑﺎﻟﻪ ﺍﻣﻪ ﻧﻬﺎﺋﻲ ﻣﺎﻓﻜﺮﺵ ﻓﻴﻬﺎ ..
ﺍﻟﺒﻨﺎﺕ ﺍﻧﺤﺮﻗﻮﺍ ﺣﺮﻕ ﻉ ﺧﺎﻃﺮ ﺍﻣﻬﻢ ﻭﻛﺎﻧﻮﺍ ﺷﺎﺩﻳﻦ ﺩﻣﻮﻋﻬﻢ ﺑﺎﻟﺴﻴﻒ ﺯﻳﻬﺎ ﻫﻲ ....
ﻃﻠﻊ ﻧﻮﺡ ﺑﺴﺮﻋﻪ ..
ﻭﻋﻴﺸﻪ ﺗﺠﺎﻫﻠﺖ ﻛﻨﺘﻬﺎ ﺯﻱ ﻣﺎﻫﻲ ﺗﺠﺎﻫﻠﺘﻬﺎ ﻭﻻﺑﺖ ﺗﻤﺸﻴﻠﻬﺎ ﻭﻻﺍﺩﻭﺭﻫﺎ ...
ﻃﻮﻝ ﺍﻟﻮﻗﺖ ﻭﻫﻲ ﻣﻊ ﺧﻮﺍﺗﻬﺎ ﻭﺑﺲ .. ﻭﺍﻣﻬﺎ ﻣﺪﻳﺮﺓ ﺍﻟﻠﻴﻠﻪ .. ﻭﻛﺎﻧﺖ ﻣﺴﺘﻜﺮﺩﺓ ﻋﻴﺸﻪ ﻭﺍﻟﺒﻨﺎﺕ ﺍﺳﺘﻜﺮﺍﺩ ﺗﺎﻡ ..
ﺣﺘﻰ ﻟﻤﺎ ﺟﺎﺑﻮﺍ ﺍﻟﻌﺸﻲ ﻣﺎﺑﻮﺵ ﻳﻤﺴﻮﺍ ﻣﻨﻪ ﺣﺎﺟﻪ ...
ﺧﺸﺖ ﻋﻤﺘﻜﻢ ﺍﻳﻤﺎﻥ ﻏﻴﺮﺕ ﻭﻟﺒﺴﺖ ﻗﻔﻄﺎﻥ ...
ﺍﻟﺼﺪﻣﻪ ﻫﻨﻲ ...
ﺍﻧﻬﺎ ﻛﺎﻧﺖ ﻣﻘﻠﺪﻩ ﻧﻮﻣﻴﺪﻳﺎ ﻓﻘﺼﺔ ﺍﻟﺸﻌﺮ ﻭﺻﺎﺑﻐﻪ ﺷﻌﺮﻫﺎ ﺑﻨﻔﺲ ﻟﻮﻥ ﺷﻌﺮ ﻧﻮﻣﻴﺪﻳﺎ ...
ﻭﺩﺍﺭﺕ ﺷﻌﺮﻫﺎ ﺑﺘﺴﺮﻳﺤﻪ ﺷﺒﻴﻬﻪ ﻟﺘﺴﺮﻳﺤﺘﻬﺎ ..
ﺟﻴﺎﻧﺎ : ﺣﻴﻲ ﻉ ﺍﻟﻤﺮﻳﻀﻪ ..
ﺭﻳﻢ : ﻣﺘﻔﻬﻬﺎ ..
ﺭﻏﺪﺓ : ﻫﻬﻬﻬﻬﻬﻬﻬﻪ ...
ﻧﻮﻣﻴﺪﻳﺎ ﺷﺒﺤﺘﻠﻬﺎ ﺑﺈﺯﺩﺭﺍﺀ : ﺍﻟﻌﺎﺍﺍﺭ ...
ﻭﺻﻠﺖ ﻓﻲ ﺍﻟﻜﻮﺷﻪ ﻭﻗﻌﻤﺰﺕ ﺣﺪﺍ ﻭﻟﺪﻫﺎ ...
ﺍﺧﺘﻬﺎ : ﺣﻤﺎﺗﻚ ﺷﺎﻓﺎﺗﻚ ﻗﺎﺻﺘﻴﻬﺎ ..
ﺍﻳﻤﺎﻥ : ﺍﻳﻪ ﻛﺎﺳﺘﺮﻟﻲ ﺭﻗﺒﺘﻲ ﺍﻟﻤﺮﻳﻀﻪ ﻫﺎﺩﻱ ﺗﻤﺎﺭﻱ ﻓﻴﺎ ﻓﻜﻞ ﺷﻲ
ﺣﺘﻰ ﻓﻲ ﺍﻟﻠﻲ ﺻﺎﺭﻟﻲ ﻓﺠﻴﺎﺑﻲ ﺩﺍﺭﺕ ﺭﻭﺣﻬﺎ ﻣﻜﺴﺮﺓ ﺑﺶ ﺗﻠﻔﺖ ﺍﻷﻧﺘﺒﺎﻩ ..
ﺍﺧﺘﻬﺎ : ﻣﺮﻳﻀﺔ ﻫﺎﺩﻱ ..
ﺍﻳﻤﺎﻥ : ﻣﺮﻳﻀﺔ ﺑﺎﻟﺤﺴﺪ ﻭﺍﻟﻐﻴﺮﻩ ..
" ﻣﺎﺗﺴﺘﻐﺮﺑﻮﺵ ﻓﻲ ﻫﻜﻲ ﻭﺍﺣﺮﻑ ﻉ ﺍﺭﺽ ﺍﻟﻮﺍﻗﻊ "😂
****
ﺭﻭﺣﻮﺍ ﺿﻴﻮﻓﻪ ﻭﻗﻌﺪ ﻫﻮ ﻭﺧﻮﻩ ﻭﻭﻻﺩ ﺧﺎﻟﺘﻪ ﻓﻲ ﺍﻟﻤﺮﺑﻮﻋﻪ ..
ﻭﻓﻲ ﺍﻟﺪﺍﺭ ﺍﻟﺪﺧﻼﻧﻴﻪ ..
ﺧﺎﺍﻻﺗﻪ ﻭﻋﻤﺘﻪ ﻭﺑﻨﺎﺗﻬﻢ ﻭﺧﻮﺍﺗﻪ ...
ﻭﻫﻲ ﻣﺮﺗﻪ 🌼 ﻣﻌﺎﻫﻢ ..
ﻛﺎﻧﻮﺍ ﻳﻬﺪﺭﺯﻭﺍ ...
ﻓﺠﺮﻳﻪ : ﻭﻓﺎﺀ ﻭﺭﺍﺱ ﺑﻨﻴﺘﻲ ﺍﻧﺘﻲ ﺣﺪﺍ ﺍﻟﺒﺎﺏ ﻓﻴﺴﻊ ﻓﻴﺴﻊ ﺟﻴﺒﻠﻲ ﺍﻟﻠﻮﻳﺰﺍﺕ ﺗﻌﺮﻓﻲ ﻣﻜﺎﻧﻬﻢ ..
ﻭﻓﺎﺀ ﻧﺎﺿﺖ ﺑﺈﺑﺘﺴﺎﻣﻪ : ﺣﺎﺿﺮ ...
ﻣﺸﺖ ﻟﻠﻜﻮﺟﻴﻨﻪ ... ﻭﻫﻲ ﻣﺎﺷﻴﻪ ﺳﻤﻌﺖ ﺻﻮﺕ ﺿﺤﻜﺘﻪ ﺍﻟﻌﺎﻟﻲ ﺟﺎﻱ ﻣﻦ ﺍﻟﻤﺮﺑﻮﻋﻪ .. ﺿﺤﻜﺖ ﺑﻌﺪﻳﻦ ﺗﻨﻬﺪﺕ ﻭﺧﺸﺖ ... ﻋﻘﻠﻬﺎ ﻋﻨﺪﻩ ... ﻗﻌﺪﺕ ﺗﻐﻨﻲ ﺗﻠﻘﺎﺋﻴﺎ ...
🎶 ﻋﻤﺮﻙ ﺳﻤﻌﺖ ﺑﻄﻴﺮ ﻭﻳﺤﺐ ﺳﺠﺎﻧﻪ
ﻣﻦ ﺷﺎﻓﻚ ﺍﻧﺖ ﻧﺴﺎ ﻭﺵ ﺗﻌﻨﻲ ﺟﻨﺤﺎﻧﻪ ..
ﺗﻨﻬﺪﺕ ﻣﻦ ﻗﻠﺒﻬﺎ ﻭﻛﻤﻠﺖ 💓
ﺍﻧﺎ ﺗﺮﺍﻧﻲ ﻃﻴﺮﻙ ﺍﻟﻠﻲ ﻳﺤﺒﻚ ﻣﻮﺕ ..
ﻟﻮ ﺣﺐ ﻗﻠﺒﻲ ﻏﻴﺮﻙ ﺍﺩﻋﻲ ﻋﻠﻴﻪ ﻳﻤﻮﺕ ..
ﺑﺪﻋﻲ ﻋﻠﻴﻪ ﻳﻤﻮﺕ ...
ﻓﻘﺮﺑﻚ ﺍﻧﺖ ﻧﺴﺎ ﺍﻧﻪ ﻳﺎﻋﻤﺮﻱ ﻃﻴﺮ ..
ﻓﺘﺤﺖ ﺍﻟﺪﻭﻻﺏ ..
ﻣﺎﺗﺸﺪ ﻋﻴﻨﻪ ﺍﻟﺴﻤﺎ ﻭﻻﻳﺮﻳﺪ ﻳﻄﻴﺮ ..
ﺧﺪﺕ ﺷﻜﺎﺭﺓ ﺍﻟﻠﻮﺯ ..
ﻫﺬﺍ ﺍﻟﻐﻼ ﻭﺍﻟﺤﺐ ﻣﻦ ﺍﻟﻠﻪ ﺳﺒﺤﺎﻧﻪ ..
ﻋﻤﺮﻙ ﺳﻤﻌﺖ ﺑﻄﻴﺮ ﻭﻳﺤﺐ ﺳﺠﺎﻧﻪ ..
ﺗﻨﻬﺪﺕ ﻭﻗﺎﻟﺖ
ﻋﻤﺮﻙ ﺳﻤﻌﺖ ﺑﻄﻴﺮ ﻭﻳﺤﺐ ﺳﺠﺎﻧﻪ ...
ﺗﻨﻬﺪﺕ ﻣﺮﺓ ﺗﺎﻧﻴﻪ ﻭﺻﻜﺮﺕ ﺍﻟﺪﻭﻻﺏ ..
ﻭﻛﻴﻒ ﺟﺖ ﺑﺘﻠﻒ ﺑﺶ ﺗﻄﻠﻊ ...
ﺷﻬﻘﺖ ﺑﺨﻠﻌﻪ ﻭﺣﻄﺖ ﻳﺪﻫﺎ ﻉ ﺻﺪﺭﻫﺎ ...
ﺭﺍﻓﻊ ﻭﻫﻮ ﻭﺍﻗﻒ ﻓﻲ ﺍﻟﺒﺎﺏ ﻗﺎﻝ ﺑﺮﻓﻌﺔ ﺣﻮﺍﺟﺐ : ﺷﻔﺘﻲ ﺟﻦ !!
ﻭﻓﺎﺀ : ﻻ ﻣﺎﺣﺴﻴﺘﺶ ﺑﻮﺟﻮﺩﻙ ..
ﺭﺍﻓﻊ ﺑﺮﻓﻌﺔ ﺣﺎﺟﺐ : ﺷﻦ ﻗﺼﺪﻙ ؟ !
ﻭﻓﺎﺀ ﺑﺨﻮﻑ ﻷﻧﻪ ﻓﻬﻤﻬﺎ ﻏﻠﻂ : ﻧﻘﺼﺪ ﻣﺎﺣﺴﻴﺘﺶ ﺍﻧﻚ ﺟﻴﺖ ..
ﺭﺍﻓﻊ ﺳﻜﺖ ﻭﻫﻮ ﻳﺸﻮﻓﻠﻬﺎ ﺑﺮﻓﻌﺔ ﺣﺎﺟﺐ ..
ﻫﻲ ﻣﺶ ﻋﺎﺭﻓﻪ ﻋﻼﺵ ﺣﺎﺳﻪ ﺭﻭﺣﻬﺎ ﻣﻠﺨﺒﻄﺔ ﻭﺧﺎﻳﻔﻪ ..
ﺍﻭ ﻣﻤﻜﻦ ﺗﻌﺮﻑ ﺧﺎﻳﻔﺔ ﻳﻬﺰﺑﻬﺎ ﻉ ﺗﻘﻌﻤﻴﺰﺗﻬﺎ ﻣﻊ ﺧﻮﻩ ..
ﻓﻜﺮﺕ ﺗﻬﺮﺏ ﻭﺗﺪﻋﻲ ﻣﻦ ﺩﺍﺧﻠﻬﺎ ﻳﺨﻠﻴﻬﺎ ﺗﻔﻮﺕ ﺑﺴﻼﻡ ..
ﻭﺻﻠﺖ ﻓﻲ ﺍﻟﺒﺎﺏ ﺳﻜﺮﻩ ﻋﻠﻴﻬﺎ ﺑﻴﺪﻩ ...
ﻋﻴﻮﻧﻬﺎ ﻗﻌﺪﻭﺍ ﻟﻮﻃﺎ ﻣﻦ ﺍﻟﺨﻮﻑ ..
ﺭﺍﻓﻊ ﺑﺤﺪﻩ : ﺍﺷﺒﺤﻴﻠﻲ ﺟﺎﻱ ..
ﺭﻓﻌﺖ ﻋﻴﻮﻧﻬﺎ ﻭﺷﺒﺤﺘﻠﻪ ..
ﺭﺍﻓﻊ :💓 ﺧﻮﻱ ﻓﻲ ﺣﺪﻭﺩ ﺩﻳﺮﻳﻬﻢ ﺑﻴﻨﻚ ﻭﺑﻴﻨﻪ .. ﺧﻴﺮ ﻣﺴﺎ ﺍﻟﺨﻴﺮ ﻭﺑﺲ .. ﺳﻼﻡ ﺑﺎﻟﻴﺪ ﻣﺎﻓﻴﺶ .. ﺍﻟﻠﻲ ﺻﺎﺭ ﺑﻜﺮﻱ ﻳﺘﻜﺮﺭ .. ﻧﺨﻠﻴﻚ ﺗﺒﻜﻲ ..
ﻫﻲ ﻧﺰﻟﺖ ﻋﻴﻮﻧﻬﺎ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ...
ﻭﻓﺎﺀ : ﺑﺎﻫﻲ ﺧﻠﻴﻨﻲ ﻧﻔﻮﺕ ﻋﻤﺘﻲ ﺗﺴﺘﻨﻰ ﻓﻴﺎ ...
ﺍﺗﻜﺎ ﻉ ﺍﻟﺠﻬﻪ ﺍﻟﻠﻲ ﻛﺎﻥ ﻣﺴﻜﺮﻫﺎ ﺑﻴﺪﻩ ﻭﻻ ﻣﺴﻜﺮﻫﺎ ﺑﺠﺴﻤﻪ ﻭﻗﺎﻝ : ﻓﻮﺗﻲ ﻣﻦ ﻫﻨﻲ ..
ﻭﻓﺎﺀ ﺷﺒﺤﺘﻠﻪ ... ﺑﻌﺪﻳﻦ ﻣﺸﺖ ﻣﻦ ﺍﻟﺠﻬﻪ ﺍﻟﺘﺎﻧﻴﻪ ...
ﺑﺴﺮﻋﻪ ﺟﻲ ﻗﺪﺍﻣﻬﺎ ..
ﻭﻓﺎﺀ ﺗﻨﻬﺪﺕ ﻭﻣﺸﺖ ﻟﻠﺠﻬﺔ ﺍﻻﻭﻟﻲ ...
ﺟﻲ ﻗﺪﺍﻣﻬﺎ ..
ﺿﺤﻜﺖ ﺑﺪﻭﻥ ﻣﺎﺗﺸﻮﻓﻠﻪ : ﻭﺍﻟﻠﻪ ﻋﻤﺘﻲ ﺗﺮﺍﺟﻲ ﻓﻴﺎ ﺍﻟﻠﻪ ..
ﺭﺍﻓﻊ ﺑﺮﻓﻌﺔ ﺣﺎﺟﺐ : ﺑﺮﻱ ﻣﻦ ﺷﺎﺩﻙ ..
ﺷﺒﺤﺘﻠﻪ ..
ﻟﻘﺎﺗﻪ ﻳﺸﻮﻓﻠﻬﺎ ﺑﺒﺮﻭﺩ ..
ﻏﻤﻀﺖ ﻋﻴﻮﻧﻬﺎ ﺑﻤﻠﻞ ﻭﻓﺘﺤﺘﻬﻢ ﻭﻣﺸﺖ ﻣﻦ ﺍﻟﺠﻬﺔ ﺍﻟﺘﺎﻧﻴﻪ ...
ﺟﻲ ﻗﺪﺍﻣﻬﺎ ..
ﻭﻓﺎﺀ ﺷﺒﺤﺘﻠﻪ ﺑﺮﻓﻌﺔ ﺣﺎﺟﺐ ..
ﺭﺍﻓﻊ : ﻭﻳﻦ ﻧﻤﺸﻲ ﺗﺠﻲ ﻗﺪﺍﻣﻲ .. ﺗﻲ ﺣﻮﻟﻲ ﺧﻞ ﻧﺨﺶ ..
ﻭﻓﺎﺀ ﺿﺤﻜﺖ ﻭﻫﻲ ﺗﺸﻘﻠﺐ ﻓﻌﻴﻮﻧﻬﺎ ..
ﺟﺖ ﻉ ﺗﺮﻛﻴﻨﻪ ﺑﺶ ﻳﺨﺶ ..
ﺧﺶ ﻭﻭﻗﻒ ﻣﻘﺎﺑﻠﻬﺎ ﻭﻳﺸﻮﻓﻠﻬﺎ ﺑﺮﻓﻌﺔ ﺣﺎﺟﺐ
ﻫﻲ ﺍﺑﺘﺴﻤﺖ ﻭﺟﺖ ﺑﺘﻄﻠﻊ .. ﻟﻘﺖ ﺍﻳﻪ ﺟﺎﻳﻪ ..
ﺍﻟﺤﺎﺟﺐ ﺍﺭﺗﻔﻊ ﺗﻠﻘﺎﺋﻴﺎ ..
ﺍﻳﻪ ﺑﺈﺑﺘﺴﺎﻣﻪ : ﺭﻭﻓﻲ ..
ﺭﺍﻓﻊ ﺑﻤﻜﺮ : ﻭﻳﻪ ..
ﺍﻳﻪ : ﺑﺎﻫﻲ ﺍﻟﻠﻲ ﺷﻔﺘﻚ ﺍﻟﺠﻮ ﺩﺍﺧﻞ ﻛﺴﺎﺩ ..
ﻭﺟﺖ ﺑﺘﺨﺶ ﻭﻗﻔﺖ ﻗﺪﺍﻣﻬﺎ ﻭﻓﺎﺀ : ﺑﺮﻱ ﺣﺒﻴﺒﺘﻲ ﺍﺭﻓﻌﻲ ﺍﻟﻠﻮﺯ ﻟﻌﻤﺘﻲ ... ﺭﺭﺭﺭﺍﺟﻠﻴﻴﻴﻲ .. ﻭﺗﺄﺷﺮ ﺑﺴﺒﺎﺑﺘﻬﺎ ﻋﻠﻴﻬﺎ .. ﻳﺒﻴﻨﻲ ..
ﺍﺑﺘﺴﻤﺖ ﺑﺮﻓﻌﺔ ﺣﺎﺟﺐ .. ﻭﻣﻦ ﺩﺍﺧﻠﻬﺎ ﺧﺎﻳﻔﻪ ﺭﺍﻓﻊ ﻳﺪﻳﺮﻟﻬﺎ ﺷﻲ ﻳﺤﺮﺟﻬﺎ ﻭﻳﺠﺮﺣﻬﺎ ﺑﻴﻪ ﻗﺪﺍﻡ ﺍﻳﻪ ..
ﺭﺍﻓﻊ : ﺧﻮﺩﻱ ﻣﻨﻪ ﺍﻳﻪ ﻭﺍﺭﻓﻌﻲ ﻷﻣﻲ ..
ﺍﻳﻪ ﺷﺒﺤﺖ ﻟﻮﻓﺎﺀ ﺑﺤﺪﻩ ﻭﺧﺪﺕ ﻣﻨﻬﺎ ﺍﻟﺸﻜﺎﺭﺓ ﺑﻐﻞ ﻭﻣﺸﺖ ..
ﻭﻓﺎﺀ : ﺇﻥ ﺷﺎﺀ ﺍﻟﻠﻪ ﺗﻨﺤﺮﻗﻲ ..
ﺭﺍﻓﻊ : ﺍﻳﻪ ﻓﺸﻦ ﻧﺒﻴﻚ ﺍﻧﻲ؟
ﻭﻓﺎﺀ ..😨 ﺍﻟﺘﻔﺘﺖ : ﺍﺣﻢ .. ﺗﺒﻲ ﻧﺪﻳﺮﻟﻜﻢ ﺣﺎﺟﻪ ..
ﺭﺍﻓﻊ ﻗﻌﺪ ﻳﺸﻮﻑ ﻟﻌﻴﻮﻧﻬﺎ .. ﻭﻫﻲ ﺗﺸﻮﻓﻠﻪ ..
ﻛﺎﻥ ﻳﺪﻭﺭ ﻓﻌﻴﻮﻧﻬﺎ ﻉ ﺷﻲ ... ﻫﻮ ﻭﺍﺿﺢ ﺑﺲ ﻣﺸﻜﻠﺘﻪ ﻣﺶ ﻗﺎﺩﺭ ﻳﺼﺪﻗﻪ ..
" ﺟﻴﺒﻴﻠﻲ ﻣﺸﺮﻭﺏ ﺷﻌﻴﺮ ﻟﻠﺼﺎﻟﻪ .."
ﻃﻠﻊ ﻣﻦ ﺣﺪﺍﻫﺎ ...
ﻫﻲ ﺗﻨﻬﺪﺕ ﻭﻫﻲ ﺗﺸﻮﻓﻠﻪ .. ﻭﺑﻌﺪﻳﻦ ﺧﺸﺖ ﺧﺪﺕ ﻣﺸﺮﻭﺏ ﺷﻌﻴﺮ ﻣﻦ ﺍﻟﺪﻭﻻﺏ ﻭﻃﻠﻌﺖ ﻣﺸﺖ ﻟﻠﺼﺎﻟﻪ ..
ﻟﻘﺎﺗﻪ ﻣﻘﻌﻤﺰ ﻭﻫﻮ ﻓﺎﺭﺩ ﺭﺟﻠﻴﻪ ﻗﺪﺍﻣﻪ ﻭﻳﺘﻔﺮﺝ ﻉ ﺍﻟﺘﻠﻔﺰﻳﻮﻥ .
ﺧﺸﺘﻠﻪ .. ﻭﺻﻠﺖ ﻓﻴﻪ ... ﻣﺪﺗﻬﺎﻟﻪ ﺧﺪﺍﻫﺎ ..
ﺟﺖ ﺑﺘﻄﻠﻊ ..
ﺭﺍﻓﻊ : ﻗﻌﻤﺰﻱ ..
ﻫﻲ ﺍﻟﺘﻔﺘﺖ ﻭﻫﻲ ﻣﺼﺪﻭﻣﻪ ..
ﺭﺍﻓﻊ ﻭﻫﻲ ﻳﺸﻮﻑ ﻟﻠﺘﻠﻔﺰﻳﻮﻥ : ﻣﺮﺍﺕ ﻧﺒﻲ ﺣﺎﺟﻪ ﻭﻻ ﻧﺒﻴﻚ ﺗﺠﻴﺒﻠﻲ ﺷﻲ ..
ﺍﺑﺘﺴﻤﺖ ﻭﻣﺶ ﻣﻬﺘﻤﻪ ﻷﺳﻠﻮﺑﻪ ﺍﻟﻠﻲ ﻛﻠﻤﻪ ﺑﻴﻬﺎ ﻭﻛﺄﻧﻬﺎ ﺧﺪﺍﻣﻪ ..
ﺍﻟﻤﻬﻢ ﻋﻨﺪﻫﺎ ﺍﻧﻬﺎ ﺗﻜﻮﻥ ﻗﺮﻳﺒﻪ ﻋﻠﻴﻪ ..
ﺍﻣﺎ ﻫﻮ ﻛﺎﻥ ﻳﺒﻴﻬﺎ ﺗﻜﻮﻥ ﻗﺮﻳﺒﻪ ﻋﻠﻴﻪ ..
ﺍﻟﺤﺮﻛﻪ ﺍﻟﻠﻲ ﺩﺍﺭﺗﻬﺎﻟﻪ ﺍﺧﺮ ﻣﺮﺓ .. ﺣﺮﻣﺎﺗﻪ ﻃﻌﻢ ﺍﻟﻨﻮﻡ ...
ﻧﺎﺭﻩ ﻭﺍﻟﻌﻪ ﻭﻗﻠﺒﻪ ﺍﻧﺠﻦ ...🔥💓 ﺑﺲ ﺍﻟﺼﺮﺍﻉ ﺍﻟﻠﻲ ﻓﺪﺍﺧﻠﻪ ﺯﻱ ﺍﻟﺼﺮﺍﻉ ﺍﻟﻠﻲ ﺻﺎﻳﺮ ﻓﻲ ﺑﻼﺩﻧﺎ ﺣﺎﻟﻴﺎ ﻣﺶ ﺑﺎﻳﻨﻠﻪ ﺣﻞ ﻭﻻﻧﻬﺎﻳﻪ ...🍃
****
ﺍﻟﺴﺎﻋﻪ 12 ﻟﻴﻼ
ﻛﺎﻧﺖ ﻣﻘﻌﻤﺰﺓ ﻓﻲ ﺳﺮﻳﺮ ﻭﺗﻔﻜﺮ ﻓﻲ ﺍﻟﻠﻲ ﺻﺎﺭ .. ﺩﻣﻬﺎ ﻣﺤﺮﻭﻕ ﻫﻠﺒﻪ ﻭﻣﻮﺟﻮﻋﻪ ﻉ ﺧﺎﻃﺮ ﺍﻣﻬﺎ ﻣﺘﺄﻛﺪﻩ ﺍﻥ ﺍﻣﻬﺎ ﺗﺒﻜﻲ ..
ﻭﻓﻲ ﻧﻔﺲ ﺍﻟﻮﻗﺖ ﻣﺴﺘﻐﺮﺑﻪ ... ﻛﻴﻒ ﺍﻳﻤﺎﻥ ﺑﻌﺪ ﺍﻟﻠﻲ ﺻﺎﺭﻟﻬﺎ ﻣﺎﺯﺍﻟﺖ ﺑﺤﺎﻟﻬﺎ ﺍﻻﻭﻝ .. ﻻﺑﺎﻟﻌﻜﺲ ﻫﻲ ﺯﺍﺩﺕ ﻓﻲ ﺍﻟﺴﻢ ﺍﻛﺜﺮ ﻭﺍﻛﺜﺮ ..
ﻗﻄﻊ ﻋﻠﻴﻬﺎ ﺗﻔﻜﻴﺮﻫﺎ ﺭﻧﺔ ﺗﻠﻴﻔﻮﻧﻬﺎ .. ﺍﺑﺘﺴﻤﺖ ... ﻭﻫﻲ ﺗﺸﻮﻑ ﺍﻟﻤﺘﺼﻞ ..
ﻋﺎﻟﻴﻪ ...2
ﺭﺩﺕ ...
ﻧﻮﻣﻴﺪﻳﺎ : ﺍﻟﻮ ..
ﺫﻭﺍﻟﻔﻘﺎﺭ ﺍﺑﺘﺴﻢ : ﺍﺣﻠﻰ ﺍﻟﻮ ﻧﺴﻤﻌﻬﺎ ﻭﻳﺎﺭﻳﺖ ﻣﺎﻧﺴﻤﻊ ﻏﻴﺮﻫﺎ ..
ﺿﺤﻜﺖ ﻭﻗﺎﻟﺖ : ﺷﻦ ﺟﻮ ..
ﺫﻭﺍﻟﻔﻘﺎﺭ : ﺗﻤﺎﻡ ﺍﻟﺤﻤﺪ ﻟﻠﻪ .. ﺷﻦ ﺟﻮﻙ ﺍﻧﺘﻲ ﻏﻴﺮﺗﻲ ﺟﻮﻙ ..
ﻧﻮﻣﻴﺪﻳﺎ ﺗﻨﻬﺪﺕ : ﻗﻮﻝ ﻋﻜﺮﺗﻲ ﺟﻮﻙ ..
ﺫﻭﺍﻟﻔﻘﺎﺭ : ﻋﻼﺵ ﺧﻴﺮﻙ .. ﻣﻦ ﺿﺎﻳﻘﻚ . ؟ !!
ﻧﻮﻣﻴﺪﻳﺎ : ﻣﺎﺧﺎﻃﺮﻳﺶ ﻧﺪﻭﻱ ﻓﻲ ﺍﻟﻤﻮﺿﻮﻉ ﺗﻮﺍ ﻹﻥ ﺑﺠﺪ ﻣﻀﺎﻳﻘﻨﻲ ﻫﻠﺒﻪ ..
ﺫﻭﺍﻟﻔﻘﺎﺭ ﺍﺿﺎﻳﻖ ﻉ ﺧﺎﻃﺮﻫﺎ : ﺗﻤﺎﻡ ﻧﻮﺭ ﻋﻴﻮﻧﻲ ﺍﻟﻠﻲ ﻳﺮﻳﺤﻚ ..
ﻧﻮﻣﻴﺪﻳﺎ ﺍﺑﺘﺴﻤﺖ : ﺭﺍﺣﺘﻲ ﻣﻌﺎﻙ ﺍﻧﺖ ..
ﺫﻭﺍﻟﻔﻘﺎﺭ ﻭﺍﺑﺘﺴﻢ ﻭﻗﻠﺒﻬﺎ ﻳﺮﻓﺮﻑ :💓 ﻗﺒﻞ ﻧﺒﻴﻚ ﺗﻨﻄﻠﻘﻲ ﻓﻲ ﺍﻟﻜﻼﻡ .. ﻣﺎﻧﺤﺴﺎﺑﺶ ﺭﻭﺣﻲ ﺑﻨﺘﻌﺐ ﻫﻜﻲ
ﻧﻮﻣﻴﺪﻳﺎ ﺿﺤﻜﺖ ﺑﺨﺠﻞ ﻭﻗﻌﺪﺕ ﺳﺎﻛﺘﻪ ..
ﺫﻭﺍﻟﻘﻔﺎﺭ ﺑﻀﺤﻜﻪ : ﺑﺎﻫﻲ ﺗﺮﺍ ﻳﺎ ﺳﻤﻮﺣﻪ .. ﻃﻠﻲ ﻋﻠﻴﺎ ..
ﻧﻮﻣﻴﺪﻳﺎ ﺍﺑﺘﺴﻤﺖ ﺑﻔﺮﺡ .. ﻭﻃﻮﻝ ﻧﺎﺿﺖ ﻟﻠﺮﻭﺷﻦ ﻭﻗﻔﺖ ﺷﺎﻓﺘﻪ ﻣﻘﻌﻤﺰ ﻓﻮﻕ ﻣﻘﺪﻣﺔ ﺍﻟﺴﻴﺎﺭﺓ ﻭﺭﺟﻠﻴﻪ ﻟﻮﻃﺎ ..
ﺷﺒﺤﻠﻬﺎ ﺩﻭﻥ ﻣﺎﻳﺮﻓﻊ ﺭﺍﺳﻪ ﻭﺍﺑﺘﺴﻢ ..
ﻧﻮﻣﻴﺪﻳﺎ ﻭﻫﻲ ﺗﺄﺷﺮﻟﻪ ﻣﻦ ﻓﻮﻕ :🖐 ﺗﻌﺮﻑ ﻛﻨﺖ ﻧﺒﻴﻚ ﺗﺠﻲ ﺍﻟﻴﻮﻡ ..
ﺫﻭﺍﻟﻔﻘﺎﺭ : ﺍﺳﺘﺎﺣﺸﺘﻴﻨﻲ ..
ﻧﻮﻣﻴﺪﻳﺎ ﺍﺑﺘﺴﻤﺖ ﺑﺨﺠﻞ : ﺍﻳﻪ ..
ﺷﺒﺤﻠﻬﺎ ... ﻭﺟﻬﻬﺎ ﻭﻻ ﺍﺣﻤﺮ ﻏﻴﺮﺕ ﻋﻴﻮﻧﻬﺎ ﻋﻨﻪ ﻭﻫﻲ ﺗﻀﺤﻚ ﻭﻗﺎﻟﺖ : ﺑﻨﻌﻄﻴﻚ ﺣﺎﺟﻪ ..
ﺫﻭﺍﻟﻔﻘﺎﺭ ﻧﺰﻝ ﻭﻗﻒ ﻭﺣﻂ ﻳﺪﻩ ﻓﻲ ﺟﻴﺒﻪ ﻭﻫﻮ ﻳﺸﻮﻓﻠﻬﺎ : ﺷﻦ ﻫﻲ؟
ﻧﻮﻣﻴﺪﻳﺎ ﺍﺑﺘﺴﻤﺖ : ﺷﻮﻳﻪ ﻭﺟﺎﻳﺘﻚ ..
ﻫﻮ ﺿﺤﻚ ﻧﺰﻝ ﺗﻠﻴﻔﻮﻧﻪ ﻭﺭﻓﻊ ﺭﺍﺳﻪ ﻭﺷﺎﻓﻬﺎ ...
ﻫﻲ ﻧﺰﻟﺖ ﺍﻟﺘﻠﻴﻔﻮﻥ ﻭﺍﺑﺘﺴﺎﻣﺘﻬﺎ ﻣﺎﺯﺍﻟﺖ ﻉ ﻭﺟﻬﻬﺎ ...
ﻟﻔﺖ ﻭﻣﺸﺖ ﻟﺸﻨﻄﺘﻬﺎ ﺍﻟﻠﻲ ﻛﺎﻧﺖ ﻣﺤﻄﻮﻃﻪ ﻉ ﺍﻟﻄﺎﻭﻟﻪ ﺧﺪﺕ ﻣﻨﻬﺎ ﺍﻟﻠﻲ ﺗﺒﻴﻪ ﺑﻌﺪﻳﻦ ﺧﺪﺕ ﻛﺒﻮﻃﻬﺎ ﻭﻃﺎﻗﻴﻪ ﻉ ﺭﺍﺳﻬﺎ ...
ﻃﻠﻌﺖ ﻣﻦ ﺍﻟﺪﺍﺭ ﻭﺗﺴﺤﺒﺖ ﻭﻧﺰﻟﺖ ...
ﻃﻠﻌﺖ ﻣﻦ ﺑﺎﺏ ﺍﻟﻜﻮﺟﻴﻨﻪ ..
ﻭﻛﻤﻠﺖ ﻟﻠﺒﺎﺏ ﺍﻟﺨﻠﻔﻲ .. ﻭﺻﻠﺖ ﺧﺪﺕ ﻧﻔﺲ ..
ﻭﻓﺘﺤﺖ ﺍﻟﺒﺎﺏ ..
ﻟﻘﺎﺗﻪ ﻣﺘﻜﻲ ﻉ ﺑﺎﺏ ﺍﻟﺴﻴﺎﺭﺓ ﻭﻣﺮﺑﻊ ﺍﻳﺪﻳﻪ ﻭﻳﺸﻮﻓﻠﻬﺎ ﺑﺈﺑﺘﺴﺎﻣﻪ 💓
ﻫﻲ ﺍﺑﺘﺴﻤﺖ ..💓
ﻧﺰﻝ ﺍﻳﺪﻳﻪ ﺣﻄﻬﻢ ﻓﺠﻴﻮﺑﻪ ﻭﻗﺪﻣﻠﻬﺎ ...
ﻫﻲ ﻗﻠﺒﻬﺎ ﻛﺎﻥ ﻳﺪﻕ ﺑﻘﻮﺓ ﺭﻫﻴﺒﻪ ﻛﻞ ﻣﺎﻳﻘﺮﺏ ..💓
ﻧﻔﺲ ﺍﻷﺣﺎﺳﻴﺲ ﻭﻛﺄﻧﻬﺎ ﺍﺣﺎﺳﺴﻴﺲ ﺍﻟﻤﺮﺓ ﺍﻷﻭﻟﻰ ..❤
ﻭﺻﻞ ﻓﻴﻬﺎ ..
ﻣﺪﺗﻠﻪ ﺍﻟﻜﻠﻴﻨﻜﺲ ﺍﻟﻤﻠﻔﻮﻑ ..
ﺫﻭﺍﻟﻔﻘﺎﺭ ﺑﺈﺳﺘﻐﺮﺍﺏ ﺑﺼﻮﺕ ﺧﺎﻓﺖ : ﺷﻦ ﻫﻮ؟
ﻧﻮﻣﻴﺪﻳﺎ ﺑﻬﻤﺲ : ﻣﺎﺗﺸﻮﻓﺎﺵ ﻟﻴﻦ ﻧﺮﻛﺐ ﻭﻧﻜﻠﻤﻚ ﻣﻦ ﻓﻮﻕ ..
ﺿﺤﻚ ﻉ ﻛﻼﻣﻬﺎ ﻭﻗﺎﻝ ﺑﻨﻔﺲ ﺍﻟﻬﻤﺲ : ﺑﺎﻫﻲ ..
ﺿﺤﻜﺖ .. ﻭﻗﺎﻟﺖ : ﻳﻴﻠﻼ ... ﺑﺎﺍﺍﻱ 🖐
ﺫﻭﺍﻟﻔﻘﺎﺭ ﺑﻨﻔﺲ ﺍﻷﺳﻠﻮﺏ : ﺑﺎﺍﺍﻱ ..🖐 ﻟﻒ ﻭﻣﺶ ﻟﻠﺴﻴﺎﺭﺓ ﻭﻫﻲ ﺿﺤﻜﺖ ﻭﺻﻜﺮﺕ ﺍﻟﺒﺎﺏ ﺑﻬﺪﻭﺀ ..
ﻭﻃﻮﻝ ﻣﺸﺖ ﺑﺴﺮﻋﻪ ..
ﺧﺸﺖ ﺍﻟﺤﻮﺵ ﻭﺭﻛﺒﺖ ﻓﻮﻕ .. ﺧﺸﺖ ﺩﺍﺭﻫﺎ ﻭﺻﻜﺮﺗﻬﺎ ﺍﻧﺨﻠﻌﺖ ﻟﻤﺎ ﺟﺖ ﻗﺪﺍﻣﻬﺎ ﺑﻴﺴﺎ : ﺷﻦ ﻧﻮﺿﻚ ﺍﻧﺘﻲ ... ﻗﺎﻣﺘﻬﺎ .. ﻭﻣﺸﺖ ﺑﻴﻬﺎ ﻟﻠﻜﺮﺳﻲ ﺧﺪﺕ
ﺍﻟﺘﻠﻴﻔﻮﻥ ... ﺟﺎﻳﻪ ﺑﺘﺘﺼﻞ ﺍﺗﺼﻞ ﻫﻮ ﺿﺤﻜﺖ ﻭﺭﺩﺕ .
ﻧﻮﻣﻴﺪﻳﺎ : ﻣﺶ ﻻﺯﻡ ﺩﻳﻤﺎ ﺍﻧﺖ ﺍﻟﻠﻲ ﺗﺘﺼﻞ ﺧﻠﻴﻬﺎ ﻣﺮﺓ ﻋﻠﻴﺎ ﻭﻣﺮﺓ ﻋﻠﻴﻚ .. ﺗﻘﻌﺪ ﻏﻴﺮ ﺍﺿﻴﻊ ﻓﻔﻠﻮﺳﻚ ﻉ ﺍﻟﻜﺮﻭﺕ .
ﺑﺮﻏﻢ ﻛﻞ ﺷﻲ ﺑﺲ ﺍﻟﻜﻠﻤﻪ ﺿﺎﻳﻘﺘﻪ ﻫﻠﺒﻪ ﻭﺣﺴﻬﺎ ﻣﺴﺖ ﺭﺟﻮﻟﺘﻪ ﺣﻤﻖ ﻭﻗﺎﻟﻠﻬﺎ : ﻣﺎﺗﻜﻠﻤﻨﻴﺶ ﺑﺎﻷﺳﻠﻮﺏ ﻫﺪﺍ ﺍﻧﺎ ﻧﻌﺮﻑ ﻛﻴﻒ ﻧﺘﺼﺮﻑ ﻭﻣﺶ ﻏﺎﻟﺐ ﻓﺤﻖ ﺍﻟﺮﺻﻴﺪ ... ﻣﺶ ﻛﺎﻥ ﺷﻜﻴﺖ ﻭﺣﻜﻴﺖ ﻣﻌﻨﺎﻫﺎ ﻧﺒﻴﻚ ﺗﺼﺨﻔﻲ ﻋﻠﻴﺎ ﻭﺗﺘﻌﺎﻣﻠﻲ ﻣﻌﺎﻱ ﺑﺄﺳﻠﻮﺏ ﺍﻟﺸﻘﻔﻪ ﺍﻟﻠﻲ ﻧﻜﺮﻩ ﻓﻴﺔ ﺍﺻﻠﻪ ﻣﺮﺓ ﻭﺣﺪﻩ ...
ﻫﻲ ﻗﻌﺪﺕ ﺗﺮﻋﺶ ﻣﻊ ﺑﻌﻀﻬﺎ ﻟﺪﺭﺟﺔ ﺍﻧﻬﺎ ﻃﻠﻘﺖ ﺑﻴﺴﺎ ﻣﻌﺎﺵ ﻗﺪﺭﺕ ﺗﺸﺪﻫﺎ ...
ﻫﻮ ﺻﻜﺮ ﻋﻠﻴﻬﺎ .. ﻭﺷﻐﻞ ﺍﻟﺴﻴﺎﺭﺓ ﻭﺗﺤﺮﻙ ﻃﻮﻝ ..
ﺍﻣﺎ ﻫﻲ ﻣﻦ ﺻﺪﻣﺘﻬﺎ ﻗﻌﻤﺰﺕ ﻉ ﺍﻟﻜﺮﺳﻲ .. ﻭﺭﺟﻠﻴﻬﺎ ﺣﺴﺘﻬﻢ ﺭﺯﻧﻮﺍ ﻫﻠﺒﻪ .. ﻭﺩﻣﻮﻋﻬﺎ ﻃﺎﺣﻮﺍ .. ﻣﺶ ﻣﺴﺘﻮﻋﺒﻪ ﺍﻥ ﺍﻟﻠﻲ ﻛﻠﻤﻬﺎ ﻫﻜﻲ ﺫﻭﺍﻟﻔﻘﺎﺭ !! ﺩﻭﻓﺎ ﺣﺒﻴﺒﻬﺎ ...
🍁 ﻫﻮ ﺍﻟﻠﻲ ﺻﺎﺭﻟﻪ ﻟﺤﻈﺘﻬﺎ ... ﻟﻤﺎ ﻳﻜﻮﻥ ﻣﻌﺎﻫﺎ ﻳﻨﺴﻰ ﺣﻘﻴﻘﺘﻪ ﺍﻟﺤﺎﻟﻴﻪ .. ﻭﻳﻌﻴﺶ ﺑﺤﻘﻴﻘﺘﻪ ﺍﻻﻭﻟﻰ ..
ﺣﺲ ﻭﻗﺘﻬﺎ ﺍﻥ ﺫﻭﺍﻟﻔﻘﺎﺭ ﺍﻟﺸﺎﺏ ﺍﻟﻤﻌﺪﻡ ﺍﺑﻦ ﺍﻟﺤﻲ ﺍﻟﺒﺴﻴﻂ ..
ﻭﺍﻧﻪ ﺣﺐ ﺑﻨﻴﻪ ﻣﺴﺘﻮﺍﻫﺎ ﺍﻟﻤﺎﺩﻱ ﺍﻋﻠﻰ ﻣﻦ ﻣﺴﺘﻮﺍﻩ ﻭﻛﻼﻣﻬﺎ ﺣﺴﺴﻪ ﺑﻨﻘﺺ ﻓﺮﺟﻮﻟﺘﻪ ﻭﺍﻫﺎﻧﻪ ﻛﺒﻴﺮﺓ ..
ﻓﻲ ﻧﺺ ﺍﻟﻄﺮﻳﻖ .. ﻋﻔﺲ ﺍﻟﻔﺮﻳﻨﻮ ﻭﻭﻗﻒ ...
ﺍﺳﺘﺎﻗﺾ ﻭﺭﺍﺟﻊ ﻧﻔﺴﻪ .. ﺷﻦ ﻗﺎﻟﻠﻬﺎ ﻛﻴﻒ ﻛﻠﻤﻬﺎ ...
ﺷﻦ ﺭﺩﺓ ﻓﻌﻠﻬﺎ ... ﺍﻛﻴﺪ ﺗﺒﻜﻲ .. ﺍﻳﻪ ﺍﻧﺼﺪﻣﺖ ﻭﻗﻌﺪﺕ ﺗﺒﻜﻲ ..
ﻭﻫﻮ ﺍﻟﻠﻲ ﺑﻜﺎﻫﺎ .. ﻫﻮ ﺍﻟﻠﻲ ﻣﺎﻳﺘﺤﻤﻠﺶ ﻓﻴﻬﺎ ﺩﻗﻪ ﺍﻟﺸﻮﻛﻪ ..
ﺟﺮﺣﻬﺎ ﻭﺑﻜﺎﻫﺎ ...
ﻃﻮﻝ ﻟﻒ ﺑﺎﻟﺴﻴﺎﺭﺓ ﻭﺭﺟﻊ ﺑﺴﺮﻋﻪ ..
ﻫﻲ ﻛﺎﻧﺖ ﺗﺒﻜﻲ ﺑﺼﻤﺖ ﺍﻳﺪﻳﻬﺎ ﺍﻟﺰﻭﺯ ﻋﻔﻤﻬﺎ ﺧﺎﻳﻔﻪ ﺍﺧﺘﻬﺎ ﺗﻨﻮﺽ ﻭﺗﺸﻮﻓﻬﺎ ﺗﺒﻜﻲ ﺷﻦ ﺑﻴﺤﺰﻫﺎ ﺑﻌﺪﻳﻦ ..
ﺳﻤﻌﺖ ﺻﻮﺕ ﺍﻟﺴﻴﺎﺭﺓ .. ﻧﺰﻟﺖ ﺍﻳﺪﻳﻬﺎ ﻣﻦ ﻓﻤﻬﺎ ﺷﺒﺤﺖ ﻟﺘﻠﻴﻔﻮﻧﻬﺎ ﺍﻟﻠﻲ ﻛﺎﻥ ﻓﺤﺠﺮﻫﺎ ﻭﺗﺮﺍﺟﻴﻪ ﺍﻣﺘﻰ ﻳﺮﻥ ...
ﺷﻮﻳﻪ .. ﻭﺭﻥ .. ﺭﺩﺕ ﻃﻮﻝ ..
ﺫﻭﺍﻟﻔﻘﺎﺭ : ﻳﺎﺭﻳﺘﻪ ﺍﻧﻘﻄﻊ ﻭﻻﻗﺎﻟﻚ ﺍﻟﻠﻲ ﻗﺎﻟﻪ ..
ﻧﻮﻣﻴﺪﻳﺎ ﺑﺒﻜﻲ : ﺑﻌﻴﺪ .. ﺍﻟﺴﻮ .. ﺍﻧﻲ ﺍﻟﻠﻲ ﺍﺱ ...
ﻗﺎﻃﻌﻬﺎ ﻭﻗﺎﻝ : ﻣﺎﺗﺘﺄﺳﻔﻴﺶ ﻗﺘﻠﻚ ﻗﺒﻞ ﺣﺘﻰ ﻟﻮ ﻏﻠﻄﺘﻲ ﻓﻴﺎ ﻣﺎﺗﺘﺄﺳﻔﻴﺶ . ﺍﻧﻲ ﺍﻟﻠﻲ ﺍﺳﻒ ﻧﻮﺭ ﻋﻴﻮﻧﻲ ﺳﺎﻣﺤﻴﻨﻲ ..
ﻧﻮﻣﻴﺪﻳﺎ ﻗﻌﺪﺕ ﺗﺒﻜﻲ ..
ﺫﻭﺍﻟﻔﻘﺎﺭ ﻏﻤﺾ ﻋﻴﻮﻧﻪ ﺑﺸﺪﻩ ﺑﻌﺪﻳﻦ ﻓﺘﺤﻬﻢ ﻭﻗﺎﻝ : ﺑﺎﻫﻲ ﺷﻦ ﺗﺒﻲ ﻧﺪﻳﺮﻟﻚ ﺑﺶ ﺗﺮﺿﻲ .. ﻛﻴﻒ ﻣﺎﺗﺒﻲ ﺗﺎﺧﺪﻱ ﺣﻘﻚ ﻣﻨﻲ ﺧﻮﺩﻳﻪ ... ﺍﻧﺘﻲ ﺍﻟﻤﻮﺱ ﻭﺍﻧﻲ ﺍﻟﻠﺤﻢ ..
ﻧﻮﻣﻴﺪﻳﺎ ﺑﻀﺤﻜﻪ ﻣﻦ ﺑﻴﻦ ﺩﻣﻮﻋﻬﺎ : ﺳﻔﺎﺣﻪ ﻗﺎﻟﻮﻟﻚ ..
ﻟﻤﺎ ﺳﻤﻊ ﺿﺤﻜﺘﻬﺎ ﻧﺰﻟﺖ ﻋﻠﻴﻪ ﺭﺍﺣﻪ ﺳﺮﺕ ﻓﺮﻭﺣﻪ ﻗﺒﻞ ﺟﺴﺪﻩ : ﺍﻳﻪ ﺳﻔﺎﺣﻪ ... ﺫﺍﺑﺤﺘﻴﻨﻲ ﺑﺤﺒﻚ ﻣﻦ ﺍﻟﻮﺭﻳﺪ ﻟﻠﻮﺭﻳﺪ ..
ﻧﻮﻣﻴﺪﻳﺎ ﺍﺑﺘﺴﻤﺖ ﻭﻗﺎﻟﺖ : ﻧﺤﺒﻚ ﺩﻭﻓﺎ ...❤
ﻏﻤﺾ ﻋﻴﻮﻧﻪ ﻭﺍﺗﻜﻰ ﻉ ﺍﻟﻜﺮﺳﻲ : ﺁﺍﺍﺍﺍﺍﻩ ... ﻳﺎﺭﻭﺡ ﺩﻭﻓﺎ ﻭﺭﺏ ﺍﻟﻌﺰﺓ ﻣﺎﻋﻨﺪﻱ ﻓﻲ ﺍﻟﺪﻧﻴﺎ ﺍﻏﻠﻰ ﻣﻨﻚ ﻭﻻﻧﺘﺤﻤﻞ ﺯﻋﻠﻚ ﻭﻻﺩﻣﻮﻋﻚ ﻭﻣﺎﻧﺒﻲ ﺷﻲ ﻳﻀﺎﻳﻘﻚ .. ﻛﺎﻥ ﻧﻠﻘﺎﻙ ﺩﻳﻤﺎ ﺗﻀﺤﻜﻲ ﻭﺗﻠﻌﺒﻲ ﻭﺟﻮﻙ ﻓﻮﻕ ﺍﻟﺮﻳﺢ ..
ﺣﺎﺳﻪ ﺭﻭﺣﻬﺎ ﻃﺎﻳﺮﺓ ﻣﺶ ﻉ ﺍﻷﺭﺽ .. ﻗﻠﺒﻬﺎ ﻣﺴﺤﻮﺭ ﺑﻴﻪ ﻣﺠﻨﻮﻥ ﺑﻴﻪ .. ﻛﻞ ﺟﺰﺀ ﻓﻴﻬﺎ ﻣﺎﺩﻱ ﻭﻣﻌﻨﻮﻱ ﻳﺤﺒﻪ ﻭﺣﺐ ﻛﺒﻴﺮ .. ﺣﺐ ﻣﺶ ﻋﺎﺩﻱ
ﻧﻮﻣﻴﺪﻳﺎ : ﺩﻭﻓﺘﻲ ❤
ﺫﻭﺍﻟﻔﻘﺎﺭ ﺑﻀﺤﻜﻪ : ﻭﺣﻖ ﺍﻟﻠﻪ ﺳﺨﻨﺖ ﺗﻘﻮﻝ ﻓﻜﻮﺷﻪ ...
ﻗﻌﻤﺰ ﻛﻮﻳﺲ ﻭﺣﻮﻝ ﺍﻟﻜﺒﻮﻁ ﻭﺍﻟﻄﺎﻗﻴﻪ ..
ﻧﺰﻝ ﻣﻦ ﺍﻟﺴﻴﺎﺭﺓ ﻭﺻﻜﺮ ﺑﺎﺑﻬﺎ .. ﻭﻭﻗﻒ ﻋﻠﻴﻪ ..
ﻫﻲ ﻧﺎﺿﺖ ﻭﻭﻗﻔﺖ ﻓﻲ ﺍﻟﺮﻭﺷﻦ : ﻫﻴﻴﻴﻲ ﺣﻲ ﻋﻠﻴﻚ ﺍﻟﺠﻮ ﺟﻤﻴﺪﻱ ..
ﺫﻭﺍﻟﻔﻘﺎﺭ ﺍﺑﺘﺴﻢ ﻭﻫﻮ ﻳﺸﻮﻓﻠﻬﺎ : ﻭﺍﻟﻠﻪ ﻣﺎﻧﺤﺲ ﺑﻴﻪ ..
ﺿﺤﻜﺖ ﻭﻗﺎﻟﺖ : ﺑﺎﻫﻲ ﻗﻌﻤﺰ ﻓﻲ ﺍﻟﺴﻴﺎﺭﺓ ..
ﺫﻭﺍﻟﻔﻘﺎﺭ : ﻓﻮﺗﻴﻨﻲ ﻣﺎﺗﺨﻤﻤﻴﺶ ﻓﻴﺎ .. ﺍﻳﻪ ﻗﻮﻟﻴﻠﻲ ﺷﻦ ﻫﻮ ﺍﻟﻠﻲ ﺟﺒﺘﻬﻴﻮﻟﻲ ..
ﻧﻮﻣﻴﺪﻳﺎ ﺑﻀﺤﻜﻪ : ﻋﻄﺘﻴﻬﻮﻟﻚ ﻧﺴﻴﺖ؟
ﺫﻭﺍﻟﻔﻘﺎﺭ ﺿﺤﻚ ﻭﻗﺎﻝ : ﺍﻧﺘﻲ ﻧﺴﻴﺘﻨﻲ ﻣﻦ ﻧﻜﻮﻥ ﺍﺳﺎﺳﺎ ..
" ﻓﻌﻼ ..."
ﻧﻮﻣﻴﺪﻳﺎ ﺿﺤﻜﺖ ﺑﺨﺠﻞ ..
ﺧﺶ ﻣﻦ ﺍﻟﺮﻭﺷﻦ ﻃﻠﻊ ﺍﻟﻜﺒﻮﻁ ﻭﺣﻂ ﻳﺪﻩ ﻓﻲ ﺍﻟﺠﻴﺐ ..
ﻃﻠﻊ ﻣﻨﻪ ﺍﻟﺤﺎﺟﻪ .. ﺣﻂ ﺍﻟﻜﺒﻮﻁ ﺩﺍﺧﻞ ..
ﻓﺘﺢ ﺍﻟﻜﻠﻴﻨﻜﺲ ﻟﻤﺎ ﺑﺎﻥ ﻋﻠﻴﻪ ﺍﻟﻌﺒﻤﺒﺮ ﻗﺎﻡ ﺭﺍﺳﻪ ﻭﺷﺒﺤﻠﻬﺎ ﻭﻫﻮ ﻳﻀﺤﻚ ..
ﻫﻲ ﺿﺤﻜﺖ ..
ﺫﻭﺍﻟﻔﻘﺎﺭ ﺑﻀﺤﻜﻪ : ﺩﺭﺗﻲ ﺯﻱ ﺍﻷﻡ ﻟﻤﺎ ﺗﻤﺸﻲ ﻟﻤﻨﺎﺳﺒﻪ ﻻﺯﻡ ﺍﺩﺱ ﻟﺼﻐﺎﺭﻫﺎ ..
ﻧﻮﻣﻴﺪﻳﺎ ﺑﺈﺑﺘﺴﺎﻣﻪ : ﻳﺪﻳﺮﻭﺍ ﻓﻴﻬﺎ ﺣﺘﻰ ﺍﻟﻨﺴﺎﻭﻳﻦ ﻟﺮﺟﺎﻟﺘﻬﻢ ..
ﻗﺎﻡ ﺭﺍﺳﻪ ﻓﻮﻕ ..
ﻫﻲ ﻗﻌﺪﺕ ﺗﺸﻮﻓﻠﻪ ﻭﻭﺟﻬﻬﺎ ﻭﻻﺃﺣﻤﺮ ..
ﺍﺑﺘﺴﻢ ﺑﺤﺐ ﻭﺗﻨﻬﺪ .. ﻭﺣﻂ ﺍﻟﻌﺒﻤﺒﺮ ﻓﻔﻢ ﻭﺍﺣﺪ ...
ﻫﻲ ﻃﻮﻝ ﺿﺤﻜﺖ ❤
****
ﺍﻟﻜﻞ ﺭﺍﻗﺪﻳﻦ ..
ﺍﻟﻠﻲ ﺟﻮﻫﻢ ﺑﺎﺗﻮﺍ ﻋﻨﺪﻫﻢ ..
ﺍﻟﺒﻨﺎﺕ ﻓﻲ ﺩﺍﺭ ...
ﺍﻟﻨﺴﺎﻭﻳﻦ ﻓﺪﺍﺭ ...
ﺍﻟﻮﻻﺩ ﻓﻲ ﺍﻟﻤﺮﺑﻮﻋﻪ ..
ﻫﻲ ﻭﻳﺎﻩ ﻓﻲ ﺍﻟﺼﺎﻟﻪ ❤🔥🌼
ﻫﻮ ﺧﺪﺍﻩ ﺍﻟﻨﻮﻡ ﻭﻫﻮ ﻳﺘﻔﺮﺝ ﻉ ﺍﻟﺘﻠﻔﺰﻳﻮﻥ ...
ﺟﺎﺑﺘﻠﻪ ﺑﻄﺎﻧﻴﻪ ﻏﻄﺎﺗﻪ ...
ﻭﻗﻌﻤﺰﺕ ﺣﺪﺍﻩ ..
ﻗﻌﺪﺕ ﺗﺘﺄﻣﻞ ﻓﻲ ﻣﻼﻣﺤﻪ ﺍﻟﺤﻠﻮﺓ ﻭﻫﻮ ﺭﺍﻗﺪ ...
ﺍﺑﺘﺴﻤﺖ ﺑﺄﻟﻢ ﻟﻤﺎ ﺍﺫﻛﺮﺕ ﺃﻭﻝ ﻣﺮﺓ ﻛﻠﻤﻬﺎ ﻓﻴﻬﺎ ...
>> ﻳﺎﺍﺍﺑﻨﺖ ..."
ﻭﻓﺎﺀ : ﺳﻤﻌﺘﻲ ...
ﺳﻤﻴﺮﺓ : ﺍﻳﻪ ..
" ﻧﻜﻠﻢ ﻓﻴﻚ ... ﻳﺎﺑﻨﺖ .."
ﻭﻗﻔﻮﺍ ﺍﻟﺰﻭﺯ ...
ﺳﻤﻴﺮﺓ ﺧﺎﻳﻔﻪ .. ﺑﺲ ﻭﻓﺎﺀ ﻻ .. ﺍﻟﺘﻔﺘﺖ ﻃﻮﻝ ..
ﺭﺍﻓﻊ ﺑﺮﻓﻌﺔ ﺑﺤﺎﺟﺐ : ﺗﻌﺎﻟﻲ ..
ﻭﻓﺎﺀ ﺿﻴﻘﺖ ﻋﻴﻮﻧﻬﺎ ﺑﺈﺯﺩﺭﺍﺀ ...
ﺭﺍﻓﻊ : ﺗﻌﺎﻟﻲ ﻗﻠﺖ ...
ﻭﻓﺎﺀ ﺷﺒﺤﺘﻠﻪ ﻣﻦ ﻓﻮﻕ ﻟﻠﻮﻃﺎ ﻭﻣﺸﺖ ﻭﻣﺸﺖ ﻣﻌﺎﻫﺎ ﺳﻤﻴﺮﺓ ..
ﺭﺍﻓﻊ ﺿﺤﻚ ﻭﻗﻌﺪ ﻳﻠﺤﻖ ﻓﻴﻬﻢ ..
ﺳﻤﻴﺮﺓ : ﻣﻦ ﻫﻮ ﺻﺤﻴﺢ ﺍﻟﻮﺟﻪ ﻫﺪﺍ ..
ﻭﻓﺎﺀ : ﺣﻴﻮﺍﻥ ﻳﻘﻮﻟﻲ ﺗﻌﺎﻟﻲ ﺍﻧﻲ ﻳﻘﻮﻟﻲ ﻳﺎﺑﻨﺖ ﺗﻌﺎﻟﻲ ... ﻋﻠﻴﻚ ﻭﻗﺖ ..
ﺳﻤﻴﺮﺓ : ﺯﻋﻤﻪ ﻗﺎﻋﺪ ﻭﺭﺍﻧﺎ ..
ﻭﻓﺎﺀ : ﻳﻤﺸﻲ ﺩﻳﻴﻲ ...
ﺳﻤﻴﺮﺓ ﺍﻟﺘﻔﺘﺖ ﺑﺒﻂﺀ ﺷﺎﻓﺘﻪ ﺍﻧﺼﺪﻣﺖ ﺗﻠﻔﺘﺖ ﺍﻟﻘﺪﺍﻡ : ﺣﻴﻴﻲ ..
ﻭﻓﺎﺀ ﺷﺒﺤﺘﻠﻬﺎ : ﺧﻴﺮﻙ ...
ﺳﻤﻴﺮﺓﺑﺼﺪﻣﻪ : ﻫﺬﺍ ﺭﺍﻓﻊ ...
ﻭﻓﺎﺀ : ﻣﻦ ﺭﺍﻓﻊ؟
ﺳﻤﻴﺮﺓ : ﺻﺎﺣﺐ ﺍﻟﺠﺎﺳﺮ ﻭﺫﺭﺍﻋﻪ ﺍﻟﻴﻤﻴﻦ <<...
ﺩﻣﻮﻋﻬﺎ ﻋﺒﻮﺍ ﻋﻴﻮﻧﻬﺎ ...
>> ﺭﺍﻓﻊ ﻣﺸﻲ ﺑﺴﺮﻋﻪ ﻭﻭﻗﻒ ﻗﺪﺍﻣﻬﺎ .. ﻗﻌﺪﺕ ﺗﺸﺒﺤﻠﻪ ﻭﻫﻮ ﻣﺮﻛﺰ ﻉ ﻋﻴﻮﻧﻬﺎ ﻣﻦ ﻭﺭﺍ ﻧﻈﺎﺭﺍﺗﻪ ... ﺣﻮﻝ ﺍﻟﺪﺧﺎﻥ ﻣﻦ ﻓﻤﻪ ﻭﻧﻔﺨﻪ ﻉ ﺟﻨﺐ ..
ﺭﺍﻓﻊ : ﻧﻜﻠﻢ ﻓﻴﻚ ﻭﻻ؟
ﺷﺒﺤﺘﻠﻪ ﻣﻦ ﻓﻮﻕ ﻻﻟﻮﻃﺎ ﺑﺮﻓﻌﺔ ﺣﺎﺟﺐ ..
ﺭﺍﻓﻊ ﻗﺪﻡ ﻭﺣﻂ ﻭﺟﻬﻪ ﻓﻮﺟﻬﻬﺎ : ﻣﺶ ﻟﻴﺎ ﺍﻧﻲ ﺍﻟﺸﺒﺤﺎﺕ ﻫﺎﺩﻱ ..
ﻟﻤﺎ ﻗﺮﺏ ﻫﻜﻲ ﺗﻠﺨﺒﻄﺖ ﺑﺎﻟﻤﺮﺓ ﻭﻣﻌﺎﺵ ﻋﺮﻓﺖ ﻛﻴﻒ ﺍﺩﻳﺮ .. ﺷﻲ ﻭﺍﺣﺪ ﺑﺲ ﺷﺎﻓﺖ ﺍﻧﻪ ﺭﺩﺓ ﻓﻌﻞ ﻉ ﻫﺎﻟﺘﺼﺮﻑ ..
ﻧﺰﻟﺖ ﺑﻴﺪﻫﺎ ﻉ ﻭﺟﻬﻪ ﺑﻜﻒ <<...
ﺿﺤﻜﺖ ﻭﺩﻣﻮﻋﻬﺎ ﻧﺰﻟﻮﺍ ..
>> ﺭﺍﻓﻊ : ﻋﻼﺵ ﺗﺘﻌﺎﻣﻠﻲ ﻣﻌﺎﻱ ﻫﻜﻲ؟ﺗﺪﻟﻠﻲ .. ﺗﺘﻐﻠﻲ .. ﺛﻘﻠﻲ ﻓﺮﻭﺣﻚ ﻋﻠﻴﺎ .
ﺑﺎﻟﺰﺑﻂ ﻋﻼﺵ؟
ﻭﻓﺎﺀ : ﻻ ﻭﻻ ﻭﺣﺪﻩ ﻣﻦ ﺍﻟﻠﻲ ﻗﻠﺘﻬﻢ .. ﺍﻧﻲ ﺑﺲ ﺧﺎﻳﻔﻪ ﻣﻨﻚ ..
ﺭﺍﻓﻊ : ﻭﺍﻧﻲ ﺷﻦ ﻗﻠﺖ ﺍﺧﺮ ﻣﺮﺓ؟
ﻭﻓﺎﺀ : ﺗﻘﻮﻝ ﺍﻟﻠﻲ ﺗﻘﻮﻟﻪ ﺍﻧﺘﻢ ﺑﺎﻟﺬﺍﺕ ﻣﺎﻓﻴﻜﻤﺶ ﺛﻘﻪ ﺗﺒﺪﻟﻮﺍ ﻓﻲ ﺍﻟﺒﻨﺎﺕ ﺯﻱ ﻣﺎﺗﺒﺪﻟﻮﺍ ﻓﻲ ﺣﻮﺍﻳﺠﻜﻢ ...
ﺭﺍﻓﻊ ﺑﻀﺤﻜﻪ : ﺣﻨﻲ ﻣﻨﻮ ﺑﺎﻟﺰﺑﻂ؟
ﻭﻓﺎﺀ : ﺍﻧﺘﻢ .. ﻭﺍﻧﺖ ﻓﺎﻫﻢ ﻗﺼﺪﻱ <<.
ﺩﻣﻮﻋﻬﺎ ﻧﺰﻟﻮﺍ ﺑﻐﺰﺍﺭﺓ ..
>> ﻧﻴﺘﻲ ﻣﻌﺎﻙ ﺍﺻﻔﻰ ﻣﻦ ﺍﻟﺤﻠﻴﺐ ﺭﺑﻲ ﺷﺎﻫﺪ ﻋﻄﻴﻨﻲ ﻳﻮﻣﻴﻦ ﻭﻧﺜﺒﻠﻚ ﻛﻼﻣﻲ <<..
ﻭﻓﺎﺀ " ﺁﺍﺍﺍﻩ ﻟﻮ ﻳﺮﺟﻊ ﺍﻟﺰﻣﺎﻥ .. ﻭﺍﻟﻠﻪ ﻣﺎﻛﻨﺖ ﺑﺪﻟﺖ ﺣﺒﻚ ﺑﻜﻨﻮﺯ ﺍﻟﺪﻧﻴﺎ ﻭﺍﻟﻠﻪ ... ﻳﺎﺭﻳﺖ ﺗﻔﻬﻢ ﺍﻟﻠﻲ ﻋﺸﺘﻪ ﻭﺗﺴﺎﻣﺤﻨﻲ ﻉ ﻏﺒﺎﺋﻲ ﺍﻟﻠﻲ ﺧﻼﻧﻲ ﻧﺠﺮﺡ ﻗﻠﺐ ﺣﻠﻮ ﺯﻱ ﻗﻠﺒﻚ .. ﺍﻩ ﻟﻮ ﻧﻘﺪﺭ ﻧﻘﻮﻟﻬﺎ ﻭﻧﻄﻠﻌﻬﺎ ﺁﺍﺍﻩ ﻟﻮ ﻧﻘﺪﺭ ﻧﺒﻮﺣﻠﻚ ﻭﻧﺨﻠﻴﻚ ﺗﺼﺪﻗﻬﺎ ﺁﺍﺍﺍﻩ ﻭﺧﻼﺹ .. ﻧﺤﺒﻚ ﻧﺤﺒﻚ ﻭﻧﻤﻮﺕ ﻓﻴﻚ .."
ﺣﻄﺖ ﻳﺪﻫﺎ ﻉ ﻟﺤﻴﺘﻪ ﻭﻗﻌﺪﺕ ﺗﻤﺸﻲ ﺑﺄﺑﻬﺎﻣﻬﺎ ﻋﻠﻴﻬﺎ ...
ﻗﻌﺪﺕ ﺗﺘﺄﻣﻞ ﻓﻴﻪ ﻟﻠﺤﻈﺎﺕ ❤
ﺑﻌﺪﻳﻦ ﻗﺮﺑﺖ ﻣﻨﻪ ﻭ 💋 ﺑﺎﺳﺘﻪ .. ﺑﻮﺳﻪ ﺧﻔﻴﻔﻪ ..
ﺑﻌﺪﻫﺎ ﻗﻌﺪﺕ ﺗﺸﻮﻓﻠﻪ ﺑﺄﺑﺘﺴﺎﻣﻪ .. ﺗﻨﻬﺪﺕ ...
ﺣﻮﻟﺖ ﻳﺪﻫﺎ ﺗﻤﺪﺩﺕ ﺟﻨﺒﻪ ﻭﺭﻗﺪﺕ ﻉ ﺟﻨﺒﻬﺎ ﺧﺪﺕ ﻳﺪﻩ ﺍﻟﻠﻲ ﻛﺎﻧﺖ ﻉ ﺻﺪﺭﻩ .. ﻭﺣﻄﺘﻬﺎ ﻋﻠﻴﻬﺎ .. ﺗﻐﻄﺖ ﻣﻌﺎﻩ ﺑﻨﻔﺲ ﺍﻟﺒﻄﺎﻧﻴﻪ ﺣﻄﺖ ﻳﺪﻫﺎ ﻉ ﺻﺪﺭﻩ ﻭﻏﻤﻀﺖ ﻋﻴﻮﻧﻬﺎ ﻭﺭﻗﺪﺕ ﻭﻫﻲ ﻓﻘﻤﺔ ﺍﻟﻔﺮﺡ ...
ﻫﻮ ﻓﺘﺢ ﻭﺣﺪﻩ ﻣﻦ ﻋﻴﻮﻧﻪ " ﺁﺍﺍﺍﺍﻩ ﻣﻨﻚ ﻳﺎﺣﻴﻮﺍﻧﻪ ..."💓
ﻏﻤﻀﻬﺎ ﻭﻛﻤﻞ ﺗﻤﺜﻴﻠﻪ ﻉ ﺃﺳﺎﺱ ﺍﻧﻪ ﺭﺍﻗﺪ ..
ﻭﻟﻒ ﻋﻠﻴﻬﺎ ﻭﺣﻀﻨﻬﺎ ..
ﻫﻲ ﻗﺮﻳﺐ ﻣﺎﺗﺖ ...💓
ﺭﺍﻓﻊ : ﺍﻣﻤﻤﻢ ... ﻣﺘﺴﺎ ... ﻣﺘﺴﺎ ... ﻉ ﺍﺳﺎﺱ ﻓﻲ ﺳﺎﺑﻊ ﺣﻠﻤﻪ 😂
ﻫﻲ ﺍﺑﺘﺴﻤﺖ ﺑﺈﺭﺗﻴﺎﺡ ﻣﺴﻜﻴﻨﻪ ﺗﺤﺴﺎﺑﻪ ﺩﺍﺭﻫﺎ ﺑﺪﻭﻥ ﻣﺎﻳﺤﺲ ..
ﻣﺎﺗﻨﺪﺭﻳﺶ ﻋﻠﻴﻬﺎ ﻣﻊ ﺳﺒﻖ ﺍﻹﺻﺮﺍﺭ ﻭﺍﻟﺘﺮﺻﺪ ..😁😉
🌼🔥👑🌹
ﻛﺎﻧﻮﺍ 4 ﺍﻷﺭﺑﻌﻪ ﻋﺎﻳﺸﻴﻦ ﻟﻴﻠﻪ ﺣﻠﻮﺓ ﺑﺎﻟﻤﺮﺓ ...
ﻧﻮﻣﻴﺪﻳﺎ ﺍﻟﻠﻲ ﻛﻤﻠﺖ ﺍﻟﻠﻴﻞ ﻭﻫﻲ ﺗﻬﺪﺭﺯ ﻉ ﺩﻭﻓﺎ ﻭﺍﻟﻜﻼﻡ ﻣﺎﺑﺎﺵ ﻳﺘﻢ ﺑﻜﻞ ﻭﺍﻟﺰﻭﺯ ﻋﺎﻳﺸﻴﻦ ﻓﻲ ﻋﺎﻟﻢ ﻣﺎﻓﻴﺸﻲ ﻏﻴﺮﻫﻢ ..
ﻫﻲ ﻭﺍﻗﻔﻪ ﻓﻲ ﺍﻟﺮﻭﺷﻦ .. ﻭﻫﻮ ﺗﺤﺖ ﺭﻭﺷﻨﻬﺎ ❤
ﻓﻲ ﺍﻟﻮﻗﺖ ﺍﻟﻠﻲ ﻓﻴﻪ
ﻭﻓﺎﺀ ﻓﺤﻀﻦ ﻛﺒﻴﺪﺗﻬﺎ 💓 ﺍﻟﻤﻨﺴﺠﻢ ﺃﺧﺮ ﺍﻧﺴﺠﺎﻡ ﻭﻫﻮ ﺣﺎﺿﻦ ﺣﻴﻮﺍﻧﺘﻪ 😂💓
🍁 ﻛﺎﻥ ﻓﻲ ﻣﻜﺎﻥ ﺗﺎﻧﻲ ﻭﺣﺪﻩ ﻏﻴﺮﻫﻢ ..
ﺭﺍﻗﺪﺓ ﻓﻔﺮﺍﺷﻬﺎ ﺗﺒﻜﻲ ﺑﺼﻤﺖ ﻭﺑﺤﺮﻗﻪ ﻭﺑﻘﻬﺮ ..
ﺍﻟﻠﻴﻠﻪ ﺭﺍﺟﻠﻬﺎ ﺗﺰﻭﺝ ﻏﻴﺮﻫﺎ .. ﻓﺤﻀﻦ ﻣﺮﺍﺓ ﻏﻴﺮﻫﺎ .. ﺷﺎﺭﻛﺘﻬﺎ ﻓﻴﻪ ﻏﻴﺮﻫﺎ ..
ﻭﺭﺩﺓ ﺍﺧﺖ ﺻﻠﻴﺤﻪ ..
ﺍﻟﻠﻲ ﺣﻠﺖ ﻋﻠﻴﻬﺎ " ﻣﻨﺤﺔ ﺍﻟﺪﻭﻻﺭ " ﺑﻤﺼﻴﺒﻪ ..
ﺑﺪﻝ ﻣﺎﺗﻜﻮﻥ ﻟﻴﻬﺎ ﻧﻌﻤﻪ ﻭﻟﺖ ﻧﻘﻤﻪ ... ﻭﺧﻠﺖ ﺭﺍﺟﻠﻬﺎ ﺍﻭﻝ ﺣﺎﺟﻪ ﻳﺪﻳﺮﻫﺎ ﺑﻌﺪ ﻣﺎﻳﺎﺧﺪﻫﺎ .. ﻳﺎﺧﺪ ﻋﻠﻴﻬﺎ ..
ﺻﻠﻴﺤﻪ ﺍﻟﻠﻲ ﻛﺎﻧﺖ ﻋﺎﻃﻴﺘﻬﺎ ﺑﺎﻟﻈﻬﺮ ﺣﺎﺳﻪ ﺑﻴﻬﺎ ﻟﻜﻦ ﻣﺎﻗﺪﺭﺗﺶ ﺗﻌﺮﻑ ﻉ ﻗﺪ ﻣﺎﺣﺎﻭﻟﺖ ...
ﻓﻲ ﺩﺍﺭ ﺗﺎﻧﻴﻪ ﻣﻦ ﻧﻔﺲ ﺍﻟﺤﻮﺵ ..
ﺧﻮﻫﻢ ﻣﺤﻤﺪ ﻣﺎﻗﺪﺭﺵ ﻳﺮﻗﺪ ﻭﻫﻮ ﻳﺨﻤﻢ ﻓﻲ ﺭﺃﻱ ﺍﻗﺘﺮﺣﻪ ﻋﻠﻴﻪ ﻭﻟﺪ ﺷﺎﺭﻋﻬﻢ " ﻃﻪ ..."
ﻣﺤﻤﺪ " ﻋﻨﺪﻩ ﺍﻟﺤﻖ ﻣﻌﺎﺵ ﻳﻨﻔﻊ ﺷﻲ ﻉ ﺍﻟﺤﺮﻗﺔ .. ﺯﻋﻤﻪ ﻧﺤﺮﻕ ﻭﻻﻻﻻ "...
ﺍﺑﺘﺴﻢ ﺑﺘﻬﻜﻢ ... ﻭﺩﻣﻮﻋﻪ ﻋﺒﻮﺍ ﻋﻴﻮﻧﻪ ...
🍃🍃🍃
... ﻳﺘﺒﻊ
