_ إسمي لولي... كنت بتفرج علي التلفزيون وشغال فيلم 365 يوم سعادة مش بتاع المخفي ميشيل موروني مش ناقصين نروح في داهية... أنا قصدي علي بتاع دنيا سمير غانم و أحمد عز (أقسم بالله ماولادي😁)... كنت سرحانة فيهم وهم بيرقصو مع بعض وإذا ترجع بيا الذكريات من ٨ سنين وأنا لسه ورور وبلقب آنسه قبل ما أكون ولية 🙄...
في ليلة فرحنا كان يوم تلات يوم مالهوش ملامح شديد الحرارة... وإحنا في القاعة وبعد أغنية طلي بالأبيض يا زهرة البتنجان و ده بالنسبة للي شوفته بعد ماطليت بالأبيض.. أشتغلت موسيقي رومانسية لرقصة السلو
_ ميدو، أنت هاتفضل ترقص في صمت كده ما تقولي حاجة.
= حاجة.
أتغاظت منه و ضربته علي كتفه:
_ بطل رخامة.
= أنتي الي بطلي رغي، وبعدين أي ميدو دي، بتكلمي إبن أختك الصغير!.
_ الحق عليا بدلعك.
=أندهيلي بإسمي عادي، ماله أحمد قصر معاكي في حاجة.
حسيت أنه أتعصب شوية فقولتله:
_ بالعكس أنا بعشق أسمك أوي.
شوفت في عينيه نظرة فخر أتحولت لنظرة تانية أول مرة أشوفها، طبعا ما النهاردة ليلة العمر وهو كان طول فترة الخطوبة عامل نفسه مؤدب و علي رأي المثل ياما تحت السواهي دواهي 😁
أحمد= بتعشقي أسم أحمد بس وبالنسبة لصاحبه؟.
و رزعني غمزة خلت قلبي يرفرف في الفضا، بصيت في الأرض وأنا مسكوفة، لاقيته مال ناحية ودني وقالي:
= بقولك أي مفيش كسوف النهاردة خالص.
سامعه كلامه وبقول في نفسي:
_ كسوف مين يا وحش، يارب أنت الي ما تتكسفش .
خدت بالي وهو بيقولي برومانسية:
_ عايزة أقولك علي حاجة.
رفعت وشي وبصتله بصة زي الأيموچي المكسوف:
_ أتفضل قول.
= أنا بحبك يا لولي، و فرحان أوي وبحمد ربنا أنه رزقني بيكي، بس خدي بالك أظن فهمتي طبعي طول فترة الخطوبة أنا بكره العند وعدم سمعان الكلام والتطنيش، تسمعي كلامي أديلك عينيا، هاتعملي العكس هاتلاقيني....
قولت في نفسي:
_ أبو الغضب .
فوقت من ذكرياتي علي كف خماسي الأبعاد أترزع علي قفايا... قومت ببص ورايا لاقيته لسه راجع من الشغل و قالب وشه ومش طايق نفسه... رمي موبايله ومفاتيحه علي الطرابيزة.
قولتلو وأنا بحسس علي قفايا:
_ هي دي سلام عليكم!.
رفع حاجبه وقالي:
_ هو ده سلامي ، عاجبك ولا مش عاجبك؟.
= طبعاً عاجبني أنا أقدر أقول حاجة ياسي أحمد 🙄.
_ بحسب.
قام ورايح ناحية أوضة النوم قومت وراه:
_ أحضرلك العشا عقبال ماتاخدلك دش وتغير؟.
= لاء، مش جعان، العيال فين مش سامع صوتهم؟.
_ أتعشو ونامو.
فجاءة لاقيتني في حضنه ونفس البصة الي من ٨ سنين بصهالي و بجرأة أتعودت عليها بقي خلاص.
_ مالك يا سي أحمد ، وأي أيموشن حمدي الوزير الي علي وشك ده؟.
غمزلي غمزة وقحة:
العيال نامت و الجو هادي والقمر بدر، هايكون مالي يعني.
فكرت وأنا بردد كلامه:
_ ليل والقمر بدر، أي هاتتحول لمستذئب.
و رده عليا كان قفا 3D رجعني لذكرياتي من تاني... بعد ماخلص الفرح وروحنا شقتنا...
_ نورتي شقتك يا حبيبتي.
ولسه كنت هارد عليه وياريتني مافتحت بوءي النور قطع!!!! 😅🙈
#إسكريبت_يومياتي_مع_أبو_الغضب
#الجزء_الأول
#بقلمي_ولاء_رفعت_علي
1000 لايك وكومنتس وهنزل الأسكريبت الي بعده
تحذير: ممنوع نسخ أو نشر الأسكريبت دون الرجوع إلي الكاتبة الي هي أنا وقد أعذر من أنذر 😎
أنت تقرأ
يومياتي مع أبو الغضب (إسكريبتات)
Humorمواقف رومانسية فكاهية مُقتبسة من حياتي الشخصية أنسجها لكم علي هيئة إسكريبتات باللهجة العامية المصرية أتمني أن تنال إعجابكم 🌹🌹
