#يومياتي_مع_أبو_الغضب
#إسكريبت_3
#بقلمي_ولاء_رفعت
طبعاً غيابي الأيام الي فاتت لابد و حتماً حصل فيه مغامرات أو أحداث ما ينفعش أعديها كده غير لما أكتبها لكم، غلاف روايتي الي نازلة معرض القاهرة الدولي للكتاب ٢٠٢٢ و هي بعنوان صراع الذئاب حبيت أعمل الغلاف بصورة أكتر شخصية محورية في الرواية و طبعاً مفيش غيره قيصو حبيبي 😅
و هو لابس چاكيت الفرو عشان يا قلب أمه كان سقعان 🥶، بالمناسبة المصممة تبقي الجميلة السكرة الفنانة المبدعة غادة عبدالرحمن، الست قولتلها فكرة الغلاف تقوم هوبا فجأتني بالجمال والعظمة وكمان مش كده و بس، دي عملتلي أوبشن جديد الغلاف والضهر بيكملو بعض، وش الكتاب قصي و ضهره الذئاب، مش بقولكم فنانة 😉
المهم نرجع لموضوعنا الأساسي بعد ما أستلمت الغلاف منها طايرة بيه من الفرحة و قومت أتحزمت بالطرحة و قعدت أرقص علي أغنية الست روبي الي أنا مش حافظة منها غير هوبا 😅💃🏻🤣
مندمجة بقي مع الأغنية و حاطه الـ AirPods في وداني كنت مقلباها من أبو الغضب زي ما قلبته في الترينج الشتوي بتاعه 😅
و فجاءة و أنا بلف بوسطي و بعمل هوبا لاقيته في وشي واقف علي الباب، يا كسفتك يا لولي ☺️🙈، سمعاكي يالي بتقولي في واحده تتكسف ترقص قدام جوزها أقولكم اه انا ، بتكسف أوي لما بلاقي حد مركز معايا و أنا برقص 💃🏻🙈 و خصوصاً أبو الغضب، طبعاً معظمكم تخيل رأيكشن وشه زي أي زوج بيشوف مراته بترقص يقوم باصص لها نفس بصة سي حمدتشي الوزير أبسلوتلي بصوت اللمبي 😂، أنا أبو الغضب جوزي غير كده خالص ده يقعد يقلدني بطريقة مضحكة بل وساخرة ويقولي:
- أول مرة أشوف رقاصة بكرش.
أنا:
- و لما الي عندي يبقي إسمه كرش يبقي الي عندك ده إسمه أي! 😏، قدرة فول متحركة 😂
لاقيته قرب عليا و لسه هيمسكني من قفايا:
- بتبرطمي بتقولي أي؟
أنا:
- ما بقولش حاجة يا باشا.😅
سابني و قال: بحسب، مالك فرحانه و بترقصي كده ليه.
أنا: لا إله إلا الله، سبحان الله في أمركم يا معشر الرجال لما بتشوفونا زعلانين أو هرمونات الحزن طافحة تقولو علينا نكديين برغم أنكم السبب، ولما بنفرح تسألو وتستغربو كأننا بنعمل شئ خارق للطبيعة، عبو أشكالكم.
برق لي كده و سألني في وضع الهجوم:
- عبو شكل مين؟
رجعت لورا و برجع في كلامي كمان:
- بقول عبو شكلي أنا. 😅
رفعلي حاجبه و ضيق لي عينيه:
- بحسب. 🤨
مسكته من إيديه و قولتله:
تعالي أقعد جمبي هوريك حاجة.
و هو عشان نيته سودة ديماً 😁 فهمني غلط وقالي:
- هتوريني أي ما أنا شوفت كل حاجة 😎
خبطو في كتفه:
- بس يا واد.
فتحت له الفون و فرجته علي صورة الغلاف:
- أي رأيك في غلاف كتابي؟
فضل يكبر في الصورة ويتفحص و يتمحص و قام باصص لي و قال:
- أي ده مش حاطه صورتي ليه؟
باصتله بإستغراب:
- و أحط صورتك ليه يا حبيبي؟
- مش دي الرواية الي صدعتيني بيها وقعدتي تقوليلي أنتي واخده حاجات كتير من شخصيتي و عملاها في شخصية بطل كده مش فاكر إسمه و وريتيني صورة الواد الملزق ده و ساعتها رزعتك كفين علي قفاكي.
قولت في دماغي : ملزق! 😏 ده طلع الصورم في الرجاله كمان.
و بعدين قولتله:
أيوه رزعتني كفين علي قفايا عشان غيران منه.
- لاء عشان المفروض تحطي صورتي أنا بداله.
فتحت بوقي و تنحت للحظات كده 😯، و حسيت إني هاتشل لما بيقولي:
- أنا عارف إنك مش هاتحطي صورتي، طبعاً عشان بتغيري عليا عشان معظم قراءك بنات وستات، برغم أنا واثق لو حطيتي صورتي علي الغلاف الكتاب هيتباع طبعه اولي وتانيه وتالته كمان.
قمت فزيت من مكاني، خلاص كفايه تعجب و إستغراب لحد كده و كفاية كتمان ماسورة ضحك هتنفجر دلوقت، قولتله:
صورة مين و هاغير عليك أي، لاء و كمان عايزني أحط صورتك علي الكتاب!!!!! 🙄، عايز تطفش لي القراء و الكتب ما تتباعش!! 😶
قام من مكانه و قولت ما بيني و ما بين نفسي أحيي شكله زعل بجد 😅
- أنت زعلت؟، و ربنا بهزر معاك يا سي أحمـ....
هوب خدني دبل كيك زي الي بيلعبو مصرعه وراح كتفني و رماني علي السرير و قعد عليا مش زي مصطلح يعتليها الي بنقرأها في الروايات إطلاقاً،الي أنا حساه بالظبط إحساس قطعة مارشيمللو غلبانة وقع فوقيها صخرة كبيرة 😅😅 :
- قلبتيني في السماعات الي قالب عليها الدولاب من أسبوع و ساكت لك، مقلباني كمان في هدومي واخده أجمد ترينج عندي حتي الدفايات والفانلات لاء وكمان شرباتي معتقتهاش و بتلبسي هم.
هاموت و بفطس و رديت بالعافية:
نسيت أقولك أخدت البوكسر الأسود حلو أوي و بيدفي😂.
-كماااان، أستحملي بقي الي هيجرالك.
قعد يرجني زي أزازة الحاجة الساقعة، و بدل ما أترجاه يسيبني أو أحاول أتزحزح و أنفد بجلدي لاء روحت قولتله:
- ده بوكسرك واسع عليا ده أنت أفخادك أكبر من أفخادي.
قام من عليا أخيراً و لسه هاخد نفسي لاقيته شايلني وبيقولي:
- بمناسبة الأفخاد فكرتيني، بقالي كتير ما عملتلكيش ساعة.
رقعت بالصوت لما عرفت هو ناوي علي أي 😮😮😮:
- لاء بالله عليك يا أحمد، أبوس أيدك مش هتنمر عليك تاني، أبوس أفخادك حرمت، ااااه
نايمني ع بطني فوق رجله ومكتفني و نزل عض فيا في نفس مكان حقنة الفيتامين 😭😭.
أيوة زي ما قرأته كده بالظبط، ما هو الي عمله قصي في صبا كنت مقتبساه من الي بيحصل فيا و أنا غولبانه و مسكينه ومكسورة الجناح 😅😁😁
- خلااااص يا احمد أنا آسفه، مش هاعمل كده تاني قصدي عاشر أو مية، حرمت يا أبو الغضب، اعاااااااا.
و إلي اللقاء في جزء جديد أحكيلكم فيه أول مرة عضني و كان أي السبب 😅
باي باي🤗🤗
أنت تقرأ
يومياتي مع أبو الغضب (إسكريبتات)
Humorمواقف رومانسية فكاهية مُقتبسة من حياتي الشخصية أنسجها لكم علي هيئة إسكريبتات باللهجة العامية المصرية أتمني أن تنال إعجابكم 🌹🌹
