Ut-utobek ti kinatalinaay ti panunotko a napurnada iti kabigatanna. Diak pay namurmurayan, addan kasla dumanarudor a tugtog iti ridawmi. Manipud iti tawa, nasiripko ni Rona, ti atapek a kabit ti asawa ni Marvina. Isu ti umariwawa; bumbumsagen iti nalaus pungtotna. Arintukiadennak a rummuar; kababain kadagiti tao ti eskandalo a pinarnuayna. Ngem idin ta agubor, linuktak ti ruangan, diak napakadaaan ta sineppegnak metten. Induronko isuna.
Awan serreg ti ngiwatna a nangilaaw: “Mosa, sika kano met ti nangibaga ken Ma'am Marvina nga adda relasionmi iti bossko nga asawana?" Inwarasko ti panagkitak. Adu ti umarimangmang a kaarruba. Nakatuon amin nga imatangda kadakami.
Nupay nakigtotak, pinagkalmak ti riknak. Saanak a nagpaatiw. "Hoy, adda pruebam? Maysa, saan kadi a pudno aber? Madika la a mabain Rona. Ti pay la adda asawanan ti tinuklawmo. Ulegka manipudsipud." Sinungrudan ti imbutakakko ti rumrumsik a matana.
"Idarumka, ayupka! Dayta kinabaketmo, atiwmo ‘tay awanan nakem nga ubing! Gapu iti kinatsismosam, nagtupak ti langit kaniak; inikkatnakon ni bossko iti trabahok.” Addan kabuyog a lua dagiti nakatadtadem a matana.
"Awan ti bibiangko dita, bruha!” inngayemngemko. Siak kedin ti butbutngenna. Ken adda turedna nga aginsasangit.
"Sika ti bruha, ti mangbalballaibo ketdin ti ub-ubraem," intudotudonak. Ginandatnak a batuen.
"Tumalnaka! Gunggonam ti napasamak kenka,” intangepko ti ruangan ta binakalnak.
Namindua pay ngata nga inubornak. Addan nabtak a jalousie. "Sadiay barangay nga iyurayka, ayupka! Idarumka!" inulitna ti pangtana.
Inyalikakak ti uppat tawenna nga anakko a kumkumpesen ti butengna iti suli. Iti agsibsibo a riknak, ammok naperdi aminen nga aldawko. Marurodak unay. Siak pay kedin ti idarumna ket isuna ti adda dakes nga aramidna! Kitaek man ti inalatna no agsubangkami iti barangay, iparupakto kenkuana ti naurnongko a saosao kadakuana iti lalakina.
Saan pay nadomminguan, addan naawatko nga abiso iti barangaymi. Ne, pinaypaysona ketdin ti dangnga! Kinunesko ti surat. Saanak a napan. Kitaek man no di mabungsot nga agur-uray kaniak.
BINABASA MO ANG
MIMOSA
Short Storymaysa kadagiti kadawyan a nasaknap a parikut wenno pasamak a masarakan iti uneg ti timpuyog a mang-tignay iti rikna ken puso dagiti agbabasa.
