Kagapgapuk iti tiendaan a kaduak ti ubingko idi impasabat kaniak ti tanod ti pasarunson a surat ti Kapitan. Nainget a naibilin ti yaatendarko, a no agtukiadak, maipilan iti korte ti asunto ni Rona.
Sinuknor ti aligagaw ti kaunggak. Agasem ti gastosek a mangabogado? ken ti pannakataktakko.
Lalon ti pannakaibabainko nga agkakaso. Nangeddengak. Tinurongko ti barangay hall-mi. Nasaripatpatak ni Rona a nakatugaw; uppat wenno lima ngata a kameng ti Lupon a pakairamanan ti kapitan. Adda pay sadiay dagiti agaasawa nga atanudko. Nagtugawnak iti batogna, nga umabay iti kapitan. Saan a nagpalikoslikos ti kapitan. Inlawlawagna ti rason ti panagmimitingmi. Daytoy a sangonsango a panagdiskutir.
Pinagsaritadak. Nagkarayam ti danag kaniak. Puro second hand laeng ti maibagak. Awan ti pannakakitak wenno pannaka-caught in the act-ko koma kadakuada. Inuntonda ti lupon no adda ebidensia kadagiti inlawlawatko. Pinagsaritada ti maseknan nga asawa. Impalgakna, ken insapatana pay iti kumadrek nga awan ti relasionda ken Rona. Pinasarunuan ti nagidarum a dakes a galad ti impakitak kano ket nagsagaba ti pamiliana ken namantsaan ti dayawna. Inrurumen kano ti intsisisko ti kinataona. Ammok, naikornerakon iti daytoy nga asunto. Ammok a ti ngiwatko la ti ebidensiak. Ngem saan nga umanay dayta tapno makaalut-onak iti kaso. Nagdumogak ta mabainakon iti kumadrek. Sumsumged dagiti matada a tallo - ti nagdarum ken ti agassawa. Dimmawatak iti pasensia. Nautobko a narigat a sarangten ti makapungpungtot a tao. Inaminko a basolko ta siak laeng diay rangtay ngem saan a siak ‘diay inhiniero ti maidandanon a palso a saosao.
Inyanug-og ni Rona. "Gapu kaniam naperdi ti talekda kaniak. Gapu iti dayta, kalikagumak, apo kapitan nga idarumko iti slander iti korte no saanak a bayadan iti danios,” kinuna.
Manen, nagkarayam ti buteng kaniak. "Pangalaak ngarud? Ni awan payen pagbayadko kadagiti sabali pay nga utangko?" ti nakarawak nga insungbat.
“Awan ti bibiangko dita, bruha!" nagallangogan iti lapayagko iti imbagak idi immaynak rinaut iti balay. “Danios wenno agkitata iti korte ta paibaludka!”
Iti panagriknak, nagtupak manen ti langit kaniak. Aglalo ta agwingwinging dagiti lupon a mangmatmamat kaniak. Diak ammo no basbasaenda ti linaon ti isipko.
‘Kurang ti sangapulo ribu no tutuosin ta minulitam ti kinataok. Ti aguutang, saan a tsismosa tapno mapalugodan laeng. Maitutop man dayta naganmo kenka!” adda nailimog a sarkastiko iti insao ni Rona.
Iti naimdengak, diak naaguantaan ti panagsibo manen ti riknak. Nagpungtotak. No saan laeng nga adda ni kapitan dinissuakon isuna. Tinenggelko ti riknak. Immangesnak iti nauneg.
"Saanka a madanagan. Itedko ti dawdawatem!” nagubsangen ti tonok. Iti suli ti isipko, sungsungkaenkon no kasano ti aramidek. No sino manen ti asitgak.
Pinagpirmakami a dua; immannugotnak nga itedko ti kuarta iti uneg ti makalawas. Naisurat pay iti dadakkel a letra, wen ammok a pamutbutengda kaniak, nga ipabaludnak kano no diak matungpal ti tulagan. Kortento kanon ti makinsakup kalpasanna.
BINABASA MO ANG
MIMOSA
Short Storymaysa kadagiti kadawyan a nasaknap a parikut wenno pasamak a masarakan iti uneg ti timpuyog a mang-tignay iti rikna ken puso dagiti agbabasa.
