MIMOSA

maikauppat a paset

Kawaw ti ulok a limmaksid iti barangay hall. Mabainak la unay iti kumadrek ngem ania ngarud, nalpasen ti amin. Diakon maisubli ti napasamak ta aturek koma. Kalkalpas ti maysa a parikutko, adda manen nadagdagsen a simmangbay. Saanman a pudno a kabit isuna, malas latta dayta Rona iti biagmi. No apay ngamin nga inayat idi isuna ti lakayko ket tatta baklaymin ti kinamalasna. 

Awanen ti mapanunotko a pamuspusan. Napindak sa aminen nga immasugan. Naisaldak payen dagiti alikamenmi ayatko laeng a maiwakaskon dagiti immuna nga obligasionko.   

Nagsaltek ti lagipko iti kumadrek. Awanen iti maiparangko a rupak ngem isuna laeng ti gayyemko nga atapek a mangted addang kaniak tapno malpasen ti parikutko. Ngem nagsabaliw san ti garaw iti bulong. Ni anniniwan ti gayyemko, saanko a nasarakan. Ammok nga adda isuna ngem nakarikep ti pagtaenganda. Duldulinannakon. Diosko! Mabagtitnak san! 

"Mama, nadamagko ti parikutmo. Idiaam ti kinatangsitmo. Isardengmo ti ugalim a kasta. Maperdi ti pamiliatayo. Inyawidmo pay gayam ditoy ti ugalim idi didiay Manila," kuna ti anakko iti maysa rabii a nakatugawkami iti paraangan ti balaymi. 

Immukuok kaniak ti kinapudno ti imbagana. Maasiannak iti anakko. Kaasi pay a  makipagbakbaklay iti parikutko. Siakon ti pagtsitsismisan dagiti kabaranggayanmi. Mabainnakon. 

Masapul nga ibabak ti pride-ko ta kasla bugbugawek dagiti ay-ayatek ti biag. Ni Marvina, ti anakko. 

Napanunotko ti dumawat iti pammakawan iti kumadrek, uray parupaannakon; asitgakto metten ni Rona, ti babai nga ap-apalak. Saanko ammon ti ubraek ta makabulan laengen birthday ti misterko ket masapul a mapankam Manila. Saanko kayat a maperdi ti pamiliak. Kasla adda button dagiti sakak, tinurongko ti dalan a paapan iti balayda ta dumawatnakon iti pammakawanna. Pimmudno ti atapko a saanak a sanguen ni Rona;  ti laeng amana ti nagparang kaniak aglalo idi ibagak nga awan ti awitko a danios. 

"Mosa, saanna kabaelan a sanguenka gapu iti inaramidmo. Ti laeng bilinna, agpason bigat ti tulagan ket iyuraymo lattan ti isasangbay dagiti pulis iti pagtaenganyo," kinuna iti lakay. 

Saannak pay nakasungbat ket inrikepnan ti ridawda. Bastos a lakay, insainnekko. Nalpay ti abagak a nagawid. Kasanon ti anakko no pidutendak dagiti pulis ket ibaluddak? Nagaripapaak. 

Agkubuaren dagiti luak. Madanagannak iti anakko. Dakesak kadi nga ina, a ti ayatko a makabulod, ken masolusionan dagiti parikutko, nagparboak iti sarita? 

Saannak a pinaturog ti parikutko. Tumaraoken ti kawitan idi mairidepko. Nakatangkayagen ni Apo init idi subliannak ti puot. Diak pay a naibukirad dagiti matak, dumanarudoren ti kibbayog iti barukongko. Pirmin ti nerbiosko. Iti aniaman nga oras, baka dumtengen dagiti pulis.  Riniingko ti anakko, awan sinsukat, intulodko isuna iti balay da kumadre. Makaamod’tan no ania ti kunana. Ti napateg, mai-safety-k ti ubingko.