كُنت بخلص إجراءات السفر وكدة علشان خلاص باقي على الحلم خطوة ويتحقق ..
هسافر أدرس المجال اللي ياما حلمت بيه بس معرفتش أحققه في بلدي .. بس! فيه حلم مش هينفع يتحقق غير في بلدي .. بعد ما خلصت كُل حاجة المفروض أبقى فرحان لكن لا! حاسس إن فيه حاجة ناقصة!
قررت أروح نفس المكان اللي شفتها فيه أكتر من مرة ..
يا رب لو ليّا خير فيها ألاقيها هناك فعلاً لو لا .. لا إن شاء الله مفيش لا وهلاقيها
وصلت بس ملقيتهاش في نفس المكان اللي بتبقى فيه .. دورت عليها بعيوني في كذا مكان بس ملقيتهاش .. يئست وخلاص كنت همشي ف تليفوني رن قعدت على المقعد علشان أرد .. وفي وسط كلامي لقيتها جت وقعدت على المقعد اللي قصادي يا ربي على السعادة ..
قلت لبابا بسرعة معلش يا حاج اقفل دلوقت هعمل حاجة وهكلمك تاني ..
اترددت صراحةً في اللي هعمله بس خلاص هكلمها وأمري لله ..
- السلام عليكم ورحمة الله وبركاته .. ممكن آخد 5د بس من وقت حضرتك
= عليكم ورحمة الله وبركاته حضرتك بتكلمني أنا ؟
- اه .. بُصي أنا عارف إن ال هقوله لحضرتك مكانش ينفع يتقال .. بس مضطر!
أنا مُعجب بحضرتك وشايف فيكِ زوجة صالحة تقدر تصون بيتي في غيابي قبل وجودي .. أنا هسافر أدرس 8 سنين وعارف إنها مدة طويلة جدًا .. بقول لحضرتك الكلام دة علشان لو رحت لوالدك وقلتله كدة أنا متأكد إنه هيرفضني قبل ما أكمل كلامي أساسًا ..
ودة رقم أختي أنا حكيتلها عنك وهي عارفاكِ .. سواء موافقة تنتظريني أو رافضاني أتمنى تبلغيها علشان أبقى عارف .. وآسف لو كُنت ضايقت حضرتك .. السلام عليكم ورحمة الله وبركاته
= وعليكم السلام ورحمة الله وبركاته
*الحمد لله ارتاحت شوية .. حتى لو رفضتني هبقى مرتاح إنّي حاولت .. *
________________
* أنا لحد الآن مصدومة من اللي حصل .. متخيلتش للحظة واحدة إن دة يحصل أصلاً .. مكنتش عارفة أرد عليه .. مكنتش حاسة غير إني زعلت لمّا عرفت بموضوع سفره .. دة ال لفت نظري في كلامه .. فرحت إنه بيبادلني نفس الشعور .. ربنا استجاب لدعواتي .. أخدت الرقم ومشيت وقعدت أفكر كتير وكتير .. في الآخر قررت أصلي استخارة .. خايفة أقول لبابا يكون رده الرفض فعلاً زي ما قال وساعتها هبقى ضيعت فرصة جت لحد عندي.
صليت استخارة ونمت ..
صحيت حاسة براحة محسيتش بيها في حياتي قبل كدة .. بس اترددت فإني أكلم أخته .. هكلمها أقولها ايه؟ .. خلاص هكلمها وأمري لله*
سجلت رقمها وبعتلها
- السلام عليكم ورحمة الله وبركاته
أنا مروة .. أكيد عرفتيني؟
= وعليكم السلام ورحمة الله وبركاته
أهلاً أهلاً بالغاليين أخبارك ايه يا حبيبتي
- بخير الحمد لله .. أخبار حضرتك ايه
= الحمد لله يا قمر .. بلاش من حضرتك دي متكبرينيش زيادة ههههه.
بالمناسبة أنا اسمي مريم قليلي يا مريووم عادي .. هاا الأستاذ قالي ع ال عمله بعتذرلك بالنيابة عنه .. موافقة ولا ايه؟
- بُصي بصراحة أنا صليت استخارة وحسيت بارتياح .. ف هقدر أقولك إن طول ما هو باقي ع العهد هفضل مستنياه .. بس إنتِ مش شايفة إن 8 سنين كتيرة وإن تفكير الإنسان بيتغير يعني وكدة فاهماني إنتِ طبعًا
= اه فاهماكِ .. أنا أكتر واحدة أعرف أحمد .. أحمد مش بتاع الكلام دة .. ولو مكانش صادق في إحساسه مكانش حكالي حاجة ..
أنا أضمنلك إنه هيوفي بكلامه .. هو مش هيتجوز قبل ما يخلص دراسته بس خايف إن إنتِ ال تتحوزي قبل ما هو يخلص
- زي ما قلتلك قبل كدة طول ما هو بيوفي بكلامه أنا مستنياه ..
* ارتاحت جامد بعد ما كلمت مريم .. كُنت هحكي لصاحبتي المُقربة .. بس حسيت إن مفيش داعي أحكي طالما مفيش حاجة رسمي .. *
_____________
*عدى 4 سنين عرفت من مريم إن اتقدملها عريسين بس هي رفضت .. فرحت إنها لسة مستنية .. بس لسة باقي 4 سنين تاني وإن أهلها موافقين على رفضها دلوقت مش هيوافقوا بعدين .. استودعتها الله وقررت أشتغل بجانب دراستي وأحاول أجهز نفسي علشان أخلص وأتقدملها على طول .. وقررت أفاتح والدي كمان في الموضوع علشان يساعدني *
_____________
*عدى 6 سنين وكُل فترة مريم بتطمني إنه لسة على قراره وقالتلي إنه فاتح باباه من سنتين في الموضوع وإنه حاليًا بيجهز نفسه ..
أهلي بدأوا يتضايقوا من رفضي الدائم ... في الأول كنت بتحجج بالماجيستير والدكتوراه وأخدتهم الحمد لله حاليًا مبقاش فيه حجة*
- مروة متقدملك عريس وأبوكِ شايف إنه كويس وهتوافقي يعني هتوافقي
= بس أنا مش عايزة أتجوز دلوقت لسة قدامي حاجات أحققها
- دة آخر كلام عند أبوكِ وإنتِ حرة .. بعدين دة دكتور يختي هو حد طايل
= مش بتفرق معايا على فكرة والمفروض تسيبوني أفكر .. أنا صاحبة قرار نفسي
* اتضايقت جامد وخايفة يجبروني بجد لازم اتصرف.. قلت هكلم مريم وأشوف ردها إيه ..
كلمتها وحكيتلها ال حصل*
- ها أتصرف إزاي ؟
= قليلهم إنك موافقة إنك تقعدي معاه لو محصلش توافق بينكم يبقى كل شئ نصيب
- حاضر هعمل كدة بإذن الله
*قُلت لبابا كدة والحمد لله وافق .. جه العريس وقعدت معاه .. هو كويس جدًا وأخلاقًا اللهم بارك .. بس بصراحة محسيتش فعلاً إن دة الشخص ال أنا عايزاه وال هكمل معاه حياتي .. أنا عايزة حد مجنون شبهي كدة بيحب روح المغامرة والمُجازفة .. والحمد لله لأول مرة هرفض وألاقي سبب بجد ههههه ... عدت المرة دي على خير بس خايفة إنها متعديش ال بعدها .. *
______________
*مريم قالتلي إن اتقدملها عريس وكانت مضطرة تقعد معاه بس الحمد لله إنها رفضت .. بس حاسس إن الموضوع بدأ يخرج من إيدي بس برضه أنا لسة على موقفي وإن شاء الله ربنا هيباركلي فيها .. كلمت بابا وقلتله عليها وعرفته إن هي البنت دي اللي أنا عايزها وعرفته إنها صاحبة مريم وطلبت منه يروح يخطبهالي ويتفق معاهم إن الخطوبة هتكون سنتين لحد ما أرجع وإني خلاص يعتبر بقيت جاهز عندي شقة وقربت أخلص فرشها .. الحمد لله بابا طلع مُتفهم ووافق ..
بابا كلم والدها وفهمه وضعي وإننا هنكتب ونعمل فرح بعد التخرج على طول وقاله إنه هيخلينا نعمل الرؤية فيديو كول ومريم هتبقى قاعدة معانا ههههه وباباها وافق*
______________
* بابا قالي إنه اتقدملي عريس وإنه جاهز ومسافر بيدرس طب وإن لو حصل نصيب هتبقى خطوبة سنتين .. قلتله مش عايزة اتجوز يا بابا بجد .. طبعًا منا لازم أعمل نفسي رافضة ههههه .. أصر برضه كالعادة قلتله خلاص نعمل رؤية وأمري لله .. عملنا الرؤية واليوم عدى ع خير الحمد لله .. إكتشفت فعلاً إن بينا حاجات كتير مشتركة وإني الحمد لله منتظرتش السنين دي كلها على الفاضي .. صليت استخارة تاني وحسيت إني مرتاحة برضه والحمد لله عملنا خطوبة *
_____________
*أخدت رقمها من مريم وبعتلها مسج واتس*
- السلام عليكم ورحمة الله وبركاته
أنا أحمد .. مُبارك الخطوبة
* عملت سين ومردتش .. هي تقريبًا كدة مبتتكلمش ههههه .. فجأة كدة لقيتني في جروب أنا وهي ومريم وردت فيه *
= وعليكم السلام ورحمة الله وبركاته
الله يبارك في حضرتك .. دي خطوبة بس يعني مينفعش نتكلم غير في وجود محرم ولا ايه
* قعدنا نتكلم احنا ال3 شوية واقترحت عليها إني بفكر أستقر في بلد دراستي واشتغل هناك وأني هاخدها معايا ورحبت بالفكرة جدًا*
*عدى سنتين واتخرجت الحمد لله ونزلت وجه اليوم المُنتظر من 8 سنين .. ياااااه يا جدع 8سنين بحالهم *
*حضنتها جامد وبكيت من الفرحة بجد .. ولقيتها هي كمان بتعيط*
- مُبارك يا حلالي .. هههه إحنا هنقضيها عياط ولا ايه
= الله يبارك فيك
- حاسس إن الدنيا وأخيرًا ضحكتلي .. حاسس إن فرحة الكون كله النهاردة في قلبي .. لا لا إحنا هنعيط تاني ولا ايه
= فرحانة يا أخي
- يالهوي عليكم انتوا تفرحوا تعيطوا تزعلوا تعيطوا
= وانتوا رخميين اوي
*كل شيء ينتظر وقته، لا وردة تتفتح قبل وقتها ولا شمس تشرق قبل وقتها، انتظر .. الذي لك سيأتيك💚*
منار البدوي🌻
