#حرب_الملائكة الحلقة 18
كانت سفرة عشاء ....كئيبة ومعبيه حزن ومفيش حد قادر ياخد نفس من كثر المشاكل والقصص يلي صارت !
ليان:خدت نفس عميق ومدت يدها عشان تبدا ماكله
بس طارت النيه اول ما شافت ناهد نازله دموعها لانها ببساطه اذكرت ساره لما تقعمز جنبها ع العشي 💔
وخرت يدها لما شافت خوف جيداء كأنها عارفه ان في شي بيصيرلها هي وعيلتها كأنها عجلة ادور والدور عليهم!
غيرت نضراتها لي عدي يلي كان مستمع بي الماكله بدون ما ينتبه لي حد ولا حتى يعدل !
نجيب:اءء فف في موضوع بنفتحه معاك
عدي:يمسح في يديه ....ان شاء الله خير؟
نجيب:تواصلت مع خوي مروان ونوري ...وققرنا نبيعو حوش جدك الله يرحمه
عدي:قام حاجبه....بس هوا قاعد تحت الصيانه؟
نجيب:عارف
لكن انت تعرف كويس ان عمامك الاثنين معندهمش لا رزق ولا مكان يأويهم
وحتى انا بداية الشهر القادم ان شاء الله طالع من هنايه
ليان:سألت بردة فعل قويه....علااااش؟؟؟
جيداء:ابتسمت تحاول تخفي خوفها....خلاص لعند امتى بنقعدو مثقلين على عدي هكي !
عدي:شاف لي ناهد .....لا ثقل ولا شي خليهم هنايه تملو الحوش بعد ما بدي فاضي
نجيب:بنطلع نشوف مشاريعنا وحياتنا انت مش دايملنا العمر كله
عدي:وقف وهوا ينفض في حوايجه .... بعد ها الافكار من راسك يا عمي وخليك مليكش مكان عند البراني وانا موجود
نجيب:شاف لي مرته وكأنه يقلها ...شفتي كيف مفيش شي تخافي منه؟!
بس طبعا جيداء كان قلبها حاسسها ان في شي بيصير!
_______________________________
منى:فتحت عيونها بعد نومه طووويله وهيا حاسه بعطش كأنها كانت في الصحراء
عرقانه كأنها كانت وسط نيران
نزلت من السرير وهيا مش قادره توقف من الدوخه
خشت للحمام وهيا تستفرغ ووجها اصفرررر
قعمزت وهيا تحسب وتعد على يديها !
توسعو عيونها لما حطت احتمال في راسها وهيا تقول بنبرة صوت خايفه!
حامل؟؟؟؟
للا لا مستحيل
وقفت وقعدت ماشيه جايه في مكانها ويدها ع راسها ....لا ياربي لا
عدي يقتلني بعدين وربي
لا ياربييييي يكون كذب مستحيل لااا
جرت بسرعه لي درج ملابسها الداخليه وقعدت تفتش فيه لعند لقت اختبار الحمل يلي ولا مره استعملاته!
خداته وقبل ما تخش الحمام تنهدت وهيا تدعي يكون يلي في بالها مش صح
___________________________________
طق طق طق :-
ناهد:تفضلي
ليان:فتحت الباب بهدوء وخشت .....اهلين
ناهد:جاوبتها بتعب...اهلين بيك
ليان؛سكتت وهيا تشوفلها
ناهد:تفضلي قعمزي
ليان:ابتسمت...مستعجلة شويتين
بس جايه بنحكيلك شي وماشيه
ناهد:ان شاء الله خير؟!
ليان:كم مره نشوف فيك نازله من سيارة ضياء في الليل
ناهد:نصدمت
ليان:مدهليش انا عشان نحاسبك لكن نبيك اديري بالك
ناهد:من شنو؟
ليان:من ضياء ومن غيره
حاولي مضيعيش نفسك ناهد !
تكلمت وقلبها يتقطععع.....ديري بالك ع شرفك لانه غالي
متخليش حد يلعب بيه بدات من ناس زي ضياء وعدي
ناهد:نزلت من سريرها وهيا تشوف لي ليان.....انتي تعرفي شي. ؟؟؟
ليان:لا
مهم ديري بالك واحتجتي شي تعاليلي ....وطلعت بسرعه قبل ما تخلي فرصة تحكي
___________________________________
