မပြည့်စုံခြင်း သီအိုရီ
လူသားတွေရဲ့ သဘာဝ
မပြည့်စုံတဲ့ လိုအင်ဆန္ဒကြောင့်
ပြီးပြည့်စုံတဲ့ အချစ်ပန်းတွေ
မိုးကုတ်စက်ဝိုင်းပေါ်ကနေ
မွေးဖွားခဲ့ကြ
အချစ်ပန်းတွေ ဖြစ်တည်နေဖို့
နေရောင်ခြည်မလိုဖူး...
ကလိုရိုဖီးလ်မလိုဖူး...
ပန်းဝတ်မှုံမလိုဖူး...
ဟော်မုန်းမလိုဖူး...
သုတ်ကောင်မလိုဖူး...
မျိုးဥမလိုဖူး...
ဥယျာဥ်မှုးမလိုဖူး...
ဒြပ်ရှိဆဲလ်တစ်ခုလည်းမလိုဖူး...
ပုထုဇဥ် လူနှစ်ယောက်
မပြည့်စုံတဲ့ တွယ်တာရောင် ဆန္ဒနှစ်ခု
ဒါပဲ လိုတယ်
လူတစ်ယောက် ကမ္ဘာတစ်ခုမှာ
အနည်းဆုံး တစ်ခေါက်
အများဆုံး တစ်ခေါက်
မပြည့်စုံတဲ့ အဖော်မွန်နဲ့ ဆုံတွေ့ပြီး
ပြီးပြည့်စုံတဲ့ သက်တန့်ပုံစံ
အချစ်ပန်းတွေပွင့်တယ်
တစ်ခါတုန်းက
မပြည့်စုံတဲ့ ငါ့ကမ္ဘာထဲ
ပြီးပြည့်စုံတဲ့ အချစ်ပန်း ဖူးပွင့်ခဲ့
လရောင်စမ်းတဲ့ ညချမ်းမှာ
နေပူစာလှုံရင်း နွေးခဲ့
မပြည့်စုံတဲ့ လူသားနှစ်ယောက်
ပြည့်စုံခြင်းတွေနဲ့ ထွေးခဲ့
သံယောဇဉ် ရထားလေး
ရင့်ကျက်ခြင်း ဘူတာမှာ ရပ်တန့်သွားတဲ့အချိန်
မပြည့်စုံခြင်း ကမ်းစပ်မှာ နေထိုင်တဲ့မင်းက
မပြည့်စုံခြင်း သမုဒ္ဒရာမှာ လက်ပြစ်ကူးနေရတဲ့ငါ့ကို
အသက်ရှူသံခြင်း ထပ်တူမကျလို့ ငြိုငြင်တယ်
မင်းရှိတဲ့ ကမ်းစပ်
ကြိုးစားကူးခတ် အရောက်လာခဲ့တော့လည်း
ရှင့်ရဲ့ အိပ်ကပ်ထဲမှာ
ရောင်နီတွေ မရှိတော့လို့ဆိုပြီး
အချစ်ပန်းလေးဟာ
တစ်ခုတည်းသော ပြီးပြည့်စုံခြင်းလေးဟာ
တစ်ခြား စကြာဝဠာဆီသို့
ခုန်ကူးသွားတယ်
ငါ့ကမ္ဘာထဲ နဂိုမူလ မပြည့်စုံခြင်းများနဲ့
ပွင့်ဖက်ကြွေများသာ ကျန်ရစ်ခဲ့
ဝမ်းနည်းခြင်း အထိမ်းအမှတ် အနေနဲ့
လင်ဇီးမှိုပေါက်နေတဲ့ စီးကရက်ကို
ဓာတ်ပုံအဟောင်းတွေနဲ့ မီးညှိ
နှလုံးအိမ်ထဲထိ ရှိုက်သွင်းပြီး
ချယ်ရီပန်းတွေ မှုတ်ထုတ်ပြစ်လိုက်တယ်
မင်းမရှိတဲ့နောက်....
ငါ့ကမ္ဘာထဲ ပြီးပြည့်စုံတဲ့ ပန်းပွင့်တွေ
နောက်ထပ် ဘယ်တော့မှ မတွေ့ရတော့ဖူး။
၃၀.၉..၂၀၂၁
၂၄ မျက်နှာ
