First Snow // Jakehoon(Completed)

Christmas Present

All I want for Christmas is U~

Mariah Carey ရဲ့ ခရစ်စမတ်သီချင်းသံသဲ့သဲ့က Sim's Bakery ဟုနာမည်တပ်ထားသည့် ကိတ်မုန့်ဆိုင်အတွင်းမှ ပျံ့လွင့်လျက်။

ကိတ်မုန့်ဆိုင်လေးရဲ့ အပြင်ဘက်တွင် ဆယ်နှစ်အရွယ် ကလေးတစ်ယောက် မတ်တပ်ရပ်နေသည်။ ထိုကလေးမှာ တစ်ယောက်ယောက်ကို စောင့်နေဟန်ပေါ်သည်။ သူ့ရှေ့မှာ ဖြတ်သွားသမျှ လူတိုင်းကို သူစောင့်နေသော လူအမှတ်နှင့် မျှော်လင့်တကြီး လိုက်ကြည့်တတ်သည်။ ဒီဇင်ဘာလရဲ့ အအေးဓာတ်ကြောင့် ထိုကောင်လေးငယ်ရဲ့ နှာဖျားလေးမှာ ရဲနေသည်။ အ‌အေးဒဏ်သက်သာစေရန် အညိုရောင်အနွေးထည်လေးကို လက်ဖြင့် ရှေ့ကိုဆွဲကာ စိလိုက်သည်။ထို့နောက် ချမ်းနေသော လက်လေးနှစ်ဖက်ကိုပွတ်ရင်း အာငွေ့ပေးကာ အိတ်ကပ်ထဲ ပြန်ထည့်ထားလိုက်သည်။

ခရစ်စမတ်ကာလရောက်ခါနီးပြီဖြစ်၍ ကိတ်မုန့်ဆိုင်လေးမှာ လူတွေဝင်လိုက်ထွက်လိုက်ဖြင့် စည်ကားနေသည်။ ကလေးငယ်မှာ ချမ်း၍တုန်နေသော်လည်း ဘယ်သူမှဂရုမထားဘဲ ကျော်ဖြတ်သွားကြသည်။ ကလေးငယ်သည် မီးရောင်ဖြင့်လင်းနေသော ကိတ်မုန့်ဆိုင်အတွင်းကို စူးစမ်းလိုစိတ်ဖြင့် လှည့်ကာ ကြည့်လိုက်မိသည်။ ကိတ်မုန့်ဆိုင်အတွင်းတွင် ကိတ်မုန့်ဝယ်နေသော ဖောက်သည်များ၊ စားပွဲတွင်ထိုင်ကာ မှာစားနေကြသော လူများကို တွေ့ရသည်။ ဒီကာလမှာ လူတိုင်းမှာ အပူအပင်မရှိဘဲ ပျော်ရွှင်နေကြသည့်ပုံ။

ဆိုင်အတွင်းတွင် နွေးနွေးထွေးထွေးရှိလောက်သဖြင့် ဝင်ရကောင်းမလားဟု စဉ်းစားမိလိုက်သော်လည်း ဘာမှမဝယ်ဘဲ ဆိုင်ထဲဝင်ရမှာ ရှက်ဖို့ကောင်းသည်ဟုဆယ်နှစ်အရွယ် ကလေးပီပီ တွေးလိုက်မိသည်။ ဆိုင်အတွင်းရှိလူများကိုကြည့်နေရင်း ကောင်တာထောင့်နားတွင် ထိုင်နေသော ရွယ်တူလောက်ရှိမည့် ကလေးလေး တစ်ယောက်ဆီကို အကြည့်ရောက်သွားသည်။ ထိုကလေးရှေ့တွင်ချောကလက်ကိတ်မုန့်တစ်ခုကို ချထားသော်လည်း ထိုကိတ်မုန့်ကို မစားဘဲ စားပွဲခုံပေါ်ခေါင်းလေးတင်ကာ သူ့ရဲ့ရုပ်ကလေးမှာလည်း တစ်ခုခုကို အလိုမကျသည့်ဟန်ဖြင့် စူပုပ်ပုပ်ဖြစ်နေသည်။ သူကြည့်နေသည်ကို ထိုကလေးကမြင်သွားပုံပေါ်သည်။ စားပွဲပေါ်ခေါင်းလေးတင်ထားရာမှ ခါးလေးကို ဆတ်ခနဲမတ်ကာ သူ့ကိုပြန်ကြည့်နေသည်။ သူကပြန်ပြုံးပြလိုက်သောအခါ ထိုကလေးက နှုတ်ခမ်းစွန်းလေးများ ကွေးတတ်သွားသည်အထိ ပြန်ပြုံးပြသည်။ သူလည်း ဘာဆက်လုပ်ရမယ်မှန်း မသိ၍ ဆိုင်ဘက်ကို ပြန်ကျောပေး၍ နဂိုစောင့်နေသည့်အတိုင်း လမ်းဘက်ကိုသာ မျက်နှာပြန်မူနေလိုက်သည်။