• اسم الكرو : دمعة
• الكاتبة : عبير ❤
• بابا : هيا ننزلو بنتي ناكلو
كانت ماما تكسح ف الطابلة و تأفأف مني
• ماما : محسوب انا مراة باباها ، اييييه زيد دللها و زيد علاش لا ، ماكان لاه تحبيني عندك باباك نور عيونك
رحت عندها باش نحضنها و نبوسها ما خلاتنيش
• ماما : بعديني ، روحي حطي المغارف و جهزي الطابلة ، انا تعبت ف حملها و مع التالي خارجة ل باباها
• نسرين : ماما حبيبتي ...
• ماما : انا ماشي أم حتى واحد و ما حبيبة حتر واحد ، و خزرت ف بابا و عطاتنا بالظهر
بابا قعد يضحك عليها و يغمزلي
• بابا : مالا شوفي شكون يخليك تروحي للعرس ياك برنسيستي ماماك ما ولاتش حبيبتي ..
• ماما : راني شفتك كي راك تغمزلها و زيد غسلتو يديكم ولا جيتو هاكدا ب وسخ يديكم !
حكمتني انا وبابا من وذنينا و نوضتنا من الطابلة
• بابا : خلاص خلاااص رانا رايحين نغسلوهم
يمشي ورايا و يجر فيا ..
• نسرين : بصح يديا راهم نظاف
خزرت فيا ماما ، ايا حط يده عند فمي باش نسكت
• نسرين : امممم امممم
• ماما : ها !
• بابا : ما قالت والو ما قالت وااالووو ..هههه ، حابتها تحرمنا من الغذاء
• نسرين : راني متمنية راجلي يكون كيفك بابا ، يحبني بزاف ويخاف عليا
• بابا : يا ريت نفرح بيك نتي و اسلام
• نسرين : بعععععق ، علاه هبلت نتزوجه بابا ما تعاودش تقول هاد الهدرة
• بابا : واش بيه اسلام راجل ومص ودايما يوقف معاك ، و مرات يعاونك ف القراية وزيد امه حبيبة ماماك و باباه صاحبي .
• نسرين : بابا ف عمري 15 سنة برك ...
• بابا : ما غاديش ندومولك انا وماماك حياتنا كاملة يجي نهار وين نروحو و ما يدوملك غير راجل ف كتافك
شنفت عليه و رحت ناكل قعدت ف الطابلة و عمرت فمي بالماكلة
• ماما : بالشوية عليك يا المجنونة ...لا تجيفي
• بابا : لوقتاه غادي تتهربي من هاد الموضوع ياك الموت حق نسرين و انا ما قلتش حاجة تخليك تزعفي مني
• ماما : نتا و مواضيعك التافهة ف وقت الماكلة
حبست ماكلة فمي كان معمر و القنطة تقتل فيا نزلو الدموع من عينيا
• نسرين : وعناااه....احم احم
لصقتلي ما قردتش نحكي ، جا بابا يمسحلي فمي بعدلته يده
• بابا : مالكي نسرين اليوم راكي تتحسسي
• ماما : نسرين ماشي وقت تدلالك قولي لباباك سمحلي
• نسرين : ياك رايح يجي نهار وين تخلوني وحدي فيه
• ماما : وشبيك تحكي هاكا علاه كاين لي ما يموتش ، بصح ماشي وقتها دوكا تحكي هاك اطلبي السماح من باباك .
نضت من الطابلة و خليتهم بقيت نبكي وحدي ..
• بابا : خليها دوك تهدا وحدها
بعد ساعات ...
• ماما : وينك نسرين .. شوية و نروحو للعرس .. لبستي ؟!
دخلت عليا لقاتني محضنة وسادتي و لاعبتها راقدة
• نسرين : ما نروحش
ما حبيتش نشوف فيهم بقيت عاطيتهم بالظهر و نرد ...
• ماما : وحابة تقعدي وحدك فالدار ؟ على الأقل روحي لدار ام سيف
• نسرين : روحي برك قلتلك ما نروحش
• بابا : غادي نديها نوصلها و نرجع نقعد معاك اوك برنسيستي ؟؟
• نسرين : كيما تحبوو
• ماما : مشي قلتلي نقعد معاك ؟ علاش راك تدلل فيها هاكا ...
• بابا : خلي برك .. برنسيستي كي نجي نلقاك مجهزتلي القهوة الشابة من يديك حاب نشربها صحا ؟؟ ..
أنت تقرأ
دمعة
Romanceأحيانا يجب أن نحذر من ما نتمناه لأنه قد يصبح حقيقة على حين بغتة ، تلك الأماني التي نظنها تبخرت عندما تناسينا الأمر سيأتي يوم تعود فيه و تتشكل على أرض الواقع لربما ستعود في وقت خاطئ في وقت نقول فيه : " يا ليتنا لم نتمنى ذلك " ، الأماني لا تشمل فقط ا...
