• اسم الكرو : دمعة
• الكاتبة : عبير ❤
• ماما : مالا اغلقي الباب مليح على روحك ساعة و يرجع باباك
قربت لعندي و باستني من راسي ، تعرفيني نحبك ما تعناديش بنتي
• نسرين : امم ، روحي برك و ما تنسيش تجيبيلي حقي تاع الباتيسري
• بابا : جهزيلي القهوة بنوتي
سمعت صوت الباب نغلق صوتهم ف الكولواغ مدوي الحالة
• ماما : الوقت ايا جري سخن السيارة
• بابا : راناااا رايحيبيين برنسيستي
بقيت نرد عليهم بالشوية
• نسرين : خلاص سمعت بلي راكم خارجين علاه لازم تديرو هاد الفوضى ...
كي خرجو نضت قعدت ف بلاصتي ، شفت ف تيليفوني يااا ربي راه الوقت و ما عيطتش ل سيفو متأكدة غادي يقتلني شوية حتى سمعت صوت حاجة تضرب ف التاقة تاعي رحت ليها لقيته واقف تحت تاقتي و مربع يديه و يخزر طلبت عليه بالشوية حتى عيطلي بقيت نلعب فيها نتثاوب زعكا نايضة من الرقاد
• نسرين : اممم...
• سيف الإسلام : ما تمثليش عليا دور البريئة عارفك راكي نايضة غير دوكا تلاقيت باباك و ماماك خارجين و زيد شفت كي كنتي تطلي ب نص عين
• نسرين : سمحلي سمحلي سييييفوووو
• سيف الاسلام : ما نسمحش قلتلك نوضينييييي مع الوقت خليتيني داني النوم ، راني رايح دوكا نلعب كي نجي نتفاهم معاك مليح مليح ...
• نسرين : بصح ...
وكوبالي ف وجهي ...
• نسرين : الجحش هاكا يكوبيلي ف وجهي ان شاء الله يخسرو الماتش ، صح نسيت ننوضه بصح ماشي ...ف الأصل هي غلطة بابا علاه يحبه لهاد الدرجة ، نادر أحسن منه ب مليار مرة توحشته بزااااف .... ، نجهز حلوى تاع شوكولا و نديها لعمو محمد متأكدة غادي يفرح
نضت شمرت على ذراعاتي و طيبتها ...
سيف الإسلام هو صديق طفولتي و أخ ليا وكلشي من لي كان ف عمري عامين ، أكبر مني ب 4 سنوات بحكم أهلنا حباب و زيد أنا وحيدة والديا كان دايما متهلي فيا و ف نفس الوقت يتنمر عليا مازلت نتفكر كيفاش كان يشرب الليموناد ف المناسبات بالتخبية و انا نعسه ، وكان يبعتني نسرقله الحلوى و ف اللخر انا نشبع مخبط لأنو يرجع اللوم فيا و هو يهرب ...حقار ...
رحت لدارهم فتحت عليا حليمة الباب ، أخته و أصغر من سيفو ب عام هي تحبني بصح ساعات تتبدل أحوال ، بستها و بست ماماها
• أم سيف : اقعدي عندنا مادام حد ما راه ف الدار ما تبقيش وحدك
• نسرين : بصح جيت برك باش نجيبلكم الحلوى ...
حتى دخل علينا عمو محمد لي هو أب سيفو يموووت عليا و معتبرني وحدة من بناته
• اب سيف : ريحة الحلوى جابتني من نيفي كنت راقد و ما قدرتش نقاومها .. حد ما يديهالك ف هاد الحاجة
• أم سيف : الحاج محمد ...
و خزرت فيه ..
• أب سيف : حبيتي ولا كرهتي ماكانش كيما الحلوة لي تطيبها ..
• نسرين : ربي يحفظك عمووو غبر نتا لي تطلعلي المورال
قعدت معاهم ساعتين
• حليمة : وشبيه وجهك متبدل هاكا ؟،
• نسرين : فاتت ساعتين : وبابا مازال ما رجع ...
أنت تقرأ
دمعة
Romanceأحيانا يجب أن نحذر من ما نتمناه لأنه قد يصبح حقيقة على حين بغتة ، تلك الأماني التي نظنها تبخرت عندما تناسينا الأمر سيأتي يوم تعود فيه و تتشكل على أرض الواقع لربما ستعود في وقت خاطئ في وقت نقول فيه : " يا ليتنا لم نتمنى ذلك " ، الأماني لا تشمل فقط ا...
