قــدر الــمــنــحــوسة ( الجزء التاني )

الفصل 14

روايــة "قــدر الــمــنــحوســة2"📖...
بــقــلــم🖋📚"Fatima Z-F"📚..

تزيرات معجبهاش الحال..
عفراء: حيد يديك...
زاد زير عليها : لا ...
عفراء معصبة : ياك.قلتي مكتسلمش على لبنات و مكتقيصهمش...
جعفر : هادوك لبنات ، ماشي نتي...
زيرات على سنانها : دابا انا مكنباانش لييك بنت ولا شنو ...
قرب حداها انفاسو كضرب فوجها مسحور بيها قال...
-لبنات فكف و عفراء فكف اخر ... فعيني كاينة نتي بوحدك ...
رجع وجها حمر بغات تبعد و هو مزير عليها ممخليهاش ..هبطات راسها وقالت..
عفراء: طلقني عافك...
جعفر: جاوبيني هو الاول ...علاش مكتهضريش معايا !! شنو درت ليك؟؟؟...
عفراء : واش نسيتي اش وقع بيناتنا و نتا عارفني وساكت ... مخبي عليا عاجبك الحال تلعب عليا ...
جعفر : اه غلطت وعارف راسي غلطت و كنطلب سماحة مغاديش نعاود...
ساطت بجهد: دابا طلقني عافك راسي كيحرقني ...
طلقها مبغاش يزيد يعصبها ...بقا شاد ليها فيديها و شبك صبعانو مع صباعها و جرها معاه...
عفرء: طلق يدي...
جعفر : لا....
حولات تحيد يدو من يديه لكن والو مزير عليها وهي حشمات ممولفاش هاد جعفر لي عندو غير نيشن ... مولفة داك جعفر لي كان غير كيشوفها يحشم و وجهو يرجع حمر ...
وها هو قدامها يدير منها جوح و كلمتو قاصحة و معطيهاش فرصة ولو انها عرفات فقط لبارح انه جعفر الا انه ليوم كيعاملها كأنهم عمرهم تفرقو شي لي خلا مشاعرها يتخربقو معرفاتش اش ادير معاه...
تصرفاتو خربقوها و تلفوها كتحاول تبعد باش تقدر تفكر على خاطرها ولكن كيزيد يقربها ليه معطيهاش ولو جزء من تانية انها تبعد ...
خدا ليها باش تفطر وخرجو متوجهين لسيارة ..
عفراء مفقوصة : شكون قال ليك خلص على ماكلتي انا لي خديت انا لي انخلص...
جعفر : كلشي ديالك...
حل ليها لباب لقدام حداه..
-طلعي ...
عفراء : لا ، غادي نركب لور حدا ماما ...
جعفر ربط حجبانو لوسط : لهاد درجة مكنعجبكش و مبغياش تركبي حدايا....
وجها زاد ولا حمر هبطات راسها و خرج من فمها فقط "اممم"..تسلاو ليها قدامو مبقات عارفة ما تقول ..كتفات انها تجاوبو بأفعالها ..
دخلات ركبات حداه وهو كيضحك غير وحدو ..سد عليها لباب و توجه لمكان ديالو ..دار ليها سمطة هي الاولى و ديمارة سيارة شد طريق ...
مد يدو بغا يشد يديها وهي تبعدها مبغاتش ولكن مخلهاش.... تبع يديها شدها و رجع شبك اصابعو مع اصابعها حطهم فوق رجلو وصبعو لكبير كيمشي و يجي فوق يديها وهي مبقات قادرة تنطق بحرف..دورات راسها لجهة الاخرى كتشوف وجها وحناكها لي حمارو من زجاج ..
كتحاول ترجع دقات قلبها لي متسارعين حتى حسات بقبلة تحطات على يديها زادو فدقات قلبها اكتر و احمرار غزا كل جسدها بغات تهرب من قدامو ..
وصلو لقبيلة لقاو دراري وصلو وناس لقبيلة مجموعين عليهم ..بزربة خرجات هاربة منو توجهات نيشن وقفات حدا باها وناس لقبيلة كيشوفو فيها و العربي كيضحك ..
نطق واحد من ناس لقبيلة ..
- سي لعربي شكون هاد زعرة ..
العربي: اللع اودي دغيا نسيتوها ..
-علاش كنعرفوها..
العربي: ياك كنتو ديما تجيو تبراو منها ..
كاشي تصدم كيطلعو وينزلو فيها و نطقو دقة وحدة ..
-واش هادي المنحوسة ولا ...
تعصباات وهي تنفاجر عليهم ...
عفراء: راه سميتي عفراء ازبل واش ما بغيتو تقدمو بحال ناس لعام لي جا يلقاكم بنفس الكلاخ ...
كلشي بقا كيشوف فيها وهما يتهزو كاملين بضحك ..
-والله تا عفراء المنحيسة ديال القبيلة..."شافو فالعربي"....ومزالة مصيبة كحلة مكتحشمش...
دخلات لطوف كتجرها قبل ما تخرج شي كلام ما فيه ما يتسمع وكضحك مع اهل دوار لي كيرحبو بيها و العيالات يعنقو و يبوسو و يبكيو الا هي مبعدة لي قربات حداها كتجري عليها محملا تا حد يبوسها ولا يعنقها ...
فاتحة لي كانت صاحبت مها غير تشوف فيها و ضحك ...
-اديك المنحيسة اجي بوسي عمتك راني توحشتك نتي و صداعك ...
هربات عند جعفر تخبات ورا ضهرو ..
عفراء: ما تبوسوني ما نبوسكم تمشي توقع ليك شي موصيبة و تقولو المنحوسة لي دارتها ..شدو تيقاركم و عطيوني تيقاري...
فاتحة بقات كضحك مداتش فكلامها لأن الفرحة لرجوع لطوف وعائلتها لقبيلة نساتها فكلشي ..شافت فجعفر لي كيهبط راسو بغا يشوف عفراء وهي كتبعد منو ...
فاتحة: مبروك اولدي جعفر ما درتي و نشالله بدرية الصالحة تعمر عليكم داركم راه وخا منحوسة زيينة تبارك الله شكون قال عفراء تولي هكذا ..
كاع اهل القبيلة سمعو كلامها و توجهو لجعفر يباركو ليه زواجو وهو بقا محافظ على الابتسامة وهي كتشوف فيهم محملاهمش..
حلات فمها ترفض مباركتهم لانه مكاين والو حتى تصدمات بكلام باها لي قال...
العربي: مزال ما تزوجو و لكن نشالله ما بقا والو وتروح عند راجلها ...
فاتحة: اوا من هكذا احسن حاجة درتو ..نديرو ليهم لعرس هنا بيناتنا نفرحو ونشطو معاكم ...
نطقات معصبة : الخرا لعرست ليكم فهاد لقبيلة...
وصل ليل والفرحة فالقبيلة تقول عندهم عرس..فرحانين برجوع سي لعربي و مراتو و ولادو ...بناو لخزاين و دبحو دبيحة دايرين عراضة فاعلة تاركة ...
خزانة فيها رجال و خزانة فيها عيالات معندهم مع تخلاط رجال مع نسا ...
جالسة حدا مها لابسة فراشة مغطيا كل لحمها و واسعة ولطوف حاضياها..
-كون غير ابنتي غطيتي داك شعر ..
عفراء معجبها حال : من امتا وانا كنغطي هاد شعر ...
لطوف: وخا هكاك ابنتي شوفي بنات لقبيلة مكيناش لي معريا شعرها من غيرك كلشي داير زيف ...
عفراء: وانا مالي فبنات لقبيلة كل واحد يدير لي بغا ..
سكتات لطوف معودات هضرات خافتها تنوض تغوت و دير ليها شي حشمة مع ناس...
دارت عند حبابها تكلم معاهم و ضحك وناس فرحانين بيها مكرهوش يحطوها فوق راسهم و مينة دغيا تولمات مع بنات دوار وتجمعات معاهم عندهم عقلية وحدة و دغيا تصاحبو ..
من غيرها هي شادة تيقارها مكتقرب لحد و تا حد ما كيقرب ليها ...بالاخص مزالين عاقلين عليها منساوش الوعارة ديالها كانت مخرجاها منهم و كيخافو منها وتا وحدة مقدرات تسلم عليها بقاو مجمعين غير مع مينة ...
حطو لعشا لي كلو شوا مع الخضرة مفورة ..يرحبو و يعاودو و البسمة مخطات من وجوهم و سنة نقرة كتلمع بين سنانهم و تزيد ضوي البسمة و تكبرها..
مزالين نسا صحاحات و ما باين فيهم كبر و بناتهم غزالات كيحمقو و بيضات كيشعلو ولبسهم كلو مستور و صوتهم مكيتسمعش و حدگات و شاطرات هازين حمل شقا على والديهم ....
كلهم غزالات وجمالهم واضح ... غير عفراء مهلية فراسها و مدايزش عليها تمارة لي داز عليهم هادشي علاش كتبان اجمل منهم و بشرتها متوحدة ما معرضة لشمس...
كلشي مربع كيتعشا و هي جامعة رجليها لعندها وكتاكل بجوج صباع وماكلتها قليلة ...زهور لي كتشوف فيها و حشمانة تبدا معاها الهضرة بعد لي وقع شحال هادي ...
خافت تكون مزال حاقدة عليها وخا لطوف مبيناتش و سلمات عادي لكن هي عارفة عفراء مكتحشم و الكلمة تقولها فلوجه و ما ضرب حسبة لبنادم ...
حولات تبسم وهزات طرف من لحم قدامها بغات تحطو قدام عفراء و نطقات بشوي...
زهور: كولي ابنتي متحشميش...
كمشات حجبانها وهزات راسها شافت فيها مزيان وهي تهز يديها و رجعات لور ..
عفراء : بصحة شبعت ...
زهور: لواه ما كليتي والو ...
عفراء بعصبة: متهضريييش معايا ...
لطوف حمرات عنيها فيها : شهاد قلة لحيا اعفراء ..
عفراء كارهة: شنو بغيتي ندير ..نضحك ليها فوجها وهي لي كانت سدات عليا فديك الكشينة والعافية شاعلة كانت غادي تقتلني ...
بنت زهور لي كانت جالسة حدا مها ..جمعات الوقفة كتهز على عفراء...
- شكووون نتي بسلااامة لي جيتي غير اليوم و ما بغيتي تهبطي خنافرك صابرين ليك و نتي منفخة و زايدة كتعايري ...
عفراء: انا مهضرتش معاك عطيني تيقار خير ليك ...
-اش غادي ديري كاع نحسك اصلا ولفناه اش عندك ما تزيدي المنحوسة ..
عفراء نقطة صبر لي بقات فاضت والاعصاب لي فيها تجننو وزادو دابا مبقات قادة تحكم فراسها ...محسوش بيها تا لقاوها طارت على بنت زهور جراتها من شعر كتنتف معصبة وكتهضر بين سنانها..
عفرء: راني قلت ليك الكلبة لخرا بعدي مني ولا غادي تلقاي مني لي ما يعجبك ...
حما لغوات و العيالات دخلو يفكو وهي لاصقة فشعرها مبغات تفرق مجننة و كملات الباهية ...
سمعو رجال لغوات دخلو كيجيرو يشوفو شواقع حتى بنات ليهم عفراء كتريش فبنت زهور لي حمياها لغوات تغلبات وما عندها جهد عفراء لي صح منها ...
دخل معصب دور عليها يدو هزها كاملة دخلها فحضنو وهي كتركل حتى سمعاتو نطق ...
جعفر: هداي...
خرجها برا كتسووط من نيفها و قلبها كيضرب بجهد و مزال شعر بنت زهور فيديها ...
بعدها من لخزانة وناس عاد وقف حطها و دورها عندو ..هز ليها وجها لعندو كيحيد ليها شعرها لي لصق فوجها..رجعو كامل لور وحناكها حمرين ...
قبل ما ينطق او يسولها قالت..
-هي لي جبداتني ....
جعفر كينضف ليها يديها من شعر لي بقا فيهم و نطق ببساطة ..
-عارف ..
هز ليها يديها بجوج باسهم من لداخل خلا دم يجمد ليها فعروقعا و قلبها يزيد فدقاتو كتر ...حس بيها وهو يتبسم ودور يدو عليها عنقها بجهد وهبط راسو حدا ودنها و نطق بلهفة...
جعفر: تزوجي بيا ....
توقفات عن الحركة جامدة اثر السؤال ديالو المفاجئ...بعدات راسها بشوي كتشوف فيها بإستغراب و قلبها كيضرب..
عفرء: شنو قلتي ؟؟؟..
جعفر بنضرة حنينة وعاود سولها عاطيها لخاطر...
-تزوجي بيا...
كمشات حجبانها مستغربة : ياك مكيعجبوكش لبنات بحالي...
جعفر ضحك بشوي : كتعجبيني غير نتي ...
رجع وجها حمر وحولات تخبي خجلها ..
عفراء: مزال ما باغية نتزوج و مكنفكرش فيه اصلا ...
جعفر بلحة فصوتو : مقادرش نصبر كثر ا عفراء...
عفراء تزيرات : راني عاد عرفتك البارح خاصني وقت نتعود عليك و نعرفك كيف داير ...
جعفر شاف فيها مزيان و تنهد تهيدة طويلة ...
-لعمر كامل قدامنا اعفراء باش نعرفو بعضنا ...
تعصبات بغات دفعو وهو زاد زير عليها ....
عفراء: راني معصبة ا جعفر وهاد الهضرة ماشي ديال دابا...
جعفر حاط خدو على راسها مدور يدو عليها ممعولش يخليها...
-جاوبي و نطلقك ...
عفراء مزيرة: لاااااا مغاديش نتزوج بيك...
جعفر : حيدي ديك لا....
عفراء: انا جاوبتك دابا طلقني ...
جعفر : قولي اه ...
عفراء: واش عندك هاد زواااج بززز...
جعفر بكل بساطة : معاك نتي ايولي بزز لموفقتيش...
مبغاش يبقا شادها وخوتها كيتسناو ..شدها من يديها و جرها معاه غادي قدامها وهي وراه كتشوف فيه بنضرات غير مفهومة و ملامحها ممفرزينش...
من شافت خوتها حيدات يديها من بين يدو و مشات عندهم حادرة راسها توجهات نيشن عند امها و خوتها بقاو كيهضرو مع جعفر...
دخلو لدارهم لي تعاونو فيها كاع ناس لقبيلة نضفوها و فرشوها بفراشهم كل واحد جايب ملاية و حصيرة و المخاد دارين الواجب بسي العربي و عائلتو...
دخلو لبيت مبني غير بطوب و سطح مغطينه بالقزدير و مفرش بزرابي قدام ..جلسات لوسط كتنهد بجهد و مها هي و عيالات خوتها دايرين بيها ..
لطوف: ابنتي واش محشمتيش ديري هاد الحالة حشمتيني قدام ناس...
عفراء معصبة: واش نسيتي اش دارت فيا ..
لطوف: منسيناش ولكن الواحد كيدير الما منين يدوز من شفناها فرحانة و كترحب بينا غمضنا عنينا و سكتنا وباين باغي تصالح معاك ونتي غير لمرا هضرات معاك نضتي كتغوتي بلا حشمة..
عفراء: انا مكنساش و مكنسمحش لبنادم لي يأديني و اصلا مكنتش باغية ندير والو ياك شفتوني جمعت الوقفة و قلت شبعت وبنتها لي بدات كتهز و تغوت شنو كتسناو مني نبقا ساكتة ليها ...
بشرى: حراام عليك اعفراء جينا نفوجو شوي مع ناس لي مخلاو مدارو بقاو يهزونا غير فوق راسهم ونتي مرضياش بيهم و محملاهمش ..
عفراء تزيرات: الالة ما عندي ما ندير بهاد لقبيلة و ناسها لي غير شافوني بداو عليا بالمنحيسة ..انا سميتي عفراء ماشي منحوسة و الله يرحم ليكم الوالدين يا تجيو مني يا متهضروش معايا كاع ....
لطوف : اواااا صااافي بقينا ليك غير حنا فالحساب غادي تجمعي و تحيدي هاد الفشوش ديالك لااا..خلي هبالك تا نرجعو لمدينة وديري كا بغيتي حنا هنا مع ناس حتارميهم ...
عفراء رجعات حمرة معصبة: يحتارمووني هما لولين و ديك ساعة نحتارمهم تا انا ..متسنااوش مني نحتارم بنادم مكيحترمنييش وهاز علية سمية عقداتني فحياتي و مرضاتني فصحتي...
لطوف عضات يديها بجهد كتحلف عليها ..
-سكتييي ابنت الحرام ناس غير برا كيسمعو ..ديري غير بوجه باك لي حشمتيه ما لقا فين يحط وجهو وهو جاي فرحان يشوف حبابو و ناس قبيلتو ...
عفراء ضربات فمها بجهد: هااا انا ساااكتة ولكن اقسم بالله و يهضرني شي حد والله ما نعقل عليه و فين ما بغات توصل توصل ..
جمعات الوقفة كتضرب فرجليها مع الارض بالاعصاب خرجات حفيانة كتسوط بجهد و كلها حمرة ..دازت حدا خوتها و جعفر مشافتش جيهتهم مشات نيشن دخلات لبيت مطرف و مضلم سدات عليها لباب مجهد خلاتهم مصدومين فبلاصتهم ...
بقا جعفر كيشوف فحالتها و كمش حجبانو لوسط ..دور راسو لطوف لي خارجة تاهي معصبة وهزات صبعها قدام ولادها ..
- شفتووو لفشووش دياالكم فين وصلهاااا ما بقاات كتحشم من حد ولا دير بوجهنا ...
هبطو دراري راسهم ما قالو كلكة بعد كلام لطوف بقا غير جعفر لي ساكت ما عاجبو حال وعينو فالبيت لي سدات عليها فيه ..
شرقات شمس منورة على كل ركن من اركان القبيلة لي رجعات ليها المنحوسة مرة تانية و على فم كل شخص كلمة وحدة وهي "المنحيسة رجعات وزينها كيعمي"...
لي محضرش مع اهل القبيلة لي رحبو بسي العربس و عائلتو حطو استفهام على ملامحهم من كلام ناس ليكيدوي على زين المنحوسة و الاوصاف لي توصفات بيها ... مقدرو يصبرو يشوفو كيف دايرة و كيف ولات ....
كاين فيهم لي ممسوقش لكلمة المنحوسة لأنهم كانو صغار فداك الوقت اما دابة كبرو و قراو عارفين الخرافة من الحقيقة ...
كل شاب من شباب القبيلة لي مقبل على زواج و مزال ما شاف بنت لي توالمو خارجين لابسين حوايج لحصاد وملامحهم سمرة بشمس و قاصحين بتمارة لي كيديرو ..كل واحد مخشي فأرضو كيحسدها حتى هزو عنيها فالبنت لي كتمشى بين الحقول ديال زرع ..كلهم وقفو من اشغالهم و ركزو نضراتهم معاها مسحورين بيها...
لابسة فقط ملابس صيفية من كسوة خفيفة طويلة ومعرية من دراع فقط سميطة على كتفها..طالقة شعرها ودايرو قبعة كبيرة مغطية من اشعة شمس...كتمشى مسرحة رجليها و كتمعن شنو تبدل فالقبيلة ساعة لقات كلشي هو نفسو ما تبدلات تا حاجة ...
غادة وسط لحقول ساهية منتبهاش لنظرات رجال لي متوجهين ليها ...جلسات فوق حجرة ومن تحتها الماء كيدوز بحال العين ...
حيدات صندالتها و هزات كسوة شوي من جهة رجلين و حطات رجليها فالما كتبردهم و كتلعب بيهم واعين رجال محطوطة على رجلين لي عريانين ...
محسات الا و بخيال وقف قدامها مخبي اعين رجال عليها ..وهبط يدو بزربة هبط ليها الكسوة غطا ليها رجليها ...
حيد تيشورت ديالو بغا يلبسو ليها وهي مفاهمة والو ...
عفراء: جعفر اش كدير ...
جعفر بدون ما يشوف فيها : لبسي حوايجك...
عفراء بدون فهم: راني لابسة واش مكتشوفش ...
شاف درعانها لي عريانين وزاد رجع حمر كثر قلبو كيتحرق مراضيش يشوفها شي حد من غيرو و بالغيرة لي كتاكل فيه قال ..
جعفر: بنات لقبيلة مكيلبسوش هاد لبس ...
و كأنه حط الملحة على ااجرح ..دفعاتو بجهد معصبة ...
عفراء: ماااشي سوقي فبنات لقبيلة يلبسو ولا يتعراو ..انااا ماالي ...
زبر على يديها ورجعها لعندو ..
جعفر: ماشي هادشي لي قصدت انا كندوي غير على لبسك ....
مرضاتش يشبهها ببنات لقبيلة والاعصاب خرجو عليها ..نطقات بين سنانها .....
عفراء: نلبس لي بغييت ماشييي سوقك..نتا ماشي راجلي و لا خطيبي ولا واحد من عائلتي لي تحكم ليا فلبسي ..
نترات يدو بجهد من بين يديها خلاتو واقف جامد فمكانو وتوجهات لدارهم معوداتش شافت فيه ...
أصبحت أغار عليك من كل شيء...
فأنا أغار عليك من أفكارك عندما لا أكون أنا جزءاً منها...
أغار عليك من كل كلمة تخرج من فمك لا تكون حروف اسمي جزءاً منها...
أغار عليك ممن حولك عندما لا أكون أنا بجانبك...
أغار عليك من أقاربك وأصدقائك الذين يجالسونك دوماً وأنا بعيد عنك...
أغار من ثيابك القريبة من جسدك وأنا بعيد عنك...
أغار من جدران منزلك الذين يرونك يومياً وأنا احترق بلهيب عشقي من شدة شوقي لرؤيتك...
دخلات لدارهم معصبة ولطوف كتشوف فيها بصدمة ..ضربات حناكها كتويل ...
لطوف: اشدام لبس لابسة ابنت الحرام وخارجة بيه قدام ناس...
عفراء : مالكم نتوما ليوم مع لبسي ياك نفس لبس لي كنت لبسو ديما اش واااقع...
لطوف جراتها من يديها دخلاتها لبيت مغددة عليها...
-لي واقع هو القبيلة ناسها كيحشمو و المرا ما كتبين تا شعرها بقا غير لحمها ..حشمي اعفراء وباركة من قلة الحيا و المسخ...
عفراء بعدات يديها ضراتها بشدة لي شدها لطوف ..جلسات لأرض كتحك فلبلاصة و عنيها حمرين حاسة بالحگرة و البكية ....
عفراء: انا كيعجبني لبسي ومرتاحة فيه هاكا مغاديش نتبدل حيت انا فالقبيلة ...
لطوف: انا مقلتش تبدلي حتارمي غير ناس كبار ممولفينش بداك لباس نرجعو لرباط و ديري ما بغيتي...
تسمعات حس الهضرة برا و تم داخل باها لابس جلابة و داير عليها سلهام... دخل كيشوف فبنتو...
سي العربي: نوضي ابنتي شوفي جعفر اش بغاك...
عفراء معصبة: قول ليه يمشي بحالاااتو مغااديش نخرج عندو...
لطوف خرجات عنيها بغات تعاود ضربها و شادة راسها بزز..
- نوضي شوووفي الراجل اش باااغيك و باركة من طيارة ....
عفراء: قلت ليك مغاديش نخرج هي مغاااديش نخرج يمشي يشوف ليه شي بنت دوار هي لي تصلاااح ليه اصلا ...
سي لعربي : سيد ابنتي مسبق ليك صداق وانا عاطي لكلمة لمو الله يرحمها مغاديش نتراجع عليها...
عفراء تفقصات : ماااا بغييتووووش عطاا الله بنات القبيلة لي تقبل علييه ...
نطق سي العربي بجهد و لأول مرة صوتو كيترفع على بنتو ..
-راني هضرت سيد عااطيه الكلمة مغاديش نرجعو برااهش على ودك..
تخلعات بصوتو باها بزربة تخبات وراه لطوف و نطقات حادرة راسها...
عفراء: انا كنت صغيرة بزااف وزواج مفيهش عطيت الكلمة ...
لطوف تفقصات جبداتها معاها بقرصة من فخاضها خلاتها تغوت بالم ...
-وااش بحال جعفر يرفضووه الناااس ..واش نسيتي مدار عليك ولا بغيتي نفكرك الالة ..نفكرك كون ما هو ما كنتي توقفي قدامي دابا ...
هبطات راسها و دموع على حنكها و نطقات بصوت مرتجف...
عفراء : اصلا طلبني لزواج و انا مبغيتش...
سي العربي لي سمع كلام بنتو وحيت عارف بنتو مزيان وعارف عنيها كبيرة وباغية الحاجة واجدة ..
جمع الوقفة وملامحو جامدين و نظراتو قاصحين ومتوجهين لبنتو لي مخبيا ورا ضهر امها ونطق كلام لي ما بعدو نقاش و لا حديث ...
سي العربي : سمعي ابنتي عفراء اش غادي نقول ليك وحلي ودنيك مزيان.. الراجل ابنتي بكلمتو يتقاس و ولد الحلال ما يلعب ببنت الناس و بنت الناس... "شاف فيها مزيان "...ما يغرها لا مال و لا لباس...
"نفض سلهامو وكمل كلامو وهو خارج"....
-الفاهم يفهم والحديث قياس...
خرج خلاها منها لمها لي ضارت عندها بغات ضربها وما لقات جهد ..كتفات تنهد بجهد و جراتها خرجاتها لعند جعفر لي كيتسنى ...
خلاتها حداه و مشات تكمل شغلها ..حدرات راسها مهزاتوش فيه وهو كيشوف اتر دموع على حناكها ..
شد ليها يديها بغات تبعد و خلهاش زاد زير على يديه وشبك صباعها مع صباعو و خرجها داها معاه وهي تبعاه بصمت وهو كذالك مقال والو باين الهضرة لي قالت لباها سمعها...
دخلها لدارو ..لدار لي كانت فين ما كدير شي مصيبة كتجي تخبا فيها ..دار لي كانت كتجمع فيها مع الكبيرة ودوز معاها نهارها...
فور ما دخلات تراكمو عليها دكريات ديال هاد المكان لي ولا خاوي مبقا فيه حس لكبيرة ...
حسات بالخنقة و مقدراتش تحبس نفسها وبدات كتبكي بصوت رقيق كيضر فالخاطر...
دار عندها دور يدو عليها دخلها فحضنو مزير عليها بجهد ودخل راسو فعنفها كيهمس ليها بحنية واضحة فصوتو ....
جعفر: شششش متبكيش مغادي يكون غير خاطرك ...
عضات فمها بجهد و دم ختافى من وجها و نطقات بصوتها الباكي...
عفراء: اترجع لديك ملاك ..نتا معاارفش باها اش دار ليا والباطل لي نزلات عليها ...
زاد زير عليها كثر فأحضانو و مقادرش يمالك نفسو اتجاها...
جعفر:ما كاين تا مرا اخرى لي اتاخد بلاصتك فقلبي...
هز راسو ودور يدو على حناكها مسح دموعها وهي كتشوف فيه حلات شفاه ديالها و نطقات بصوت هامس...
عفراء: كتبغيني...
توقفات يدو عن الحركة من سمع كلماتها و تبسم ابتسامة جميلة ...
جعفر : هادشي لي كلو كنديرو على ودك شنو كيتسما...
هزات كتافها : معرفتش!!.. ميمكنش تبغيني بين ليلة و نهار ونتا كنتي كتكرهني فلول ...
كمش حجبانو و نطق بهدوء...
جعفر: مكنتش عارفك فذاك الوقت ونادم حيت تعاملت معاك بداك شكل...
هبطات راسها لتحت كتشوف فرجليها و نطقات ساهية ..
- يعني نتا مكتبغينيش غير حيت عاطي عهد لبا و صافي..
كمش حجبانو لوسط مفاهمش...
-شنو كتقصدي..
عفراء تنهدات بجهد: نتا مكتبغينيش كون كنتي كتبغيني اتبغيني من لول ماشي اتكرهني...
هز راسو كيضحك ورجع عنقها كيشوف فيها بحب...
جعفر: مسطية.."حط جبهتو على جبهتها"..هادشي لي كان شاغل بالك..
عضات جنب فمها ...
عفراء: مكيعجبنيش نعيش فالاحلام و كنبغي نكون واقعية ..نتا فالاول بينتي ليا شكل و دابا من عرفتيني بينتي ليا شيء اخر لدرجة معاطيني تا فرصة نتعرف عليك ولا نولفك ..كلشي عندك بزربة تلفتيني وما بقيت فاهمة والو ...
حرك راسو بتفهم لكلامها و نطق برقة ..
-شنو باغية تعرفي عليا انجاوبك على كلشي...
عفراء: ماشي مسألة نعرفك ا جعفر ..مسألة ولف و انا معنديش مع هاد زربة ...
جعفر نطق بصراحة : عارف اعفراء هادشي ولكن من صغري كابر على حاجة وحدة وهو انك ديالي وانا ديالك .."نطق بكل حب"..متصوريش شحال توحشتك و عمري نسيتك وما كرهتش نتزوجو دابا قبل غدا مقادرش نصبر كثر..
زيرات على فمها بإحراج من كلماتو وهو مركز فعيونها و بريق غريب بدا كيضهر فعيونه الخضراء ونزلهم ببطئ نحو الشفاه ديالها الجميلة ..
سارح فيهم حرك صبعو حطو فوق شفاها السفلة فرقها عن اختها ودوز اصبعو عليها ببطئ بللها بلعاب ديالها وهي واقفة متوترة بحركاتو المفاجئة لي مكانتش ضاربة ليها حساب...
نزل راسو و ميلو ببطئ نحوها حتى ولات انفاسهم كضرب فبعض و شفاه ديالو قربات لديالها وغمض عينو متشوق يضوق طعم شفتيها الممتلئة حط فمو ببطئ لكن لي لقا هو خدها وليس شفتيها ...
حل عينو شاف وجها مدور لجهة الاخرى واللون الاحمر غزا كل ركن مث ركن ملامحها..
بسرعة بعد بإحراج بدا كيسوط جاه صهد و نطق بثقل مقادرش يشوف فعنيها..
جعفر: مكنتش ناوي غير كنت..
سكت ماقدرش يكمل كلامو حيت غير ايزيد يتحرج كثر ...
تحل الصمت بيناتهم والاحراج مخيم المكان وكل واحد كيشوف فجهة الاخرى مقدرينش يشوفو فبعض ...
بعد مدة نطقات بصوت هامس...
عفراء:خليني نفكر...
المشكل لي فيها هو انها مكتنساش و كتبقى عاقلة على اي واحد اداها او قال ليها حاجة جرحاتها ..ونهار تلقات بجعفر وقع بيناتهم بزاف المشاكل شي لي خلا نفسيتها تزعز ...
توجهات لدارهم جلسات فركنة تحت شجرة كتشوف بعيد ساهية كتفكر و عقلها خدام كتحلل غير مع راسها ..
معندهاش مع زربة وخا كتبان فريفرة بتصرفاتها لكن الحوايج لي عندهم علاقة بحياتها كتبغي تاخد دقة بدقة و تفكر الف مرة وما كتبغي تاخد بشوار تا حد ..
ولي فيها زوين هو انها عارفة راسها مزيان ومكترميش راسها لحاجة لي تقدر تخرج عليها لأن كلمة المنحوسة لي كبرات معاها خلاتها تاخد احتيطاتها الكاملة مع كل ناس و جعفر ماشي استثناء بالاخص انها مولفة جعفر صغير و عقلها بقا مع داك جعفر ودابا من كتشوفو قدامها راجل كامل متكامل كتحس بإستغراب لان عقلها وقف فطفولتها متقبلاتش لحد الان جعفر لي قدامها او ربما هي مبغاتش تقنع راسها...
دخلات مينة كضحك وباين عليها فرحانة غير شافتها وهي تجمع ضحكة ...
مينة: عفراء مالكي ساهية..
عفراء: غير كنفكر ونتي مالكي كضحكي وغير شفتيني جمعتيها...
مينة تزيرات ومتقدرش تخبي عليها حيت عارفة اتسمع من جهة اخرى، نطقات بزز..
-امين ايجي هو والام ديالو غدا بغاو يمشيو معانا لقبر و يحضرو لصدقة لي انديرو...
عفراء : علاش كاينة شي صدقة مفراسي والو...
مينة: نتي لي ما جايبة خبار اما كلشي كيوجد ليها...
كتفات انها تحرك راسها ومينة قربات ليها ...
-سمعت من جدة ان جعفر طلب يديك مالكي معاجبك حال ...
عفراء : معرفتش هاد زربة مدخلاتش ليا لراسي...
مينة: اصاحبتي راه جعفر هذا واش عاد باغية تعرفيه و نتوما تربيتو مع بعض ...
عفراء: راه زواج هدا ماشي لعب وانا اصلا مكنفركش فزواج و مداخلش ليا لراسي .."نطقات بدون ما تحس"...كون كان غير شي واحد لباس عليه نقدر نفكر اما مزلوط ميصلاحش لزواج و .....
سكتات كتشوف مينة لي خرجات عنيها كتنغز فيها بجهد ..دورات راسها لشخص لي واقف حدا شجرة يشوف فيها بنضرات فشكل ..تهز قلبها و نطقات برجفة ...
عفراء: جعفر!!...
بقا صامت كيشوف فيها بتمعن وباين لكلام كامل داز على ودنو ..ضرب دورة عطاها بضهر و نظق كلمة وحدة..
جعفر: الله يسهل عليك...
بخطوات مشى مستاقم معاودش شاف جيهتها...خلاها واقفة مزيرة مكرهاتش الارض تشق و تبلعها فهاد اللحظة ...

#تتبع