တံဆိပ်နှိပ်ထားတဲ့ ရှပ်အင်္ကျီလေး(တံဆိပ္ႏွိပ္ထားတဲ့ ရွပ္အကၤ်ီေလး)MM Translation

Chapter 32 Unicode

ရှောင်ယွီအန်းသည် သူတို့၏အတန်း၏ပန်းကလေးဖြစ်သည့် ထုံးယွီကခေါ်၍ ထွက်လာခဲ့ရခြင်းဖြစ်သည်။ သူမသည်သူတို့နှစ်တွင် အလှဆုံးမိန်းကလေးအဖြစ် အများကအသိအမှတ်ပြုခြင်းကို ခံထားရတာဖြစ်သည်။

သူတို့နှစ်ယောက်သည် အလယ်တန်းတွင် အတူတူတက်ရောက်ခဲ့ကြပြီး အထက်တန်းကျောင်းသို့မရောက်ခင် ဂျူနီယာအထက်တန်းတွင်လည်း အတူတူဆက်လက်တက်ရောက်ခဲ့ကြသည်။ သူတို့၏ဂျူနီယာအထက်တန်း ဒုတိယနှစ်တွင် သူတို့သည်အချိန်ခဏတာ အတူတူထိုင်ဖော်ထိုင်ဖက်သူငယ်ချင်းဖြစ်ခဲ့ကြသည်။ သူတို့အထက်တန်းကျောင်းသို့ရောက်သည်နှင့် အတန်းမတူတော့ချေ။ ရှောင်ယွီအန်းသည်ဂုဏ်ထူးတန်းတစ်တွင် တက်ရောက်ရပြီး ထုံးယွီကတော့ ဂုဏ်ထူးတန်းနှစ်တွင် တက်ရောက်ရသည်။ နှစ်ယောက်လုံးသိပ္ပံဘာသာရပ်အထူးပြုဖြစ်သည်။

ထုံးယွီသည်အလွန်လှပပြီးမာနကြီးကာ သပ်ရပ်ကျော့ရှင်းသည့် မိန်းကလေးဖြစ်သည်။ တတိယနှစ်၏ပန်းကလေးနှင့် ပထမနှစ်၏ပန်းကလေးတို့သည် လူမှုရေးဘာသာအထူးပြုများဖြစ်ကြသည်။ ဒုတိယနှစ်၏ပန်းကလေးထုံးယွီကသာ သိပ္ပံဘာသာရပ်အထူးပြုဖြစ်သည်။

အမှန်ပြောရလျှင် သူတို့အထက်တန်းရောက်သည်နှင့် ရှောင်ယွီအန်းသည် ထုံးယွီ၏သူ့အပေါ်ရည်ရွယ်ချက်များအား ခန့်မှန်းမိနေပြီဖြစ်သည်။

ကျောင်းသားအားလုံးအတွက် အိုလံပစ်အတန်းတွင်တက်ရောက်ရန် ဘာသာရပ်အားမိမိစိတ်ကြိုက် ရွေးချယ်ကာစာရင်းသွင်းခွင့်ရှိသည်။ ထုံးယွီ၏အားအသာဆုံးဘာသာရပ်သည် သင်္ချာဘာသာရပ်ဖြစ်ပြီး သူမသာသင်္ချာဘာသာရပ်အိုလံပစ်အတန်းကို ရွေးချယ်ခဲ့မည်ဆိုလျှင် သဘာဝကျလှသည်။ သို့သော်သူမသည် ရှောင်ယွီအန်းနှင့်တူညီသည့် ရူပဗေဒဘာသာရပ်အားရွေးချယ်ခဲ့သည်။

အိုလံပစ်အတန်းမှထိုင်ခုံများသည် တစ်သမတ်တည်းမရှိပေ။ ကျောင်းသားများသည် အတန်းထဲသို့ရောက်လျှင် သူတို့စိတ်ကြိုက်နေရာများတွင် ထိုင်ခွင့်ရှိသည်။ ထုံးယွီသည်အတန်းထဲသို့အမြဲစောစောလာပြီး ရှောင်ယွီအန်းအတွက်နေရာဦးပေးထားတတ်သည်။ ထို့အပြင်သူမသည် ရှောင်ယွီအန်းအတွက် အအေးတစ်ဘူးအမြဲယူလာပေးလေ့ရှိသည်။